.jpg)
ពិធីជួបសំណេះសំណាលរវាងលោក សាយ សំអាល់ និងនិស្សិតកាលពីថ្ងៃ ១០ មីនា។ រូបថត ក្រសួងបរិស្ថាន
ភ្នំពេញៈ រដ្ឋមន្ដ្រីក្រសួងបរិស្ថានលោក សាយ សំអាល់ បានជំរុញឱ្យដៃគូសហការតាមបណ្ដាសាកលវិទ្យាល័យនានារៀបចំវេទិកាជជែកពិភាក្សា (debate) លើប្រធានបទបរិស្ថានដើម្បីឲ្យមានការស្វែងយល់ពីបរិស្ថានឱ្យទូលំទូលាយ ក្នុងនោះមានការកាត់បន្ថយការប្រើប្រាស់ប្លាស្ទិកផងដែរ ដោយក្រសួងបរិស្ថាននឹងគាំទ្រគំនិតផ្ដួចផ្ដើមលើកិច្ចពិភាក្សានេះ។
ការលើកឡើងរបស់លោករដ្ឋមន្ដ្រីបែបនេះ ខណៈពេលលោកដឹកនាំកិច្ចពិភាក្សាសំណេះសំណាលជាមួយនិស្សិតនៃសាកលវិទ្យាល័យបញ្ញាសាស្ត្រកម្ពុជា និងដៃគូសហការរបស់ក្រសួងបរិស្ថាននៅទីស្តីការក្រសួងបរិស្ថានកាលពីថ្ងៃទី ១០ ខែមីនា ថ្មីៗនេះ។
លោក សាយ សំអាល់ បានបញ្ជាក់ថា៖ «ដៃគូសហការសូមរួមគ្នាផ្សព្វផ្សាយការពារបរិស្ថាន និងអភិរក្សធនធានធម្មជាតិនៅតាមសហគមន៍តំបន់ការពារធម្មជាតិក៏ដូចជាតាមរយៈការរៀបចំវេទិកាពិភាក្សានៅតាមសាលារៀនស្តីពីប្រធានបទបរិស្ថានដើម្បីជំរុញការសិក្សាស្វែងយល់ពីបរិស្ថានឱ្យទូលំទូលាយផងដែរ»។
ជាមួយគ្នានេះលោករដ្ឋមន្ដ្រីបានលើកទឹកចិត្តឱ្យនិស្សិត និងដៃគូសហការចែករំលែកអំពីការងារ និងចូលរួមផ្សព្វផ្សាយបរិស្ថាន ហើយក៏បានលើកទឹកចិត្តឱ្យមានការចែករំលែកអំពីការងារបរិស្ថានទាក់ទងនឹងការកាត់បន្ថយការប្រើប្រាស់ប្លាស្ទិកតាមរយៈការដាក់ធុងចម្រោះបរិស្ថាននៅតាមសាលារៀននិងការប្រើប្រាស់ឡដុតសំរាមនៅតាមមូលដ្ឋានផងដែរ។
ទាក់ទងនឹងបញ្ហានេះដែរ លោក នេត្រភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងកាលពីម្សិលមិញថា ការជំរុញដល់ដៃគូសហការធ្វើកិច្ចពិភាក្សាសម្រាប់សិស្ស-និស្សិតនេះ គឺផ្ដោតការយកចិត្តទុកដាក់លើការសិក្សាស្រាវជ្រាវផ្សេងៗមានដូចជា តើការដាំដើមឈើនៅក្នុងទីក្រុងបានផ្ដល់ផលប្រយោជន៍អ្វីខ្លះ?
សត្វជន្លេននៅក្នុងដីមានតួនាទីអ្វីខ្លះ? តួនាទីរបស់សត្វឃ្មុំ ឬតួនាទីពាក់ព័ន្ធនឹងប្រព័ន្ធអេកូឡូហ្ស៊ីផ្សេងៗមានសារៈសំខាន់អ្វីខ្លះជាដើម?
លោកបានបន្ដថា៖ «ទាំងនេះយើងជំរុញឱ្យមានការជជែកនៅតាមកម្មវិធីនៅក្នុងកញ្ចក់ទូរទស្សន៍ជាដើម។ ឯកឧត្ដមរដ្ឋមន្ដ្រីគាត់គាំទ្រទៅលើគំនិតផ្ដួចផ្ដើមផ្សេងៗរបស់អ្នកសិក្សាស្រាវជ្រាវរបស់អ្នកប្រតិបត្ដិការទៅលើការស្រឡាញ់បរិស្ថាន ប្រសិនបើពួកគាត់មានគំនិតផ្ដួចផ្ដើមអ្វីល្អៗគឺសូមឱ្យបង្ហាញមកក្រសួងបរិស្ថានដើម្បីគាំទ្រហើយផ្ដល់ថវិកាគាំទ្រទៅលើគម្រោងផ្សេងៗដែលមានមេត្រីភាពបរិស្ថាន ការជួយឱ្យបរិស្ថានបានល្អនេះ»។
លោក ស្រី ស៊ុនលាង សមាជិកក្រុមប្រឹក្សាភិបាល Youth Action for Green Environment នៃសាកលវិទ្យាល័យបញ្ញាសាស្ដ្រដែលបានដឹកនាំនិស្សិតក្នុងជំនួបសំណេះសំណាលជាមួយរដ្ឋមន្ដ្រីក្រសួងបរិស្ថាននោះបានប្រាប់ភ្នំពេញប៉ុស្ដិ៍ពីម្សិលមិញថា ក្រុមនិស្សិតកំពុងសិក្សាពីលទ្ធភាពលើគម្រោងមួយចំនួន។ ក្នុងនោះមានការកាត់បន្ថយការប្រើប្រាស់ប្លាស្ទិកនៅតាមសាកលវិទ្យាល័យដូចជា ការដាក់ធុងទឹកស្អាតដែលអាចឱ្យនិស្សិតយកដបទឹកបរិស្ថានមកដាក់ទឹកបានជាដើម។
លោកបានបន្តថា៖ «គម្រោងនេះ យើងអាចបង្កើតជាធុងទឹកចម្រោះមួយដែលអាចឱ្យនិស្សិតគាត់យកដបទឹកបរិស្ថានមកប្រើប្រាស់ច្រកទឹកបាន។ ខាងសាលារៀនយើងក៏នឹងរៀបចំឱ្យមានកិច្ចពិភាក្សាដែរ ប៉ុន្ដែក្រោយរៀបចំរួចរាល់យើងនឹងស្នើទៅក្រសួងបរិស្ថានជាអ្នកសម្រេចលើការងារនេះព្រោះការរៀបចំវេទិកានេះគឺជាការរៀបចំរបស់ក្រសួង។ ប៉ុន្ដែយើងនឹងលើកឡើងជាគំនិតផ្សេងៗផងដែរ ដើម្បីដាក់ស្នើទៅក្រសួងបរិស្ថាន»៕
