កិច្ចប្រជុំគណៈកម្មាធិការអចិន្ត្រៃយ៍រដ្ឋសភា នារសៀលថ្ងៃទី៥ ខែកុម្ភៈនេះ។ រូប រដ្ឋសភា
ភ្នំពេញៈ រដ្ឋសភា បានសម្រេច ប្រគល់គណៈកម្មាធិការនីតិកម្ម និងយុត្តិធម៌រដ្ឋសភា ធ្វើការពិនិត្យ និងសិក្សាពីវិសោធនកម្មច្បាប់ក្រមព្រហ្មទណ្ឌ ដែលត្រូវបានគណៈរដ្ឋមន្ត្រីអនុម័តកាលពីចុងសប្តាហ៍មុន ចែងថា ការប្រមាថ អង្គព្រះមហាក្សត្រ អាចប្រឈមទោសដល់៥ឆ្នាំ ក្នុងពន្ធនាគារ។
តាមសេចក្តីប្រកាសព័ត៌មានពីរដ្ឋសភា ទទួលបាននាពេលនេះ គណៈកម្មាធិការអចិន្ត្រៃយ៍នៃរដ្ឋសភា បានបើកកិច្ចប្រជុំ នៅថ្ងៃចន្ទ ទី៥ ខែកុម្ភៈ ឆ្នាំ២០១៨នេះ ក្រោមអធិបតីភាព លោក ហេង សំរិន ដើម្បីធ្វើការពិភាក្សា និងអនុម័តនូវសេចក្តីព្រាងច្បាប់ស្តីពី វិសោធនកម្មក្រមព្រហ្មទណ្ឌ និងសេចក្តីព្រាងច្បាប់ស្តីពីវិសោធនកម្មមាត្រា ២៦ មាត្រា ២៧ ថ្មី មាត្រា ២៨ មាត្រា ៣១ និងមាត្រា៣២ នៃច្បាប់ស្តីពីការរៀបចំ និងការប្រព្រឹត្តទៅ នៃក្រុមប្រឹក្សាធម្មនុញ្ញ។
លោក ហេង សំរិន បានសម្រេចប្រគល់វិសោធនកម្មនៃច្បាប់ខាងលើនេះ ជូន «ដល់គណៈកម្មការនីតិកម្មនិងយុត្តិធម៌ នៃរដ្ឋសភា ពិនិត្យនិងសិក្សា ហើយធ្វើរបាយការណ៍ ជូនគណៈ-កម្មាធិការអចិន្រ្តៃយ៍រដ្ឋសភា វិញ»។
យោងតាមប្រកាសព័ត៌មានរបស់គណៈរដ្ឋមន្ត្រី ចុះកាលពីថ្ងៃទី ២ ខែកុម្ភៈ ឲ្យដឹងថា ៖ «មាត្រា ៤៣៧ ស្ទួន បញ្ចូលទៅក្នុងជំពូកទី១ នៃមាតិកាទី១ នៃគន្ថីទី៤ នៃក្រមព្រហ្មទណ្ឌ ដែលមានខ្លឹមសារជារួមថា ការប្រមាថចំពោះអង្គព្រះមហាក្សត្រ ត្រូវផ្តន្ទាទោសដាក់ពន្ធនាគារ ពី ១ ឆ្នាំទៅ ៥ ឆ្នាំនិងពិន័យជាប្រាក់ពី ២ លានរៀល ទៅ ១០ លានរៀល»។
«ចំពោះនីតិបុគ្គល ក៏អាចត្រូវបានផ្តន្ទាទោសពិន័យជាប្រាក់ពី ១០ លានរៀលទៅ ៥០ លានរៀល ព្រមទាំងទោសបន្ថែមមួយ ឬច្រើនក្នុងករណីដែលតុលាការរកឃើញថា មានពិរុទ្ធភាពពាក់ព័ន្ធនឹងការប្រមាថចំពោះអង្គព្រះមហាក្សត្រ»៕
.jpg)
