ភ្នំពេញៈ ក្នុងអង្គប្រជុំរដ្ឋសភាដែលមានវត្តមានសមាជិកចំនួន ១១០ រូប ក្នុងចំណោមទាំងអស់ ១២៥ រូប មកពីគណបក្សប្រជាជនកម្ពុជាពីម្សិលមិញ បានអនុម័តយល់ព្រមលើសន្ធិសញ្ញាបំពេញបន្ថែមលើសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥។ សន្ធិសញ្ញាបំពេញបន្ថែមឆ្នាំ ២០១៩ នេះនឹងប្រើប្រាស់ជាឯកសារសម្រាប់ទទួលស្គាល់កម្ពុជា-វៀតណាម ដែលបានព្រមព្រៀងគ្នាបោះបង្គោលព្រំដែនគោកសម្រេចបាន ៨៤ ភាគរយ។
លោក ទៀ បាញ់ រដ្ឋមន្ត្រីក្រសួងការពារជាតិ និងជាតំណាងរដ្ឋាភិបាលបានប្រាប់រដ្ឋសភាថាសន្ធិសញ្ញាបំពេញបន្ថែម ឆ្នាំ ២០១៩ ដែលរដ្ឋសភាទើបអនុម័តយល់ព្រមនេះគឺជាឯកសារ ផ្លូវច្បាប់ប្រវត្តិសាស្ដ្រដ៏មានសារៈសំខាន់បំផុតក្នុងការទទួលយកសមិទ្ធផលដែលប្រទេសទាំង ២ សម្រេចបានមកដល់បច្ចុប្បន្ន ៨៤ ភាគរយនៃការបោះបង្គោល និងខណ្ឌសីមាព្រំដែនគោករវាងកម្ពុជា-វៀតណាម។
លោក ទៀ បាញ់ ដែលក៏ជាឧបនាយករដ្ឋមន្ត្រីផងនោះបានថ្លែងថា៖ «វាក៏ជាឯកសារគ្រឹះ ការពារបូរណភាពទឹកដីកម្ពុជាដោយមានខ្សែព្រំដែន មិនឱ្យប្រែប្រួល ថែរក្សាបាននូវព្រំដែនសុខសន្ដិភាព ស្ថិរភាព មិត្តភាព សហប្រតិបត្តិការ និងការអភិវឌ្ឍលើគ្រប់វិស័យដើម្បីភាពសុខសាន្តរបស់ពលរដ្ឋកម្ពុជាតទៅទៀត»។
បើតាមរដ្ឋមន្ត្រីការពារជាតិរូបនេះសន្ធិសញ្ញាឆ្នាំ ២០១៩ ដែលត្រូវមេដឹកនាំប្រទេសទាំង ២ ចុះហត្ថលេខាទទួលស្គាល់នៅថ្ងៃទី ៥ តុលាឆ្នាំ ២០១៩ នៅរដ្ឋធានី ហាណូយ គឺត្រូវបានរៀបចំដោយភាគីកម្ពុជា-វៀតណាមតាមរយៈកិច្ចប្រជុំប្ដូរវេនចំនួន ៥ ដង ការផ្លាស់ប្ដូរកំណត់ទូតចំនួន ៤ ដង និងលិខិតឆ្លើយឆ្លងគ្នានូវចំណុចមិនឯកភាពចំនួន ៣ ដង។
តាមសន្ធិសញ្ញាដដែលនេះគឺប្រទេសទាំង ២ បានឯកភាពគ្នាកែសម្រួលខ្សែព្រំដែនដែលបានកំណត់ក្នុងសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាឆ្នាំ ២០០៥ ដើម្បីសម្រេចយកតាមការកាន់កាប់ជាក់ស្ដែងរបស់ប្រជាពលរដ្ឋ ដោយឈរលើគោលការណ៍ស្មើភាព ១=១ ស្ដីពីផ្ទៃដីដែលត្រូវដោះដូរគ្នា។
លោក ឡឹក សុធារ អ្នកនាំពាក្យគណបក្សប្រជាធិបតេយ្យមូលដ្ឋាន (GDP) ដែលជាគណបក្សបានដាក់លិខិតស្នើសុំទៅរដ្ឋសភា ឱ្យពន្យារពេលលើការអនុម័តយល់ព្រមសន្ធិសញ្ញាបំពេញបន្ថែមឆ្នាំ ២០១៩ ស្ដីពីការទទួលស្គាល់ការកំណត់ព្រំដែនគោកនេះបានសម្ដែងការសោកស្ដាយចំពោះរដ្ឋសភាដែលបានបដិសេធ និងមិនយកចិត្តទុកដាក់ចំពោះការដាក់សំណើសុំរបស់ GDP។
លោកថា កត្តាដែលគណបក្សរបស់លោកមានការព្រួយបារម្ភចំពោះការផ្ដល់សច្ចាប័នលើសន្ធិសញ្ញាបំពេញបន្ថែមនេះ ពីព្រោះរដ្ឋសភាបច្ចុប្បន្នកំពុងតែដឹកនាំដោយគណបក្សតែមួយ និងស្របពេលប្រទេសកំពុងជួបបញ្ហានយោបាយប្រេះឆានៅឡើយ។
លោកបន្ថែមថា ក្នុងស្ថានភាពមិនទាន់មានការឯកភាពជាតិគ្នាបែបនេះការអនុម័តផ្ដល់សច្ចាប័នពាក់ព័ន្ធនឹងបញ្ហាព្រំដែននឹងអាចធ្វើឱ្យជាតិកាន់តែមានការបែកបាក់គ្នាកាន់តែខ្លាំងថែមទៀតនាពេលខាងមុខ។ ពីព្រោះនឹងមានអ្នកនយោបាយគណបក្សមួយលើកយកបញ្ហាព្រំដែននេះទៅវាយប្រហារអ្នកនយោបាយគណបក្សមួយទៀតថាបានក្បត់ជាតិ ឬលក់ទឹកដី និងកាត់ទឹកដីឱ្យបរទេស។
លោកបានប្រាប់ភ្នំពេញប៉ុស្តិ៍ពីម្សិលមិញថា៖ «ពួកគេយកបញ្ហាព្រំដែនជាចំណុចរសើប និងចំណុចក្ដៅក្នុងការបញ្ឆេះកំហឹងប្រជាជនឱ្យងើបបះបោរ និង ងើបតស៊ូជាដើម។ គណបក្សប្រជាធិបតេយ្យមូលដ្ឋានព្រួយបារម្ភអំពីចំណុចនេះ ហើយមិនចង់ឱ្យប្រវត្តិសាស្ត្រច្រំដែលដ៏អាក្រក់ហ្នឹង កើតឡើងនៅក្នុងប្រទេសកម្ពុជាទៀតទេ»។
អ្នកនាំពាក្យ GDP បានលើកឡើងទៀតថា នៅពេលខាងមុខគណបក្សរបស់លោកនឹងដាក់ញត្តិទៅព្រឹទ្ធសភា និងស្ថាប័នព្រះមហាក្សត្រ ដើម្បីឱ្យស្ថាប័នកំពូលរបស់ជាតិទាំង ២ នេះចេញអន្តរាគមន៍ជុំវិញការអនុម័តរបស់រដ្ឋសភាលើសន្ធិសញ្ញាបំពេញបន្ថែមនេះ។
អតីតគណបក្សសង្គ្រោះជាតិបានអះអាងថា សន្ធិសញ្ញាឆ្នាំ ១៩៨៥ ជាសន្ធិសញ្ញាខុសច្បាប់ ពីព្រោះជាសន្ធិសញ្ញាដែលវៀតណាមបង្កើតឡើងជាឯកតោភាគីក្នុងទសវត្សរ៍ ៨០ នៅពេលកំពុងត្រួតត្រាប្រទេសកម្ពុជា។
ប៉ុន្តែលោក ទៀ បាញ់ បានប្រាប់អ្នកកាសែតបន្ថែមទៀតថា ការបោះបង្គោល និងខណ្ឌសីមាព្រំដែនគោកជាមួយប្រទេសវៀតណាមដែលទម្រាំសម្រេចចំនួន ៨៤ ភាគរយនេះ គឺជួបបញ្ហាស្មុគស្មាញជាច្រើន ព្រោះត្រូវចុះទៅពិនិត្យដល់ទីតាំងផ្ទាល់សាចុះសាឡើង និងពិនិត្យផ្ទៀងផ្ទាត់ជាមួយផែនទី និងនិយាមការឱ្យបានត្រឹមត្រូវរហូតដល់ភាគីទាំង ២ អាចឯកភាព ដោយមិនត្រូវឱ្យខាងណាត្រូវបាត់បង់ទឹកដីឡើយ។
លោកបន្តថា រដ្ឋាភិបាលមិនខ្វល់នឹងអ្នករិះគន់ទាំងនោះឡើយ ព្រោះពួកគេមួយចំនួនចេះតែនិយាយប៉ុណ្ណោះ និងមិនដែលទៅមើលការបោះបង្គោល ឬស្គាល់បង្គោលព្រំដែនផង។
លោក ទៀ បាញ់ បញ្ជាក់ថា៖ «ចង់និយាយម៉េចឱ្យគេនិយាយទៅមិនអាចហាមគេបានទេ។ ប៉ុន្តែកិច្ចការងារនេះយើងបានខិតខំធ្វើ ១៣ ឆ្នាំមកហើយ ទម្រាំបានប៉ុណ្ណេះ»។
ពីថ្ងៃម្សិលមិញ ភ្នំពេញប៉ុស្ដិ៍មិនអាចទាក់ទងសុំការអធិប្បាយពីអ្នកវិភាគនយោបាយ លោក មាស នី និងលោក ឡៅ ម៉ុងហៃ រួមទាំងលោក សុខ ទូច ប្រធានរាជបណ្ឌិត្យសភាកម្ពុជាជុំវិញការអនុម័តនេះបានទេ ដោយសារពួកលោកមិនលើកទូរស័ព្ទ៕