.jpg)
ក្មេងម្នាក់កំពុងរៀននៅក្នុងផ្ទះខណៈដែលសាលាឈប់សម្រាកវិស្សមកាលមុនពេលកំណត់។ រូបថត ហ្វេសប៊ុក
ភ្នំពេញៈ រដ្ឋមន្ត្រីក្រសួងអប់រំបានអំពាវនាវឱ្យមាតាបិតាសិស្សឱ្យរៀបចំកន្លែងសិក្សាដល់កូនដែលធ្វើស្វ័យសិក្សានៅផ្ទះ ឱ្យមានបរិស្ថានសមរម្យ និងជួយស្វែងរកឯកសាររៀនបន្ថែមដល់ពួកគេ ខណៈដែលក្រសួងបានអនុញ្ញាតឱ្យសិស្សានុសិស្សឈប់សម្រាកវិស្សមកាលតូចមុនពេលកំណត់ បន្ទាប់ពីអ្នកផ្ទុកជំងឺកូវីដ ១៩ ត្រូវបានរកឃើញជាបន្តបន្ទាប់។
តាមរយៈវីដេអូដែលផ្សព្វផ្សាយតាមហ្វេសប៊ុកក្រសួងអប់រំកាលពីថ្ងៃទី ២១ ខែមីនា លោក ហង់ជួន ណារ៉ុន រដ្ឋមន្ត្រីក្រសួងអប់រំថ្លែងថា ដើម្បីធានាបាននូវការបន្តការសិក្សា ក្រសួងស្នើសូមឱ្យមាតាបិតារៀបចំកន្លែងនៅក្នុងផ្ទះឱ្យមានបរិស្ថានសិក្សាសមស្របមានតុ មានកៅអី។ ប្រសិនបើអាចគឺអាចមានកុំព្យូទ័រ និងអ៊ីនធឺណិត។
លោកបន្តថា៖ «ហើយជាពិសេសសូមមាតាបិតាអាណាព្យាបាលជួយកូនក្នុងការស្វែងរកឯកសារសម្រាប់រៀនបន្ថែមដែលប្រើប្រាស់នូវសៀវភៅគោលសិក្សាដែលក្រសួងបានដាក់ចេញក៏ដូចជាស្វែងរកនូវឯកសារបន្ថែមទៀតតាមអ៊ីនធឺណិត តាម Youtube ក៏ដូចជា Facebook និងគេហទំព័ររបស់ក្រសួងដែលក្រសួងបានថតតាមមេរៀន និងតាមថ្នាក់នីមួយៗក្នុងពេលកន្លងមក»។
លោកក៏បានអំពាវនាវឱ្យមាតាបិតាសិស្សពន្យល់ប្រាប់សិស្សឱ្យជ្រាបពីការឆ្លងជំងឺកូវីដ១៩ និងវិធីបង្ការ និងទប់ស្កាត់ជំងឺ និងស្ថានភាពនៃការវិវឌ្ឍនៃជំងឺនេះ ដើម្បីកុំឱ្យមានការភ័យខ្លាច និងមានអារម្មណ៍នឹងនរនៅក្នុងចិត្ត។ លោកបន្តថា នាពេលបច្ចុប្បន្នជំងឺនេះមិនទាន់មានសភាពខ្លាំងនៅឡើយ តែទាមទារឱ្យគ្រួសារទាំងអស់តាមដានពីការវិវឌ្ឍជំងឺនេះពីមួយថ្ងៃទៅមួយថ្ងៃឱ្យបានដិតដល់ ដើម្បីចូលរួមចំណែកជាមួយរដ្ឋាភិបាលក្នុងការបង្ការ និងទប់ស្កាត់ជំងឺនេះ។
លោក ណារ៉ុន បានថ្លែងថា៖ «ខ្ញុំស្នើសូមឱ្យមាតាបិតា អាណាព្យាបាលទាំងអស់សូមមេត្តាណែនាំកុំឱ្យកូនដើរលេងនៅកន្លែងដែលមានហានិភ័យខ្ពស់ចំពោះសុខភាព ហើយជាពិសេសសូមណែនាំឱ្យកូនចៅរក្សានូវអនាម័យ លាងដៃនឹងសាប៊ូឱ្យបានញឹកញាប់ និងឱ្យបានទៀងទាត់ ហើយជាពិសេសអនុវត្តទៅតាមគោលការណ៍ណែនាំដែលក្រសួងបានដាក់ចេញកន្លងមក»។
លោក រស់ សុវាចា អ្នកនាំពាក្យក្រសួងអប់រំមិនបានបញ្ជាក់បន្ថែមនោះទេកាលពីថ្ងៃអាទិត្យដោយលោកស្នើសុំឱ្យយោងខ្លឹមសារទាំងស្រុងនៃសេចក្តីណែនាំផ្សេងៗរបស់ក្រសួងអប់រំ។
ក្រសួងអប់រំបានអនុញ្ញាតឱ្យសិស្សនិស្សិតចាប់ពីថ្នាក់មតេ្តយ្យដល់ថ្នាក់ឧត្តមសិក្សាទាំងរដ្ឋ និងឯកជនឈប់សម្រាកចាប់ពីថ្ងៃទី ១៦ ខែមីនារហូតដល់មានការជូនដំណឹងតាមក្រោយ ដើម្បីបង្ការ និងទប់ស្កាត់ការរីករាលដាលនៃជំងឺកូវីដ១៩។
ក្រសួងក៏បានអំពាវនាវដល់មាតាបិតាសិស្សត្រូវជំរុញឱ្យកូនចៅចៀសវាងកន្លែងមួយចំនួនដែលប្រឈមនឹងការឆ្លងខ្ពស់ ដូចជាកន្លែងហែលទឹកសាធារណៈ កន្លែងហាត់ប្រាណ សួនកុមារ និងកន្លែងផ្សេងទៀតដែលមានហានិភ័យខ្ពស់ក្នុងការឆ្លងវីរុសកូវីដ១៩។
កាលពីថ្ងៃទី ១៣ ខែមីនា ក្រសួងអប់រំបានដាក់ឱ្យដំណើរការកម្មវិធីរៀនតាមប្រព័ន្ធអេឡិចត្រូនិក (E-Learning) ដែលសិស្សអាចរៀនដោយខ្លួនឯងតាមបណ្តាញទំនាក់ទំនងសង្គមដែលមាន Facebook និង Youtube និងគេហទំព័ររបស់ក្រសួងដោយឥតគិតថ្លៃលើមុខវិជ្ជាចំនួន ៦ ដែលមានគណិតវិទ្យា ប្រវត្តិវិទ្យា រូបវិទ្យា គីមីវិទ្យា ជីវវិទ្យា និងភាសាខ្មែរ។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀនកម្ពុជាឯករាជ្យបានប្រាប់ភ្នំពេញប៉ុស្តិ៍កាលពីថ្ងៃអាទិត្យថា មួយរយៈកាលកន្លងមកនេះប្រព័ន្ធទូរស័ព្ទដែលមានផ្តល់សេវាអ៊ីនធឺណិតផងនោះហាក់ដូចជាមានការរអាក់រអួល ហើយពេលខ្លះកាត់ថ្លៃសេវាលឿនពេក។
លោកស្រីថ្លែងថា៖ «បើដូចសព្វថ្ងៃនេះខ្ញុំគិតថា ដូចជាអត់មានអីចំណេញប៉ុន្មានទេ ព្រោះអីយើងឃើញហើយថា ប្រព័ន្ធទូរស័ព្ទហ្នឹងហាក់បីដូចជាស៊ីលុយខ្លាំង។ នេះក៏ធ្វើឱ្យប្រជាពលរដ្ឋហ្នឹងក៏គាត់កាន់តែអស់លុយច្រើនឡើងទៀតក្នុងការប្រើប្រាស់តាមប្រព័ន្ធហ្នឹង។ រដ្ឋាភិបាលក៏ដូចជាក្រសួងប្រៃសណីយ៍ និងទូរគមនាគមន៍ធ្វើម៉េចឱ្យសង់តង់គ្នាដើម្បីឱ្យ (ស្វ័យសិក្សា) ដំណើរការទៅបានល្អ»៕
វីដេអូ៖
