.jpg)
សមាជិករដ្ឋសភាលើកដៃអនុម័តសេចក្ដីព្រាងច្បាប់ក្នុងកិច្ចប្រជុំពេញអង្គកាលពីម្សិលមិញ។ ហេង ជីវ័ន
ភ្នំពេញៈ តំណាងរាស្ត្រចំនួន ១០៨ រូបដែលមានវត្តមានក្នុងសាលប្រជុំពេញអង្គនៃរដ្ឋសភាកាលពីម្សិលមិញបានបោះឆ្នោតដោយលើកដៃអនុម័តមាត្រាមួយចំនួននៃសេចក្ដីស្នើវិសោធនកម្មច្បាប់ ២ ស្ដីពីការបោះឆ្នោតជ្រើសរើសក្រុមប្រឹក្សា និងគ្រប់គ្រងរដ្ឋបាល រាជធានី ខេត្ត ក្រុង ស្រុក និងខណ្ឌក្នុងគោលបំណងដោះស្រាយបញ្ហាថ្នាក់ក្រោមជាតិឲ្យមានប្រសិទ្ធភាពខ្ពស់ក្នុងការលើកកម្ពស់ការផ្ដល់សេវា ការអភិវឌ្ឍឲ្យសមស្របទៅនឹងកំណើនប្រជាពលរដ្ឋនៅក្នុងប្រទេស។
លោក ស ខេង រដ្ឋមន្ត្រីក្រសួងមហាផ្ទៃ និងជាសមាជិករដ្ឋសភាបានថ្លែងប្រាប់អ្នកសារព័ត៌មានថា សមាជិករដ្ឋសភាចំនួន ១០៨ នាក់បានលើកដៃអនុម័តនៃសេចក្ដីព្រាងច្បាប់ទាំង ២ នេះដោយសារតែកំណើនប្រជាពលរដ្ឋនៅរាជធានី ខេត្ត ក្រុង ស្រុកខណ្ឌ និងដើម្បីជួយជំរុញ និងពង្រីកការអនុវត្តគោលនយោបាយ វិមជ្ឈការ និងវិសហមជ្ឈការដែលជាផ្នែកនៃការធ្វើកំណែទម្រង់ផ្នែករដ្ឋបាលក្នុងការបម្រើប្រជាពលរដ្ឋឲ្យកាន់តែមានប្រសិទ្ធភាព។
លោក ស ខេង បានថ្លែងឲ្យដឹងថា៖ «យើងមានបំណងដ៏ជាក់លាក់ដើម្បីនឹងផ្ទេរអំណាចតាមវិមជ្ឈការ ហើយក្នុងនោះក៏មានវិសហមជ្ឈការដែរក្នុងការផ្ទេរសិទ្ធិអំណាច និងផ្ទេរធនធានមានទាំងថវិកា និងមនុស្សទៅឲ្យរដ្ឋបាលថ្នាក់ក្រោមជាតិ រាជធានី ខេត្ត ក្រុង ស្រុក ខណ្ឌ ដើម្បីឲ្យរដ្ឋបាលដែលនៅកៀកកិតជាមួយប្រជាពលរដ្ឋមានសិទ្ធិអនុវត្តនូវកិច្ចការរបស់ខ្លួន ដើម្បីបម្រើផលប្រយោជន៍ប្រជាពលរដ្ឋ»។
លោករដ្ឋមន្ត្រីក្រសួងមហាផ្ទៃបានអះអាងថា នៅក្នុងសេចក្ដីព្រាងច្បាប់បោះឆ្នោតជ្រើសរើសក្រុមប្រឹក្សាខាងមុខនេះនឹងមានការបង្កើនអាសនៈក្រុមប្រឹក្សា រាជធានី ខេត្ត ក្រុង ស្រុក ខណ្ឌ ហើយការបង្កើនអាសនៈនេះវាក៏មិនប៉ះពាល់ធ្វើឲ្យខាតបង់ថវិកាជាតិទេ តែវានឹងជួយលើកកម្ពស់ប្រសិទ្ធភាពក្នុងការផ្តល់សេវាការអភិវឌ្ឍ និងដោះស្រាយបញ្ហាថ្នាក់មូលដ្ឋាន។
លោក ស ខេង ថ្លែងថា៖ «ការចំណាយត្រូវតែចំណាយហើយ (ព្រោះ) ក្រុមប្រឹក្សាធ្វើការបានផលសម្រាប់ប្រជាពលរដ្ឋ និងជាតិ»។
លោក ជាម យៀប តំណាងក្រុមអ្នកតំណាងរាស្ត្រដែលស្នើវិសោធនកម្មច្បាប់នេះបានថ្លែងទៅកាន់សមាជិករដ្ឋសភាក្នុងសម័យប្រជុំពេញអង្គកាលពីម្សិលមិញថាក្នុងរយៈពេល ១០ ឆ្នាំកន្លងមកនេះបន្ទាប់ពីច្បាប់គ្រប់គ្រងរដ្ឋបាល រាជធានី ខេត្ត ក្រុង ស្រុក ខណ្ឌនេះចូលជាធរមានរហូតដល់បច្ចុប្បន្ន ស្ថានភាពប្រជាជននៅក្នុងប្រទេសកម្ពុជាមានការកើនឡើងជាលំដាប់ដែលតម្រូវឲ្យមានការលើកកម្ពស់ប្រសិទ្ធភាពក្នុងការផ្តល់សេវា និងការអភិវឌ្ឍ ស្របពេលដែលមុខងារ និងធនធានត្រូវបានផ្ទេរជាបន្តបន្ទាប់ពីថ្នាក់ជាតិទៅរដ្ឋបាលថ្នាក់ក្រោមជាតិ។
លោកបញ្ជាក់ថា៖ «ដើម្បីឆ្លើយតបទៅនឹងតម្រូវការរបស់ប្រជាពលរដ្ឋតាមមូលដ្ឋាននីមួយៗ។ ទន្ទឹមនេះស្ថានភាពភូមិសាស្ត្រក៏ត្រូវបានកែសម្រួល និងកំណត់ឲ្យបានកាន់តែច្បាស់លាស់ស្របតាមការអភិវឌ្ឍរីកចម្រើននៃសេដ្ឋកិច្ច និងសង្គមផងដែរ»។
លោក ជាម យៀប បានបញ្ជាក់ថា៖ «យើងខ្ញុំជាតំណាងរាស្ត្រហត្ថលេខីសុំលើកសំណើជូនរដ្ឋសភាដើម្បីពិនិត្យ និង អនុម័ត លើសេចក្តីស្នើច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌដែលបានដាក់ជូនសម័យប្រជុំរដ្ឋសភារួមមានការលុបចោលនូវ ២ ជំពូកកែសម្រួលលេខជំពូក កែសម្រួលមាត្រាយោង និងបន្ថែមនូវខ្លឹមសារថ្មីក្នុងមាត្រាមួយចំនួន»។
យោងតាមសេចក្ដីថ្លែងហេតុនៃសេចក្ដីស្នើច្បាប់ស្ដីពីវិសោធនកម្មច្បាប់ស្ដីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌបានឲ្យដឹងថាមាត្រាមួយចំនួនត្រូវបានកែសម្រួល និងបន្ថែមខ្លឹមសារថ្មីរួមមានដូចជា កំណត់បន្ថែមនូវបុគ្គលគ្មានសិទ្ធិឈរឈ្មោះជាបេក្ខជនបោះឆ្នោតជ្រើសរើសក្រុមប្រឹក្សា កំណត់អំពីការបន្ថយរយៈពេលផ្ដល់សុពលភាពបញ្ជីបោះឆ្នោតពី ៣៥ ថ្ងៃមក ១៥ ថ្ងៃមុនថ្ងៃបោះឆ្នោត កំណត់អំពីការបន្ថយរយៈពេលបិទផ្សាយបញ្ជីបោះឆ្នោតផ្លូវការពី ៣០ ថ្ងៃមក ១៥ ថ្ងៃវិញ កំណត់បន្ថយរយៈពេលនៃការឃោសនាបោះឆ្នោតពី ១៥ ថ្ងៃមក ៨ ថ្ងៃវិញ កំណត់អំពីការហែក្បួនទ្រង់ទ្រាយធំត្រូវធ្វើយ៉ាងច្រើន ២ ដងក្នុងអំឡុងពេលឃោសនាបោះឆ្នោត កំណត់អំពីភ្នាក់ងារគណបក្សនយោបាយ សិទ្ធិ តួនាទី និងលក្ខខណ្ឌផ្សេងៗ។
រដ្ឋសភាបានអនុម័តមាត្រា ១៨ នៃសេចក្ដីស្នើច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ដោយបង្កើនសមាជិកក្រុមប្រឹក្សារាជធានីភ្នំពេញពី ២១ រូបទៅដល់ ២៧ រូប។ សមាជិកក្រុមប្រឹក្សាខេត្តត្រូវបង្កើនចន្លោះពី ១៥ ដល់ ២៧ រូប។ សមាជិកក្រុមប្រឹក្សាក្រុងត្រូវបង្កើនចន្លោះពី ១១ រូបដល់ ២១ រូប។ សមាជិកក្រុមប្រឹក្សាស្រុក ក្រុមប្រឹក្សាខណ្ឌត្រូវបានបង្កើនចន្លោះពី ១១ ដល់ ២១ រូប។
លោក សោម សូរីដា អគ្គលេខាធិការគណៈកម្មាធិការជាតិរៀបចំការបោះឆ្នោតបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា គជប មិនទាន់បានទទួលច្បាប់វិសោធនកម្មទាំង ២ នោះទេ ដូច្នេះមិនដឹងថាចំនួនអាសនៈនឹងកើនចំនួនប៉ុន្មាននោះទេ។
លោក ឱក សេរីសោភក្តិ៍ និងលោក អ៊ូ វីរៈ អ្នកវិភាគនយោបាយកាលពីម្សិលមិញសុំមិនធ្វើអត្ថាធិប្បាយទៅលើសេចក្ដីព្រាងច្បាប់ដែលបានអនុម័តដោយរដ្ឋសភាកាលពីម្សិលមិញនោះដែរ។
លោក វីរៈ ថ្លែងថា៖ «ខ្ញុំអាចធ្វើអត្ថាធិប្បាយបានប្រសិនបើខ្ញុំមានឱកាសបានមើលច្បាប់ទាំងនោះ»។
លោក ឱក សេរីសោភក្តិ៍ ថ្លែងថា៖ «ខ្ញុំមិនទាន់មានពេលអានវិសោធនកម្មច្បាប់នោះនៅឡើយទេ»។
ទោះជាយ៉ាងណាក៏ដោយយោងតាមតារាងរបស់គណៈកម្មាធិការជាតិរៀបចំការបោះឆ្នោតដែលចេញផ្សាយកាលពីថ្ងៃទី ២១ ខែកុម្ភៈ ឆ្នាំ ២០១៤ សម្រាប់ការបោះឆ្នោតក្រុមប្រឹក្សា រាជធានី ខេត្ត ក្រុង ស្រុក ខណ្ឌ អាណត្តិទី ២ បានឲ្យដឹងថាចំនួន ក្រុង ស្រុក ខណ្ឌ ទាំងអស់មានចំនួន ១៩៧ ហើយមានសមាជិកសរុបចំនួន ២ ៩៣១ នាក់រួមទាំងសមាជិកក្រុមប្រឹក្សា រាជធានី ខេត្ត ចំនួន ៣៩៣ នាក់ និងសមាជិកក្រុមប្រឹក្សាឃុំសង្កាត់ចំនួន ១១ ៤៥៩ នាក់។
កាលពីថ្ងៃទី ៣០ ខែតុលាប្រមុខរាជរដ្ឋាភិបាលកម្ពុជាបានចេញសេចក្ដីសម្រេចមួយដោយកំណត់យកថ្ងៃអាទិត្យ ទី ២៦ ខែឧសភា ឆ្នាំ ២០១៩ ជាកាលបរិច្ឆេទនៃការបោះឆ្នោតលើកទី ៣ ដើម្បីជ្រើសរើសក្រុមប្រឹក្សារាជធានីខេត្ត ក្រុង ស្រុកខណ្ឌដែលជាការបោះឆ្នោតអសកលដោយមានសមាជិកក្រុមប្រឹក្សាឃុំ-សង្កាត់ ក្នុងមុខតំណែងជាអង្គបោះឆ្នោត។ ការបោះឆ្នោតនេះធ្វើឡើងជាលក្ខណៈអសកលដោយមានសមាជិកក្រុមប្រឹក្សាឃុំ-សង្កាត់ក្នុងតំណែងចូលរួមបោះឆ្នោត៕
