ភ្នំពេញ: រដ្ឋសភាកាលពីម្សិលមិញបានអនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១ និងសេចក្តីព្រាងច្បាប់ ៦ ផ្សេងទៀត ប៉ុន្តែមិនទាន់មានគម្រោងបញ្ជូនទៅព្រឹទ្ធសភា ដើម្បីពិនិត្យ និងអនុម័តបន្តទេ ខណៈសង្គមស៊ីវិលថា ការអនុម័តច្បាប់ទាំងនេះមានលក្ខណៈលឿនពេកដែលធ្វើឱ្យគ្មានអត្ថន័យគ្រប់គ្រាន់។
ការអនុម័តច្បាប់ទាំងនេះធ្វើឡើងក្នុងសម័យប្រជុំរដ្ឋសភាលើកទី៥ នីតិកាលទី៦ ដឹកនាំដោយលោក ហេង សំរិន ប្រធានរដ្ឋសភា និងមានការចូលរួមពីសមាជិកចំនួន ១១៤ រូប។
លោក ហេង សំរិន បានឱ្យដឹងតាមហ្វេសប៊ុកផ្លូវការលោកថា សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២១ ដែលមាន ៦ ជំពូក ១៥ មាត្រាត្រូវបានរៀបចំឡើងក្នុងបរិការណ៍ជំងឺកូវីដ១៩ ដ៏កាចសាហាវបាននិងកំពុងយាយីសកលលោក រួមទាំងកម្ពុជាផង។
លោកបន្តថា ថវិកាឆ្នាំ ២០២១ គឺជាថវិកាសម្រាប់ប្រយុទ្ធការពារអាយុជីវិតប្រជាជន រក្សាលំនឹងសង្គម សេដ្ឋកិច្ច និងជីវភាពរបស់ប្រជាជន ព្រមជាមួយនឹងការតម្រង់ធនធានឆ្ពោះទៅស្តារ និងជំរុញកំណើនសេដ្ឋកិច្ចឡើងវិញក្រោយពេលវិបត្តិជំងឺកូវីដ១៩ តាមគន្លងប្រក្រតីថ្មីដើម្បីធានាសុខសន្តិភាព ស្ថិរភាពសង្គម និងចីរភាពនៃកំណើនសេដ្ឋកិច្ច ។
លោក ហេង សំរិន បានបញ្ជាក់ថា៖ «រដ្ឋសភា បានគាំទ្រសេចក្តីព្រាងច្បាប់ដ៏សំខាន់នេះ និងសេចក្តីព្រាងច្បាប់ដទៃទៀតដែលមានសារៈសំខាន់នៅក្នុងវិស័យសេដ្ឋកិច្ចពាណិជ្ជកម្មទាំងក្នុង និងក្រៅប្រទេស»។
លោក ឡេង ប៉េងឡុង អ្នកនាំពាក្យរដ្ឋសភាកាលពីម្សិលមិញមិនអាចទាក់ទងសុំការបញ្ជាក់បន្ថែមជុំវិញកិច្ចប្រជុំអនុម័តច្បាប់នេះទេ ដោយទូរស័ព្ទលោកគ្មានអ្នកទទួល។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) បានថ្លែងពីម្សិលមិញថា ការអនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ឆ្នាំនេះ និងសេចក្តីព្រាងច្បាប់ផ្សេងចំនួន ៦ នេះគឺហាក់ដូចជាប្រញាប់ពេក ដោយមិនបានពិភាក្សាឱ្យបានគ្រប់ជ្រុងជ្រោយពីគ្រប់ភាគីពាក់ព័ន្ធ។ ការអនុម័តច្បាប់លឿនបែបនេះ គេនឹងចាត់ទុកថាច្បាប់គ្មានគុណភាពគ្រប់គ្រាន់ និងមិនឆ្លុះបញ្ចាំងតថភាពទាំងមូលក្នុងសង្គមជាតិ។
លោក សន ជ័យ បានបញ្ជាក់ថា៖ «ច្បាប់នេះគួរតែមានការពិគ្រោះយោបល់ឱ្យបានច្រើនជាងនេះហើយជាពិសេស input សម្រាប់កែលម្អខ្លឹមសារច្បាប់នេះ ជាពិសេសការបែងចែកថវិការវាងថ្នាក់ជាតិ និងថ្នាក់ក្រោមជាតិ ព្រោះយើងចង់ឱ្យថវិកាជាតិហ្នឹងទៅឱ្យដល់ថ្នាក់ក្រោមជាតិឱ្យបានច្រើនជាងនេះ ដោយសារទីនោះ ជាទីកន្លែងដែលមានតម្រូវការច្រើនដូចជា ត្រូវស្ដារហេដ្ឋារចនាសម្ព័ន្ធនានា និងបញ្ហាទប់ស្កាត់ជំងឺកូវីដ១៩ ឬគ្រោះធម្មជាតិជាដើម»។
លោក ហ៊ុន ម៉ានី ប្រធានគណៈកម្មការអប់រំ យុវជន និងកីឡា កិច្ចការសាសនា វប្បធម៌ និងទេសចរណ៍នៃរដ្ឋសភាបានឱ្យដឹងតាមរយៈហ្វេសប៊ុកលោកពីម្សិលមិញថា តំណាងរាជរដ្ឋាភិបាលបានបង្ហាញពីស្មារតីនៃការតាក់តែងសេចក្តីព្រាងច្បាប់នេះដោយផ្តោតជាចម្បងលើការប្រយុទ្ធការពារអាយុជីវិតប្រជាជន ការរក្សាលំនឹងសង្គម សេដ្ឋកិច្ច នៅក្រោយវិបត្តិកូវីដ ១៩ ។
លោកបន្តថា កន្លងមករាជរដ្ឋាភិបាលបានអនុវត្តការងារប្រកបដោយភាពទទួលខុសត្រូវ និងជោគជ័យពីអាណត្តិ ១ ទៅអាណត្តិ ១ ដោយសម្រេចបានសមិទ្ធផលជាប្រយោជន៍ជូនពលរដ្ឋ និងភាពរីកចម្រើនក្នុងសង្គម។ ប៉ុន្តែដោយសារកត្តាសត្យានុម័តនៃបរិបទអន្តរជាតិតម្រូវកត្តាអត្តនោម័តត្រូវតែសម្របខ្លួនទៅតាមស្ថានភាពជាក់ស្តែងក្នុងបរិបទថ្មីនេះ។ ក្នុងន័យនេះ ការគិតគូរ និងរបៀបរបបនៃការអនុវត្តការងារក៏ត្រូវតែមានការសម្របតាមកាលៈទេសៈជាក់ស្តែងដោយផ្អែកលើមូលដ្ឋាននៃការរៀបចំថវិកាជាតិ និងចំណូលថវិកាជាតិ ដែលមានកម្រិតតាមស្ថានភាពដូចគ្នាដែរ។
ដោយឡែកចំពោះសេចក្តីព្រាងច្បាប់ ៦ ផ្សេងទៀតដែលរដ្ឋសភាពិភាក្សា និងអនុម័តដែរនោះរួមមាន ទី១-សេចក្តីព្រាងច្បាប់ស្តីពីការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០១៩ ទី២- សេចក្តីព្រាងច្បាប់ស្តីពីមូលបត្រ ទី៣- សេចក្តីព្រាងច្បាប់ស្តីពីការរៀបចំ និងការប្រព្រឹត្តទៅនៃអាជ្ញាធរសេវាហិរញ្ញវត្ថុមិនមែនធនាគារ ទី៤- សេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀង អាស៊ានស្តីពីការទទួលស្គាល់ទៅវិញទៅមកលើការផ្តល់អាជ្ញាប័ណ្ណក្រុមអាកាសយានិក ទី៥- សេចក្តីព្រាងច្បាប់ស្តីពីការអនុម័តយល់ព្រមលើសិទ្ធិសហការលើជើងហោះហើរក្នុងស្រុកក្នុងរង្វង់ទឹកដីនៃប្រទេសជាសមាជិកអាស៊ានណាមួយ និងសិទ្ធិហោះហើរកូធ័រមីណលរវាងអាកាសយានដ្ឋាននៅក្នុងទឹកដីនៃប្រទេសជាសមាជិកអាស៊ាន និងទី៦- សេចក្តីព្រាងច្បាប់ស្តីពីការអនុម័តយល់ព្រមលើពិធីសារអនុវត្តកញ្ចប់កិច្ចសន្យាទី ៩ និងទី ១០ នៃសេវាកម្មដឹកជញ្ជូនតាមផ្លូវអាកាសក្រោមកិច្ចព្រមព្រៀងក្របខ័ណ្ឌអាស៊ានស្តីពីសេវាកម្ម៕