ភ្នំពេញៈ អង្គការ Save the Children និងយូនីសេហ្វ លើកឡើងថា ក្នុងអំឡុងពេលមានករណីជំងឺកូវីដ ១៩ រាជរដ្ឋាភិបាលកម្ពុជាបានរៀបចំកម្មវិធីឧបត្ថម្ភប្រាក់ប្រចាំខែជូនគ្រួសារក្រីក្រជាង ២,២ លាននាក់ ប៉ុន្តែអង្គការទាំងនេះថា ប្រសិនបើពុំមានវិធានការបន្ទាន់ទេ កុមារក្រីក្រនៅប្រទេសមានចំណូលទាប និងមធ្យមអាចកើន ១៥ ភាគរយនៅចុងឆ្នាំនេះ។
សេចក្តីប្រកាសព័ត៌មានរួមរបស់អង្គការទាំង ២ កាលពីថ្ងៃទី ១ ខែមិថុនា បានបញ្ជាក់ថា៖ «ចាប់តាំងពីពេលដែលមានករណីជំងឺកូវីដ១៩មក រាជរដ្ឋាភិបាលកម្ពុជាបានពង្រីកវិសាលភាពកម្មវិធីគាំពារសង្គមរបស់ខ្លួន។ កម្មវិធីឧបត្ថម្ភសាច់ប្រាក់ប្រចាំខែជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩ ថ្មី ដោយផ្ដោតលើគ្រួសារដែលត្រូវបានកំណត់អត្តសញ្ញាណថា ជាគ្រួសារក្រីក្របានទទួលការឯកភាពហើយគ្រោងនឹងប្រកាសអនុវត្តនៅដើមខែមិថុនា ឆ្នាំ ២០២០»។
សេចក្តីប្រកាសព័ត៌មានបន្ថែមថា «ដោយមានការគាំទ្រពីយូនីសេហ្វ សហភាពអឺរ៉ុប Sida GIZ និងអ្នកផ្ដល់ជំនួយផ្សេងទៀតកម្មវិធីនេះមានបំណងគ្របដណ្ដប់លើពលរដ្ឋប្រមាណ ៥៤ ម៉ឺនគ្រួសារ ដែលកំពុងរស់ក្នុងភាពក្រីក្រ (ត្រូវបានកំណត់អត្តសញ្ញាណថាជាគ្រួសារក្រីក្រ) ឬស្មើនឹងជាង ២,២ លាននាក់»។
សេចក្តីប្រកាសព័ត៌មានបន្ថែមថា កម្មវិធីនេះត្រូវបានរៀបចំឡើងដើម្បីឆ្លើយតបចំពោះតម្រូវការរបស់ក្រុមអ្នកងាយរងគ្រោះបំផុតរួមទាំងកុមារអាយុពី ០-៥ ឆ្នាំជនមានពិការភាព ចាស់ជរា និងអ្នកដែលរស់នៅជាមួយនឹងមេរោគអេដស៍/ជំងឺអេដស៍។
អង្គការទាំង ២ ឲ្យដឹងថាកម្មវិធីនេះនឹងផ្ដល់ថវិកាបន្ថែមលើកម្មវិធីដែលមានស្រាប់ ដូចជា កម្មវិធីជួយស្ត្រីមានផ្ទៃពោះ និងកុមារអាយុ ០-២ ឆ្នាំ និងកម្មវិធីផ្ដល់អាហារូបករណ៍ដល់កុមារដែលកំពុងរៀននៅបឋមសិក្សា និងមធ្យមសិក្សាដែលកំពុងអនុវត្តនាពេលបច្ចុប្បន្ន។
បើតាមសេចក្តីប្រកាសព័ត៌មានផលប៉ះពាល់សេដ្ឋកិច្ចដោយសារជំងឺកូវីដ១៩អាចរុញច្រានកុមារ ៨៦ លាននាក់បន្ថែមទៀតនៅក្នុងពិភពលោកឱ្យធ្លាក់ចូលក្នុងភាពក្រីក្រនៅចុងឆ្នាំនេះគឺកើនឡើង ១៥ ភាគរយ។
សេចក្តីប្រកាសព័ត៌មានបន្ថែមថា «ការវិភាគនេះបង្ហាញថា ប្រសិនបើពុំមានការចាត់វិធានការបន្ទាន់ ដើម្បីការពារគ្រួសារពីភាពលំបាកផ្នែកហិរញ្ញវត្ថុដែលបង្កឡើងដោយការរាតត្បាតជាសកលទេ ចំនួនកុមារដែលរស់នៅក្រោមបន្ទាត់នៃភាពក្រីក្ររបស់ជាតិក្នុងបណ្តាប្រទេសចំណូលទាប និងមធ្យមអាចកើនឡើងរហូតដល់ ៦៧២ លាននាក់គិតត្រឹមចុងឆ្នាំនេះ»។
លោក ណុប កនណាវុឌ្ឍ អ្នកនាំពាក្យក្រសួងផែនការបានប្រាប់ភ្នំពេញប៉ុស្តិ៍កាលពីថ្ងៃទី ១ ខែមិថុនាថា ក្រសួងផែនការបានបញ្ចប់ការកំណត់អត្តសញ្ញាណកម្មគ្រួសារក្រីក្រតាមការស្នើសុំក្នុងអំឡុងពេលកូវីដ១៩នៅជនបទរួចហើយកាលពីចុងខែមុន ហើយកំពុងរៀបចំបូកសរុបរបាយការណ៍នេះ។ បន្ទាប់មកក្រសួងផែនការនឹងពិភាក្សាជាមួយក្រសួងសេដ្ឋកិច្ច និងហិរញ្ញវត្ថុដើម្បីរៀបចំការប៉ាន់ប្រមាណការចំណាយ។
លោកថា៖ «ការងារបន្ទាប់គឺយើងធ្វើ (កំណត់អត្តសញ្ញាណកម្មគ្រួសារក្រីក្រ) នៅទីប្រជុំជនធ្វើយ៉ាងម៉េចឱ្យចប់នៅក្នុងខែមិថុនាហ្នឹង»។
ហ្វេសប៊ុកក្រសួងផែនការកាលពីថ្ងៃទី ១ មិថុនា បានដកស្រង់សម្ដីលោក ឆាយ ថន រដ្ឋមន្ត្រីក្រសួងផែនការ ខណៈលោកចុះជួបពលរដ្ឋក្រីក្រមានបណ្ណសមធម៌ ២២១ គ្រួសារ នៅឃុំត្រពាំងគង ស្រុកសំរោងទង ខេត្តកំពង់ស្ពឺថា ក្នុងឃុំត្រពាំងគងនេះការកំណត់អត្តសញ្ញាណកម្មគ្រួសារក្រីក្រក្នុងអំឡុងពេលប្រយុទ្ធប្រឆាំងកូវីដ១៩នេះបានរកឃើញមាន ៨៩ បន្ថែមទៀត ដែលត្រូវយកចិត្តទុកដាក់គិតគូរឧបត្ថម្ភ។ រីឯគ្រួសារក្រីក្រផ្សេងទៀតនៅទូទាំងប្រទេស ក៏ត្រូវគិតគូរឧបត្ថម្ភដូចគ្នានេះដែរ៕