.jpg)
លោកនាយករដ្ឋមន្ត្រី ហ៊ុន សែន នៅក្នុងពិធីមួយនាពេលថ្មីៗនេះ។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចដំឡើងប្រាក់កម្រៃប្រចាំខែជូនមន្ត្រីជាប់កិច្ចសន្យាដែលធ្វើការងារនៅក្នុងក្រសួង ស្ថាប័នថ្នាក់ជាតិ និងថ្នាក់ក្រោមជាតិនៅឆ្នាំ ២០២០ ខាងមុខនេះពី ៦៥ ម៉ឺន (១៦២ ដុល្លារ) ដល់ ៦៧ ម៉ឺនរៀល (១៦៧ ដុល្លារ) គឺកើនឡើង ២ ម៉ឺនរៀលដោយអនុវត្តចាប់ពីថ្ងៃទី ១ ខែមករា។
អនុក្រឹត្យដែលចុះហត្ថលេខាដោយលោក ហ៊ុន សែន កាលពីថ្ងៃទី ៤ ខែ ធ្នូ ឆ្នាំ ២០១៩ បញ្ជាក់ថា៖ «ការដំឡើងប្រាក់កម្រៃដូចមានកំណត់ក្នុងមាត្រា ១ ខាងលើត្រូវអនុវត្តចំពោះមន្ត្រីជាប់កិច្ចសន្យាដែលបម្រើការងារនៅតាមក្រសួង ស្ថាប័នថ្នាក់ជាតិ និងថ្នាក់ក្រោមជាតិ អនុលោមតាមបទប្បញ្ញត្តិនៃអនុក្រឹត្យលេខ ២៦ អនក្រ.បកចុះថ្ងៃទី ១០ ខែ កុម្ភៈ ឆ្នាំ ២០១៦ ស្តីពីការគ្រប់គ្រង និងប្រើប្រាស់មន្ត្រីជាប់កិច្ចសន្យា»។
លោក យក់ ប៊ុនណា អ្នកនាំពាក្យក្រសួងមុខងារសាធារណៈបានប្រាប់ភ្នំពេញប៉ុស្តិ៍ កាលពីថ្ងៃទី ៥ ខែធ្នូ ថា ការដំឡើងប្រាក់កម្រៃនេះគឺជាការអនុវត្តក្របខ័ណ្ឌគោលនយោបាយរបស់រាជរដ្ឋាភិបាលក្នុងការលើកកម្ពស់ជីវភាពរបស់មន្ត្រីរាជការក៏ដូចជាមន្ត្រីកិច្ចសន្យា។ ការដំឡើងនេះដូចជាការទប់ទល់នឹងអតិផរណាផងដែរ។
លោក យក់ ប៊ុនណា ថ្លែងថា៖ «រដ្ឋាភិបាលអាចមានលទ្ធភាពដោះស្រាយក្នុងកម្រិតមួយ អ៊ីចឹងយើងផ្តល់ការគាំទ្របន្ថែមដល់មន្ត្រីរាជការ មន្ត្រីកិច្ចសន្យា ហើយយើងឃើញនៅក្នុង ១ ឆ្នាំៗវាអាចមានអតិផរណា ៣ ភាគរយអ៊ីចឹង»។
លោក ប៊ុនណា ថ្លែងថាក្រៅពីប្រាក់បៀវត្សរ៍មន្ត្រីជាប់កិច្ចសន្យាទទួលបានអត្ថប្រយោជន៍ពីរបបគាំពារសង្គមទាក់ទងនឹងការពិនិត្យព្យាបាលជំងឺដូចមន្ត្រីរាជការផងដែរ។ បើតាមលោក ប៊ុនណា បច្ចុប្បន្ន មន្ត្រីជាប់កិច្ចសន្យាមានចំនួនជាង ២ ម៉ឺននាក់។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជាថ្លែងថា មន្ត្រីជាប់កិច្ចសន្យាភាគច្រើនមានមូលដ្ឋាននៅតំបន់ដាច់ស្រយាលនៅតាមខេត្ត។ បើនិយាយពីប្រាក់ខែរបស់អ្នកធ្វើការដែលរួមមាន អ្នកធ្វើការរាជការ និងអ្នកធ្វើការងារផ្សេងៗទៀត គេតែងតែប្រៀបធៀបទៅនឹងតម្លៃទំនិញនៅលើទីផ្សារ។ ភាពគ្រប់គ្រាន់ ឬភាពអាចទប់ទល់បាននេះគឺអាស្រ័យទៅលើស្ថានភាពតម្លៃទំនិញនៅទីផ្សារ។
លោក សន ជ័យ ថ្លែងថា៖ «យើងទទួលស្គាល់ថា ទំនិញនៅលើទីផ្សារ វាជាការអនុវត្តនូវទីផ្សារសេរី ប៉ុន្តែយើងនៅតែចង់ឱ្យមានតុល្យភាពគ្នាជាមួយនឹងប្រាក់ចំណូលរបស់ប្រជាពលរដ្ឋដែរ។ បើនិយាយពីគ្រប់ហ្នឹង គឺពិបាករកសូចនាករមកវាស់ ក៏ប៉ុន្តែធាតុផ្សំផ្សេងៗទៀតដែលអាចរួមចំណែកទៅដល់ការកាត់បន្ថយការចំណាយគឺការគិតគូរទៅលើទំនិញនៅលើទីផ្សារដើម្បីឱ្យទំនិញហ្នឹងវាមានលក្ខណៈស្របជាមួយនឹងចំណូលរបស់ប្រជាពលរដ្ឋ»។
ក្នុងឆ្នាំ ២០១៩ រដ្ឋាភិបាលបានដំឡើងប្រាក់កម្រៃរបស់មន្ត្រីជាប់កិច្ចសន្យាពី ៦០ ម៉ឺនរៀល (១៥០ ដុល្លារ) ដល់ ៦៥ ម៉ឺនរៀល (១៦២ ដុល្លារ)។ ឆ្នាំ ២០១៨ ដំឡើងពី ៥០ ម៉ឺនរៀល (១២៥ ដុល្លារ) ដល់ ៦០ ម៉ឺនរៀល (១៥០ ដុល្លារ) ចំណែកឯឆ្នាំ ២០១៧ ដំឡើងពី ៤០ ម៉ឺនរៀល (១០០ ដុល្លារ) ដល់ ៥០ ម៉ឺនរៀល (១២៥ ដុល្លារ)។ នេះបើយោងតាមអនុក្រឹត្យតាមបណ្តាឆ្នាំទាំងនេះ។
កាលពីថ្ងៃទី ៤ ខែធ្នូនេះដែរ លោក ហ៊ុន សែន ក៏បានចេញអនុក្រឹត្យដំឡើងតម្លៃឯកតានៃសន្ទស្សន៍បៀវត្សរ៍មូលដ្ឋានពី ២ ៣៤០ រៀល (០.៥៨ ដុល្លារ) ទៅ ២៥០០ រៀល (០,៦២ ដុល្លារ) ក្នុង ១ សន្ទស្សន៍ដោយត្រូវអនុវត្តចាប់ពីថ្ងៃទី ១ ខែ មករា ឆ្នាំ ២០២០ តទៅ៕
