The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋមន្ត្រី​ឱ្យ​គ្រឹះស្ថានសិក្សា​មាន​វិធានការ​ ចំពោះ​ផលប៉ះពាល់​ពី​ទឹកជំនន់




រដ្ឋមន្ត្រី​ឱ្យ​គ្រឹះស្ថានសិក្សា​មាន​វិធានការ​ ចំពោះ​ផលប៉ះពាល់​ពី​ទឹកជំនន់

Content image - Phnom Penh Post
សាលារៀន​នៅ​ខណ្ឌដង្កោ​ដែល​លិច​ទឹក​កាលពី​ម្សិលមិញ​។ ហេង ជីវ័ន

រដ្ឋមន្ត្រី​ឱ្យ​គ្រឹះស្ថានសិក្សា​មាន​វិធានការ​ ចំពោះ​ផលប៉ះពាល់​ពី​ទឹកជំនន់

ភ្នំពេញៈ ក្រសួង​អប់រំ​យុវជន​ និង​កីឡា​បាន​ស្នើឱ្យ​គ្រប់​មន្ទីរអប់រំ​រួមគ្នា​ទប់ស្កាត់ និង​ការពារ​សម្ភារ​តាម​គ្រឹះស្ថានសិក្សា​ទាំង​កំពុង​ប៉ះពាល់​ពី​ទឹកជំនន់​ទាំង​​គ្រឹះស្ថាន​មិនទាន់​រងគ្រោះ និង​ឱ្យ​រៀបចំ​វិធានការ​នៅ​ក្រោយ​គ្រោះមហន្តរាយ​នេះ ខណៈ​តាម​របាយការណ៍​ពី​ម្សិលមិញ​បង្ហាញថា មាន​សាលារៀន​ជាង​ ៤០០ ​កន្លែង ​រង​ផលប៉ះពាល់​ពី​គ្រោះធម្មជាតិ​នេះ​។

លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា​បាន​លើកឡើង​ក្នុង​សេចក្តី​ណែនាំ​ ១ ​កាលពី​យប់​ថ្ងៃ​​ទី​ ១៤ ខែតុលា​ ថា ជំនន់​ទឹកភ្លៀង​​ដែល​កំពុង​កើត​នៅ​កម្ពុជា​ធ្វើឱ្យប៉ះពាល់​ដល់​គ្រឹះស្ថានសិក្សា​​ដូចជា​អគារសិក្សា សម្ភារ​សិក្សា​​ និង​សម្ភារ​បរិក្ខារ​ជាដើម​។

សម្រាប់​គ្រឹះស្ថានសិក្សា​ដែល​កំពុង​ប៉ះពាល់​ពី​ទឹកជំនន់​លោក​រដ្ឋមន្ត្រី​បាន​ឱ្យ​មន្ត្រី​នៃ​មន្ទីរអប់រំ តាមដាន​ព័ត៌មាន​ពី​ស្ថានភាព​អាកាសធាតុ និង​ទឹកជំនន់​ជាប្រចាំ ហាម​សិស្សានុសិស្ស​មិន​ឱ្យ​លេង​ទឹក​ក្នុង​តំបន់​មាន​ទឹកជំនន់​ ឬ​ទឹក​ហូរ​ខ្លាំង​។ ក្នុង​​ករណី​ចាំបាច់​ត្រូវ​ជម្លៀស​សិស្ស​​ទៅ​ទីទួល​សុវត្ថិភាព និង​ចៀសវាង​ធ្វើដំណើរ​តាម​មធ្យោបាយ​ទឹក និង​ក្នុងពេល​ទឹក​កំពុង​ហូរ​ខ្លាំង តែ​បើ​ចាំបាច់ ត្រូវ​ប្រើ​អាវ​ពោង ឬ​ប៊ីដុង​។

លោក​ ហង់ជួន ណារ៉ុន បាន​​បញ្ជាក់ថា​៖ «​គណៈ​គ្រប់គ្រង​សាលារៀន លោកគ្រូ-អ្នកគ្រូ​ត្រូវ​ចូលរួម​សម្របសម្រួល​ដល់​ការធ្វើដំណើរ​របស់​សិស្ស ពេល​ត្រឡប់​ទៅ​ផ្ទះ​វិញ​ប្រកប​ដោយ​សុវត្ថិភាព និង​ការទទួល​ខុសត្រូវ​​ខ្ពស់​ក្នុង​ករណី​ចាំបាច់​។ សូម​អំពាវនាវ​ឱ្យ​មាតាបិតា អាណាព្យាបាល​សិស្ស​ជូន​កូន​ទៅ​សាលារៀន និង​ទទួល​ត្រឡប់​វិញ​ដោយ​ប្រុងប្រយ័ត្ន និង​ណែនាំ​សិស្ស​អំពី​អនាម័យ​ការហូបចុក​ចំណីអាហារ​ស្អាត និង​ទឹកស្អាត​»​។

លោក​បាន​បន្ថែមថា គ្រឹះស្ថាន​សិក្សា​ត្រូវ​សហការ​ជាមួយ​អាជ្ញាធរ​ដែនដី គណៈកម្មការ​ទ្រទ្រង់​សាលារៀន អង្គការ​សង្គម​​ស៊ីវិល សប្បុរសជន និង​អ្នកពាក់ព័ន្ធ​ឱ្យ​ចូលរួម​សហការ​ដើម្បី​កាត់បន្ថយ​ហានិភ័យ​នៃ​​គ្រោះមហន្តរាយ​ទាំង​ផ្នែក​សម្ភារ និង​ថវិកា​។

ជាមួយ​គ្នា​នេះ​លោក​រដ្ឋមន្ត្រី​បាន​លើកឡើង​ថា​៖ «​ត្រូវ​លើក​ទឹកចិត្ត​គ្រូបង្រៀន​ឱ្យ​បន្ត​ការបង្រៀន​តាម​គ្រប់​រូបភាព ដូចជា ការសិក្សា​ពី​ចម្ងាយ​ការសិក្សា​តាម​ប្រព័ន្ធ​អេឡិចត្រូនិក ដើម្បី​ធានា​និរន្តរភាព​នៃ​ការសិក្សា​របស់​សិស្ស​គ្រប់​កម្រិត​ថ្នាក់ ហើយ​គណៈ​គ្រប់គ្រង​សាលារៀន​ត្រូវ​ផ្តល់ព័ត៌មាន និង​រាយការណ៍​ជាប្រចាំ​ពី​ផលប៉ះពាល់​របស់​សាលារៀន​នីមួយៗ​...​ដើម្បី​បូកសរុប​របាយការណ៍​ជូន​ថ្នាក់ដឹកនាំ​ក្រសួង​អប់រំ​យុវជន និង​កីឡា​»​។

លោក ហង់ជួន ណារ៉ុន បាន​បន្តថា ចំពោះ​គ្រឹះស្ថានសិក្សា​ដែល​មិនទាន់​រង​ផលប៉ះពាល់​ពី​ទឹកជំនន់​គឺ​ត្រូវ​បន្ត​តាមដាន​ព័ត៌មាន​ពី​ស្ថានភាព​អាកាសធាតុ និង​ទឹកជំនន់​ជាប្រចាំ​។ គ្រឹះស្ថានសិក្សា​ដែល​ស្ថិត​ក្នុង​តំបន់​ងាយ​រងគ្រោះ​ត្រូវ​ត្រៀម​​ជាមុន​ដូចជា​ការ​ទុកដាក់​សម្ភារ​​ឯកសារ​ (​ជាពិសេស​សៀវភៅ​ក្នុង​​បណ្ណាល័យ​) ​គ្រឿង​បរិក្ខារ​អេឡិចត្រូនិក គ្រឿងអគ្គិសនី​។​ល​។

ចំពោះ​បញ្ហា​ក្រោយពេល​ទឹកជំនន់​លោក ហង់ជួន ណារ៉ុន បាន​ណែនាំ​ឱ្យ​គ្រឹះស្ថានសិក្សា​​ទាំងអស់​រួមគ្នា​សម្អាត​បរិស្ថាន​សាលារៀន អគារសិក្សា បន្ទប់​រៀន ដើម្បី​ធានាបាន​នូវ​អនាម័យ និង​ផាសុកភាព​។ ត្រូវ​រៀបចំ​ជួសជុល​ឡើងវិញ​នូវ តុ កៅអី ក្តារខៀន ទូ សម្ភារ​បរិក្ខារ​ប្រើប្រាស់​ក្នុង​សាលា ហើយ​គណៈគ្រប់គ្រង​សាលារៀន​ត្រូវ​រៀបចំ​របាយការណ៍​ជូន​ដល់​ថ្នាក់ដឹកនាំ​គ្រប់​លំដាប់ថ្នាក់​។

អ្នកនាំពាក្យ​នៃ​ក្រសួង​អប់រំ យុវជន និង​កីឡា លោក រស់ សុវាចា បាន​ប្រាប់​ភ្នំពេញ​ប៉ុស្តិ៍​ម្សិលមិញ​ថា គិត​មកដល់​ពេល​នេះ​មាន​សាលារៀន​មួយចំនួន​តូច​នៅ​តំបន់​ទំនាប​បាន​ផ្អាក​ដំណើរការ​ជា​បណ្តោះអាសន្ន​​ដោយសារ​ករណី​ទឹកជំនន់​នេះ​។

លោក​ថា​៖ «​ក្រសួង​បន្ត​យកចិត្ត​ទុកដាក់​កម្រិត​ខ្ពស់​តាមដាន​​នូវ​ស្ថានភាព​ធម្មជាតិ ដោយយោង​លើ​ការព្យាករ​ឧតុនិយម​​ផ្លូវការ និង​ទិដ្ឋភាព​ជាក់ស្តែង​។ ​ក្រសួង​មាន​ក្រុមការងារ​គ្រប់គ្រង​គ្រោះមហន្តរាយ​វិស័យ​អប់រំ ដែល​បាន​បន្ត​កិច្ចសហការ​ដូច​ ៧ ​ឆ្នាំ​កន្លង​មក​ដែរ​ដើម្បី​ត្រៀម​​អន្តរាគមន៍​លើ​កត្តាចាំបាច់​»​។

យ៉ាងណាក្ដី​លោក រស់ សុវាចា បាន​បញ្ជាក់ថា ក្រសួង​អប់រំ​​នៅតែ​បន្ត​ស្វាគមន៍​កិច្ចសហការ​វិជ្ជមាន​ពី​គ្រប់ភាគី​ពាក់ព័ន្ធ​​ដើម្បី​ឆ្លើយតប​នឹង​ផលប៉ះពាល់​​លើ​គ្រឹះស្ថានសិក្សា​សាធារណៈ​​ដោយសារ​ទឹកជំនន់​នេះ​។

តាម​របាយការណ៍​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ គិត​ត្រឹម​ព្រឹក​ថ្ងៃទី​ ១៥ ខែតុលា ឆ្នាំនេះ​បង្ហាញ​​ថា មាន​សាលា​ ៤២៥ ​កន្លែង​ បាន​​រង​ការប៉ះពាល់​ពី​ទឹកជំនន់​ក្នុង​​នោះ​ខេត្តពោធិ៍សាត់​ ២៦ ​កន្លែង​,​ ខេត្តបាត់ដំបង​ ៣១៦ ​កន្លែង, បន្ទាយមានជ័យ​ ៣៩ ​កន្លែង​,​ ប៉ៃលិន​ ២ ​កន្លែង​,​ កណ្តាល​ ២៣ ​កន្លែង​,​ ព្រះសីហនុ​ ១ ​កន្លែង​,​ កំពង់ធំ​ ១ ​កន្លែង​,​ ស្ទឹងត្រែង​ ២ ​កន្លែង​,​ កំពង់ស្ពឺ​ ១ ​កន្លែង​,​ តាកែវ​ ៣ ​កន្លែង, កំពង់ចាម​ ១ ​កន្លែង និង​ខេត្ត​សៀមរាប​ ១០ ​កន្លែង​៕

អត្ថបទគួរចាប់អារម្មណ៍

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។

  • ភ្នំពេញៈ ក្រសួង​អប់រំ យុវជន​ និង​កីឡា​កំពុង​សហការ​ជាមួយ​ក្រសួង​ប្រៃសណីយ៍ និង​ទូរគមនាគមន៍ ព្រមទាំង​ដៃគូ​អភិវឌ្ឍន៍ និង​វិស័យ​ឯកជន ដើម្បី​រៀបចំ​តភ្ជាប់​ប្រព័ន្ធ​អ៊ីនធឺណិត​ដល់​គ្រឹះស្ថានសិក្សា​សាធារណៈ​​ក្នុង​រយៈពេល​ ៤ ​ឆ្នាំ​ (​ឆ្នាំ​ ២០២០-២០២៣) ​ដើម្បី​ផ្ដល់​ការរៀន​ និង​ការបង្រៀន​តាមបែប​ឌីជីថល​​ដែល​ការអនុវត្ត​ត្រូវធ្វើ​ឡើងជា​ជំហានៗ​ចាប់ពី​ចុងឆ្នាំ​នេះ​ទៅ​។