The Phnom Penh Post Search

Search form

រដ្ឋាភិបាល​ដក​ទីប្រឹក្សា​ ១២ ​រូប​មកពី​គណបក្ស​លោក​ ញឹក ប៊ុនឆៃ

Content image - Phnom Penh Post
លោក ញឹក ប៊ុនឆៃ ប្រធាន​គណបក្ស​ខ្មែរ​រួបរួម​ជាតិ​។ ហេង ជីវ័ន

រដ្ឋាភិបាល​ដក​ទីប្រឹក្សា​ ១២ ​រូប​មកពី​គណបក្ស​លោក​ ញឹក ប៊ុនឆៃ

ភ្នំពេញៈ រដ្ឋាភិបាល​របស់​លោក​នាយក​រដ្ឋមន្ត្រី ហ៊ុន សែន ​បាន​ចាប់ផ្តើម​ដក​ទីប្រឹក្សា​របស់​ខ្លួន​ដែល​ជា​សមាជិក​គណបក្ស​ខ្មែរ​រួបរួម​ជាតិ​របស់​លោក ញឹក ប៊ុនឆៃ ជាង​ ១០ ​រូប​បន្ថែម​ទៀត បន្ទាប់ពី​លោក​ ប៊ុនឆៃ ត្រូវ​គេ​ចោទប្រកាន់​ថា លួច​មាន​ទំនាក់ទំនង​ជាមួយ​គណបក្ស​សង្គ្រោះ​ជាតិ​។ ​

នៅក្នុង​បញ្ជី​ទីប្រឹក្សា​រដ្ឋាភិបាល​ចំនួន ១២ នាក់​ដែល​ត្រូវ​បាន​បញ្ឈប់​ពី​តំណែង​កាលពី​ថ្ងៃ​ទី​ ១៨ កក្កដា​ដោយ​ព្រះមហាក្សត្រ នរោត្តម សីហមុនី ដែល​ស្នើ​ឡើង​ដោយ​លោក​នាយក​រដ្ឋមន្ត្រី ហ៊ុន សែន និង​ទទួល​បាន​ដោយ​ភ្នំពេញ-ប៉ុស្តិ៍​កាលពី​ថ្ងៃ​ម្សិលមិញ​បាន​ឲ្យ​ដឹង​ថា​ទីប្រឹក្សា​ទាំង​នោះ​មាន​ឋានៈ​ស្មើ​រដ្ឋមន្ត្រី រដ្ឋលេខាធិការ និង​អនុរដ្ឋលេខាធិការ​។

ទីប្រឹក្សា​ដែល​មាន​ឋានៈ​ស្មើ​រដ្ឋមន្ត្រី រួមមាន​លោក គុជ ម៉ូលី លោក ញឹក គឹមឈុន និង​លោក កែវ រដ្ឋា​។

ទីប្រឹក្សា​ដែល​មាន​ឋានៈ​ស្មើ​រដ្ឋលេខាធិការ រួមមាន លោក​ ម៉ៅ សុវណ្ណារិទ្ធិ លោក ជា បំរុង លោក សុខ រុន និង​ទីប្រឹក្សា​ដែល​មាន​ឋានៈ​ស្មើ​អនុរដ្ឋលេខាធិការ​រួមមាន​លោក ផួង វិន័យ លោក ហែម ឈិន លោក សំ បូរ័ត្ន លោក ប៉េង សុសេង លោក ឈួយ ចាន់រ៉ុង និង លោក​ ចិន ពៀន​។

បើ​តាម​បញ្ជី​ទីប្រឹក្សា​រដ្ឋាភិបាល​ពីរ​ផ្សេង​គ្នា​ដែល​ផ្ញើ​មក​កាសែត​ ភ្នំពេញ-ប៉ុស្តិ៍ កាលពី​ម្សិលមិញ បញ្ជី​ទីប្រឹក្សា​មួយ​បាន​បង្ហាញ​ឥស្សរជន ២២ រូប​ដែល​ត្រូវ​បាន​តែងតាំង​ជា​ទីប្រឹក្សា​រដ្ឋាភិបាល​មាន​ឋានៈ​ស្មើ​ឧបនាយក​រដ្ឋមន្ត្រី ទេសរដ្ឋមន្ត្រី រដ្ឋមន្ត្រី រដ្ឋលេខាធិការ និង​អនុរដ្ឋលេខាធិការ​។

ប៉ុន្តែ​ក្នុង​ចំណោម​ទីប្រឹក្សា​ទាំង​នោះ​ទីប្រឹក្សា​ ១០ ​រូប​ផ្សេង​ទៀត​មិន​ត្រូវ​បាន​ឃើញ​នៅ​ក្នុង​បញ្ជី​ដក​តំណែង​នោះ​ទេ​រួមមាន អតីត​សហរដ្ឋមន្ត្រី​ក្រសួង​មហាផ្ទៃ លោក យូ ហុកគ្រី មាន​ឋានៈ​ស្មើ​ឧបនាយក​រដ្ឋមន្ត្រី លោក ទៀ ចំរ៉ាត់ មាន​ឋានៈ​ស្មើ​ទេសរដ្ឋមន្ត្រី​លោក ខាន់ សាវឿន លោក ហ៊ុន ផឿង លោក ឈឹម សាខន លោក ហាក់គី សេចៀន លោក ថង នូវ មាន​ឋានៈ​ស្មើ​រដ្ឋមន្ត្រី លោក រស់ សាភ័ណ្ឌ លោក យ៉ាង សារីម លោក អ៊ុន សុគន្ធ មាន​ឋានៈ ស្មើ​រដ្ឋលេខាធិការ​។

ទីប្រឹក្សា​ម្នាក់​ក្នុង​ចំណោម​ទីប្រឹក្សា​រដ្ឋាភិបាល​ដែល​បដិសេធ​បញ្ចេញ​ឈ្មោះ បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​ទីប្រឹក្សា ១០ ​រូប​ក្នុង​ចំណោម​ទីប្រឹក្សា​ ២២ ​រូប​ដែល​មិន​ត្រូវ​បាន​ដក​ចេញ​ពី​តំណែង​គឺ​ដោយសារ​ភាគច្រើន​បំផុត​នៃ​ពួកគេ​បាន​រត់​ទៅ​ចូល​ជាមួយ​គណបក្ស​ប្រជាជន​កម្ពុជា​ដែល​ជា​គណបក្ស​កាន់​អំណាច​ហើយ​ថា​ទីប្រឹក្សា​ ២ ​រូប​ក្នុង​ចំណោម​ទីប្រឹក្សា​ទាំង​នោះ កំពុង​នៅ​ជាមួយ​គណបក្ស​ហ៊្វុនស៊ិនប៉ិច​របស់​ព្រះអង្គម្ចាស់​នរោត្តម រណឫទ្ធិ​។

ការ​ដក​តំណែង​មន្ត្រី​រដ្ឋាភិបាល​ជាន់ខ្ពស់ និង​ទីប្រឹក្សា​ជា​បន្តបន្ទាប់​ដែល​ជិតស្និទ្ធ​នឹង​លោក ញឹក ប៊ុនឆៃ ប្រធាន​គណបក្ស​ខ្មែរ​រួបរួម​ជាតិ​ត្រូវ​បាន​ធ្វើ​ឡើង​បន្ទាប់ពី​លោក ប៊ុនឆៃ ត្រូវ​បាន​គេ​ចោទប្រកាន់​ថា​មិន​ស្មោះត្រង់​ជាមួយ​គណបក្ស​ប្រជាជន​កម្ពុជា​របស់​លោក​នាយករដ្ឋមន្ត្រី ហ៊ុន សែន និង​ចង់​សហការ​ជាមួយ​គណបក្ស​សង្គ្រោះ​ជាតិ​ដែល​ជា​គណបក្ស​ប្រឆាំង​របស់​លោក កឹម សុខា ខណៈ​យុទ្ធនាការ​ឃោសនា​បោះឆ្នោត​ឃុំ សង្កាត់​កំពុង​ចាប់ផ្តើម និង​មាន​ការ​ចោទប្រកាន់​ថា​លោក ញឹក ប៊ុនឆៃ និង​អនុប្រធាន​គណបក្ស​សង្គ្រោះ​ជាតិ លោក អេង ឆៃអ៊ាង បាន​ជជែក​គ្នា​តាម​ទូរស័ព្ទ និង​ថា លោក ញឹក ប៊ុនឆៃ បាន​សន្យា​ថា​នឹង​ប្រាប់​ទៅ​សមាជិក​របស់​លោក​ឲ្យ​បោះឆ្នោត​ឲ្យ​គណបក្ស​សង្គ្រោះ​ជាតិ​នៅ​ក្នុង​ខេត្ត​បន្ទាយមានជ័យ​។

ប៉ុន្តែ​លោក ញឹក ប៊ុនឆៃ បាន​ច្រានចោល​រួច​ហើយ​ចំពោះ​ការ​ចោទប្រកាន់​នេះ​ដោយ​ថ្លែង​ថា​លោក​គ្រាន់តែ​ទូរស័ព្ទ​ទៅ​លោក​ អេង ឆៃអ៊ាង ច្រឡំ​លេខ​ប៉ុណ្ណោះ ហើយ​ថា​លោក​មាន​បំណង​ចង់​ទូរស័ព្ទ​ទៅ​សមាជិក​របស់​លោក​ដែល​មាន​ឈ្មោះ​ស្រដៀង​នឹង អេង ឆៃអ៊ាង​។

នៅ​ពេល​ទាក់ទង​កាលពី​ម្សិលមិញ​លោក ផួង វិន័យ បាន​អះអាង​ថា​លោក​ត្រូវ​បាន​ដក​តំណែង​ដោយសារ​លោក​បាន​សម្រេច​ទៅ​តាម​លោក ញឹក ប៊ុនឆៃ ប្រធាន​គណបក្ស​ខ្មែរ​រួបរួម​ជាតិ ហើយ​ថា​ប្រសិន​បើ​លោក​រត់​ទៅ​ចូល​ជាមួយ​គណបក្ស​ប្រជាជន​កម្ពុជា ឬ​គណបក្ស​ហ៊្វុនស៊ិនប៉ិច លោក​នឹង​មិន​ត្រូវ​ដក​តំណែង​នោះ​ទេ​។

លោក ផួង វិន័យ ថ្លែង​បន្ត​ថា​៖ «​ពួកគេ​ហៅ​ខ្ញុំ​ដែរ ប្រសិន​បើ​ខ្ញុំ​ទៅ​ជា​មួយ​សម្តេច​ក្រុមព្រះ ពួកគេ​នឹង​មិន​ដក​ហើយ​ប្រសិន​បើ​ទៅ​គណបក្ស​ប្រជាជន​កម្ពុជា ពួកគេ​ក៏​នឹង​មិន​ដក​ខ្ញុំ​ដែរ​»​។

លោក ផួង វិន័យ បាន​ថ្លែង​បន្ត​ថា​៖ «​ខ្ញុំ​មិន​ជឿ​ថា​លោក [​ញឹក ប៊ុនឆៃ​] សហការ​ជាមួយ​គណបក្ស​សង្គ្រោះ​ជាតិ​ទេ​។ នេះ​ជា​ការ​ចោទប្រកាន់​ទៅ​លើ​គាត់​ប្រហែល​ជា​ពួកគេ​បាន​ឃើញ​ថា​គាត់​មាន​សំឡេង​គាំទ្រ​ច្រើន​នៅ​ក្នុង​ខេត្ត​បន្ទាយមានជ័យ​»​។

លោក ញឹក គឹមឈុន ដែល​ឈ្មោះ​របស់​លោក​ត្រូវ​បាន​ដក​ចេញ​ពី​តំណែង​ទីប្រឹក្សា​បាន​បដិសេធ​ធ្វើ​អត្ថាធិប្បាយ​លម្អិត ដោយ​គ្រាន់​តែ​ថ្លែង​ថា​លោក​ធ្លាប់​ជា​អភិបាលរង​ខេត្ត​បន្ទាយមានជ័យ ខេត្ត​បាត់ដំបង និង​រដ្ឋលេខាធិការ​ក្រសួង​ទេសចរណ៍​ពី​មុន​ពេល​លោក​ត្រូវ​បាន​តែងតាំង​ជា​ទីប្រឹក្សា​រដ្ឋាភិបាល​។

ទោះ​យ៉ាង​ណា​ក្តី​អ្នក​នាំ​ពាក្យ​គណបក្ស​ប្រជាជន​លោក សុខ ឥសាន នៅ​តែ​អះអាង​ថា​លោក ញឹក ប៊ុនឆៃ មិន​ស្មោះត្រង់​នឹង​សម្ព័ន្ធភាព​រវាង​គណបក្ស​ប្រជាជន​កម្ពុជា និង​គណបក្ស​ខ្មែរ​រួបរួម​ជាតិ ដូច្នេះ​គណបក្ស​ប្រជាជន​កម្ពុជា មិន​អាច​ទុក​ដៃគូ​នយោបាយ​បែប​នេះ​ទេ​។

លោក សុខ ឥសាន ថ្លែង​បន្ត​ថា​៖ «​យើង​មាន​ភ័ស្តុតាង​ច្បាស់លាស់ ឯកឧត្តម ញឹក ប៊ុនឆៃ និយាយ​ជាមួយ​ អេង ឆៃអ៊ាង យើង​សម្រេច​កាត់​ផ្តាច់​សម្ព័ន្ធភាព​នេះ​»​។

«​ប្រសិន​បើ​ [​មន្ត្រី​ទាំង​នោះ​] ​ទៅ​គណបក្ស​ដទៃ​ដែល​មាន​សម្ព័ន្ធភាព​ជាមួយ​គណបក្ស​ប្រជាជន​នោះ​តំណែង​ប្រហែល​ជា​អាច​រក្សា​ទុក​ដដែល​»៕ PS

អត្ថបទគួរចាប់អារម្មណ៍