.jpg)
ភ្ញៀវទេសចរមួយក្រុមកំពុងឈរគយគន់ប្រាសាទបាយ័នកាលពីពេលកន្លងមក។ ហុង មិនា
សៀមរាបៈ រដ្ឋាភិបាលជប៉ុន និងរដ្ឋាភិបាលកម្ពុជា បានផ្ដល់មូលនិធិ សរុប ១,៥ លានដុល្លារ សម្រាប់ដំណើការអនុវត្តគម្រោងជួសជុល កែលម្អឡើងវិញ នូវប្រាសាទបាយ័នជំហានទី ៥ ដែលផ្ដោតសំខាន់ទៅលើការសិក្សា និងស្ដារឡើងវិញនូវ រចនាសម្ព័ន្ធរឹងមាំ នៃតួកណ្ដាលនៃប្រាសាទបាយ័ន រួមទាំងការអភិរក្សនូវក្បាច់ចម្លាក់នានា ដែលមាននៅក្នុងផ្ទៃនៃប្រាសាទ។ នេះបើយោងតាម លោក Philippe Delanghe មន្ត្រីជំនាញផ្នែកកម្មវិធីវប្បធម៌ នៃអង្គការយូណេស្កូ ប្រចាំទីក្រុងភ្នំពេញ នៅថ្ងៃទី ២៥ ខែកញ្ញា។
លោក Philippe បានថ្លែងថា៖«តាមរយៈកិច្ចព្រមព្រៀងរវាង អង្គការយូណេស្កូប្រចាំទីក្រុងភ្នំពេញ និង ក្រសួងវប្បធម៌ និង វិចិត្រសិល្បះ កាលពីថ្ងៃចន្ទ គម្រោងជួសជុលកែលម្អឡើងវិញ នូវប្រាសាទបាយ័នជំហានទី ៥ នេះ មានរយៈពេលបីឆ្នាំ (២០១៨-២០២០) ដោយមានការចូលរួមវិភាគទាន ពីរដ្ឋាភិបាលជប៉ុន នូវទឹកប្រាក់១លានដុល្លារអាមេរិក និង ៥០ម៉ឺនដុល្លារពីរដ្ឋាភិបាលកម្ពុជា»។
លោក ស៊ុំ ម៉ាប់ អគ្គនាយកអាជ្ញាធរជាតិអប្សារា បានថ្លែងថា ការងារជួសជុលកែលម្អប្រាសាទ ក្នុងតំបន់រមណីយដ្ឋានអង្គរ ដែលជាសម្បត្តិបេតិកភណ្ឌពិភពលោក មានសារៈសំខាន់ណាស់ សម្រាប់មនុស្សជាតិ។
ប្រាសាទនៅក្នុងតំបន់ រមណីយដ្ឋានអង្គរមានចំនួន ៩១ ប្រាសាទ បាននិងកំពុងដំណើរការសិក្សាស្រាវជ្រាវ ជួសជុលកែលម្អ និងការពារអភិរក្សឲ្យនៅគង់វង្សយូរអង្វែងច្រើនឆ្នាំទៅមុខទៀត ដើម្បីទុកជាប្រយោជន៍សម្រាប់មនុស្សជំនាន់ក្រោយ បានដឹងនិងធ្វើការសិក្សាស្រាវជ្រាវស្វែងយល់ពីសំណង់ប្រវត្តិសាស្ត្រ ដែលឆ្លុះបញ្ចាំងពីវប្បធម៌ប្រពៃណី និងជីវិតរស់នៅប្រចាំថ្ងៃរបស់មនុស្សនាសម័យបុព្វកាលដ៏រុងរឿងរបស់កម្ពុជា។
លោកបានបញ្ជាក់ថា៖«វិភាគទានទាំងនេះ គឺជាផ្នែកមួយ នៃការចូលរួមដ៏ធំធេងរបស់រដ្ឋាភិបាលប្រទេសជប៉ុន នៅក្នុងកិច្ចការពារនិងអភិរក្សប្រាសាទបាយ័ន ដែលជាផ្នែកមួយនៃប្រាសាទអង្គរធំ ក្នុងតំបន់រមណីយដ្ឋានប្រាសាទបេតិកភណ្ឌពិភពលោក ហើយវានឹងជួយដល់ដំណើរការអនុវត្តគម្រោងជួសជុលកែលម្អនិងស្ដារឡើងវិញ នូវប្រាសាទបាយ័នក្នុងជំហានទី ៥ នេះ បានប្រព្រឹត្តទៅបានដោយជោគជ័យ»។
ប្រទេសជប៉ុន តាមរយៈសាកលវិទ្យាល័យ Waseda បានដើរតួនាទីដ៏សំខាន់ នៅក្នុងការសិក្សាស្រាវជ្រាវ ការពារនិងអភិរក្ស ប្រាសាទបេតិកភណ្ឌពិភពលោក តាមរយៈការរៀបចំសម្របសម្រួលផ្នែករដ្ឋបាលដោយអង្គការយូណេស្កូ បានផ្ដល់ជំនួយជាបន្តបន្ទាប់លើគម្រោងនេះ តាមរយៈមូលនិធិសម្រាប់ការអភិរក្សវប្បធម៌បេតិកភណ្ឌពិភពលោក( Japan Trust Fund for the Conservation of Culture World Heritage)។
គួរបញ្ជាក់ថា នៅក្នុងដំណើរការអនុវត្តគម្រោងជួសជុលកែលម្អ និងស្ដារឡើងវិញ នូវប្រាសាទបាយ័ន ក្នុងជំហានទី៣ ដែលមានរយៈពេល៦ឆ្នាំ ដែលចាប់ផ្ដើមពីខែ មិថុនាឆ្នាំ ២០០៥ ដល់ខែកក្កដាឆ្នាំ ២០១១ ប្រទេសជប៉ុនបានផ្ដល់ជំនួយជាទឹកប្រាក់ចំនួន ៣២៦៨ ២៨៦ លានដុល្លារអាមេរិក ដែលជំនួយនេះ ស្ថិតនៅក្រោមក្របខ័ណ្ឌរួម ដែលត្រូវបានគេហៅថាជប៉ុន-អប្សរាការពារថែរក្សាអង្គរ (JASA)។
គម្រោងនេះត្រូវបានអនុវត្តក្រោមកិច្ចសហការជាមួយអាជ្ញាធរអប្សរា (APSARA) ដែលផ្តល់នូវការចូលរួមវិភាគទាន ៥០ ម៉ឺនដុល្លារពីរាជរដ្ឋាភិបាលកម្ពុជាផងដែរ។ នៅក្នុងជំហានទី ៤ នៃគម្រោងនេះ ដែលមានរយៈពេល៥ឆ្នាំ ដោយចាប់ផ្ដើមកាលពីខែតុលា ឆ្នាំ ២០១១ ដល់ ឆ្នាំ២០១៥ រដ្ឋាភិបាលជប៉ុន បានផ្ដល់ជំនួយថវិកាចំនួន ២,៥ លានដុល្លារអាមេរិក ខណៈអាជ្ញាធរអប្សរាផ្ដល់វិភាគទាន ៥០ ម៉ឺនដុល្លារ៕
