ភ្នំពេញ: រដ្ឋមន្ដ្រីក្រសួងព័ត៌មានលោក ខៀវ កាញារីទ្ធ បានថ្លែងថា អ្នកសារព័ត៌មានឯករាជ្យមិនមែនសំដៅលើការជេររដ្ឋាភិបាលទើបហៅសារព័ត៌មានឯករាជ្យទេ ដោយពាក្យឯករាជ្យគឺសំដៅលើឯករាជ្យនៃការគិតដោយផ្នត់គំនិត និងការសរសេរដោយគ្មានសម្ពាធ ខណៈលោកអំពាវនាវដល់មន្ត្រីមួយចំនួនកុំឲ្យចាត់ទុកអ្នកកាសែតជាសត្រូវ។
លោក ខៀវ កាញារីទ្ធ បានថ្លែងក្នុងសន្និសីទសារព័ត៌មានស្ដីពីវឌ្ឍនភាពការងារឆ្នាំ ២០១៩ និងទិសដៅការងារបន្ដឆ្នាំ ២០២០ របស់ក្រសួង ស្ថាប័ន និងរដ្ឋបាលរាជធានី-ខេត្តកាលពីម្សិលមិញថា លោកបានកត់សម្គាល់ឃើញមានគ្រូបង្រៀនកាសែតជនជាតិបរទេសមួយចំនួនលើកពីទ្រឹស្ដីមកបង្រៀនសិស្សនិស្សិតកម្ពុជាថា អ្នកកាសែតដែលហ៊ានសរសេររិះគន់ និងជេររដ្ឋាភិបាលទើបជាកាសែតឯករាជ្យ។
លោកថា៖ «ចំពោះខ្ញុំយល់ថា ជាក់ស្ដែង មិនមែនអ៊ីចឹងទេ អ្នកកាសែតណាក៏ដោយនៅលើពិភពលោក កុំតាំងខ្លួនជាកាសែតឯករាជ្យ គឺគ្មានទេ គឺអ្នកកាសែតមិនដែលដើរហួសគន្លងរបស់និពន្ធនាយកទេ បើនិពន្ធនាយកស្ថាប័នហ្នឹងឈរលើជំហរត្រឹមណាគឺកាសែតហ្នឹង បានត្រឹមតែជំហរត្រឹមហ្នឹងទេ»។
លោកបានបញ្ជាក់ថា៖ «ពាក្យថា កាសែតឯករាជ្យគឺមកពីការគិតរបស់យើង គេថា ឯករាជ្យ មិនទៅពឹងលើនរណាទាំងអស់អាចសរសេរវាយប្រហារ ឬរិះគន់អ្នកនេះ អ្នកនោះ ឬរដ្ឋាភិបាលតាមចិត្ត ហៅថា ឯករាជ្យទេ។ គឺមិនមែនអ៊ីចឹងទេ ពាក្យថា ឯករាជ្យ គឺមកពីការគិតរបស់យើង ដែលគ្មានសម្ពាធពីអ្នកផ្សេង ហើយសរសេរតាមគំនិតខ្លួនឯង ទស្សនៈខ្លួនឯង និងតាមស្ថានភាពជាក់ស្ដែង»។
លោក កាញារីទ្ធ ថា មន្ត្រីទាំងអស់មិនគួរគិតលើអ្នកដែលសរសេរអត្ថបទអវិជ្ជមាន ហើយមានគំនិតគិតថា គេសុទ្ធតែអ្នកប្រឆាំងទាំងអស់ទេ។ មន្ត្រីគួរតែយកគំនិតនៃការសរសេរបែបអវិជ្ជមានរបស់ពួកគេមកគិតពិចារណាថា តើគេសរសេរបែបនេះត្រូវឬខុស? ហើយមានមូលដ្ឋានច្បាស់លាស់ដែរទេ? ប្រសិនវាជារឿងមិនពិតគួរតែចេញមុខមកច្រានចោលព័ត៌មានទាំងនេះ តែបើរឿងពិតត្រូវតែធ្វើការកែតម្រូវជាបន្ទាន់។
លោក ហ៊ុយ វណ្ណៈ ប្រធានសហភាពសហព័ន្ធអ្នកសារព័ត៌មានកម្ពុជា (ស.ស.ស.ក) ថ្លែងថា លោកមិនមានមតិយោបល់ជុំវិញសារព័ត៌មានឯករាជ្យទេ ប៉ុន្ដែលោកជំរុញឲ្យអ្នកសារព័ត៌មានទាំងអស់ត្រូវតែខិតខំប្រឹងប្រែងសិក្សារៀនសូត្របន្ថែមទៀតទាក់ទងការសរសេរអត្ថបទ ការសម្ភាស ការអត្ថាធិប្បាយព័ត៌មាន និងចំណេះដឹងទូទៅ។ ជាពិសេសបច្ចេកវិទ្យាថ្មីៗដែលកំពុងមានការវិវត្តថ្មីជាច្រើន ដើម្បីជាមូលដ្ឋានគ្រឹះសម្រាប់ការសួរដេញដោលជាមួយប្រភពព័ត៌មានរបស់ខ្លួន។
លោកបន្តថា ប្រសិនអ្នកសារព័ត៌មានបានសិក្សាស្រាវជ្រាវដឹងពីសាច់រឿងច្រើននឹងធ្វើឲ្យអ្នកសារព័ត៌មានមានមូលដ្ឋានគ្រឹះសម្រាប់យកទៅសម្ភាសប្រភព ហើយអ្នកសារព័ត៌មានត្រូវតែហ៊ានសួរសំណួរស៊ីជម្រៅទៅមន្ត្រីដើម្បីឲ្យគាត់មានឱកាសបញ្ចេញមតិយោបល់ ហើយគាត់អាចស្រាវជ្រាវរកចម្លើយល្អៗសម្រាប់អ្នកសារព័ត៌មានក៏ដូចជាសាធារណជនចង់ដឹងដែរ។ «អ្នកកាសែតយើងគឺត្រូវចូលរួមផ្សព្វផ្សាយអ្វីដែលជាសមិទ្ធផលជាតិការអភិវឌ្ឍប្រទេសជាតិ ហើយចូលរួមស្ថាបនា និងការបំពេញបន្ថែមរាល់ចំណុចខ្វះចន្លោះ»៕