The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​ជ្រើសរើស​មន្ត្រី​រាជការ​ស៊ីវិល​ជាង​ ៥ ពាន់​នាក់

រដ្ឋាភិបាល​ជ្រើសរើស​មន្ត្រី​រាជការ​ស៊ីវិល​ជាង​ ៥ ពាន់​នាក់

មន្ត្រីរាជការ​ស៊ីវិល​ នៅក្នុង​ពិធី​មួយ​កាលពី​ពេល​កន្លងមក​។
មន្ត្រីរាជការ​ស៊ីវិល​ នៅក្នុង​ពិធី​មួយ​កាលពី​ពេល​កន្លងមក​។ ម៉ៃ វីរៈ

រដ្ឋាភិបាល​ជ្រើសរើស​មន្ត្រី​រាជការ​ស៊ីវិល​ជាង​ ៥ ពាន់​នាក់

ភ្នំពេញៈរាជរដ្ឋាភិបាល​កម្ពុជា​បាន​ប្រកាស​ប្រឡង​ជ្រើសរើស​ក្របខ័ណ្ឌ​​ថ្មី​នៃ​មន្ត្រីរាជការ​ស៊ីវិល​ចំនួន​ ៥០០១ ​នាក់​សម្រាប់​ឆ្នាំ ២០១៥ នេះ ដើម្បី​បំពេញ​ចំនួន​មន្ត្រីរាជការ​ស៊ីវិល ដែល​បាត់បង់​ពី​ក្របខ័ណ្ឌ​នៃ​ស្ថាប័នរដ្ឋ​ចំនួន​ ២៩ ដោយសារ​ការចូលនិវត្តន៍ ការ​លុប​ឈ្មោះ​ចោល និង​ការបាត់បង់​សម្បទា​វិជ្ជាជីវៈ។

តាម​លិខិត​ជូន​ដំណឹង​ដល់​ថ្នាក់ដឹកនាំ​​ក្រសួង និង​​អង្គភាព​រដ្ឋ​ចុះ​ថ្ងៃ​ទី ៧ ខែ​មេសា​ឆ្នាំ​ ២០១៥ ​រដ្ឋមន្ត្រី​ក្រសួង​មុខងារ​សាធារណៈ​លោក ពេជ្រ ប៊ុនធិន បាន​ឲ្យ​ដឹង​ថា រាជរដ្ឋាភិបាល​បាន​អនុញ្ញាត​ជា​គោលការណ៍ ក្នុង​ការជ្រើសរើស​ក្របខ័ណ្ឌ​ថ្មី​មន្ត្រីរាជការ​ស៊ីវិល​សម្រាប់​​ផែនការ​ឆ្នាំ ២០១៥ តាម​ចំនួន​ស្មើ​នឹង​​មន្ត្រី​រាជការ​ដែល​​បាន​បាត់បង់ ក្នុង​​ឆ្នាំ ២០១៤ ដែល​មាន​បុគ្គលិក​ចូលនិវត្តន៍​របស់​ស្ថាប័នរដ្ឋ​ទាំងអស់​ ៣៦៨២ ​​នាក់ លុប​ឈ្មោះ​ចោល ១១២៦ ​​នាក់ និង​​បាត់បង់​សម្បទា​វិជ្ជាជីវៈ ៩៣ នាក់។ លោក ពេជ្រ ប៊ុនធិន​បាន​ឲ្យ​​ដឹង​កាលពី​ម្សិលមិញ​​​ថា ការជ្រើសរើស​ដ៏ច្រើន​នេះ គឺជា​តម្រូវការ​ដែល​​ត្រូវ​បាន​សម្រេច​តាម​សេចក្តី​រាយការណ៍​របស់​ស្ថាប័ន​នីមួយៗ។

លោក​ថ្លែង​ថា៖ «មន្ត្រី​ឈ្មោះ​ខ្មោច​ក្នុង​​តួលេខ​លុប​ចេញ​ហ្នឹង​គេ​រក​ឃើញ​ប៉ុន្មាន​គេ​លុប​ចេញ​ក្រសួង​នីមួយៗ​ជា​ម្ចាស់ការ​គេ​រាយការណ៍​​មក​ប្រាប់​ថា​គេ​លុប​ចេញ អ្នក​សុំ​ឈប់​ប៉ុន្មាន​ស្លាប់​ប៉ុន្មាន ​ហើយ​​ចូលនិវត្តន៍​ប៉ុន្មាន​គេ​រាយការណ៍​​មក និង​សុំ​ជំនួស​វិញ»​។

ក្នុង​សេចក្តី​ជូន​ដំណឹង​នោះ ក្រសួង​មួយ​ចំនួន​ដែល​ត្រូវ​ជ្រើសរើស​ក្របខ័ណ្ឌ​ថ្មី​មន្ត្រីរាជការ​ច្រើន​ជាង​គេ រួមមាន ក្រសួង​​អប់រំ​ ៣០១៥ នាក់ ក្រសួង​វប្បធម៌​ ១០៧ នាក់ ក្រសួង​មហាផ្ទៃ ៤០០ នាក់ ក្រសួង​កសិកម្ម ៣៧៧ នាក់ ក្រសួង​សុខាភិបាល ៤៣៣ ​នាក់ និង​​ក្រសួង​សេដ្ឋកិច្ច ១៧៦​ នាក់​។

រដ្ឋមន្ត្រី​ក្រសួង​អប់រំ លោក ហង់ ជួនណារ៉ុន ​ថ្លែង​ថា ការជ្រើសរើស​មន្ត្រីរាជការ​ច្រើន​ជាង​គេ​សម្រាប់​ក្រសួង​​លោក​គឺ ទី ១ ចំនួន​សិស្ស​កើនឡើង ទី ២ គ្រូ​ចូលនិវត្តន៍ និង​ទី ៣ ការ​ផ្ទេរ​ការងារ​របស់​មន្ត្រី​នៃ​ក្រសួង​នេះ​ទៅកាន់​ក្រសួង​ផ្សេងៗ​ទៀត ដែល​មាន​សរុប​ជាង ៣០០០ នាក់​ក្នុង​ឆ្នាំ​ ២០១៤ ។

លោក​ថា៖ «ក្រសួង​អប់រំ ខុសពី​ក្រសួង​ផ្សេងៗ ដោយសារ​តែ​ការជ្រើសរើស​ដល់​ទៅ ៣០០០ ​នាក់​នេះ ត្រូវ​បណ្តុះបណ្តាល​ ២ ឆ្នាំ ដែល​អាច​នាំឲ្យ​ប៉ះពាល់​ដល់​ចំនួន​គ្រូ​ទៅ​ថ្ងៃ​ក្រោយ​ហេតុ ដូចនេះ យើង​ទាមទារ​ឲ្យ​មាន​ការជជែក​ពិភាក្សា​ជាមួយ​​រដ្ឋាភិបាល​ម្តង​ទៀត អត់​ទាន់​សម្រេច​ទេ»។

បើ​តាម​សេចក្តី​ជូន​ដំណឹង​របស់​ក្រសួង​មុខងារ​សាធារណៈ​បាន​តម្រូវ​ឲ្យ​ស្ថាប័ន​សាមី ចាត់ចែង​រៀបចំ​ការប្រឡង​ប្រជែង​ជ្រើសរើស​បេក្ខជន​ដែល​​មាន​លក្ខណ​សម្បត្តិ​គ្រប់គ្រាន់​ឲ្យ​ចូល​បម្រើ​ការងារ​ដោយ​ខ្លួនឯង តែ​ត្រូវ​​យក​ចិត្តទុក​ដាក់​បេក្ខភាព​ជា​ជនពិការ​ដែល​មាន​សមត្ថភាព​សមស្រប​ ២ ភាគរយ​នៃ​ចំនួន​ក្របខ័ណ្ឌ​សរុប ហើយ​​ត្រូវ​មាន​បេក្ខនារី​ជាប់​ជាស្ថាពរ ពី​ ២០​ ទៅ​ ៥០ ​ភាគរយ។

លោក យ៉ែម បុញ្ញឫទ្ធិ ប្រធាន​គណៈកម្មការ​ទី ៧ នៃ​រដ្ឋសភា ​ថ្លែង​​ថា ការជ្រើសរើស​នេះ គឺជា​ឱកាស​ល្អ​មួយ​ដល់​យុវជន និង​ជា​ការឆ្លើយតប​ទៅ​នឹង​សេចក្តី​ត្រូវការ​របស់​ក្រសួង​ និង​ស្ថាប័នរដ្ឋ​ដែល​ខ្វះខាត ប៉ុន្តែ​លោក​នៅតែ​​ព្រួយបារម្ភ​​ពាក់ព័ន្ធ​នឹង​មន្ត្រី​ខ្មោច។

លោក​ថា៖ «​វា​ពិបាក​ក្នុង​ការ​វាយតម្លៃ​ថា​ការជ្រើសរើស​ច្រើន​​បែប​នេះ​ជា​ការ​​ចាំបាច់​ ឬ​យ៉ាង​ណា? ព្រោះ​​រហូត​មក​ទល់​ពេល​នេះ​យើង​មិន​ទាន់​មាន​របាយការណ៍​ណា​មួយ បង្ហាញពី​តួលេខ​ជាក់លាក់​នៃ​មន្ត្រី​ដែល​មាន​ស្រាប់​ក្នុង​ក្រសួង និង​មន្ត្រី​ថ្មី​ដែល​ត្រូវការ​នោះ​ទេ។ អ៊ីចឹង​ហើយ​​យើង​នឹង​ពិនិត្យ​លើ​​បញ្ហា​​នេះ​បន្ថែម​ទៀត»។

លោក ព្រាប កុល នាយកប្រតិបត្តិ​អង្គការ​តម្លាភាព​កម្ពុជា សង្ឃឹម​ថា ដំណើរការ​នៃ​ការជ្រើសរើស​មន្ត្រី​​ក្របខ័ណ្ឌ​ថ្មី​នេះ​គប្បី​មាន​ការចូលរួម​វាយតម្លៃ​ល្អិតល្អន់​ពី​គណៈកម្មការ​ដែល​មាន​សមាសភាព​ចម្រុះ​ដើម្បី​បង្កើន​ការត្រួតពិនិត្យ​គ្នា​ទៅវិញ​ទៅមក​។

ចំណែក លោក កៅ ពឿន ប្រធាន​សមាគម​មន្ត្រី​រាជការ​ឯករាជ្យ​កម្ពុជា យល់​​ឃើញ​ថា មន្ត្រីរាជការ​ស៊ីវិល មិន​​គួរ​ត្រូវ​​ជ្រើសរើស​​បន្ថែម​ មាន​ចំនួន​ច្រើន​​បែប​នេះ​ទេ​ខណៈ​ដែល​​ស្ថានភាព​​ជាក់ស្តែង​បច្ចុប្បន្ន មន្ត្រី​ដែល​មាន​ស្រាប់​មិន​បាន​បំពេញ​ការងារ​ជាប់លាប់​ឡើយ​ ដោយសារ​តែ​បញ្ហា​ប្រាក់​បៀវត្សរ៍​ទាប​ពេក​។

លោក​​បាន​ថ្លែង​ថា៖ «មន្ត្រី​រាជការ​ខ្លះ​ គ្រាន់តែ​ដាក់​ឈ្មោះ​ចោល​ក្នុង​ក្រសួង​តែ​រក​ការងារ​ធ្វើ​ក្រៅ​។ ជម្រើស​​ដ៏ល្អ​គឺ​ត្រូវ​ដំឡើង​បៀវត្សរ៍​មន្ត្រី​រាជការ​ចាស់ៗ ​ហើយ​ពង្រឹង​នូវ​សមត្ថភាព​របស់​​ពួកគាត់​ជា​មុន​សិន ជា​ជាង​ការយក​ទៅ​ដាក់​ថែម តែ​មិន​ផ្តល់​ប្រយោជន៍»៕

អត្ថបទគួរចាប់អារម្មណ៍