The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋសភា​អនុម័ត​ច្បាប់​គ្រប់គ្រង​ផ្ទះ​ជួល

រដ្ឋសភា​អនុម័ត​ច្បាប់​គ្រប់គ្រង​ផ្ទះ​ជួល

កម្មការិនី​រោងចក្រ​កំពុង​ហាល​ខោអាវ​នៅ​ផ្ទះជួល​។
កម្មការិនី​រោងចក្រ​កំពុង​ហាល​ខោអាវ​នៅ​ផ្ទះជួល​។ ផា លីណា

រដ្ឋសភា​អនុម័ត​ច្បាប់​គ្រប់គ្រង​ផ្ទះ​ជួល

ភ្នំពេញៈ ច្បាប់​ភតិសន្យា​ពិសេស ឬ​ហៅ​ថា​ច្បាប់​គ្រប់គ្រង​ផ្ទះ​ជួល​ដែល​រដ្ឋសភា​បាន​អនុម័ត​កាលពី​ម្សិលមិញ​នឹង​មិន​​អនុញ្ញាត​ឲ្យ​ម្ចាស់​ផ្ទះ​ជួល​ដំឡើង​ថ្លៃ​ឈ្នួល​ផ្ទះ​សម្រាប់​កម្មករ និស្សិត និង​សិស្ស​ដែល​ជួល​ផ្ទះ​ក្នុង​អំឡុង​ពេល​ ២ ​ឆ្នាំ​នៃ​ការ​ជួល​ផ្ទះ​តែ​ផ្តល់​សិទ្ធិ​ឲ្យ​អ្នក​ជួល​ផ្ទះ​អាច​ឈប់​ជួល​ពេល​ណា​ក៏​បាន។

ច្បាប់​ភតិសន្យា​ពិសេស​ត្រូវ​បាន​អនុម័ត​ដោយ​សំឡេង​គាំទ្រ ១០២/១០៤ សំឡេង។ ច្បាប់​នេះ​មាន ៤ ជំពូក និង​ ១១ ​មាត្រា។

តាមរយៈ​សេចក្តី​ថ្លែង​ហេតុ​ច្បាប់​នេះ​ធ្វើ​ឡើង​ក្នុង​គោលបំណង​គ្រប់គ្រង​បន្ទប់​ជួល និង​ទំនាក់ទំនង​រវាង​កម្មករ សិស្ស និង​និស្សិត ជាមួយ​នឹង​​ម្ចាស់​ផ្ទះ​ដែល​មាន​បន្ទប់​ជួល​ស្នាក់នៅ​ឲ្យ​មាន​លក្ខណៈ​រៀបរយ​ព្រម​ទាំង​ជួយ​ដោះស្រាយ​សំណូមពរ​របស់​កម្មករ សិស្ស និង​និស្សិត ទាក់ទង​នឹង​តម្លៃ​បន្ទប់​ជួល​សមស្រប​នឹង​កម្រៃ​ប្រាក់​កម្រៃ​គោល​ប្រចាំ​ខែ​ទាប​។

មាត្រា ៦ មាត្រា ៨ និង ៩ នៃ​ច្បាប់​នេះ​បាន​ចែង​ថា​ភតិសន្យា​ពិសេស​មាន​អំឡុង​ពេល​មិន​តិច​ជាង ២ ឆ្នាំ ហើយ​ភតិសន្យា​ពិសេស​ដែល​មិន​កំណត់​​អំឡុង​ពេល ឬ​កំណត់​អំឡុង​ពេល​តិច​ជាង ២ ឆ្នាំ ត្រូវ​ចាត់​ទុក​ថា​មាន​រយៈពេល ២ ឆ្នាំ។

ក្នុង​អំឡុង​ពេល​ដែល​ភតិសន្យា​ពិសេស​មាន​អានុភាព​អនុវត្ត​ម្ចាស់​ផ្ទះជួល មិន​អាច​ដំឡើង​ថ្លៃ​ឈ្នួល​បាន​ឡើយ។ អ្នក​ជួល​ផ្ទះ​មាន​សិទ្ធិ​រំលាយ​ភតិសន្យា​ពិសេស នៅ​ពេល​ណា​ក៏​បាន។ ដោយ​ឡែក មាត្រា ៧ ចែង​ថា​ម្ចាស់​ផ្ទះ​ជួល​មាន​សិទ្ធិ​រំលាយ​ភតិសន្យា​ពិសេស បាន​តែ​ករណី​ដូចជា​អ្នក​ជួល​ផ្ទះ​មិន​បង់​ថ្លៃ​ឈ្នួល ២ ដង​ជា​បន្តបន្ទាប់ ដោយ​គ្មាន​មូលហេតុ​សមស្រប​អ្នក​ជួល​ផ្ទះ​ប្រើប្រាស់ និង​អាស្រ័យ​ផល​លើ​វត្ថុ​ជួល​ខុស​ពី​គោលបំណង​នៃ​ការ​ជួល ឬ​មាន​ចេតនា​ធ្វើឲ្យ​ប៉ះពាល់​ដល់​សណ្តាប់ធ្នាប់​ច្រើន​លើក និង​បង្ក​ឥទ្ធិពល​ធ្ងន់ធ្ងរ​ដល់​ជីវភាព​រស់នៅ​ប្រក្រតី​របស់​អ្នក​រស់នៅ​ជុំវិញ​។

តំណាងរាស្ត្រ​គណបក្ស​ប្រជាជន​កម្ពុជា និង​ជា​សមាជិក​ក្រុម​ការងារ​តាក់តែង​ច្បាប់​ស្តី​ភតិសន្យា​ពិសេស លោក ប៉ាល់ សំអឿន បាន​ឲ្យ​ដឹង​ថា​ក្រោយ​ការ​អនុម័ត​ច្បាប់​នេះ​ក្រសួង​ស្ថាប័ន​ពាក់ព័ន្ធ​នឹង​ត្រូវ​បាន​រៀបចំ​ឲ្យ​ទទួល​ខុសត្រូវ​តាម​ផ្នែក​នីមួយៗ​នៃ​​កម្រិត​ការងារ​ទាក់ទង​នឹង​ការ​វាយតម្លៃ និង​ការ​វាស់ស្ទង់​ភាពក្រីក្រ​ដើម្បី​អនុវត្ត​ច្បាប់​នេះ​ឲ្យ​មាន​ប្រសិទ្ធភាព។

លោក​ថា៖ «ថ្វី​បើ​ច្បាប់​នេះ​អនុម័ត​រួច​មែន​តែ​យើង​មិន​ទាន់​អនុវត្ត​នោះ​ទេ​ខាង​រដ្ឋាភិបាល​នឹង​ធ្វើការ​កំណត់​បែងចែក​តួនាទី​របស់​ស្ថាប័ន ក្រសួង​លើ​ការងារ​ផ្សេង ដើម្បី​កំណត់​ពី​កម្រិត​នៃ​ភាព​ក្រីក្រ​របស់​កម្មករ សិស្ស និង​និស្សិត​។ យើង​​អនុវត្ត​ច្បាប់​នេះ​ក្នុង​ក្របខ័ណ្ឌ​ផ្ទៃ​ប្រទេស​តែ​ក៏​ទាមទារ​ឲ្យ​មាន​ការ​កំណត់​ឲ្យ​ច្បាស់លាស់​ទើប​ច្បាប់​នេះ​មាន​ប្រសិទ្ធភាព»។

អ្នកស្រី មុំ ម្ចាស់​ផ្ទះ​ជួល​ជា​ប្រភេទ​ផ្ទះ​ល្វែង​នៅ​ម្តុំ​ទួលស្លែង​បាន​បង្ហាញ​ការ​គាំទ្រ​ចំពោះ​ច្បាប់​នេះ​ដើម្បី​បង្ការ​នូវ​ទំនាស់​កើតឡើង​របស់​ភាគី​ទាំង​ពីរ ប៉ុន្តែ​អ្នកស្រី​យល់​ថា​ការ​កំណត់​រយៈពេល​ ២ ឆ្នាំ គឺ​​ច្បាស់​ណាស់​នឹង​បង្ក​ផលវិបាក​ខ្លះ​ដល់​ម្ចាស់​ផ្ទះជួល​។

អ្នកស្រី​ថា៖ «កន្លង​មក​ខ្ញុំ​ឃើញ​ការ​តវ៉ា​ទាមទារ​របស់​កម្មករ​រោងចក្រ តម្លៃ​ប្រាក់​ឈ្នួល​សមរម្យ​សព្វថ្ងៃ​គ្នា​មាន​ប្រាក់​ខែ​តិច​បើ​គ្នា​បាន​ឡើង​តិច​តួច ម្ចាស់​ផ្ទះ​មិន​គួរ​ដំឡើង​ថ្លៃ​ផ្ទះ​តាម​នោះ​ទេ។ ខ្ញុំ​ដឹង​ថា​រយៈពេល ២ ឆ្នាំ គឺ​នឹង​ធ្វើឲ្យ​ម្ចាស់​ផ្ទះ​ពិបាក អ៊ីចឹង​ហើយ​​មាន​តែ​អំពាវនាវ​ដល់​រដ្ឋាភិបាល​ពិចារណា​គ្រប់គ្រង​តម្លៃ​ទីផ្សារ​កុំ​ឲ្យ​អ្វីៗ​ឡើង​ថ្លៃ​ហើយ​លើក​​ហេតុផល​រឿង​ទីផ្សារ​សេរី​នោះ​»​។

កញ្ញា គិត ម៉េង កម្មការិនី​កាត់ដេរ​រោងចក្រ គីន តាយ ស្នាក់នៅ​បន្ទប់​ជួល​មួយ​កន្លែង​ក្នុង​សង្កាត់​ចាក់អង្រែ​ក្រោម​នៅ​តែ​បង្ហាញ​ក្តីបារម្ភ​ចំពោះ​ប្រសិទ្ធភាព​នៃ​ច្បាប់​នេះ​ដោយ​ថា​បច្ចុប្បន្ន​តម្លៃ​ផ្ទះជួល​របស់​កម្មករ​ចន្លោះ​ពី ២០ ទៅ​ ៣០ ​ដុល្លារ គឺ​មិន​មាន​កិច្ចសន្យា​នោះ​ទេ​ហើយ​ថ្លៃ​ជួល​នៅ​តែ​បន្ត​កើនឡើង​ទោះ​តិចតួច​ក្តី។

កញ្ញា​ថា៖ «ជា​រឿង​ល្អ​ដែល​មាន​ច្បាប់​តែ​ច្បាប់​នេះ​អនុវត្ត​បាន​កម្រិត​ណា​តាម​​ពិសោធន៍​របស់​ខ្ញុំ នៅពេល​សួរ​នាំ​ម្ចាស់​ផ្ទះ​ជួល​តែងតែ​មិន​អើពើ​ហើយ​បើ​យើង​រឹងរួស​គឺ​គេ​ឈប់​ជួល​ផ្ទះ​ហើយ»។

កញ្ញា សុង ដាណែត អាយុ​ ១៨ ​ឆ្នាំ ជា​សិស្ស​ថ្នាក់​ទី ១២ នៃ​វិទ្យាល័យ​ឥន្ទ្រទេវី បច្ចុប្បន្ន​ស្នាក់នៅ​ផ្ទះ​ជួល​ម្តុំ​សំណង់ ១២ ខណ្ឌ​ទួលគោក​ក្នុង​តម្លៃ ៧០ ​ដុល្លារ​ក្នុង ១ ខែ ដោយ​មិន​គិត​ថ្លៃ​ទឹក និង​ភ្លើង​នោះ​ទេ។

ដាណែត​ថា​៖ «ខ្ញុំ​សប្បាយ​ចិត្ត និង​គាំទ្រ​ច្បាប់​គ្រប់គ្រង​ផ្ទះ​ជួល​នេះ​ព្រោះ​ថា​ការ​កំណត់​បែប​ហ្នឹង​ធ្វើឲ្យ​ម្ចាស់​ផ្ទះ មិន​ហ៊ាន​ដំឡើង​ថ្លៃ​ឈ្នួល​ផ្តេសផ្តាស ហើយ​បែប​នេះ​ធ្វើឲ្យ​ខ្ញុំ​មាន​​អាម្មណ៍​សុវត្ថិភាព និង​ងាយស្រួល​ក្នុង​ការ​រស់នៅ​ដោយ​មិន​ចាំបាច់​បារម្ភ​ពី​ការ​ផ្លាស់ប្តូរ​លំនៅឋាន​ញឹកញាប់»។

បញ្ហា​នេះ​ក៏​ត្រូវ​បាន​លោក សុន ឆ័យ តំណាងរាស្ត្រ​គណបក្ស​សង្គ្រោះជាតិ​លើក​ឡើង​ដូច​គ្នា​នៅក្នុង​កិច្ចប្រជុំ​អនុម័ត​ច្បាប់​នេះ​កាលពី​ម្សិលមិញ​ដោយ​លោក​ថា​មន្ត្រី​នៅ​តាម​មូលដ្ឋាន​តែងតែ​មាន​សកម្មភាព​ចុះ​មូលដ្ឋាន​ដើម្បី​ប្រមូល​យក​លុយ​ពី​ម្ចាស់​ផ្ទះ​ជួល​។

ប៉ុន្តែ​ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ លោក ស ខេង បាន​អះអាង​ថា​ទាក់ទិន​នឹង​បញ្ហា​នេះ​គឺ​ក្រសួង​មហាផ្ទៃ​បាន​សហការ​ជាមួយ​នឹង​ក្រសួង​សេដ្ឋកិច្ច​បាន​រួម​គ្នា​ធ្វើ​សៀវភៅ​សេវា​ដើម្បី​កំណត់​តម្លៃ​យ៉ាង​ច្បាស់លាស់។

លោក​បន្ត​ថា៖ «ខ្ញុំ​ទទួល​ស្គាល់​ថា​អាច​នឹង​មាន​បុគ្គល​មន្ត្រី​របស់​យើង​នៅ​មូលដ្ឋាន​មាន​ភាព​ឆ្គាំឆ្គង ប៉ុន្តែ​ខ្ញុំ​មិន​ឯកភាព​ថា​វាយតម្លៃ​ជា​ទូទៅ​ទាំងអស់​សុទ្ធតែ​អសកម្ម​ទេ​យើង​ត្រូវ​មើល​បញ្ហា​ឲ្យ​ពិត បើ​មិន​ដូច្នោះ​ទេ​យើង​ដោះស្រាយ​ក៏​វា​មិន​បាន​ល្អ​ដែរ»៕

អត្ថបទគួរចាប់អារម្មណ៍