.jpg)
លោក វង សូត រដ្ឋមន្ត្រីក្រសួងសង្គមកិច្ចអតីតយុទ្ធជន។ ហ៊ាន រង្សី
ភ្នំពេញៈ រាជរដ្ឋាភិបាលសម្រេចតែងតាំងសមាសភាពថ្មីនៃគណៈកម្មាធិការជាតិដោះស្រាយបញ្ហាជនអនាថា ដែលមានលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាជាប្រធាន និងមានមន្ត្រីរដ្ឋាភិបាលចំនួន ១៥ រូប រួមទាំងអភិបាលរាជធានី-ខេត្តទូទាំងប្រទេសជាសមាជិក។
សេចក្តីសម្រេចរបស់រាជរដ្ឋាភិបាលចុះថ្ងៃទី ១៧ វិច្ឆិកា ដែល ភ្នំពេញ ប៉ុស្តិ៍ ទើបទទួលបានពីម្សិលមិញបានឱ្យដឹងថា សមាសភាពមន្ត្រីរដ្ឋាភិបាលដែលជាសមាជិកក្នុងគណៈកម្មាធិការជាតិដោះស្រាយបញ្ហាជនអនាថានេះគឺមកពីបណ្តាក្រសួងពាក់ព័ន្ធដូចជាក្រសួងមហាផ្ទៃ ក្រសួងទេសចរណ៍ ក្រសួងសេដ្ឋកិច្ច ក្រសួងសុខាភិបាល ក្រសួងការបរទេស និងក្រសួងអប់រំ យុវជន និងកីឡាជាដើម។
ក្រៅពីប្រកាសសមាសភាពទាំងនេះ រាជរដ្ឋាភិបាលក៏បានសម្រេចមោឃភាពសេចក្តីសម្រេច និងបទប្បញ្ញត្តិទាំងឡាយដែលផ្ទុយនឹងសេចក្តីសម្រេចថ្មីនេះផងដែរ ខណៈរាជរដ្ឋាភិបាលប្រកាសឱ្យមន្ត្រីដែលមានឈ្មោះក្នុងសេចក្តីសម្រេចត្រូវអនុវត្តតួនាទីចាប់ពីថ្ងៃចុះហត្ថលេខាតទៅ។
លោក តូច ចាន់នី អ្នកនាំពាក្យក្រសួងសង្គមកិច្ចបានឱ្យ ភ្នំពេញ ប៉ុស្តិ៍ ដឹងពីថ្ងៃអាទិត្យថា ការសម្រេចប្រកាសសមាសភាពថ្មីនេះ គឺដើម្បីធ្វើបច្ចុប្បន្នភាពនៃសមាជិកគណៈកម្មាធិការចាស់ដែលបានផ្លាស់ប្តូរតួនាទី និងភារកិច្ចថ្មី ដែលមិនសមស្របនឹងស្ថានភាពបច្ចុប្បន្ន។ លោក បន្តថាបន្ទាប់ពីសមាសភាពថ្មី ត្រូវបានតែងតាំងក្នុងពេលខាងមុខឆាប់ៗនឹងមានការបើកកិច្ចប្រជុំមួយ ដើម្បីអនុវត្តសកម្មភាពបន្ត និងដាក់ទិសដៅថ្មីក្នុងការដោះស្រាយបញ្ហាជនអនាថានៅទូទាំងប្រទេស។
លោកបញ្ជាក់ថា៖ «នៅពេលខាងមុខនេះ យើងនឹងប្រជុំគណៈកម្មាធិការ ដើម្បីជួបជុំសមាសភាពថ្មីហើយពេលប្រជុំនេះ យើងនឹងមានយុទ្ធសាស្ត្របន្ត។ ក្នុងចុងខែវិច្ឆិកានេះ យើងក៏នឹងធ្វើជំរឿនជនអនាថា បានន័យថា យើងកំណត់ឱ្យគ្រប់ខេត្ត ធ្វើជំរឿនដូចគ្នា ដើម្បីចង់ដឹងថា ទូទាំងប្រទេសមានជនអនាថា ប៉ុន្មាននាក់? ហើយនៅពេលបានទិន្នន័យនេះហើយ យើងនឹងត្រូវដោះស្រាយយ៉ាងម៉េច»។
គណៈកម្មាធិការជាតិដោះស្រាយបញ្ហាជនអនាថា ត្រូវបានរដ្ឋាភិបាល សម្រេចបង្កើតឡើងតាំងពីឆ្នាំ ២០០៥ ដែលលោក តូច ចាន់នី បានឱ្យដឹងថា គណៈកម្មាធិការនេះបានធ្វើការជាច្រើនពាក់ព័ន្ធនឹងបញ្ហាជនអនាថា ដោយមានការស្រាវជ្រាវផ្តល់ការគាំទ្រផ្សេងៗ និងបញ្ជូនជនអនាថាឱ្យត្រឡប់ទៅរកស្ថានភាពក្នុងសហគមន៍វិញ។
លោកបញ្ជាក់ថា៖ «អាជ្ញាធរគ្រប់គ្រងជនអនាថាបានល្អប្រសើរក្នុងអំឡុងពេលនេះគឺចំនួនជនអនាថាមិនមានការកើនឡើងឡើយ។ ស្របពេលដែលមានបញ្ហាកូវីដ ១៩ រដ្ឋាភិបាលបានផ្អាករៀបចំពិធីបុណ្យធំៗជាច្រើនដែលជាហេតុមិននាំឱ្យជនអនាថាមិនមានការកើនឡើងនោះទេ។ ម្យ៉ាងទៀតជនអនាថា ភាគច្រើនគឺមានបណ្ណក្រីក្រ ដែលពួកគាត់បានអត្ថប្រយោជន៍ពីរាជរដ្ឋាភិបាលដែលកំពុងអនុវត្តគោលនយោបាយចែកប្រាក់ឧបត្ថម្ភដល់ជនក្រីក្រ»។
តាមការវាយតម្លៃចុងក្រោយរបស់ក្រសួងសង្គមកិច្ច ជនអនាថានៅទូទាំងប្រទេសមានជាង ៣ ០០០ នាក់ ខណៈនៅរាជធានីភ្នំពេញមានជាង ៤០០ នាក់ ហើយពួកគេទាំងនោះភាគច្រើនកំពុងរស់នៅក្នុងមណ្ឌលសង្គមកិច្ច និងមណ្ឌលកុមារកំព្រាព្រៃស្ពឺដែលជាមណ្ឌលមើលការខុសត្រូវលើជនចាស់ជរា និងជនអនាថា។
លោក អំ សំអាត នាយករងអង្គការលីកាដូលើកឡើងថា មួយរយៈចុងក្រោយនេះចំនួនជនអនាថា ពិតជាមានការថយចុះពិតមែន។ ប៉ុន្តែមិនមែនបានន័យថាមិនមានជនអនាថានោះទេ ព្រោះថានៅតាមដងផ្លូវ និងនៅតាមមណ្ឌលនានាគឺនៅតែមានជនអនាថាច្រើនកំពុងស្នាក់នៅ បូករួមទាំងជនអនាថាផ្នែកសតិស្មារតីផង។
លោកបញ្ជាក់ថា៖ «សមាសភាពគណៈកម្មាធិការថ្មីនេះ គួរតែស្វែងរកយុទ្ធសាស្ត្រយ៉ាងណា ដើម្បីដោះស្រាយឱ្យជនអនាថាទាំងនោះអាចវិលត្រឡប់ទៅរស់នៅតាមបែបសហគមន៍វិញ ហើយចៀសវាងឱ្យពួកគេ វិលត្រឡប់ទៅស្ថានភាពជាជនអនាថាវិញ ហើយចំពោះជនអនាថាផ្នែកសតិស្មារតីគឺគួរមានមណ្ឌលមួយដាក់ឱ្យនៅដាច់ដោយឡែក ដើម្បីទទួលការព្យាបាល»។
លោក សំអាត យល់ថាបើបញ្ហាទាំងអស់នេះនៅមិនត្រូវបានដោះស្រាយនោះទេ ជនអនាថានៅតែបន្តកើនឡើង ហើយបើមានជនអនាថាច្រើនទៅនោះនឹងធ្វើឱ្យប៉ះពាល់ដល់មុខមាត់រដ្ឋាភិបាល ដែលបង្ហាញពីភាពក្រីក្ររបស់ប្រជាជននៅក្នុងប្រទេស ហើយក៏បង្កភាពអសន្តិសុខសង្គមផងដែរ៕
