ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានជូនដំណឹងពីការផ្អាកជាបណ្តោះអាសន្នដំណើរការចាក់វ៉ាក់សាំងការពារជំងឺកូវីដ១៩ ជូនបុគ្គលិកអប់រំ មន្ត្រីជាប់កិច្ចសន្យា បុគ្គលិកអង្គការមិនមែនរដ្ឋាភិបាលចាប់ពីថ្ងៃទី ១៧ ខែមេសា នេះរហូតមានការជូនដំណឹងជាថ្មី ខណៈដែលយុទ្ធនាការចាក់វ៉ាក់សាំងការពារវីរុសកូវីដ១៩ក្នុងជំហានទី ១ ដល់បុគ្គលិកអប់រំសរុបបានជាង ១០ ម៉ឺននាក់ហើយ។
លោកបានលើកឡើងតាមរយៈសេចក្តីជូនដំណឹងនៅថ្ងៃនេះថា ក្រសួងអប់រំ យុវជន និងកីឡា សម្រេចផ្អាកជាបណ្តោះអាសន្នការចាក់វ៉ាក់សាំងការពារជំងឺកូវីដ១៩ ជូនបុគ្គលិកអប់រំ មន្ត្រីជាប់កិច្ចសន្យានៃអង្គភាពអប់រំ និងគ្រឹះស្ថានសិក្សាសាធារណៈ និងឯកជន ព្រមទាំងបុគ្គលិកអង្គការមិនមែនរដ្ឋាភិបាលក្នុងវិស័យអប់រំនៅរាជធានីភ្នំពេញ ដោយគិតចាប់ពីថ្ងៃទី ១៧ ខែមេសា ឆ្នាំ ២០២១។ ក្រសួងនឹងជម្រាបជូនអំពីកាលបរិច្ឆេទនៃការបន្តដំណើរការចាក់វ៉ាក់សាំងកូវីដ១៩ នៅពេលក្រោយ។
ជាមួយគ្នានេះដែរ លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ភ្នំពេញប៉ុស្តិ៍នៅថ្ងៃសៅរ៍ ទី ១៧ ខែមេសា នេះថាក្នុងយុទ្ធនាការចាក់វ៉ាក់សាំងការពារវីរុសកូវីដ១៩ក្នុងជំហានទី ១ ដល់បុគ្គលិកអប់រំ បុគ្គលិកកិច្ចសន្យានៃអង្គភាពអប់រំ និងគ្រឹះស្ថានសិក្សាសាធារណៈ និងឯកជន ព្រមទាំងបុគ្គលិកអង្គការមិនមែនរដ្ឋាភិបាលក្នុងវិស័យអប់រំសរុបមានចំនួន ១១៣ ២២៣ នាក់។
លោកបានបន្តថា គិតត្រឹមថ្ងៃទី ១៥ ខែមេសា ឆ្នាំ ២០២១ បុគ្គលិកអប់រំ និងបុគ្គលិកកិច្ចសន្យានៃក្រសួងអប់រំ យុវជន និងកីឡាទូទាំងប្រទេសបានចាក់វ៉ាក់សាំងកូវីដ១៩ ចំនួន ១០២ ៦៥១ នាក់ ត្រូវជា ៧១,៤% នៃចំនួនសរុប ១៤៣ ៨០៦ នាក់។ បុគ្គលិកអប់រំ និងបុគ្គលិកកិច្ចសន្យានៅអង្គភាពថ្នាក់ជាតិ បានចាក់វ៉ាក់សាំងចំនួន ៤៩៦៦ នាក់ ត្រូវជា ៨០,២% នៃចំនួនសរុប ៦១៨៧ នាក់។ បុគ្គលិកអប់រំ និងបុគ្គលិកកិច្ចសន្យានៅតាមរាជធានី ខេត្ត បានចាក់វ៉ាក់សាំង ៩៧៦៨៥ នាក់ ត្រូវជា ៧០,៩% នៃចំនួនសរុប ១៣៧ ៦១៩ នាក់។
លោក រស់ សុវាចា បានបញ្ជាក់ថា ដើម្បីផ្តល់លទ្ធភាពឱ្យបុគ្គលិកអប់រំ បុគ្គលិកកិច្ចសន្យា និងបុគ្គលិកអង្គការដៃគូអភិវឌ្ឍន៍ក្នុងវិស័យអប់រំទទួលបានវ៉ាក់សាំងកូវីដ១៩គ្រប់គ្នា ក្រសួងអប់រំ យុវជន និងកីឡាគ្រោងស្នើសុំវ៉ាក់សាំងបន្ថែមពីគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេស និងក្រសួងសុខាភិបាលសម្រាប់ចាក់វ៉ាក់សាំងកូវីដ១៩នៅជំហានទី ២ ក្នុងបរិមាណ ៥៥ ០០០ នាក់៕