ភ្នំពេញៈ រាជរដ្ឋាភិបាលកម្ពុជាចេញអនុក្រឹត្យស្តីពីលិខិតអនុញ្ញាតសាងសង់ថ្មី ដោយកំណត់សមត្ថកិច្ចច្បាស់លាស់ដល់អាជ្ញាធរក្នុងការចេញលិខិតអនុញ្ញាតសាងសង់ ជួសជុល រុះរើ បើកការដ្ឋាន និងលិខិតបន្តសុពលភាពលិខិតអនុញ្ញាតដោយធ្វើឡើងតាមរយៈច្រកចេញចូលតែ ១ ដើម្បីបង្កើនជំនឿទុកចិត្តពីវិនិយោគិន និងអ្នកប្រើប្រាស់លើវិស័យសំណង់។
អនុក្រឹត្យស្តីពីលិខិតអនុញ្ញាតសាងសង់ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ៣០ ធ្នូ ឆ្នាំ ២០២០ បានប្រកាសឱ្យប្រើប្រាស់ ដោយសម្រេចនិរាករណ៍អនុក្រឹត្យស្តីពីលិខិតអនុញ្ញាតសាងសង់កាលពីឆ្នាំ ១៩៩៧ និងលិខិតបទដ្ឋានទាំងឡាយណាដែលផ្ទុយពីអនុក្រឹត្យថ្មីនេះ បន្ទាប់ពីច្បាប់ស្តីពីសំណង់ត្រូវបានបង្កើតឡើងជាលើកដំបូង និងត្រូវបានព្រះមហាក្សត្រប្រកាសឱ្យប្រើកាលពីខែវិច្ឆិកា ឆ្នាំ ២០១៩។
តាមខ្លឹមសារអនុក្រឹត្យដែលមាន ៤៥ មាត្រា និង ១២ ជំពូកបានឱ្យដឹងថា អនុក្រឹត្យនេះ បង្កើតឡើងដើម្បីធានាគុណភាព សុវត្ថិភាពសំណង់ ការពារទ្រព្យសម្បត្តិ និងសុខុមាលភាពរបស់ម្ចាស់សំណង់ អ្នកប្រើប្រាស់ និងសាធារណជន ហើយវាក៏ធានាដល់ការងារសាងសង់ ឬរុះរើឱ្យបានត្រឹមត្រូវតាមបទដ្ឋានគតិយុត្ត និងបទដ្ឋានបច្ចេកទេសសំណង់ផងដែរ។
បន្ថែមពីនេះ រាជរដ្ឋាភិបាលក៏បានសម្រេចក្នុងអនុក្រឹត្យនេះដោយបែងចែកសមត្ថកិច្ចនីមួយៗទៅតាមទំហំការងារជាក់ស្តែង និងត្រូវធ្វើតាមច្រកចេញចូលតែ ១ ដើម្បីការជឿទុកចិត្តរបស់អ្នកវិនិយោគិនក្នុងវិស័យសំណង់ និងជំរុញទីផ្សារអចលនទ្រព្យប្រកបដោយប្រសិទ្ធភាពផ្នែកសេដ្ឋកិច្ច និងសង្គម។
នៅក្នុងអនុក្រឹត្យនោះ រាជរដ្ឋាភិបាលបានបញ្ជាក់ថា ចំពោះរដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់មានសមត្ថកិច្ចផុ្តល់លិខិតសាងសង់ និងលិខិតរុះរើចំពោះសំណង់ដែលមានផ្ទៃក្រឡាកម្រាលសំណង់សរុបលើសពី ៣ ពាន់ម៉ែត្រក្រឡា និងមានកម្ពស់ខ្ពស់ចាប់ពី ១១ ជាន់ឡើងទៅ រួមទាំងជាន់ផ្ទាល់ដី និងជាន់ក្រោមដីក្នុងជម្រៅជាង ៥ ម៉ែត្រ។
ជាមួយគ្នានេះដែរ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក៏មានសមត្ថកិច្ចក្នុងការផ្តល់ការអនុញ្ញាតរាល់សំណង់ទាំងឡាយណាដែលពាក់ព័ន្ធនឹងវិស័យធំៗដូចជា ឋបនីយភណ្ឌ ដែលអាចបង្កគ្រោះថ្នាក់សំណង់សម្រាប់វិស័យកីឡា ទេសចរណ៍ និងវប្បធម៌នានារួមនឹងសំណង់មិនមែនអគារដទៃទៀតដែលមានកម្ពស់ខ្ពស់ជាង ១០ ម៉ែត្រ។
ក្រៅពីនេះ រាជរដ្ឋាភិបាលបានសម្រេចបែងចែកឱ្យអភិបាលនៃគណៈអភិបាលរាជធានីខេត្តដោយមានមន្ទីររៀបចំដែនដី នគរូបនីយកម្ម សំណង់ និងសុរិយោដីមានសមត្ថកិច្ចផ្តល់លិខិតអនុញ្ញាតសាងសង់ រុះរើ ជួសជុល បើកការដ្ឋានសំណង់ចាប់ពីសំណង់ដែលមានផ្ទៃក្រឡាតិចជាង ឬស្មើ ៣ ពាន់ម៉ែត្រក្រឡា និងមានកម្ពស់ទាបជាង ១១ ជាន់។ រីឯអភិបាលនៃគណៈអភិបាលក្រុង ស្រុក ខណ្ឌ ដោយមានការិយាល័យរៀបចំដែនដីជាសេនាធិការអាចមានសមត្ថកិច្ចផ្តល់លិខិតត្រឹមតែសំណង់លំនៅឋានដែលមានផ្ទៃក្រឡាកម្រាលសំណង់សរុបយ៉ាងតិច ឬស្មើ ៥០០ ម៉ែត្រក្រឡាដោយគ្មានជាន់ផ្ទាល់ដី និងអនុញ្ញាតត្រឹមរបងបេតុងដែលមានកម្ពស់ទាប ឬស្មើ ៣ ម៉ែត្រប៉ុណ្ណោះ។
ទោះជាយ៉ាងណាអនុក្រឹត្យនេះបានផ្តល់សិទ្ធិប្តឹងតវ៉ាដល់បុគ្គលដែលមានទំនាក់ទំនងផលប្រយោជន៍ជាមួយសេចក្តីសម្រេចរបស់អាជ្ញាធរមានសមត្ថកិច្ច ឬមន្ត្រីមានសមត្ថកិច្ចដោយការប្តឹងតវ៉ាទៅស្ថាប័នទាំងនោះ ឬតាមរយៈតុលាការផងដែរ។ ប៉ុន្តែអនុក្រឹត្យនេះមិនបានបញ្ញតិពីទោសទណ្ឌច្បាស់លាស់ទេ ដោយគ្រាន់តែបញ្ជាក់ថា រាល់បុគ្គលដែលក្លែងបន្លំឯកសារ ឬផ្តល់ព័ត៌មានមិនពិត និងអ្នករាជការសាធារណៈមិនទទួលពិនិត្យសំណុំឯកសារដោយគ្មានមូលហេតុត្រឹមត្រូវ ត្រូវទទួលទណ្ឌកម្មពិន័យ ឬទោសទណ្ឌណាមួយដែលមានចែងក្នុងច្បាប់ព្រហ្មទណ្ឌជាធរមាន។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់មិនអាចសុំការអត្ថាធិប្បាយបន្ថែមបានទេដោយសារទូរស័ព្ទរបស់លោកគ្មានអ្នកទទួល។
លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញបានប្រាប់ភ្នំពេញប៉ុស្តិ៍ពីថ្ងៃទី ៣ មករាឆ្នាំនេះថា ទន្ទឹមនឹងអនុក្រឹត្យនេះ រដ្ឋាភិបាលក៏បានចេញអនុក្រឹត្យស្តីពីលក្ខខណ្ឌ និងនីតិវិធីនៃការផ្ដល់ ការព្យួរ និងការដកហូតវិញ្ញាបនបត្រប្រើប្រាស់សំណង់ និងអនុក្រឹត្យស្តីពីលក្ខខណ្ឌ និងនីតិវិធីនៃការត្រួតពិនិត្យ និងបញ្ជាក់សំណង់ផងដែរ។
លោកថា៖ «ការចេញអនុក្រឹត្យនេះ គឺជាគោលការណ៍របស់ថ្នាក់ជាតិ ក្រោយពីមានច្បាប់សំណង់ដែលត្រូវតែមានអនុក្រឹត្យ ឬសារាចរណ៍ណែនាំច្បាប់ឱ្យបានច្បាស់លាស់។ ដោយសារតែរដ្ឋាភិបាលយើងមានយុទ្ធសាស្ត្រតម្រង់ទិសឱ្យចូលក្នុងទិសដៅតែ ១ តាមច្រកចេញចូលតែ ១ នៅទូទាំងប្រទេស និងដើម្បីបង្កលក្ខណៈងាយស្រួល»។
លោក សារិន វណ្ណា បានស្នើឱ្យពលរដ្ឋដែលស្នើសុំសេវាទាក់ទងនឹងវិស័យសំណង់ទាំងអស់ត្រូវទៅស្វែងរកសេវានៅតាមច្រកចេញចូលតែ ១ ដែលបង្កលក្ខណៈងាយស្រួលជាងមុនដោយលោកអះអាងថា មន្ត្រីមានសមត្ថកិច្ចនឹងព្យាយាមដោះស្រាយរាល់គ្រប់បញ្ហាដែលបានស្នើឡើងជុំវិញបញ្ហាទាំងនេះ។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា បានថ្លែងថា អនុក្រឹត្យទាំងនេះគឺមានសារប្រយោជន៍ និងធ្វើឱ្យទំនាក់ទំនងនៅក្នុងវិស័យសំណង់ប្រព្រឹត្តទៅដោយរលូន ខណៈកន្លងទៅការដ្ឋានសំណង់មួយចំនួនហាក់មិនបានគោរពតាមបទប្បញ្ញត្តិច្បាប់នោះ។
លោកបញ្ជាក់ថា៖ «អនុក្រឹត្យនេះវាមានសារប្រយោជន៍ព្រោះពីមុនមកកម្ពុជាយើងមិនទាន់មានច្បាប់សំណង់ ហើយក្រោយពីមានការបាក់រលំអគារ ដែលក្រោយមកទៀតក៏មានចេញច្បាប់ និងអនុក្រឹត្យបន្ថែមនេះ។ នេះគឺល្អសម្រាប់ភាគីទាំងអស់ ព្រោះនិយោជកមានការទទួលខុសត្រូវជាក់លាក់នៅហ្នឹង ហើយកម្មករក៏ទទួលបានផល»៕
វីដេអូ៖