The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋសភា​ស្នើ​ឲ្យ​លោក​ កឹម សុខា ​​បំភ្លឺ​ពី​រឿង​អាស្រូវ​ស្នេហា​ផ្ទាល់​ខ្លួន

រដ្ឋសភា​ស្នើ​ឲ្យ​លោក​ កឹម សុខា ​​បំភ្លឺ​ពី​រឿង​អាស្រូវ​ស្នេហា​ផ្ទាល់​ខ្លួន

លោក កឹម សុខា នៅ​គេហដ្ឋាន​របស់​លោក​កាលពី​ពេល​កន្លង​មក​។
លោក កឹម សុខា នៅ​គេហដ្ឋាន​របស់​លោក​កាលពី​ពេល​កន្លង​មក​។ រូបថត VICTORIA

រដ្ឋសភា​ស្នើ​ឲ្យ​លោក​ កឹម សុខា ​​បំភ្លឺ​ពី​រឿង​អាស្រូវ​ស្នេហា​ផ្ទាល់​ខ្លួន

ភ្នំពេញៈ រដ្ឋសភា​កាលពី​ម្សិលមិញ​បាន​​ចេញ​លិខិត​មួយ​ដោយ​ស្នើ​ឱ្យ​លោក កឹម សុខា បំភ្លឺ​ពាក់ព័ន្ធ​នឹង​​​​ខ្សែ​អាត់​សំឡេង​​ពី​​រឿង​អាស្រូវ​ស្នេហា​ដ៏​ចម្រូង​ចម្រាស​ជា​រឿង​ដែល​​ត្រូវ​បាន​អង្គការ​សង្គម​ស៊ីវិល​​ និង​មជ្ឈដ្ឋាន​ជាច្រើន​ចាត់​ទុក​ថា​ជា​ការ​បង្វែរ​ទិស​មិន​ឲ្យ​​មាន​ការ​​ជជែក​ពី​បញ្ហា​ជាតិ​ដែល​ជា​យុទ្ធសាស្ត្រ​ដដែលៗ​ដើម្បី​ដាក់​សម្ពាធ​​ទៅ​លើ​​បក្ស​ប្រឆាំង​។

លោក ឡេង ប៉េងឡុង អគ្គលេខាធិការ​រដ្ឋសភា​កាលពី​ម្សិលមិញ​បាន​ចេញ​លិខិត​មួយ​​ដោយ​​ស្នើ​ឱ្យ​លោក កឹម សុខា តំណាងរាស្ត្រ​មណ្ឌល​កំពង់ចាម​បំភ្លឺ​រឿង​សំឡេង​ខ្សែអាត់​តាម​បណ្តឹង​របស់​យុវជន​​មួយ​ក្រុម​ដែល​អះអាង​ថា​ជា​និស្សិត​។

ក្នុង​លិខិត​បញ្ជាក់​ថា៖ «រដ្ឋសភា​បាន​ទទួល​ញត្តិ​ស្នើ​សុំ​ដោយ​លោក ស្រី ចំរើន តំណាង​យុវជន និង​និស្សិត​ចុះ​ថ្ងៃ​ទី ១៤ មីនា​ដែល​មាន​ខ្លឹមសារ​ស្នើសុំ​ឯកឧត្តម​ឆ្លើយ​បំភ្លឺ​ចំពោះ​ខ្សែអាត់​សំឡេង​ស្នេហា​អសីលធម៌​ដែល​សង្ស័យ​ជា​សំឡេង​របស់​ឯកឧត្តម (កឹម សុខា)»។ «អាស្រ័យ​ហេតុ​នេះ​សូម​ឯកឧត្តម​មេត្តា​ពិនិត្យ​ពិចារណា​ និង​ផ្តល់​នូវ​ការ​បំភ្លឺ​តាម​សំណើ​ឱ្យ​បាន​ឆាប់​តាម​ការ​គួរ»។

លោក ឡេង ប៉េងឡុង បាន​បញ្ជាក់​បន្ថែម​ថា៖ «សូម​ឱ្យ​លោក​ធ្វើការ​បំភ្លឺ​មួយ​មក​លោក​ចង់​បំភ្លឺ​ម៉េច​ក៏​បាន​ដែរ​បាទ​ តែ​កាន់​តែ​ឆាប់​កាន់​តែ​ល្អ»។ តែ​លោក​ថា​ប្រសិន​បើ​លោក កឹម សុខា មិន​​បំភ្លឺ​ករណី​នេះ​ទេ​រដ្ឋសភា​ក៏​នឹង​មិន​មាន​វិធានការ​អ្វី​ដែរ​គ្រាន់​តែ​ជូន​ដំណឹង​ទៅ​ក្រុម​និស្សិត​វិញ​ថា​លោក កឹម សុខា បដិសេធ​ធ្វើការ​បំភ្លឺ​តាម​ការ​ស្នើ។ កាលពី​ថ្ងៃ​ទី ១៤ មីនា យុវជន​មួយ​ក្រុម​នេះ​បាន​ដាក់​ញត្តិ​ទៅ​រដ្ឋសភា​ដើម្បី​ឲ្យ​ស្ថាប័ន​ជាតិ​កំពូល​​មួយ​នេះ​កោះ​ហៅ​លោក កឹម សុខា ចេញ​មុខ​បកស្រាយ​រឿង​ខ្សែ​អាត់​សំឡេង​ពី​រឿង​​អាស្រូវ​ស្នេហា​។

ជាមួយ​គ្នា​នេះ​កាលពី​ល្ងាច​ថ្ងៃ​ទី ១៨ ខែ មីនា លោក ចំរើន បាន​ដឹកនាំ​និស្សិត​ប្រមាណ ៣០ នាក់​ដាក់​​ពាក្យ​ប្តឹង​លោក កឹម សុខា ទៅ​អង្គភាព​ប្រឆាំង​អំពើ​ពុករលួយ​ដើម្បី​ស៊ើប​លើ​ករណី​នេះ​ផង​ដែរ​។

ទាក់ទង​នឹង​បណ្តឹង​នេះ​ប្រធាន​អង្គភាព​ប្រឆាំង​អំពើ​ពុករលួយ​លោក ឱម យ៉ិនទៀង បាន​ប្រាប់​​ភ្នំពេញ​ប៉ុស្តិ៍​កាលពី​ម្សិលមិញ​ថា​លោក​បាន​ទទួល​ពាក្យ​បណ្តឹង​របស់​យុវជន​កាលពី​ថ្ងៃ​សុក្រ​សប្តាហ៍​មុន​។

លោក​បន្ត​ថា​៖ «​ជាធម្មតា​ពាក្យ​ប្តឹង​យើង​ទទួល​ថ្ងៃ​នេះ​ហើយ​ថ្ងៃ​ស្អែក​យើង​នឹង​ដោះស្រាយ​ប៉ុន្តែ​យើង​មាន​ការ​យឺតយ៉ាវ​មួយ​ថ្ងៃ​ដោយសារ​ខ្ញុំ​ទើប​ត្រឡប់​ពី​ក្រៅ​ប្រទេស​វិញ​តែ​យើង​បាន​ជូន​ដំណឹង​ម្ចាស់​ប្តឹង​សូម​ឱ្យ​មក​ការពារ​ពាក្យ​ប្តឹង​របស់​ខ្លួន»។

យ៉ាង​ណា​ក្តី​​លោក​ថា​នឹង​រង់ចាំ​ការ​បកស្រាយ​របស់​​យុវជន​នោះ​ថា​ពិតជា​ត្រឹម​ត្រូវ​ឬ​អត់​ទើប​អាច​មាន​វិធានការ​តាម​ក្រោយ។

លោក ស្រី ចំរើន បាន​​ថ្លែង​​កាលពី​ម្សិលមិញ​ថា​លោក​នឹង​​ដឹកនាំ​ក្រុម​និស្សិត​ប្រមាណ ១០០ នាក់​ចូលរួម​កិច្ចប្រជុំ​តាម​ការ​អញ្ជើញ​ពី​ប្រធាន​អង្គភាព​ប្រឆាំង​អំពើ​ពុករលួយ​នៅ​វេលា​ម៉ោង ៩ ព្រឹក​ថ្ងៃ​នេះ​ដើម្បី​បំភ្លឺ និង​ការពារ​ពាក្យ​បណ្តឹង​ដែល​ប្តឹង​លោក កឹម សុខា ពី​បទ​ពុករលួយ​ដោយ​លោក​ចោទ​ថា​បាន​ទិញ​ផ្ទះ​ដី​ជាច្រើន​ឲ្យ​ស្រី​ស្នេហ៍។

លោក​ថា៖ «មូលហេតុ​ប្តឹង​ពី​បទ​ពុករលួយ​ព្រោះ​ថា​​គាត់​ (កឹម សុខា) ជា​តំណាង​រាស្ត្រ​អត់​មាន​​អភ័យ​ឯកសិទ្ធិ​ក្នុង​ការ​បើក​ជំនួញ ឬ​ធ្វើ​អាជីវកម្ម​អ្វី​ទេ​ព្រោះ​គាត់​​ជា​សមាជិក​សភា​ដូច្នេះ​យើង​មាន​ចម្ងល់​ថា​តើ​គាត់​បាន​លុយ​មក​ពី​ណា​ទិញ​ផ្ទះ ដី​រាប់​ម៉ឺន​ដុល្លារ និង​ផ្តល់​លុយ​រាប់​ពាន់​ដុល្លារ​ឱ្យ​ស្រី​ស្នេហ៍​បើក​មុខរបរ​រកស៊ី»។ ប៉ុន្តែ​នៅ​ពេល​ភ្នំពេញ​ប៉ុស្តិ៍​ សួរ​ចុះ​បើ​ លោក​ កឹម សុខា គាត់​មាន​លុយ​មុន​ពេល​ក្លាយ​ជា​តំណាង​រាស្ត្រ​តើ​លោក​យល់​យ៉ាង​ណា?

លោក​ ចំរើន ​​ឆ្លើយ​ថា​បើ​នេះ​ជា​ការពិត​គឺ​ជា​ចំណាត់ការ​របស់​អង្គភាព​ប្រឆាំង​អំពើ​ពុករលួយ​។

ភ្នំពេញ​ប៉ុស្តិ៍​មិន​អាច​សុំ​ការ​អធិប្បាយ​ដោយ​ផ្ទាល់​ពី​ប្រធាន​ស្តីទី​គណបក្ស​សង្គ្រោះ​ជាតិ​លោក​ កឹម សុខា បាន​នៅ​​ឡើយ​ទេ​ខណៈ​អ្នក​នាំពាក្យ​លោក យឹម សុវណ្ណ បញ្ជាក់​ថា​៖ ​«​ខ្ញុំ​មិន​ដឹង​មិន​ចាប់​អារម្មណ៍»​។

ប៉ុន្តែ​អ្នក​វិភាគ​​ឯករាជ្យ​លោក អ៊ូ វីរៈ មើល​ឃើញ​ថា​ចំណាត់ការ​របស់​រដ្ឋសភា និង​អង្គភាព​ប្រឆាំង​អំពើ​ពុករលួយ​នេះ​ធ្វើ​ឡើង​បន្ទាប់​ពី​មាន​ការ​ថ្លែង​របស់​លោក​នាយក​រដ្ឋមន្ត្រី ហ៊ុន សែន ដោយ​លោក​ចាត់​ទុក​ថា​ជា​រឿង​នយោបាយ​ទាំង​ស្រុង។

លោក​ វីរៈ ​បន្ត​ថា «ខ្ញុំ​គិត​ថា​ជា​រឿង​មួយ​ដើម្បី​បង្វែរ​ទិស​មិន​ឱ្យ​ជជែក​ពី​រឿង​បញ្ហា​ជាតិ​បើ​សិន​ជា​យើង​មើល​មែនទែន​មនុស្ស​ទាំង​ពី ១៥ ទៅ ២០ ម៉ឺន​នាក់​អ្នក​ខ្លះ​មាន​រថយន្ត​តម្លៃ​មួយ​លាន​ដុល្លារ​ផ្ទះ​វីឡា​រាប់​មិន​អស់ ទ្រព្យសម្បត្តិ​រាប់​មិន​អស់​ហេតុ​អ្វី​មិន​បើក​ការ​ស៊ើបអង្កេត​»​។

លោក វីរៈ បាន​​សម្តែង​​ការ​សោកស្តាយ​ដោយ​ហៅ​​រឿង​​នេះ​ថា​ជា​របៀប​ធ្វើ​នយោបាយ​ចាស់​​គំរឹល​ដដែលៗ​។

លោក​ថា​ មួយ​​វិញ​ទៀត «ខ្ញុំ​មើល​ទៅ​ជា​យុទ្ធសាស្ត្រ​ដាក់​សម្ពាធ​លោក កឹម សុខា ក្នុង​ការ​ធ្វើ​នយោបាយ​ដើម្បី​គាប​សង្កត់​គណបក្ស​ប្រឆាំង​​ទាំង​មូល​ប៉ុន្តែ​ខ្ញុំ​មើល​​ទៅ​មិនមែន​ជា​របៀប​ធ្វើ​នយោបាយ​ល្អ​ទេ»។

លោក​នាយក​រដ្ឋមន្ត្រី​ ហ៊ុន សែន កាល​ពី​ថ្ងៃ​ទី ១៧ មីនា បាន​ព្រមាន​ចាត់​វិធានការ​ផ្លូវ​ច្បាប់​ពី​រឿង​អាស្រូវ​ស្នេហា​ដែល​គេ​សង្ស័យ​ថា​ពាក់ព័ន្ធ​នឹង​​លោក​ កឹម សុខា ខណៈ​លោក​ កឹម សុខា បាន​ប្រកាន់​យក​គោលជំហរ​មិន​ឆ្លើយ មិន​ឆ្លង និង​មិន​ឈ្លោះ​៕

អត្ថបទគួរចាប់អារម្មណ៍