ភ្នំពេញៈ រដ្ឋសភានឹងបើកសម័យប្រជុំពេញអង្គនៅសប្ដាហ៍ក្រោយដើម្បីអនុម័តជ្រើសរើសបេក្ខជនចេញពីសមាជិករដ្ឋសភា ២ រូបមកពីគណបក្សហ៊្វុនស៊ិនប៉ិចដើម្បីតែងតាំងជាសមាជិកព្រឹទ្ធសភាក្រោយពីការបោះឆ្នោតកាលពីដើមខែកុម្ភៈ។
យោងតាមសេចក្ដីប្រកាសព័ត៌មានស្ដីពីលទ្ធផលកិច្ចប្រជុំគណៈកម្មាធិការអចិន្រៃ្តយ៍នៃរដ្ឋសភានៅថ្ងៃអង្គារនេះបានឲ្យដឹងថា៖ «អង្គប្រជុំបានអនុម័តទទួលយកបេក្ខជនចំនួន ២ រូបដែលមានលក្ខណសម្បត្តិគ្រប់លក្ខខណ្ឌក្នុងចំណោមបេក្ខជន ១២ រូបដែលបានដាក់ពាក្យឈរឈ្មោះជាសមាជិកព្រឹទ្ធសភានីតិកាលទី ៤ ដើម្បីដាក់ជូនសម័យប្រជុំរដ្ឋសភានាពេលខាងមុខ បោះឆ្នោតជ្រើសតាំង»។
លទ្ធផលនៃការបោះឆ្នោតព្រឹទ្ធសភាកាលពីខែកុម្ភៈគណបក្សប្រជាជនកម្ពុជាឈ្នះបានអាសនៈទាំងអស់ចំនួន ៥៨ នៃកៅអីសរុបចំនួន ៦២ កើតចេញបានការបោះឆ្នោតក្នុងនោះ ២ រូបតែងតាំងដោយព្រះមហាក្សត្រ និង ២ រូបតែងតាំងដោយរដ្ឋសភា។ ព្រះមហាក្សត្របានតែងតាំងសមាជិក ២ រូបរួចហើយមានឈ្មោះ សម្តេចរាជបុត្រីព្រះអនុជ នរោត្តម អរុណរស្មី និងលោកស្រី អ៊ុំ សូម៉ានីន។
លោក ញ៉េប ប៊ុនជិន អ្នកនាំពាក្យគណបក្សហ៊្វុនស៊ិនប៉ិចបានថ្លែងដោយក្ដីសង្ឃឹមថាបេក្ខជន ២ នាក់របស់គណបក្សហ៊្វុនស៊ិនប៉ិចដែលមានគ្រប់លក្ខណៈ និងអាចជាប់ដោយមិនអាចប្រកែកបាន។
លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភាជាតិបានឲ្យដឹងថា បេក្ខជន ២ នាក់នោះមិនទាន់អាចបង្ហាញអត្តសញ្ញាណបានទេរង់ចាំប្រជុំសម្រេចនៅថ្ងៃទី ៩ ខែមេសា ខាងមុខនេះ»៕