The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​ចង់​ផ្តល់​ឋានៈ​ជន​ភៀស​ខ្លួន​ដល់​ជនជាតិ​ម៉ុងតាញ៉ា​វិញ




រដ្ឋាភិបាល​ចង់​ផ្តល់​ឋានៈ​ជន​ភៀស​ខ្លួន​ដល់​ជនជាតិ​ម៉ុងតាញ៉ា​វិញ

Content image - Phnom Penh Post
ជនម៉ុងតាញ៉ា ១៣ នាក់ថតរូប​មុន​ពេល​ជួប​ជាមួយ​នឹង​តំណាង​អង្គការ UN នៅ​ខេត្ត រតនគិរី កាល​ពី​ចុង​ឆ្នាំ ២០១៤។ រូបថត អាដហុក

រដ្ឋាភិបាល​ចង់​ផ្តល់​ឋានៈ​ជន​ភៀស​ខ្លួន​ដល់​ជនជាតិ​ម៉ុងតាញ៉ា​វិញ

ភ្នំពេញៈ រាជ​រដ្ឋាភិបាល​កម្ពុជា បាន​ងាក​ចេញ​ពី​ការ​ចង់ និរទេស​ជនជាតិ ​ម៉ុងតាញ៉ា ​ជាង ១០០ នាក់​ដែល​កំពុង​​ស្វែង​រក​​សិទ្ធិ​ជ្រក​កោន​ក្នុង​ប្រទេស កម្ពុជា​ ហើយ​​សន្យាវិញ​ថា ​នឹង​ពន្លឿន​ដំណើរ​ការ​នៃ​ការ​វាយ​តម្លៃ ​​ផ្តល់​ឋានៈ​ជា​ជន​ភៀស​ខ្លួន​ទៅ​ដល់​ជន​ជាតិ​ទាង​នោះ​ជំនួស​វិញ។

បន្ទាប់​ពី​កិច្ច​ប្រជុំ​មួយ​រវាង​រដ្ឋមន្ត្រី​ក្រសួង​មហាផ្ទៃ សរ ខេង ជាមួយ​នឹង​ទីភ្នាក់​ងារ​ទទួល​បន្ទុក​ជន​ភៀស​ខ្លួន​របស់​អង្គការ​សហប្រជាជាតិ អ្នក​នាំពាក្យ​ក្រសួង​នេះ លោក ប៉ោ ភក្តិ បាន​ធ្វើ​ការ​​បញ្ជាក់​ថា​ រាជរដ្ឋភិបាល​នឹង​ធ្វើ​ការ​យ៉ាង​ជិត​ស្និទ្ធ​ជាមួយ​នឹង​ទី​ភ្នាក់​ងារ​នេះ ដើម្បីពន្លឿន​ដំណើរ​ការ​ស្វែង​រក​សិទ្ធិ​ជ្រកកោន​របស់​ជនជាតិ​ម៉ុងតាញ៉ា​ទាំង​​នោះ។

លោក​ថ្លែង​ថា៖ «យើង​នឹង​បន្ត​ធ្វើ​ការ​រួមគ្នា​ជាមួយ​នឹង​ ឧត្តម​ស្នង​ការ​អង្គការ​សហប្រជាជាតិ (UNHCR) ទទួល​បន្ទុក​ជន​ភៀស​ខ្លួន ព្រម​ទាំង​ជាមួយ​នឹង​ក្រុម​ជន​ភៀស​ខ្លួន ម៉ុងតាញ៉ា ​ដែល​បាន​ស្នើ​សុំ​រួច និង​អ្នក​កំពុង​រៀប​ចំ​ស្នើ​សុំ​សិទ្ធិ​ជ្រក​កោន​នា​ពេល​ខាង​មុខ​ឆាប់ៗ​នេះ»។

លោក ប៉ោ ភក្តិ បាន​បន្តថា៖ ​«​នៅ​ក្នុង​កិច្ច​ប្រជុំ យើង​បាន​យល់​ព្រម​​បង្កើន​ល្បឿន​នៃ ដំណើរ​ការ​ពិនិត្យ​វាយ​តម្លៃ ដើម្បី​ទទួល​បាន​ឋានៈ​ជន​ភៀស​ខ្លួន និង​ការ​ផ្តល់​នូវ​សិទ្ធិ​ជ្រកកោន​ទៅ​ដល់​ជន​ភៀស​ខ្លួន​ទាំង​នោះ»។

ប្រមាណ​ជាង ១៨ ​ខែកន្លង​ទៅ​នេះ ជនជាតិ​ម៉ុងតាញ្ញ៉ា​ជាង ២០០ នាក់​បាន​ភៀស​ខ្លួន​ចេញ​ពី​តំបន់​ខ្ពង់រាប​កណ្តាល​នៃ​ប្រទេស ​វៀតណាម ចូល​មក​ប្រទេស​កម្ពុជា។ ក្រុម​ជន​ជាតិ​ភាគតិច​កាន់​សាសនា​គ្រឹស្ត​នេះ​បាន​អះ​អាង​ថា ពួកគេ​ត្រូវ​បាន​ធ្វើ​ទុក្ខ​បុកម្នេញ​នៅ​ឯ​ទឹក​ដី​កំណើត​របស់​ពួកគេ។

មក​ដល់​ពេល​នេះ មាន​ជនជាតិ ម៉ុងតាញ៉ា ​តែ ​១៣ ​នាក់​​ប៉ុណ្ណោះ​ ដែល​ត្រូវ​បាន​ទទួល​ស្គាល់​ជាជន​ភៀស​ខ្លួន​នៅ​ក្នុង​ប្រទេស​កម្ពុជា ហើយ​ទន្ទឹម​នឹង​នោះ​ដែរ ពួកគេ​ជាច្រើន​ត្រូវ​បាន​បញ្ជូន​ទៅ​ប្រទេស​កំណើត​វិញ។ ជនជាតិ​ម៉ុងតាញ៉ា​ជាច្រើន​រយ​នាក់​ទៀត​បាន​ចាក​ចេញ​ពី​កម្ពុជា​ទៅ​កន្លែង​ផ្សេង ​ដោយ​សារ​តែ​រដ្ឋាភិបាលបាន​បដិសេធ​មិន​ធ្វើ​តាម​ទំនួល​ខុស​ត្រូវ លើ​កាតព្វកិច្ច​ដែល​ចែង​នៅ​ក្នុង​អនុសញ្ញា​ជនភៀស​ខ្លួន​របស់​អង្គការ​សហប្រជាជាតិ​ឆ្នាំ ១៩៥១ ដែល​កម្ពុជា​ក៏​ជា​ប្រទេស​ហត្ថលេខី​មួយ​ដែរ។

កាល​ពី​ខែ​កញ្ញា​ ឆ្នាំ​មុន រាជរដ្ឋាភិបាល​កម្ពុជា​បាន​ប្រកាស​កាល​បរិច្ឆេទ​ផុត​កំណត់ ៣ ខែ​សម្រាប់​អ្នក​ដែល​រង់ចាំ​សម្ភាស និង​​វាយ​តម្លៃ​ ឲ្យ​​ត្រឡប់​ទៅ​​ប្រទេស​​កំណើត​​វិញ​ ដោយ​​​ខ្លួន​​ឯង​ ឬ​ ត្រូវ​ប្រឈម​​​នឹង​​ការ​បញ្ជូន​ដោយ​បង្ខំ​ត្រឡប់​ទៅ​អាជ្ញាធរ​វៀតណាម​វិញ។ ក្រោយ​មក កាល​បរិច្ឆេទ​នេះ​ត្រូវ​បាន​ពន្យា​ទៅ​ដល់​ខែ កុម្ភៈ។

បន្ទាប់​បី​មាន​ការ​គំរាមកំហែង និង​ការ​កាត់​​បន្ថយ​ជំនួយ​កាន់​តែ​តិច​ទៅៗ ក្រុម​ជនភៀស​ខ្លួន​មួយ​ចំនួន​បាន​សម្រេច​ចិត្ត​ត្រលប់​ទៅ​​ប្រទេស​វៀតណាម​វិញ តាម​រយៈ​ជំនួយ​របស់​អង្គការ​សហប្រជាជាតិ​ដែល​បាន​អះអាង​ថា​បាន​ទទួល​​ការ​ធានា​សុវត្ថិភាព​ទៅ​លើ​ជន​ទាំង​នោះ​ពី​រាជ​រដ្ឋាភិបាល​វៀតណាម។

ដោយឡែក ប្រព័ន្ធ​ផ្សព្វផ្សាយ​ក្នុង​ស្រុក ​បាន​រាយការណ៍​កាល​ពី​យប់​មិញ​ថា ជនជាតិ​ម៉ុងតាញ៉ា​ ១៣ នាក់​ដែល​ត្រូវ​បាន​ទទួល​ឋានៈ​ជា​ជន​ភៀស​ខ្លួន​ នឹង​ចាកចេញ​ទៅ​រស់​នៅ​ក្នុង​ប្រទេសហ្វី​លីពីន​ ជា​ប្រទេស​ទី​បី។

លោក ប៉ោ ភក្តិ បាន​បដិសេធពុំ​ឆ្លើយ​នឹង​សំនួរ​ទាក់​ទិន​នឹង​ផែនការ​​បញ្ជូន​ជន​ភៀស​ខ្លួន​ទាំង​ ១៣ នាក់​នោះ ​ទៅ​រស់​​នៅ​ប្រទេស​ទី ៣ តែ​លោក​បាន​បង្ហើប​ថា កាល​បរិច្ឆេទ​ដែល​រដ្ឋាភិបាល​បាន​ព្រមព្រៀង​ក្នុង​ការ​ជួយ​ស្វែង​រក​ទី​លំនៅ​សម្រាប់​ជន​ភៀស​ខ្លួនទាំង ​១៣ ​រូប​នោះ​ត្រូវ​បាន​អនុម័តរួច​​ហើយ។

លោក​​និយាយថា៖ ​«​យើង​កំពុង​តែ​ធ្វើ​អ្វីៗ​ដែល​យើង​អាច​ធ្វើ​បាន ​ដើម្បី​ប្រយោជន៍​ជនភៀស​ខ្លួន​ទាំង​នោះ»។

រីឯ លោក Phil Robertson ជា​នាយក​រង​នៃ​អង្គការ​ឃ្លាំ​មើល​សិទ្ធ​មនុស្ស (Human Rights Watch) ប្រចាំ​នៅ​អាស៊ី​បាន​ឲ្យ​ដឹង​តាម​រយៈ​សារអេឡិចត្រូនិច (Email) មួយ​ថា៖​ «វា​ពិត​ជា​ដំណឹង​ល្អ​ដែល​រដ្ឋាភិបាល​កម្ពុជា​កំពុង​តែ​យល់​ព្រម​ក្នុងការ​បំពេញ​កាតព្វកិច្ច​អន្តរជាតិ​របស់​ខ្លូន ដោយ​ផ្តល់​ឲ្យ​ជនជាតិ​ម៉ុងតាញ្ញា​ទាំង​នេះ​នូវ​ការ​វាយ​តម្លៃ​ត្រឹម​ត្រូវ​ដើម្បី​ទទួល​ឋានៈ​ជា​ជនភៀស​ខ្លួន»។ ​

លោក​បាន​សរសេរ​ទៀត​ថា៖ «យើង​សង្ឃឹម​ថា​ទង្វើ​នេះ​បង្ហាញ​ពី​ឥរិយាបថ​ទទួល​ស្គាល់​ថា​ជនជាតិ ម៉ុងតាញ៉ា​​កំពុង​តែ​រត់​គេច​ពី​ការ​រំលោភ​បំពាន​សិទ្ធិ​ធ្ងន់​ធ្ងរ​នៅឯ​ប្រទេស​វៀតណាម ហើយ​ត្រូវ​ទទួល​ការ​មើល​ថែ​ឲ្យ​បាន​ម៉តចត់​ជា​ជាង​ការ​បណ្តេញ​ពួកគេ​ចេញ​ដើម្បី​ប្រយោជន៍នៃ​ទំនាក់​ទំនង​បង​ប្អូន​រវាង​ភ្នំពេញ (កម្ពុជា) និង​ហាណូយ​(វៀតណាម)»។

លោក ឆាយ ធី មន្ត្រី​សម្រប​សម្រួល​របស់​អង្គ​ការ​សិទ្ធិ​មនុស្ស​អាដហុក​ប្រចាំ​ខេត្ត​រតនគិរី​ ដែល​ជា​ទីតាំង​ដំបូង​ដែល​ជន​ជាតិ​ម៉ុងតាញ៉ា​ជាច្រើន​បាន​ឆ្លង​កាត់​ចូល​មក​ប្រទេស​កម្ពុជា បាន​ឲ្យ​ដឹង​ថា នេះ​គឺ​ជាជំហាន​វិជ្ជមាន​មួយ ក៏​ប៉ុន្តែ បើ​យោង​ទៅ​លើ​ការ​ចាត់​ចែង​ដោះស្រាយ​កាល​ពី​មុន​របស់​រដ្ឋាភិបាល​ទៅ​លើ​ករណី​ជន​ភៀស​ខ្លួន​ ដំណើរ​ការ​នេះ​នឹង​ត្រូវ​ការ​ការ​ត្រួត​ពិនិត្យ​ឲ្យ​បាន​ម៉ត់ចត់។

លោក​និយាយថា៖​«រដ្ឋាភិបាល​ពុំអាច​សម្រេច​បាន​ថា​ពួកគេ​ (ជនជាតិ​ម៉ុងតាញ៉ា)​ជា​ជនអន្តោប្រវេសន៍​ខុស​ច្បាប់​ដោយ​គ្រាន់​តែ​មើល​នឹង​ភ្នែក​នោះ​ទេ។ ពួក​គេ​ត្រូវ​បំពេញ​ និង​ឆ្លងកាត់​ដំណើរ​ការ​វាយ​តម្លៃ​ត្រឹម​ត្រូវ»។

កាល​ពី​ម្សិល​មិញ UNHCR​ ពុំ​បាន​ធ្វើ​ការ​ឆ្លើយ​តប​ជាមួយ​នឹង​សារព័ត៌មាន​ភ្នំពេញ​ប៉ុស្តិ​ដែល​ចង់​បាន​ការ​បំភ្លឺ​បន្ថែម​នោះឡើយ៕ TN

អត្ថបទគួរចាប់អារម្មណ៍