The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​គ្រោង​សង់​ស្ពាន​ ២ ​ទៀត​ឆ្លង​កាត់​ទន្លេ​មេគង្គ




រដ្ឋាភិបាល​គ្រោង​សង់​ស្ពាន​ ២ ​ទៀត​ឆ្លង​កាត់​ទន្លេ​មេគង្គ

លោក​នាយករដ្ឋមន្ត្រី​ ហ៊ុន សែន កាត់​ខ្សែ​បូ​បើក​សម្ពោធ​ស្ពាន​ជ្រោយចង្វារ​ទី​ពីរ​កាលពី​ថ្ងៃ​ម្សិលមិញ​។
លោក​នាយករដ្ឋមន្ត្រី​ ហ៊ុន សែន កាត់​ខ្សែ​បូ​បើក​សម្ពោធ​ស្ពាន​ជ្រោយចង្វារ​ទី​ពីរ​កាលពី​ថ្ងៃ​ម្សិលមិញ​។ ហុង មិនា

រដ្ឋាភិបាល​គ្រោង​សង់​ស្ពាន​ ២ ​ទៀត​ឆ្លង​កាត់​ទន្លេ​មេគង្គ

ភ្នំពេញៈ លោក​នាយក​រដ្ឋមន្ត្រី​ ហ៊ុន សែន បាន​ប្រកាស​ជា​ផ្លូវការ​នូវ​គម្រោង​សាងសង់​ស្ពាន​ចំនួន​ ២ ទៀត​ឆ្លង​កាត់​ទន្លេ​មេគង្គ​គឺ​ស្ថិត​​ក្នុង​តំបន់​ជ្រោយ​ចង្វារ​រាជធានី​ភ្នំពេញ និង​តំបន់​អរិយក្សត្រ​ ខេត្ត​កណ្តាល​ដែល​គម្រោង​នេះ​​កំពុង​ត្រូវ​បាន​ក្រុមហ៊ុន​ចិន​ធ្វើការ​សិក្សា​ពី​ផល​ប៉ះពាល់។

លោក​ ហ៊ុន សែន ​បាន​ថ្លែង​​ថា​គម្រោង​របស់​រដ្ឋាភិបាល​គឺ​នឹង​សិក្សា​ស្ពាន​រហូត​ដល់​ពីរ​មិនមែន​តែ​មួយ​ទេ។ ស្ពាន​ទី ១ គឺ​សាងសង់​នៅ​ចំណុច​ភូមិ​ស្វាយជ្រំ សង្កាត់​ស្វាយជ្រំ ខណ្ឌ​ឫស្សីកែវ​ឆ្លង​ទៅ​សង្កាត់​ជ្រោយ​ចង្វារ​ ខណ្ឌ​ជ្រោយ​ចង្វារ​ រាជធានី​ភ្នំពេញ​។ រីឯ​ស្ពាន​ទី ២ គ្រោង​ធ្វើ​នៅ​ភូមិ-ឃុំ​អរិយក្សត្រ ស្រុក​ល្វាឯម ខេត្ត​កណ្តាល​ភ្ជាប់​ទៅ​ភូមិ​ក្តីតាកុយ សង្កាត់​ព្រែកឯង ខណ្ឌ​ច្បារអំពៅ ​រាជធានី​ភ្នំពេញ​។

លោក​ ហ៊ុន សែន បាន​ថ្លែង​​នៅក្នុង​ពិធី​បើក​សម្ពោធ​​ដាក់​ឲ្យ​ប្រើប្រាស់​ជា​ផ្លូវការ​ស្ពាន​ជ្រោយ​ចង្វារ​ទី​ពីរ​កាលពី​ម្សិលមិញ​ថា៖ «​យើង​កំពុង​ធ្វើការ​សិក្សា​ហើយ​ដោយ​ក្រុមហ៊ុន​សាជីវកម្ម​ស្ពាន​ថ្នល់​របស់​ចិន​ជា​អ្នក​សង់​ស្ពាន​ជ្រោយចង្វារ​នេះ​កំពុង​សិក្សា​ធ្វើ​ស្ពាន​ទាំង​ពីរ​នេះ»។

ស្ពាន​ជ្រោយចង្វារ​ទី​ ២ ​ឬ​ស្ពាន​មិត្តភាព​កម្ពុជា-ចិន ត្រូវ​បាន​សាងសង់​ឡើង​​អស់​ទឹក​ប្រាក់​​ជាង​​ ៣៩ លាន ៤សែន​ដុល្លារ​អាមេរិក​​ដែល​ជា​ជំនួយ​របស់​រដ្ឋាភិបាល​ចិន​ និង​ប្រាក់​បដិភាគ​របស់​រដ្ឋាភិបាល​​។

លោក ​ហ៊ុន សែន​ បាន​ថ្លែង​ថា ​ស្ពាន​ថ្មី​នេះ​នឹង​សម្រួល​ដល់​ការ​ធ្វើ​ដំណើរ​របស់​​ពលរដ្ឋ​ក្នុង​ការ​ដឹកជញ្ជូន​ទំនិញ​ឆ្លងកាត់ និង​អាច​សម្រួល​​ចរាចរណ៍​ផង​ដែរ។

ពលរដ្ឋ​ឈ្មោះ ចាន់ ស៊ី អាយុ​ ៣៥ ​ឆ្នាំ​រស់​នៅ​ភូមិ​ស្វាយជ្រំ​ឲ្យ​ដឹង​ថា​អ្នក​ចម្ការ​​នៅ​ទី​នោះ​បាន​​នាំ​គ្នា​យក​បន្លែ​បង្ការ​មក​លក់​នៅ​តាម​ទីផ្សារ​ក្នុង​រាជធានី​ភ្នំពេញ​។

លោក​ថា​​៖ «​បើ​មាន​ស្ពាន​ភ្ជាប់​ពី​ជ្រោយចង្វារ​មក​ស្វាយជ្រំ​ខ្ញុំ​នឹង​មិន​ពិបាក​ក្រោក​ពី​យប់​ និង​ចំណាយ​ថ្លៃ​ឆ្លង​ដ​ទៀត​ទេ»។

លោក ជា ថុល អធិការ​ស្រុក​ល្វាឯម ខេត្ត​កណ្ដាល​ថ្លែង​ថា​ប្រសិន​​រដ្ឋាភិបាល​សម្រេច​សង់​ស្ពាន​ឆ្លងកាត់​ទន្លេ​មេគង្គ​តភ្ជាប់​ពី​ស្រុក​ល្វាឯម​ទៅ​នឹង​សង្កាត់​ព្រែកឯង​មែន​លោក​រំពឹង​ថា​ទៅ​ថ្ងៃ​អនាគត​ជីវភាព​ប្រជាពលរដ្ឋ​តំបន់​នេះ​នឹង​ប្រសើរ​ឡើង​មួយ​កម្រិត​ទៀត។

លោក​ថា​ពលរដ្ឋ​មក​ធ្វើការ​​នៅ​​ភ្នំពេញ​ក៏​ងាយ​ការ​ភ្ជាប់​ចរាចរណ៍​​ពី​ផ្លូវ​ជាតិ​លេខ ១ ទៅ​ផ្លូវ​ ៦ ​អា​ក៏​ងាយ​ ឯ​ដី​ធ្លី​នៅក្នុង​ស្រុក​ខ្សាច់កណ្ដាល​ និង​ស្រុក​ល្វាឯម​ក៏​មាន​ហាង​ឆេង​ដែរ​។

លោក ផែង សុវិជ្ជានោ អ្នក​នាំពាក្យ​ក្រសួង​សាធារណការ​ និង​ដឹកជញ្ជូន​បាន​ថ្លែង​តាម​ទូរស័ព្ទ​កាលពី​ម្សិលមិញ​ថា​គម្រោង​សង់ស្ពាន​ភ្ជាប់​ទៅ​អរិយក្សត្រ​ និង​ស្ពាន​តំបន់​ស្វាយជ្រំ​នៅ​មិន​ទាន់​អាច​កំណត់​​ពេល​វេលា​នៃ​ការ​ចាប់ផ្តើម​ការ​សាងសង់​នៅ​ឡើយ​។

លោក​ថា៖ «អ្វីៗ​វា​ស្ថិត​ក្នុង​ការ​សិក្សា​ពី​ផល​ប៉ះពាល់​យើង​មិន​អាច​ដឹង​ថា​ត្រូវ​ចំណាយ​ប៉ុន្មាន​ចាប់ផ្តើម​សាងសង់​ពេល​ណា​ទេ​ទាល់​​តែ​សិក្សា​ចប់​នៅ​ឆ្នាំ​ក្រោយ​»។

កាលពី​ម្សិលមិញ​លោក ហ៊ុន សែន ក៏​បាន​​ប្រកាស​ឲ្យ​បើក​ដំណើរការ​ជា​បណ្តោះ​អាសន្ន​នូវ​ស្ពាន​អាកាស​ តិចណូ​ នៅ​ថ្ងៃ​ទី​ ២១ វិច្ឆិកា​ ខាង​មុខ ​គឺ​កៀក​​នឹង​ថ្ងៃ​បុណ្យ​អុំទូក​ ដែល​​នឹង​ធ្វើ​ឡើង​នៅ​ថ្ងៃ​ទី​ ២៤ ២៥ និង​ ២៦ ខែ​វិច្ឆិកា​​នៅ​រាជធានី​ភ្នំពេញ​គឺជា​ប្រការ​មួយ «ជួយ​សម្រួល​ចរាចរណ៍​ថ្ងៃ​បុណ្យ​អុំទូក»។

លោក​ ហ៊ុន សែន ថ្លែង​បន្ត​​ទៀត​ថា ​ក្នុង​ឱកាស​ទស្សនកិច្ច​នៅ​ចិន​លើក​នេះ​លោក​​បាន​ចរចា​ជាមួយ​ប្រធានាធិបតី​ចិន​លោក Xin Jing Ping ហើយ​បាន​ស្នើសុំ​ឲ្យ​ចិន​បន្ត​ភាព​អនុគ្រោះ​​សម្រាប់​កម្ពុជា​ក្នុង​ការ​បង់​ប្រាក់​បដិភាគ​តែ​ ៥ ​ភាគរយ​ប៉ុណ្ណោះ​នៃ​តម្លៃ​គម្រោង​ជំនួយ​សម្រាប់​សាងសង់​ស្ពាន​ក្រោយៗ​ទៀត​ខណៈ​ដែល​ប្រទេស​​ដទៃ​គេ​ឲ្យ​កម្ពុជា​ចេញ​ដល់​ ២០ ​​ភាគរយ​។

លោក​បន្ត​ថា​៖ «យើង​ត្រូវ​ដោះស្រាយ​ផលប៉ះពាល់​ដោះស្រាយ​ដីធ្លី ឬ​ផ្ទះ​សម្បែង​របស់​ប្រជាពលរដ្ឋ​ដែល​ស្ពាន​ ឬ​ផ្លូវ​ត្រូវ​ឆ្លង​កាត់​ទី​នោះ​»។

បើ​តាម​លោក​នាយករដ្ឋមន្ត្រី​ចិន​បាន​ផ្តល់​ជំនួយ​ឥត​សំណង​ ១ ពាន់​លាន​យន់​ស្មើ ១៥៧ លាន​ដុល្លារ​ដែល​មួយ​ផ្នែក​ត្រូវ​យក​ទៅ​សាងសង់​ពហុកីឡដ្ឋាន​សម្រាប់​ស៊ីហ្គេម​ឆ្នាំ ២០២៣។

លោក​​បន្ត​ថា​៖ «ចិន​បាន​ផ្តល់​មន្ទីរពេទ្យ​នៅ​ខេត្ត​ត្បូងឃ្មុំ​ដែល​ជា​ការ​ចង់​បាន​របស់​យើង​។ យើង​មាន​ស្ពាន​​ឆ្លង​កាត់​ទន្លេ​សាប​ហើយ​យើង​កំពុង​ដាក់​ស្នើ​សុំ​មិត្ត​ចិន​សង់​ស្ពាន​​មួយ​នៅ​ក្រចេះ និង​ស្ពាន​មួយ​ទៀត​​នៅ​​កំពង់ចាម និង​ត្បូងឃ្មុំ (ស្ទឹងត្រង់ និង​ក្រូចឆ្មារ)»៕

អត្ថបទគួរចាប់អារម្មណ៍