ភ្នំពេញ៖លោកនាយករដ្ឋមន្ត្រី ហ៊ុន សែន បានលើកឡើងថា ពេទ្យទ្រទ្រង់លែងជាប់ហើយ ដោយត្រឹមតែរយៈពេល ២ ថ្ងៃកន្លងមកនេះមានអ្នកឆ្លងជាង ១០០០ នាក់ ដែលលើសពីសមត្ថភាពនៃការដាក់ឱ្យស្នាក់នៅក្នុងមន្ទីរពេទ្យហ្លួងម៉ែ និងមន្ទីរពេទ្យនានាដែលពោរពេញទៅដោយអ្នកជំងឺកូវីដ១។
លោកថា ដោយសារតែនៅតាមមន្ទីរពេទ្យលែងមានស្នាក់នៅគ្រប់គ្រាន់ហើយ ទើបបានជារាជរដ្ឋាភិបាលបង្កើតនូវនីតិវិធីប្រតិបត្តិស្តង់ដារព្យាបាលអ្នកជំងឺកូវីដ១៩នៅតាមផ្ទះ។
ជាមួយគ្នានេះ មជ្ឈមណ្ឌលពិព័រណ៍កោះពេជ្របានផ្តល់ទីតាំងសម្រាប់រៀបចំជាកន្លែងដាក់អ្នកជំងឺដែលអាចដាក់អ្នកជំងឺបានរហូតប្រមាណជា ៥០០០ គ្រែ។
លោក ហ៊ុន សែន មានប្រសាសន៍ថា៖ «ខ្ញុំបានសុំទៅអ្នកឧកញ៉ា ពុង ឃាវសែ ដោយយកសាលពិព័រណ៍កោះពេជ្រ សម្រាប់ជាទីកន្លែងទទួលអ្នកជំងឺស្រាល ហើយគាត់មិនត្រឹមតែឱ្យសាលនៃពិព័រណ៍ទេគឺគាត់ឱ្យទាំងអគារដែលប្រើសម្រាប់រៀបអាពាហ៍ពិពាហ៍ដើម្បីរៀបចំដាក់អ្នកជំងឺផងដែរ»។
លោកបានបញ្ជាក់ថា លោក ឃួង ស្រេង អភិបាលរាជធានីភ្នំពេញបានរៀបចំវិទ្យាល័យមួយសម្រាប់ធ្វើជាកន្លែងដាក់ព្យាបាលអ្នកជំងឺ និងមួយកន្លែងទៀតដែលរៀបចំដោយកូនប្រុសច្បង និងភរិយានៅទីតាំងមួយទៀតដែលផ្តល់ដោយវិស័យឯកជន ហើយថ្ងៃនេះក្រុមការងាររបស់កូនប្រុស និងកូនប្រសាររបស់លោកក៏កំពុងរៀបចំនៅមជ្ឈមណ្ឌលពិព័រណ៍កោះពេជ្រផងដែរ។
លោក ហ៊ុន សែន បានថ្លែងថា៖ «ទីតាំងទាំងអស់នេះគឺដាក់តែអ្នកជំងឺស្រាលទេ តែអ្នកជំងឺធ្ងន់គឺត្រូវតែបញ្ជូនទៅកាន់មន្ទីរពេទ្យដោយមានការតាមដានជំងឺហ្មត់ចត់»។
ទន្ទឹមនឹងនេះដែរ លោកនាយករដ្ឋមន្ត្រីក៏បានបញ្ជាឱ្យមានការបញ្ចេញកងទ័ព នគរបាល កងកម្លាំងប្រដាប់អាវុធ ដើម្បីជួយដំណើរការរៀបចំលើរឿងនេះ ហើយខាងក្រសួងសុខាភិបាលត្រូវបញ្ចេញគ្រែ និងបញ្ជាទិញចូលបន្ថែម រួមនឹងការត្រៀមក្រុមគ្រូពេទ្យឱ្យបានគ្រប់គ្រាន់ផងដែរ៕