ពិធីប្រគល់សញ្ញាបត្រដល់និស្សិតនៅសាកលវិទ្យាល័យ LIMKOKWING ពីម្សិលមិញ។ ហេង ជីវ័ន
ភ្នំពេញៈ លោក ហង់ ជួនណារ៉ុន រដ្ឋមន្រ្ដីក្រសួងអប់រំ យុវជន និងកីឡា កាលពីម្សិលមិញ បានជំរុញឲ្យនិស្សិតដែលបញ្ចប់ការសិក្សាត្រូវប្រឹងប្រែងរៀនសូត្របន្ថែមទៀត ដើម្បីក្លាយជាបញ្ញវន្ដជំនាញមួយច្បាស់លាស់ ខណៈកម្ពុជាកំពុងត្រូវការធនធានមនុស្សពូកែៗសម្រាប់ជួយអភិវឌ្ឍកម្ពុជាឲ្យរីកចម្រើនថែមទៀត។
ការថ្លែងបែបនេះ បានធ្វើឡើងក្នុងពេលលោករដ្ឋមន្ត្រីចូលរួមក្នុងពិធីចែកសញ្ញាបត្រដល់និស្សិតនៃសាកលវិទ្យាល័យ LIMKOKWING នៅសណ្ឋាគារ Sofitel ក្នុងរាជធានីភ្នំពេញ ដើម្បីចូលរួមអបអរសាទរដល់និស្សិតដែលបានបញ្ចប់ការសិក្សា និងទទួលសញ្ញាបត្រ ដោយលោកក៏បានរំឭកនិស្សិតឲ្យខំរៀនបន្តទៀតផងដែរ។
លោក ហង់ ជួនណារ៉ុន បានបញ្ជាក់ថា៖ «ប្រទេស កម្ពុជា យើងគឺកំពុងត្រូវការធនធានមនុស្សពូកែៗជាច្រើនដើម្បីអភិវឌ្ឍកម្ពុជាឲ្យក្លាយជាប្រទេសមួយមានពន្លឺរឹតតែខ្លាំងទាំងក្នុងតំបន់ និងពិភពលោក។ដូច្នេះខ្ញុំសូមឆ្លៀតឱកាសនេះដើម្បីថ្លែងអំណរគុណដល់មាតាបិតាសិស្សដែលបានគាំទ្រដល់កូនប្រុសស្រីឲ្យបានសិក្សារៀនសូត្រ រហូតបញ្ចប់សញ្ញាបត្រ និងជំនាញរៀងៗខ្លួននាថ្ងៃនេះ។ បើមិនមានការគាំទ្រពីមាតាបិតា អាណាព្យាបាលសិស្ស ក៏មិនមានធនធានមនុស្សបញ្ចប់ការសិក្សានាថ្ងៃនេះដែរ។ ក៏សូមអរគុណលោកសាកលវិទ្យាធិការ និងលោកគ្រូអ្នកគ្រូនៃសាកលវិទ្យាល័យ LIMKOKWING ដែលបានខិតខំប្រឹងប្រែងបណ្ដុះបណ្ដាលនិស្សិតរហូតបញ្ចប់ការសិក្សានាថ្ងៃនេះដែរ»។
លោករដ្ឋមន្រ្ដីបានថ្លែងថា និស្សិតដែលបានបញ្ចប់ការសិក្សាបានក្លាយជាបញ្ញវន្ដសម្រាប់មនុស្សជាតិ សង្គម និងសកលលោក នឹងចូលរួមជួយអភិវឌ្ឍសង្គមជាតិឲ្យរឹតតែប្រសើរឡើង។
លោកថា៖ «បច្ចុប្បន្នគឺជាពេលវេលាមួយនៃការផ្លាស់ប្ដូរទៅកាន់ទំនើបកម្មនៃបច្ចេកវិទ្យាដែលការវិវឌ្ឍនេះនឹងបណ្ដាលឲ្យជំនាញចាស់ៗនឹងលុបបាត់ ហើយមុខជំនាញថ្មីៗនឹងកើតមានឡើង។
ដូច្នេះ យើងត្រូវរស់នៅដោយការឲ្យតម្លៃលើការសិក្សា ព្រោះមានការតែសិក្សាពេញ ១ ជីវិត ទើបធ្វើឲ្យជីវិតមានតម្លៃ។ ទោះបញ្ចប់ការសិក្សាក៏ដោយ តែយើងទាំងអស់គ្នាត្រូវបន្ដការសិក្សាបន្ថែមទៀតដើម្បីក្លាយខ្លួនជាអ្នកជំនាញមួយរូបទៅថ្ងៃអនាគត។
លោក Dato'' Raja Aznil Bin Hisham អនុប្រធានជាន់ខ្ពស់នៃសាកលវិទ្យាល័យ Limkokwing បានថ្លែងថា ការចែកសញ្ញាបត្រពេលនេះមាននិស្សិតជយលាភីទទួលសញ្ញាបត្រសរុបចំនួន ១១១ នាក់ ក្នុងនោះរួមមាននិស្សិតបញ្ចប់បរិញ្ញាបត្រជាន់ខ្ពស់ បរិញ្ញាបត្រ និងបរិញ្ញាបត្ររងផងដែរ។
លោកថា៖ «សូមអបអរសាទរដល់និស្សិតទាំងអស់ដែលទទួលជយលាភីថ្ងៃនេះ។ ខ្ញុំសូមយកឱកាសនេះ ជូនពរជោគជ័យដល់អ្នកទាំងអស់គ្នា ខ្ញុំគិតថាឱកាសនេះអាចឲ្យនិស្សិតទាំងអស់ចាប់យកទៅបង្កើតអនាគតមួយដ៏ប្រសើររៀងៗខ្លួន»។
លោកបន្ថែមថា៖ «ពិភពលោកពោរពេញទៅដោយឱកាសនានា។ ប្រឈមមុខបញ្ហាថ្មីៗដោយសុទិដ្ឋិនិយម និងប្រើទេពកោសល្យរបស់អ្នកដើម្បីស្វែងរកដំណោះស្រាយរាល់ចំណែកនៃសង្គមនិងឧស្សាហកម្ម ស្វះស្វែងធ្វើឲ្យជីវិតរបស់យើងកាន់តែស្រស់បំព្រង»៕
.jpg)
