The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​កាត់បន្ថយ​រយៈពេល​វិនិយោគ​ក្រុមហ៊ុន​ដីសម្បទាន​ចំនួន​ ៩

រដ្ឋាភិបាល​កាត់បន្ថយ​រយៈពេល​វិនិយោគ​ក្រុមហ៊ុន​ដីសម្បទាន​ចំនួន​ ៩

តំបន់​ដីសម្បទាន​មួយ​កន្លែង​នៅ​ខេត្ត​រតនគិរី​ដែល​ពោរពេញ​ដោយ​គំនរ​ឈើ​។
តំបន់​ដីសម្បទាន​មួយ​កន្លែង​នៅ​ខេត្ត​រតនគិរី​ដែល​ពោរពេញ​ដោយ​គំនរ​ឈើ​។ រូបថត អាដហុក

រដ្ឋាភិបាល​កាត់បន្ថយ​រយៈពេល​វិនិយោគ​ក្រុមហ៊ុន​ដីសម្បទាន​ចំនួន​ ៩

ភ្នំពេញៈ រដ្ឋាភិបាល​បាន​សម្រេច​កាត់​បន្ថយ​រយៈពេល​វិនិយោគ​ក្រុមហ៊ុន​ដីសម្បទាន​សេដ្ឋកិច្ច​ចំនួន ៩ បន្ថែម​ទៀត​មាន​ផ្ទៃដី​សរុប​ជាង ២ ម៉ឺន​ហិកតា​ក្នុង​ខេត្ត​កំពង់ធំ​ដែល​ស្ថិត​ក្រោម​ការ​គ្រប់គ្រង​របស់​ក្រសួង​បរិស្ថាន​ឲ្យ​មក​នៅ​ត្រឹម ៥០ ឆ្នាំ​វិញ​ក្រោយ​ធ្វើការ​វាយតម្លៃ​ពី​ផលប៉ះពាល់​រួចរាល់។

គិត​ចាប់​តាំងពី​ការ​សម្រេច​ជា​គោលការណ៍​ក្នុង​ការ​កាត់បន្ថយ​រយៈពេល​នៃ​ការ​អនុវត្ត​គម្រោង​វិនិយោគ​អភិវឌ្ឍន៍​សម្បទាន​ដី​សេដ្ឋកិច្ច​ដោយសារ​រាជរដ្ឋាភិបាល​រកឃើញ​ថា​គម្រោង​ក្រុមហ៊ុន​ខ្លះ​យឺតយ៉ាវ និង​ខ្លះ​មិន​ដំណើរការ​មក​ក្រុមហ៊ុន​សរុប​​ចំនួន ៣៧ ហើយ​ដែល​ស្ថិត​ក្រោម​ក្របខ័ណ្ឌ​ក្រសួង​បរិស្ថាន​ត្រូវ​បាន​វាយតម្លៃ និង​សម្រួល​រយៈពេល។

សេចក្តី​ប្រកាស​ព័ត៌មាន​របស់​ក្រសួង​បរិស្ថាន​ចុះ​ថ្ងៃ​ទី ១៥ ខែ​កញ្ញា បាន​ឲ្យ​ដឹង​ថា​ក្រុមហ៊ុន​ចំនួន ៩ បន្ថែម​ទៀត​មាន​ផ្ទៃដី​សរុប ២១ ៨៣៩ ហិកតា​ដែល​ស្ថិត​ក្នុង​តំបន់​ប្រើប្រាស់​ដោយ​ចីរភាព​នៃ​ដែន​ជម្រក​សត្វព្រៃ​បឹងពែរ​ក្នុង​ភូមិសាស្ត្រ​ខេត្ត​កំពង់ធំ។

ក្រសួង​បរិស្ថាន​បាន​ពិនិត្យ និង​វាយតម្លៃ​គម្រោង​វិនិយោគ​អភិវឌ្ឍន៍​ទាំងអស់​ចំនួន​សរុប ១១៣ ដែល​មាន​ផ្ទៃដី​សរុប ៦១០ ២៩៦,៧៥ ហិកតា​ដែល​ក្នុង​នោះ​គម្រោង​ចំនួន ១០៩ ត្រូវ​ដាក់​ឆ្លង​អង្គប្រជុំ​គណៈកម្មាធិការ​អន្តរក្រសួង​ដើម្បី​ពិភាក្សា និង​លើក​សំណើ​ជូន​ប្រមុខ​រាជរដ្ឋាភិបាល​ក្នុង​ការ​ពិភាក្សា និង​លើក​សំណើ​ជូន​ប្រមុខ​រដ្ឋាភិបាល​សម្រេច។

ជា​លទ្ធផល​គម្រោង​របស់​ក្រុមហ៊ុន​ចំនួន ២៣ លើ​ផ្ទៃដី​សរុប ៩០៦៨២ ហិកតា​ត្រូវ​បាន​រាជរដ្ឋាភិបាល​សម្រេច​និរាករណ៍ (ដកហូត) សិទ្ធិ​វិនិយោគ​ក្រោយពី​រកឃើញ​ថា​ក្រុមហ៊ុន​ទាំងនោះ​មិន​បាន​គោរព​តាម​គោលការណ៍ និង​នីតិវិធី​នានា​ដែល​​បាន​កំណត់​។

នាយ​ខុន្ទកាល័យ​ក្រសួង​បរិស្ថាន​លោក ស្រ៊ុន ដារិទ្ធិ បាន​ឲ្យ​ដឹង​ថា​ក្នុង​ចំណោម​ក្រុមហ៊ុន​ចំនួន ៩០ ដែល​នៅ​សេសសល់​ក្នុង​ក្របខ័ណ្ឌ​ក្រសួង​នេះ​គឺ​មាន​តែ​ក្រុមហ៊ុន ៤ ទៀត​ប៉ុណ្ណោះ​ដែល​នឹង​ត្រូវ​ឆ្លង​កិច្ចប្រជុំ​វាយតម្លៃ​នៅ​ថ្ងៃ​ទី ១៧ ខែ​សីហា​ខាង​មុខ​នេះ​ដើម្បី​បញ្ចប់​ទាំង​ស្រុង​នូវ​ការ​ត្រួត​ពិនិត្យ និង​វាយតម្លៃ។

លោក​ថា៖ «ជាក់ស្តែង​ក្រុមហ៊ុន​ទាំង ៩០ នេះ​គឺ​ត្រូវ​បាន​ស្នើ​កាត់​បន្ថយ​រយៈពេល​វិនិយោគ​មក​ត្រឹម ៥០ ឆ្នាំ​គ្រាន់តែ​ខ្លះ​មិន​ទាន់​ទទួល​បាន​សេចក្តី​ជូន​ដំណឹង​ផ្លូវការ​ហើយ​រហូត​​មក​ទល់​ពេល​នេះ​គឺ​យើង​ចេញ​បាន ៣៧ ​ក្រុមហ៊ុន»។

លោក ដារិទ្ធិ បាន​ឲ្យ​ដឹង​ថា ​គិត​ចាប់ពី​ខែ​ឧសភា ​ឆ្នាំ​ ២០១២ មក​រដ្ឋាភិបាល​បាន​ចេញ​បទបញ្ជា ០១ សម្រេច​បញ្ឈប់​​ការ​ផ្តល់​ដីសម្បទាន​សេដ្ឋកិច្ច​ហើយ​បច្ចុប្បន្ន​នេះ​ការ​ត្រួត​ពិនិត្យ និង​វាយតម្លៃ​ក្នុង​ក្របខ័ណ្ឌ​ក្រសួង​បរិស្ថាន និង​ក្រសួង​កសិកម្ម​គឺ​ផ្តោត​សំខាន់​លើ​ផលប៉ះពាល់ និង​វិធានការ​ចំពោះ​ក្រុមហ៊ុន​ដែល​មិន​បាន​អនុវត្ត​តាម​នីតិវិធី។

តាមរយៈ​ទិន្នន័យ​សង្ខេប​បង្ហាញ​ដោយ​អ្នក​នាំពាក្យ និង​ជា​អនុរដ្ឋ​លេខាធិការ​ក្រសួង​កសិកម្ម​រុក្ខាប្រមាញ់ និង​នេសាទ​លោក អ៊ាង សុផល្លែត គិត​ត្រឹម​ថ្ងៃ​ទី ៥ ខែ​សីហា​ក្រុមហ៊ុន​ចំនួន ៧៧ ត្រូវ​បាន​គណៈកម្មការ​អន្តរ​ក្រសួង​ត្រួតពិនិត្យ និង​វាយតម្លៃ​ហើយ​ក្នុង​ក្របខ័ណ្ឌ​ដីសម្បទាន សេដ្ឋកិច្ច​ ក្រសួង​កសិកម្ម ក្នុង​នោះ​ក្រុមហ៊ុន​ចំនួន ១០ ត្រូវ​បាន​និរាករណ៍​ក្រុមហ៊ុន ៦ ត្រូវ​បាន​ឲ្យ​សម្រួល​ផ្ទៃដី​ក្រុមហ៊ុន ៥៤ ត្រូវ​បាន​អនុញ្ញាត​ឲ្យ​បន្ត​នីតិវិធី និង​ក្រុមហ៊ុន ៧ ត្រូវ​បាន​ទុក​ពេល​ឲ្យ​ពី ៦ ខែ​ទៅ​ ១ ​ឆ្នាំ​ដើម្បី​បន្ត​នីតិវិធី (ស្ថិត​ក្រោម​ការ​តាមដាន)។

បើ​តាម​លោក សុផល្លែត លើក​ឡើង​កន្លង​ទៅ​ក្នុង​ក្របខ័ណ្ឌ​ក្រសួង​កសិកម្ម​មាន​ក្រុមហ៊ុន​សរុប​ចំនួន ១២២ មាន​ផ្ទៃដី​សរុប​​ចន្លោះ​ពី ១,២ លាន​ហិកតា​ទៅ ១,៣ លាន​ហិកតា​ដែល​បាន​ទទួល​ការ​អនុញ្ញាត និង​ចុះ​កិច្ចសន្យា​ជាមួយ​រដ្ឋាភិបាល​ក្នុង​ការ​អភិវឌ្ឍ​វិនិយោគ។

យ៉ាង​ណា​ក៏ដោយ ​លោក​មិន​បាន​បញ្ជាក់​ថា​ តើ​បច្ចុប្បន្ន​នេះ ​ក្រុមហ៊ុន​ប៉ុន្មាន​ត្រូវ​បាន​​កាត់បន្ថយ​រយៈពេល​វិនិយោគ​មក​ត្រឹម ៥០ ​ឆ្នាំ​នៅ​នោះ​ទេ។

កាលពី​ថ្ងៃ​ទី ២៧ ខែ​សីហា ឆ្នាំ​ ២០១៥ ក្រសួង​កសិកម្ម​ក៏​បាន​ក្រើន​រំឭក​ដល់​ក្រុមហ៊ុន​ដែល​ទទួល​បាន​ដី​សម្បទាន​សេដ្ឋកិច្ច​ហើយ​គឺ​មិន​ឲ្យ​ធ្វើការ​ផ្ទេរ​ទៅ​ក្រុមហ៊ុន​មួយ​ទៀត​ដើម្បី​យក​ផលចំណេញ​ឡើយ​ហើយ​បើ​ក្រុមហ៊ុន​នៅ​តែ​បំពាន​នោះ​រដ្ឋ​នឹង​ដកហូត​ដី​នោះ​យក​មក​វិញ​ភ្លាម​ផង​ដែរ​ប៉ុន្តែ​ក្រសួង​បាន​អនុញ្ញាត​ឲ្យ​រក​ដៃគូ​ចូលរួម​ជា​ភាគហ៊ុន​បាន៕

អត្ថបទគួរចាប់អារម្មណ៍