.jpg)
សកម្មភាពពលរដ្ឋបង់សំណាញ់រកត្រីនៅបឹងតាមោកកាលពីពេលកន្លងមក។ ហុង មិនា
ភ្នំពេញៈ រាជរដ្ឋាភិបាលបានសម្រេចកាត់ផ្ទៃដីបឹងតាមោកចំនួន ៨៣ ហិកតាបន្ថែមទៀតជូនរដ្ឋបាលរាជធានីភ្នំពេញ និងអគ្គស្នងការដ្ឋានគរបាលជាតិដើម្បីបង្កើតសួន និងឧទ្យានធម្មជាតិសាធារណៈ និងសាងសង់អគាររួមទាំងហេដ្ឋារចនាសម្ព័ន្ធនាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិក្រសួងមហាផ្ទៃ។ នេះបើតាមលិខិតរបស់គណៈរដ្ឋមន្ត្រី។
យោងតាមលិខិតលេខ ៣៦៨ សជណ.មយ ចុះថ្ងៃទី ១៣ ខែមីនា ឆ្នាំ ២០២០ ដែលចុះហត្ថលេខាដោយលោក ឈិត សុខុន រដ្ឋលេខាធិការទីស្ដីការគណៈរដ្ឋមន្ត្រីទទួលបន្ទុកជួយសម្របសម្រួលការងារក្រសួងមហាផ្ទៃ ក្រសួងរៀបចំដែនដីនគរូបនីយកម្ម និងសំណង់ក្រសួងទេសចរណ៍ និងក្រសួងបរិស្ថានដែលភ្នំពេញប៉ុស្តិ៍ទើបទទួលបានកាលពីថ្ងៃពុធបានគូសបញ្ជាក់ថា៖ «រាជរដ្ឋាភិបាលយល់ព្រមផ្តល់ផ្ទៃបឹងតាមោកទំហំ ៧៥ ហិកតាស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ ដើម្បីបង្កើតសួន និងឧទ្យានធម្មជាតិសាធារណៈនៅរាជធានីភ្នំពេញ» ។
ការសម្រេចនេះបានយោងតាមលិខិតលេខ ០១៦.២០ លស.គ ចុះថ្ងៃទី ៥ ខែ មីនា ឆ្នាំ ២០២០ របស់រដ្ឋបាលរាជធានីភ្នំពេញ និងយោងលិខិតលេខ១២៨.ខន.០២០ សជណ ចុះថ្ងៃទី ៩ ខែ មីនា ឆ្នាំ ២០២០ របស់ខុទ្ទកាល័យលោកនាយករដ្ឋមន្ត្រី ហ៊ុន សែន និងយោងតាមចំណារដ៏ខ្ពង់ខ្ពស់បំផុតរបស់លោកនាយករដ្ឋមន្ត្រី ហ៊ុនសែន ចុះថ្ងៃទី ៨ ខែមីនា ឆ្នាំ ២០២០។
នៅថ្ងៃដដែលនោះទីស្តីការគណៈរដ្ឋមន្ត្រីក៏បានចេញលិខិតមួយច្បាប់ទៀតផងដែរ (លិខិតលេខ ៣៦៩ សជណ.មយចុះថ្ងៃទី ១៣ ខែមីនាឆ្នាំ ២០២០) ជម្រាបជូនលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ,លោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ដោយលិខិតនោះបញ្ជាក់ថា៖ «រាជរដ្ឋាភិបាលយល់ព្រមផ្តល់ផ្ទៃបឹងតាមោក (បឹងកប់ស្រូវ) ទំហំ ៨ ហិកតា ស្ថិតនៅសង្កាត់គោករកា ខណ្ឌព្រែកព្នៅ-រាជធានីភ្នំពេញដើម្បីសាងសង់អគារ និងហេដ្ឋារចនាសម្ព័ន្ធនាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិក្រសួងមហាផ្ទៃ»។
ជុំវិញការសម្រេចកាត់ដីបឹងតាមោកចំនួន ៨៣ ហិកតាបន្ថែមទៅឲ្យរដ្ឋបាលរាជធានីភ្នំពេញ និងអគ្គស្នងការនគរបាលជាតិនៃក្រសួងមហាផ្ទៃនេះលោកឯក ថាអ្នកនាំពាក្យទីស្ដីការគណៈរដ្ឋមន្ត្រីបានប្រាប់ភ្នំពេញ-ប៉ុស្តិ៍នៅល្ងាចថ្ងៃពុធថា លោកនៅមិនទាន់ដឹងច្បាស់អំពីដំណឹងនេះនៅឡើយទេ។
ទោះជាយ៉ាងណាលោក ឯក ថា បានបញ្ជាក់ថា៖ «ជាទូទៅការសម្រេចអ្វីមួយរបស់រាជរដ្ឋាភិបាលគឺដើម្បីបម្រើផលប្រយោជន៍សាធារណៈ បម្រើផលប្រយោជន៍ប្រជាពលរដ្ឋ និងប្រទេសជាតិ»។
គួររំឭកថា ទីស្តីការគណៈរដ្ឋមន្ត្រីក៏ធ្លាប់បានជម្រាបជូនរដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងអភិបាលរាជធានី-ភ្នំពេញតាមរយៈលិខិតលេខ ៨២៧ សជណ.ចុះថ្ងៃទី ២ ខែសីហាឆ្នាំ ២០១៨ ថា រាជរដ្ឋាភិបាលយល់ព្រមផ្តល់ជាគោលការណ៍យកដីចំនួន ២០ ហិកតា នៅបឹងតាមោកដើម្បីសាងសង់ជាផ្សារផ្គត់ផ្គង់បន្លែផ្លែឈើនិងជាចំណតរថយន្ត និងអនុញ្ញាតរើផ្សារបន្លែពីផ្សារដើមគទៅទីតាំងថ្មីនៅបឹងតាមោកវិញ។
បឹងតាមោក ឬបឹងកប់ស្រូវស្ថិតនៅក្នុងភូមិសាស្ត្ររាជធានី-ភ្នំពេញត្រូវបានគ្រប់គ្រងដោយអនុក្រឹត្យលេខ ២០ អនក្របកចុះថ្ងៃទី ២០ ខែ កុម្ភៈ ឆ្នាំ ២០១៦ កំណត់ផ្ទៃបឹងមួយនេះមានទំហំ ៣ ២៣៥,៧ ហិកតា ក្នុងរាជធានីភ្នំពេញជាសម្បត្តិសាធារណៈរបស់រដ្ឋ៕
