.jpg)
ប្រជាពលរដ្ឋទទួលបានការចាក់វ៉ាក់សាំងស៊ីណូវ៉ាក់នៅខណ្ឌមានជ័យ នាពេលកន្លងមក។ ហ៊ាន រង្សី
ភ្នំពេញៈ រដ្ឋាភិបាលដាក់ឱ្យប្រើប្រាស់នូវ «ផែនការយុទ្ធសាស្ត្រយុទ្ធនាការជាតិចាក់វ៉ាក់សាំងបង្ការជំងឺកូវីដ១៩ សំដៅបង្កើតឲ្យបាននូវភាពស៊ាំសង្គមសេដ្ឋកិច្ចនៅកម្ពុជាក្នុងឆ្នាំ ២០២១» ដើម្បីពន្លឿនការចាក់វ៉ាក់សាំងដល់ប្រជាជនអាយុចាប់ពី ១៨ ឆ្នាំឡើងក្នុងតំបន់អាទិភាពខ្ពស់ឱ្យបានគ្រប់គ្នា។
យោងតាមឯកសារផែនការយុទ្ធសាស្ត្រនេះ ដែលភ្នំពេញប៉ុស្តិ៍ទទួលបាននៅថ្ងៃទី ៦ ខែឧសភាបានឱ្យដឹងថា ដើម្បីសម្រេចគោលដៅការអនុវត្តផែនការយុទ្ធសាស្ត្រនេះ នឹងត្រូវបានអនុវត្តអនុលោមតាមអភិក្រម «ផ្ការីក» ដោយចាប់ផ្តើមពីយុទ្ធនាការចាក់វ៉ាក់សាំងពីចំណុចកណ្តាលនៃប្រទេសគឺផ្តើមចេញពីរាជធានីភ្នំពេញ និងតំបន់ទីប្រជុំជនសំខាន់ៗជុំវិញរាជធានី ហើយពង្រីកជាជំហានៗ ទៅកាន់តំបន់ផ្សេងទៀតតាមលំដាប់លំដោយនៃការធ្វើអាទិភាពវូបនីយកម្ម។
កម្ពុជានឹងត្រូវបានបែងចែកជា ៣ តំបន់ គឺតំបន់អាទិភាពខ្ពស់ តំបន់អាទិភាពមធ្យម និងតំបន់អាទិភាពទាប។
ឯកសារនេះបញ្ជាក់ថា៖ «អនុលោមតាមអភិក្រម ‘ផ្ការីក’ យុទ្ធនាការជាតិចាក់វ៉ាក់សាំងនៅក្នុងតំបន់អាទិភាពខ្ពស់ ត្រូវតែបញ្ចប់ឱ្យបាននៅក្នុងឆ្នាំ ២០២១ កាន់តែឆាប់ កាន់តែប្រសើរ»។
តំបន់អាទិភាពខ្ពស់ត្រូវបានកំណត់យកក្រុង ស្រុកខណ្ឌ ចំនួន ៧០ នៅទូទាំងប្រទេស ក្នុងនោះគ្របដណ្តប់ទាំងរាជធានីភ្នំពេញ និងខេត្តកណ្តាលទាំមូល និងតំបន់សក្តានុពលសេដ្ឋកិច្ចនៅក្នុងក្រុងព្រះសីហនុ, ក្រុងប៉ោយប៉ែតខេត្តបន្ទាយមានជ័យ ក្រុងបាវិតខេត្តស្វាយរៀង ទីរួមខេត្តទាំងអស់នៃបណ្តាខេត្តនានា និងបណ្តាស្រុកសំខាន់ៗដែលស្ថិតនៅជុំវិញខេត្តកណ្តាល។
ឯកសារនេះបញ្ជាក់ថា ចំនួនប្រជាជនដែលមានអាយុចាប់ពី ១៨ ឆ្នាំឡើងទៅកំពុងរស់នៅក្នុងតំបន់ទាំងនោះ សរុបមាន ៤,៩ លាននាក់ ដែលស្មើនឹង ៤៨,៥៧ % នៃប្រជាជនដែលមានអាយុលើសពី ១៨ ឆ្នាំឡើងទៅនៅទូទាំងប្រទេស។
ឯកសារដដែលបញ្ជាក់ថា៖ «ដូច្នេះការចាក់វ៉ាក់សាំងដល់ប្រជាជនចាប់ពីអាយុ ១៨ ឆ្នាំឲ្យបានគ្រប់គ្នា នៅក្នុងតំបន់អាទិភាពខ្ពស់នេះ នឹងអាចបង្កើតបានជារួមនូវភាពស៊ាំសង្គមសេដ្ឋកិច្ចសម្រាប់ទូទាំងប្រទេស»។
តំបន់អាទិភាពមធ្យមត្រូវបានកំណត់យកក្រុងស្រុកខណ្ឌ ចំនួន ៦៤ នៅទូទាំងប្រទេស។
ឯកសារដដែលលើកឡើងថា ចំនួនប្រជាជនដែលមានអាយុចាប់ពី ១៨ ឆ្នាំឡើងទៅ កំពុងរស់នៅក្នុងតំបន់ ទាំងនោះ សរុបមាន ២,៨ លាននាក់។
តំបន់អាទិភាពទាបត្រូវបានកំណត់យកក្រុងស្រុកខណ្ឌចំនួន ៦៩ នៅទូទាំងប្រទេស។
បើតាមឯកសារនេះចំនួនប្រជាជនដែលមានអាយុចាប់ពី ១៨ ឆ្នាំឡើងទៅ កំពុងរស់នៅក្នុងតំបន់ទាំងនោះ សរុបមាន ២,៣ លាននាក់។
កម្ពុជារំពឹងថា នឹងទទួលបានវ៉ាក់សាំងបន្ថែម ៧ លានដូសពីខែឧសភាដល់ខែកក្កដា និង ២,៥ លានដូសទៀត ពីខែសីហាដល់ខែកញ្ញា។
ឯកសារដដែលបន្ថែមថា៖ «វ៉ាក់សាំងដែលរំពឹងថា នឹងទទួលបាននេះមានចំនួនគ្រប់គ្រាន់ ដើម្បីសម្រេចឲ្យបាននូវយុទ្ធនាការជាតិចាក់វ៉ាក់សាំងបង្ការជំងឺកូវីដ១៩ នៅតំបន់អាទិភាពខ្ពស់ សំដៅបង្កើតឲ្យបាននូវភាពស៊ាំសង្គមសេដ្ឋកិច្ចនៅកម្ពុជានៅក្នុងឆ្នាំ ២០២១»។
លោក ម៉ី កល្យាណទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិមិនអាចទាក់ទង ដើម្បីសុំការបញ្ជាក់បានទេនៅថ្ងៃទី ៦ ខែឧសភានេះ៕
