The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​ចំណាយ​ ៧៥ ​លាន​ដុល្លារ​សម្រាប់​គ្រួសារ​អតីត​យុទ្ធជន​ក្នុង ១ ​ឆ្នាំ

រដ្ឋាភិបាល​ចំណាយ​ ៧៥ ​លាន​ដុល្លារ​សម្រាប់​គ្រួសារ​អតីត​យុទ្ធជន​ក្នុង ១ ​ឆ្នាំ

មន្ត្រី​យោធា​ចូលរួម​ប្រជុំ​កាលពី​ថ្ងៃ​ម្សិលមិញ​។
មន្ត្រី​យោធា​ចូលរួម​ប្រជុំ​កាលពី​ថ្ងៃ​ម្សិលមិញ​។ ហុង មិនា

រដ្ឋាភិបាល​ចំណាយ​ ៧៥ ​លាន​ដុល្លារ​សម្រាប់​គ្រួសារ​អតីត​យុទ្ធជន​ក្នុង ១ ​ឆ្នាំ

ភ្នំពេញៈ គិត​ត្រឹម​ខែ​មិថុនា​ឆ្នាំ​ ២០១៥ អតីត​យុទ្ធជន​កម្ពុជា​សរុប​ជាង ៨ ​​ម៉ឺន​ ៧ ពាន់​នាក់ និង​អ្នក​នៅក្នុង​បន្ទុក ឬ​ហៅ​ថា​គ្រួសារ​អតីត​យុទ្ធជន​ជាង ១ ​ម៉ឺន​ ៤ ពាន់​នាក់​បាន​ទទួល​នូវ​ប្រាក់​ឧបត្ថម្ភ​សរុប​ជាង ៣០០ ​ពាន់​លាន​រៀល (ប្រហែល ៧៥ ​លាន​ដុល្លារ) ក្នុង​ ១ ឆ្នាំ។

ក្នុង​កម្មវិធី​មហាសន្និបាត​ផ្ទៃ​ក្នុង​តំណាង​សមាគម​អតីតយុទ្ធជន​កម្ពុជា​ទូទាំង​ប្រទេស​លើក​ទី ២ កាលពី​ម្សិលមិញ​រដ្ឋមន្ត្រី​ក្រសួង​សង្គមកិច្ច​ អតីត​យុទ្ធជន និង​យុវនីតិ​សម្បទា លោក វង សូត បាន​ថ្លែង​ថា​តាមរយៈ​ការ​អនុវត្ត​គោល​នយោបាយ​សម្តែង​ការ​ដឹងគុណ​ដល់​អតីត​យុទ្ធជន និង​យុទ្ធនារី​ដែល​បាន​លះបង់​អាយុ​ជីវិត​ក្នុង​បុព្វហេតុ​ប្រទេស​ជាតិ​រាជរដ្ឋាភិបាល​កម្ពុជា​បាន​និង​កំពុង​យក​ចិត្ត​ទុក​ដាក់​ដោះស្រាយ​ជីវភាព​ទាំង​សម្ភារ​ថវិកា​ជា​បន្តបន្ទាប់។

លោក​ថា​ ក្នុង​នោះ​គិត​ត្រឹម​ខែ​មិថុនា ឆ្នាំ ២០១៥ មាន​អតីត​យុទ្ធជន ៨៧ ២៨៥ នាក់ និង​អ្នក​នៅក្នុង​បន្ទុក ១៤០ ៥២៨ នាក់​ដែល​ត្រូវ​ចំណាយ​ថវិកា​សរុប​ជាង ៣០០ ពាន់​លាន​រៀល (ប្រហែល ៧៥ លាន​ដុល្លារ) ក្នុង​មួយ​ឆ្នាំ​ដែល​ប្រាក់​របប​គោលនយោបាយ​នេះ​ត្រូវ​បាន​កែ​សម្រួល​ជា​បន្តបន្ទាប់​ស្រប​តាម​ការ​ដំឡើង​ប្រាក់​បៀវត្សរ៍​មន្ត្រី​រាជការ និង​កងកម្លាំង​ប្រដាប់​អាវុធ។

បើ​តាម​លោក វង សូត ក្នុង​ឆ្នាំ​ ២០១៤ រាជរដ្ឋាភិបាល​កម្ពុជា​​បាន​កែសម្រួល​ប្រាក់​បៀវត្សរ៍​មូលដ្ឋាន​ជូន​ជនពិការ និវត្តជន និង​ជន​បាត់បង់​​​សមត្ថភាព​ការងារ​មុន​និង​ក្រោយ​​ឆ្នាំ​ ២០០៧ ឲ្យ​មាន​តុល្យភាព​គ្នា​ក្នុង​នោះ​ក៏​បាន​​​កែសម្រួល​​បង្កើន​ប្រាក់​ម្ហូបអាហារ​ជូន​ជនពិការ​ក្នុង​ម្នាក់ៗ​រហូត​ដល់ ៤៥ ០០០ ​រៀល​ក្នុង​ ១ ​ខែ​។

ក្នុង​នាម​សមាគម​អតីត​យុទ្ធជន​ដែល​ជា​ដៃគូរ​សំខាន់​របស់​រាជរដ្ឋាភិបាល​លោក វង សូត ជា​​អគ្គលេខាធិការ​សមាគម​អតីត​​យុទ្ធជន​កម្ពុជា​ស្តីទី​ក៏​បាន​ឲ្យ​ដឹង​ថា​សមាគម​នេះ​មាន​សមាជិក​ទូទាំង​ប្រទេស ៧៥ ២៥៨ នាក់ និង​​បាន​​ចូលរួម​ពង្រឹង​ពង្រីក​តួនាទី​របស់​អតីត​យុទ្ធជន​កែ​លម្អ​ជីវភាព និង​​ពង្រឹង​នូវ​សាមគ្គីភាព​ក្នុង​ជួរ​អតីត​យុទ្ធជន។

លោក​ថ្លែង​ថា​គិត​ចាប់ពី​ឆ្នាំ​ ២០០៨ ​​មក​អតីត​យុទ្ធជន​កម្ពុជា​ចំនួន ៥ ៥១៣ នាក់​បាន​ទទួល​ប្រាក់​ឧបត្ថម្ភ ៤ ​លាន​រៀល​ក្នុង​មួយ​គ្រួសារ​ពី​បេឡា​មរណ​សង្គ្រោះ​របស់​សមាគម​អតីត​យុទ្ធជន​កម្ពុជា​ខណៈ​នៅ​សល់ ១៥២៣ ​នាក់​មិន​ទាន់​ត្រូវ​​បាន​ដោះស្រាយ​នៅ​ឡើយ​ដោយសារ​តែ​អត្រា​នៃ​​មរណភាព​​អតីត​យុទ្ធជន​បាន​និង​កំពុង​កើនឡើង​។

លោក វង សូត បាន​ថ្លែង​ថា៖ «ពី​មុន​មក​បេឡា​មរណ​សង្គ្រោះ​ក្នុង​លក្ខន្តិកៈ​គេ​ដាក់​ថា ៣៥ និយាយ​រាង​ពិបាក​ស្តាប់​​បន្តិច​គឺ​កំណត់​អ្នក​ងាប់ ៣៥ បើ​ងាប់​ប៉ុណ្ណឹង​សមាគម​យើង​រ៉ាប់រង​បាន​ប៉ុន្តែ​ជាក់ស្តែង​មិន​មែន​ប៉ុណ្ណឹង​ច្រើន​ជាង​ហ្នឹង​ឡើង​ដល់ ២ ដង​ដល់​​ ៧០ ឥឡូវ​មួយ​ខែ​ឡើង​ដល់ ១០០ ​ជាង»។

ទោះ​យ៉ាង​នេះ​ក្តី​លោក​បាន​បញ្ជាក់​ថា៖ «សម្រាប់​អ្នក​ដែល​នៅ​សល់​ជាង ១ ៥០០ នាក់​និយាយ​ឲ្យ​ស្រួល​ស្តាប់​ថា​ខាង​សមាគម​ជំពាក់​នោះ​គឺ​កំពុង​បន្ត​ដោះស្រាយ​ជា​បន្តបន្ទាប់​ទៅ​តាម​នីតិវិធី​ហើយ​យើង​មិន​បោះបង់​នោះ​ទេ»។

លោក ខុត សារ៉ាន អាយុ ៥៩ឆ្នាំ ជា​អនុប្រធាន​សមាគម​អតីតយុទ្ធជន​ស្រុក​កំពង់សៀម ខេត្ត​កំពង់ចាម បាន​ឲ្យ​ដឹង​ថា​ដើម្បី​ដោះស្រាយ​​នូវ​បញ្ហា​នេះ​សមាគម​បាន​កំពុង​ពង្រីក​នូវ​ប្រាក់​ភាគទាន​ដើម្បី​ឈាន​ដល់​ការ​ទ្រទ្រង់​នូវ​គ្រួសារ​អតីត​យុទ្ធជន​ដែល​មិន​ទាន់​ទទួល​បាន​ប្រាក់​ឧបត្ថម្ភ។

លោក​ថា៖ «សម្រាប់​អតីត​យុទ្ធជន​ដែល​មិនមែន​ជា​សមាជិក​នៃ​សមាគម​អតីត​យុទ្ធជន​កម្ពុជា​គឺ​មិន​ត្រូវ​បាន​ទទួល​នូវ​ប្រាក់​ឧបត្ថម្ភ​សម្រាប់​គ្រួសារ​នោះ​ទេ​ពោល​ប្រាក់​ភាគទាន​របស់​សមាគម​នឹង​ចំណាយ​​តែ​លើ​សមាជិក​នៃ​សមាគម​តែ​ប៉ុណ្ណោះ​។

យោង​របាយការណ៍​បូក​សរុប​លទ្ធផល​ការងារ​​នៃ​សមាគម​អតីត​​យុទ្ធជន​កម្ពុជា​រយៈពេល ៥ ឆ្នាំ (២០១១-២០១៥) អាន​ដោយ​លោក យី យ៉ូន រដ្ឋលេខាធិការ​ក្រសួង​សង្គមកិច្ច​បាន​បង្ហាញ​ថា​ក្នុង​ចំណោម​សមាជិក​ជា​អតីតយុទ្ធជន និង​គ្រួសារ​សរុប ៧៥ ២៥៨ នាក់​ក្នុង​នោះ​ប្រភេទ​និវត្តជន​មាន ២១ ៩០៧ នាក់​ជន​បាត់បង់​សមត្ថភាព​ការងារ ១ ៨២៣ ​នាក់​ជនពិការ ២៦ ១៩៤ នាក់​គ្រួសារ​ជនពលី ២១ ៩៥៣ ​នាក់​គ្រួសារ​ជនមរណៈ​ចំនួន ៣ ១៩៩ នាក់ និង​សមាជិក​ជា​មន្ត្រី​រាជការ ១៨២ នាក់។

បើ​យោង​តាម​លក្ខន្តិកៈ​របស់​សមាគម​​អតីត​យុទ្ធជន​កម្ពុជា​បាន​​ឲ្យ​និយមន័យ​អតីត​យុទ្ធជន​សំដៅ​ដល់​ជន​ទាំងឡាយ​ណា​ដែល​ធ្លាប់​បាន​បម្រើ​ការងារ​ក្នុង​កងយោធពល​ខេមរភូមិន្ទ និង​កង​នគរបាល​ជាតិ​ហើយ​បាន​​បញ្ចប់​ការងារ​របស់​ខ្លួន​ត្រឹមត្រូវ​តាម​ច្បាប់​រីឯ​គ្រួសារ​អតីត​យុទ្ធជន​សំដៅ​ដល់​ឪពុក ម្តាយ ឬ​​អាណាព្យាបាល ប្រពន្ធ ឬ​ប្តី និង​កូន​បង្កើត​របស់​អតីត​យុទ្ធជន៕

អត្ថបទគួរចាប់អារម្មណ៍