.jpg)
ពលរដ្ឋជិះកាត់កុងទ័រភ្លើងស្ថិតនៅសង្កាត់ចាក់អង្រេក្រោម ខណ្ឌមានជ័យ ។ ហុង មិនា
ភ្នំពេញៈ រដ្ឋាករទឹកស្វយ័តក្រុងភ្នំពេញ និងអគ្គិសនីកម្ពុជាប្រកាសមិនផាកពិន័យ និងផ្តាច់ការផ្គត់ផ្គង់ទឹក និងភ្លើងដល់ពលរដ្ឋនោះទេ បើទោះជាអ្នកប្រើប្រាស់មិនទាន់បង់សេវានេះក្នុងអំឡុងពេលបិទខ្ទប់ ប៉ុន្តែអំពាវនាវឲ្យអ្នកមានលទ្ធភាពចូលរួមបង់សេវាឲ្យបានទាន់ពេល។
រាជធានីភ្នំពេញ និងក្រុងតាខ្មៅត្រូវបានរាជរដ្ឋាភិបាលប្រកាសបិទខ្ទប់ ខណៈតំបន់មួយចំនួន ត្រូវបានកំណត់ជា «តំបន់ក្រហម» ដោយហាមប្រាមមនុស្សចេញពីផ្ទះដែលជាផ្នែកមួយនៃវិធានការទប់ស្កាត់ជំងឺកូវីដ១៩ ដែលកំពុងរីករាលដាលនៅកម្ពុជា។
លោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញបានប្រាប់ភ្នំពេញប៉ុស្តិ៍នៅថ្ងៃនេះថា ដោយយល់ពីទុក្ខលំបាករបស់ពលរដ្ឋក្នុងរាជធានីភ្នំពេញ ការខកខានមិនទាន់ទូទាត់សេវាទឹកតាមការកំណត់នឹងមិនត្រូវទទួលការផាកពិន័យនោះទេ។ នៅក្នុងអំឡុងពេលនេះបើទោះជាពលរដ្ឋមិនទាន់បានបង់សេវានេះ ក៏មិនត្រូវបានផ្តាច់សេវាទឹកមិនប្រើប្រាស់នោះដែរ។
លោកបានបញ្ជាក់ថា៖ «ក្នុងស្ថានភាពនេះ យើងត្រូវចូលរួមជាមួយរដ្ឋាភិបាល ធ្វើយ៉ាងម៉េច ផ្គត់ផ្គង់ទឹកឲ្យប្រជាពលរដ្ឋយើងក្នុងក្រុងឲ្យបានប្រើប្រាស់គ្រប់គ្រាន់។ រឿងបង់ ឬមិនបង់ថ្លៃទឹកនោះក្នុងពេលនេះ គឺយើងទុកមួយឡែកសិន ហើយគណៈគ្រប់គ្រងយើង ក៏បានសម្រេច យើងនឹងមិនពិន័យលើពួកគាត់ទេ»។
ស្រដៀងគ្នានេះលោក កែវ រតនៈ អគ្គនាយកអគ្គិសនីកម្ពុជាបានប្រាប់ភ្នំពេញប៉ុស្តិ៍នៅថ្ងៃនេះដែរថា ការខកខានមិនបានបង់ថ្លៃភ្លើងទាន់ពេលវេលាក៏មិនទទួលការពិន័យ និងផ្តាច់សេវានេះមិនឲ្យប្រើប្រាស់នោះដែរ។ក៏ប៉ុន្តែ លោក នៅតែទទូចឲ្យពលរដ្ឋដែលមានលទ្ធភាព គួរចូលរួមបង់សេវានេះតាមរយៈប្រព័ន្ធអេឡិចត្រូនិកឲ្យបានគ្រប់គ្នា ដើម្បីអាចឲ្យអគ្គិសនីកម្ពុជា មានថវិកាបង្វិលទៅទូទាត់ថ្លៃជាវភ្លើងនេះជាមួយប្រទេសជិតខាង។
លោកបានបញ្ជាក់ថា៖ «យើងអត់មានពិន័យអ្វីទៅពួកគាត់ទេបើពួកគាត់បង់មិនទាន់ពេលវេលា ប៉ុន្តែយើងក៏សំណូមពរឲ្យបងប្អូនយើងជួយបង់ឲ្យអស់លទ្ធភាពក្នុងកម្រិតណា ដែលអាចបង់បាន។ ដោយសារតែអគ្គិសនីកម្ពុជាយើងត្រូវការថវិកានេះយកទៅសង់ថ្លៃភ្លើង ដែលយើងបានទិញពីគេដូចគ្នា»។
លោកបញ្ជាក់បន្ថែមថា៖ «មិនត្រឹមតែមិនផ្តាច់ភ្លើងទេ ក្នុងអំឡុងពេលនេះ បើបងប្អូនមានបញ្ហាអ្វី នៅកន្លែងណា នៅតែអាចហៅភ្នាក់ងារយើងទៅពិនិត្យមើលដល់លំនៅឋានគាត់ បើទោះបីតំបន់នោះស្ថិតក្នុងតំបន់ក្រហមក៏ដោយ»។
ក្រៅពីនេះ លោក កែវ រតនៈ បានអះអាងថា ចំពោះករណីដែលរដ្ឋាភិបាលផ្តល់សេវានេះដោយមិនគិតថ្លៃជូនពលរដ្ឋដែលមានផ្ទុកជំងឺកូវីដ១៩នោះគឺពលរដ្ឋនៅតែត្រូវបង់សេវានេះតាមប្រតិបត្តិការដដែលទេដោយគ្រាន់តែក្រសួងសេដ្ឋកិច្ចនឹងទូទាត់ថវិកាដែលបានបង់នេះជូនពួកគាត់នៅពេលក្រោយវិញ។
កញ្ញា កាន់ និកា ជាពលរដ្ឋរស់នៅក្នុងតំបន់ផ្លូវរថភ្លើងសង្កាត់បឹងកក់ ១ ខណ្ឌទួលគោក រាជធានីភ្នំពេញបានសាទរចំពោះការមិនផាកពិន័យរបស់ស្ថាប័នទាំង២នេះដោយកញ្ញាថ្លែងថា ការលើកលែងនេះបានចូលរួមជួយពលរដ្ឋដែលកំពុងប្រឈមនឹងការបិទខ្ទប់ ហាមមិនឲ្យចេញពីផ្ទះ។
ក៏ប៉ុន្តែកញ្ញាបានយល់ស្របថា ក្នុងកាលៈទេសៈនេះ ពលរដ្ឋដែលមានលទ្ធភាព គួរតែចូលរួមបង់សេវាឲ្យបានទាន់ពេលវេលាតាមរយៈប្រព័ន្ធបច្ចេកវិទ្យាដោយមិនត្រូវមានការគេចវេះនោះទេ ព្រោះថា មុននឹងក្រោយ ពលរដ្ឋគ្រប់រូបនៅតែត្រូវបង់សេវានេះដដែល។
កញ្ញា បានបញ្ជាក់ថា៖ «ប្រសិនបើគាត់ មិនទទួលរងការពិន័យនេះ គឺជាការជួយសម្រួលថវិកាពលរដ្ឋក្នុងគ្រានេះដែរអ៊ីចឹង។ ម្យ៉ាងកន្លងទៅឲ្យតែមានពលរដ្ឋមានការបង់យឺតយ៉ាវ គឺនឹងត្រូវបានផ្តាច់ទឹក ផ្តាច់ភ្លើង មិនឲ្យប្រើប្រាស់ហើយ។ តែខ្ញុំក៏មានគំនិតថា បើយើងមានលុយហើយ គួរបង់ទៅ បើបង់ផ្ទាល់មិនបាន គឺបង់តាមរយៈប្រព័ន្ធវីង ឬធនាគារ ABA អី អ៊ីចឹងទៅ»៕
