ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលបានទទួលថវិកាចំនួនជិត ៩ លានដុល្លារពីសប្បុរសជនក្នុងស្រុកសម្រាប់ប្រើប្រាស់ប្រយុទ្ធប្រឆាំងនឹងជំងឺកូវីដ ១៩ ដែលកំពុងរាតត្បាត ខណៈក្រសួងសុខាភិបាលបានរកឃើញអ្នកឆ្លងជំងឺនេះជាបន្តបន្ទាប់។
ការប្រកាសរបស់លោក ហ៊ុន សែន ធ្វើឡើងក្នុងពិធីជួបសំណេះសំណាលជាមួយគ្រូពេទ្យស្ម័គ្រចិត្តប្រមាណ ៤២២ នាក់មុននឹងចេញបេសកកម្មជាមួយក្រសួងសុខាភិបាលដើម្បីប្រយុទ្ធជាមួយជំងឺកូវីដ ១៩ កាលពីថ្ងៃពុធ។
លោក ថ្លែងថា៖ «មកដល់ពេលនេះថវិកានៃការចូលរួមរបស់សប្បុរសជនបានប្រមាណជាជិត ៩ លាន។ សូមអរគុណជាមួយនឹងការអរព្រះគុណចំពោះព្រះករុណា ព្រះមហាក្សត្រ ក៏ដូចជាសម្តេចម៉ែជាទីសក្ការៈ។ អរគុណចំពោះសប្បុរសជននានាដែលបានចូលរួមមិនថាច្រើនមិនថាតិច។ នេះបង្ហាញពីទឹកចិត្តដែលខ្មែរចេះស្រឡាញ់គ្នា។ ថវិកាយើងប៉ុណ្ណេះគ្រាន់តែពលរដ្ឋរបស់យើងចំនួនទឹកប្រាក់ជាង ៨ លានដុល្លារដែលចូល (រួម) តែប៉ុន្មានថ្ងៃទេ ហើយយើងនឹងបន្តទទួល ដោយសារជំងឺនេះវាអត់ទាន់ស្ងប់ទេ»។
លោក ហ៊ុន សែន ថ្លែងថា ព្រះមហាក្សត្រី នរោត្តម មុនិនាថ សីហនុ ក៏បានព្រះរាជទានថវិកាចំនួន ២០ ម៉ឺនដុល្លារ ចំណែកឯព្រះករុណា ព្រះបាទសម្តេចព្រះនរោត្តម សីហមុនីបានព្រះរាជទានថវិកាចំនួន ១០ ម៉ឺនដុល្លារ។
លោកថ្លែងថារដ្ឋាភិបាលមិនទាន់បានប្រើប្រាស់ថវិកានេះនៅឡើយទេព្រោះរដ្ឋាភិបាលត្រូវរៀបចំនូវថវិកានេះ។ ប្រសិនបើថវិកានេះនៅសល់ ហើយជំងឺកូវីដ ១៩ បែរជាស្ងប់ទៅវិញគោលដៅរបស់លោកគឺនឹងបង្វែរថវិកាដែលនៅសល់នេះទៅកាន់មូលនិធិមន្ទីរពេទ្យគន្ធបុប្ជា។
លោកថ្លែងថា៖ «កូវីដមិនទាន់ចប់ថវិកានេះត្រូវតែរក្សាទុក និងប្រើប្រាស់នៅក្នុងសកម្មភាពប្រឆាំងនឹងកូវីដ១៩»។
លោក ហ៊ុន សែន ក៏បានលើកពីឈ្មោះលោកឧកញ៉ា ថៃ សម្បត្តិ ផងដែរដែលបានផ្តល់សណ្ឋាគារលំដាប់ផ្កាយ ៥ សម្រាប់ធ្វើជាកន្លែងព្យាបាលអ្នកជំងឺកូវីដ១៩ ដោយមិនយកប្រាក់។
លោកបានប្រកាសទៀតថា អ្នកដែលផ្ទុកជំងឺកូវីដ១៩ ទាំងអស់នៅក្នុងប្រទេសកម្ពុជាទាំងខ្មែរទាំងជនបរទេសត្រូវបានទទួលព្យាបាលពីគ្រូពេទ្យកម្ពុជា ដោយមិនត្រូវបង់ថ្លៃនោះទេ ពីព្រោះនេះគឺជាកាតព្វកិច្ចរបស់កម្ពុជាក្នុងឋានៈជាម្ចាស់ផ្ទះ។ លោកថា នយោបាយនេះខុសប្លែកពីវៀតណាមដែលតម្រូវឱ្យជនបរទេសត្រូវបង់ថ្លៃសេវាព្យាបាលជំងឺកូវីដ១៩នេះ។
លោកបានបញ្ជាក់ថា៖ «នាយករដ្ឋមន្ត្រីវៀតណាមបានប្រកាសថា ជនជាតិបរទេសដែលកើតជំងឺនេះ ត្រូវចេញលុយព្យាបាលខ្លួនឯង។ យើងក្រតែយើងចិត្តធំ។ អ្នកណាកើតជំងឺលើដីយើងយើងចេញលុយព្យាបាល។ ឯណា! គាត់ខាតទៅស្រុកគាត់ផង។ អាណា ផ្ញើយកលុយមក ហើយបើអត់មានលុយ ឱ្យគាត់ងាប់អី! ត្រូវមើលថែទាំគាត់ ហើយពួកហ្នឹងមិនមែនទទួលទានដូចយើង។ អានេះត្រូវមាននំបុ័ងសាច់ការីត្រូវមានប្រូម៉ាសមានប៊័រ ត្រូវចិញ្ចឹមពួកហ្នឹងឱ្យស្រួល។ តិចលោឱ្យស៊ីប្រហុកហ្នឹងងាប់បណ្តោយ!»។
សារព័ត៌មាន VN Express International កាលពីថ្ងៃទី ១៤ ខែមីនាបានចុះផ្សាយដោយស្រង់សម្តី នាយករដ្ឋមន្ត្រីវៀតណាម លោក Nguyen Xuan Phuc ថា ជនបរទេសនៅក្នុងប្រទេសវៀតណាមត្រូវតែបង់ប្រាក់ដោយខ្លួនឯង សម្រាប់ការព្យាបាលប្រសិនបើពួកគេមានផ្ទុកវីរុសកូរ៉ូណា។ ទោះជាយ៉ាងណា ពួកគេនឹងមិនត្រូវចំណាយប្រាក់សម្រាប់ការដាក់ឱ្យនៅដាច់ដោយឡែក និងការធ្វើតេស្តរកមេរោគកូវីដនោះឡើយ។
កាលពីថ្ងៃទី ២៣ ខែមីនា អាល្លឺម៉ង់ បានប្រកាសផ្តល់ថវិកាចំនួន ១,៥ លានអឺរ៉ូ ដើម្បីគាំទ្រផែនការឆ្លើយតបបន្ទាន់ទៅនឹងកូវីដ ១៩ របស់រដ្ឋាភិបាលក្នុងការការពារ ទប់ស្កាត់ និងឆ្លើយតបចំពោះការរីករាលដាលយ៉ាងឆាប់រហ័សនៃជំងឺកូវីដ ១៩ នៅក្នុងប្រទេស៕