.jpg)
ភ្នំពេញៈ រដ្ឋសភាបានសម្រេចជាឯកច្ឆន្ទអនុម័តលើសេចក្ដីព្រាងច្បាប់កាលពីម្សិលមិញបើកផ្លូវឱ្យមានការសាងសង់រោងចក្រអគ្គិសនីដុតធ្យូងថ្មចំនួន ២ ដែលមានតម្លៃសរុបចំនួន ១ ៦៦៥ លានដុល្លារអាមេរិក ដើម្បីផ្គត់ផ្គង់អគ្គិសនីឲ្យបាន ១០០ ភាគរយសម្រាប់ដាក់ឲ្យប្រើប្រាស់ក្នុងក្របខ័ណ្ឌទូទាំងប្រទេសក្នុងឆ្នាំ ២០២៤។
សមាជិករដ្ឋសភាបានឲ្យដឹងនៅក្នុងកិច្ចប្រជុំថា រោងចក្រអគ្គិសនីដុតធ្យូងថ្មចំនួន ២ ដែល ១ ស្ថិតនៅក្នុងខេត្តកោះកុង និង ១ ទៀតស្ថិតនៅក្នុងខេត្តឧត្តរមានជ័យ។
លោក ហេង សំរិន ប្រធានរដ្ឋសភាបានដឹកនាំកិច្ចប្រជុំរដ្ឋសភាជាវិសាមញ្ញ ដើម្បីពិភាក្សាលើសេចក្ដីព្រាងច្បាប់ចំនួន ៣ ដែលជាគម្រោងវិនិយោគលើគម្រោងថាមពលអគ្គិសនីនៅកម្ពុជា។
ក្នុងចំណោមសេចក្ដីព្រាងច្បាប់ទាំង ៣ នោះគឺសេចក្ដីព្រាងច្បាប់ចំនួន ២ ជាគម្រោងសាងសង់រោងចក្រអគ្គិសនីដុតធ្យូងថ្មអានុភាព ៧០០ មេហ្គាវ៉ាត់នៅខេត្តកោះកុងរបស់ក្រុមហ៊ុន រ៉ូយ៉ាល់ អ៊ិនវេសម៉ិន គ្រុប ឯ.ក និងគម្រោងសាងសង់រោងចក្រអគ្គិសនីដុតធ្យូងថ្មអានុភាព ២៦៥ មេហ្គាវ៉ាត់នៅខេត្តឧត្តរមានជ័យរបស់ក្រុមហ៊ុន ហាន សេង ខូល ម៉ាញ។
ចំណែកសេចក្ដីព្រាងច្បាប់មួយទៀតគឺជាគម្រោងវិនិយោគសាងសង់ខ្សែបណ្ដាញបញ្ជូនអគ្គិសនីតង់ស្យុង ២៣០ គីឡូវ៉ុល តភ្ជាប់ពីរោងចក្រអគ្គិសនីដុតធ្យូងថ្មខេត្តឧត្តរមានជ័យមកអនុស្ថានីយសៀមរាបខាងកើតរបស់ក្រុមហ៊ុន ហាន សេង ខូល ម៉ាញ។
លោក វិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានលើកឡើងថា បច្ចុប្បន្ននៅក្នុងចំណោមខ្នងផ្ទះទាំងអស់ប្រមាណ ៣ លាន ៨ សែននៅទូទាំងប្រទេសគឺនៅសល់ខ្ទង់ ៥០ ម៉ឺនខ្នងផ្ទះទៀត ឬស្មើនឹង ៧% ដែលពុំទាន់មានអគ្គិសនីប្រើប្រាស់នៅឡើយ។
លោកបន្តថា ការបង្កើតរោងចក្រអគិ្គសនីដុតធ្យូងថ្មទាំង ២ នេះមានបំណងផ្គត់ផ្គង់អគ្គិសនីទៅកាន់ខ្នងផ្ទះនៅសល់ប្រហែល ៧% នោះដើម្បីឱ្យពលរដ្ឋនៅក្នុងក្របខ័ណ្ឌទូទាំងប្រទេសមានអគ្គិសនីប្រើប្រាស់ទាំងអស់គ្នានៅត្រឹមឆ្នាំ ២០២៤ ខាងមុខ។
លោកថា៖ «ទី ១ យើងធ្វើយ៉ាងណាឱ្យការផ្គត់ផ្គង់អគ្គិសនីឱ្យពលរដ្ឋទាំងអស់នៅក្របខ័ណ្ឌទូទាំងប្រទេសមានអគ្គិសនីប្រើប្រាស់ ហើយទី ២ ដោយសារថាមពលអគ្គិសនីជាស្នូលនៃការអភិវឌ្ឍ គឺធ្វើយ៉ាងណាដើម្បីជួយបង្កើតការងារជូនពលរដ្ឋយើងបន្ថែមទៀត»។
លោក វិចទ័រ ហ្សូនា បញ្ជាក់ថាគម្រោងសាងសង់រោងចក្រអគ្គិសនីនៅខេត្តកោះកុងដោយក្រុមហ៊ុនរបស់លោក គិត ម៉េង គឺមានទំហំទឹកប្រាក់វិនិយោគចំនួន ១៤០០ លានដុល្លារ ខណៈគម្រោងសាងសង់រោងចក្រអគ្គិសនីនៅខេត្តឧត្តរមានជ័យដែលជាក្រុមហ៊ុនខ្មែរសហការជាមួយចិនគឺមានទំហំទឹកប្រាក់ចំនួន ២៦៥ លានដុល្លារ។
បើតាមតួលេខពីក្រសួងរ៉ែ និងថាមពលបញ្ជាក់ដែរថា ភូមិចំនួន ១៣១៣១ គឺទទួលបានអគ្គិសនីប្រើប្រាស់ក្នុងចំណោមភូមិសរុបទាំងអស់ចំនួន ១៤១៦៨ ភូមិ ខណៈក្រសួងអះអាងថាត្រឹមឆ្នាំ ២០២០ នេះការតភ្ជាប់បណ្ដាញអគ្គិសនីចូលភូមិគឺនឹងធ្វើឱ្យបាន ១០០%៕
