.jpg)
មន្ត្រីកម្ពុជា-វៀតណាមក្នុងពិធីប្រគល់ទទួលផែនទី។ រូបKoy Pisey page
ភ្នំពេញៈ គណៈកម្មាធិការចម្រុះ កិច្ចការព្រំដែនកម្ពុជាបានចេញសេចក្ដីថ្លែងការណ៍មួយកាលពីថ្ងៃម្សិលមិញដោយបានទាត់ចោលចំពោះការលើកឡើងដែលថា ផែនទីខ្នាត ១ លើ ២៥ ពាន់គូសដោយវៀតណាម ធ្វើឱ្យកម្ពុជាត្រូវបាត់បង់ទឹកដីដោយចាត់ទុកអ្នកលើកឡើងបែបនេះថា ការប្រឌិតរឿងដោយក្រុមឧទ្ទាមក្រៅច្បាប់ប៉ុណ្ណោះ។
សេចក្ដីថ្លែងការណ៍គណៈកម្មាធិការចម្រុះ កិច្ចការព្រំដែនអះអាងថា ការលើកឡើងដែលថា ការទទួលយកផែនទីថ្មីសន្លាងខ្នាត ១ លើ ២៥ ពាន់ គឺប្រៀបដូចជាការទទួលប្លង់ដីថ្មីនៃប្រទេសកម្ពុជា គូសដោយវៀតណាម និងដែលមានន័យថា បូរណភាពទឹកដីកម្ពុជាត្រូវបានកំណត់ដោយវៀតណាម នោះគឺជាការចោទប្រកាន់ដោយគ្មានមូលដ្ឋាន។
សេចក្ដីថ្លែងការណ៍សរសេរថា៖ «សូមប្រកាសបដិសេធចោលទាំងស្រុង ការចោទប្រកាន់ដោយគ្មានមូលដ្ឋានរបស់ក្រុមឧទ្ទាមក្រៅច្បាប់ និងគូកន ដែលមានចេតនាបង្កើតរឿង និងផ្សព្វផ្សាយនូវព័ត៌មានមិនពិតក្នុងចេតនាទុច្ចរិត និងក្នុងគោលបំណងបំភាន់សាធារណមតិជាតិ និងអន្តរជាតិឱ្យមានការយល់ច្រឡំមកលើការងារព្រំដែនរបស់រដ្ឋាភិបាលអំពីការធ្វើឱ្យបាត់បង់ទឹកដីក៏ដូចជាការបណ្ដោយឱ្យមានការរំលោភបំពានទឹកដីពីប្រទេសវៀតណាម»។
គណៈកម្មាធិការចម្រុះកិច្ចការព្រំដែនបានបញ្ជាក់ថា ការកំណត់ខណ្ឌសីមា និងបោះបង្គោលព្រំដែនគោកប្រទេសទាំង ២ គឺជាការងារបច្ចេកទេសកម្រិតខ្ពស់ និងអនុវត្តដោយក្រុមជំនាញប្រទេសទាំង ២ ដោយយកគោលការណ៍ខ្សែព្រំដែនមិនកែប្រែតាមផែនទីផ្លូវការបោនខ្នាត ១ លើ ១០០ ពាន់ដែលបោះពុម្ពដោយក្រុមភូមិសាស្ដ្រឥណ្ឌូចិន ស្របតាមរដ្ឋធម្មនុញ្ញកម្ពុជាដែលធានាអំពីការមិនបាត់បង់ទឹកដី។
គណៈកម្មាធិការនេះបញ្ជាក់ទៀតថា ខ្សែព្រំដែននៅលើផែនទីខ្នាត ១ លើ ២៥ ពាន់គឺត្រឹមត្រូវតាមខ្សែព្រំដែននៅផែនទីបោនខ្នាត ១ លើ ១០០ ពាន់ទាំងអស់ លើកលែងតែតំបន់មួយចំនួនដែលពលរដ្ឋកម្ពុជា និងវៀតណាមកំពុងរស់នៅនិងដាំដុះអាស្រ័យផលជាក់ស្ដែងគឺត្រូវរក្សាដីទាំងនោះជូនពលរដ្ឋដដែល តាមរយៈការដោះដូរដីមួយស្មើមួយ។
លើសពីនេះផែនទី ១ លើ ២៥ ពាន់គឺបានប្រគល់ឱ្យប្រទេសទី ៣ ជាអ្នកបោះពុម្ពគឺក្រុមហ៊ុន BlominFo A/S នៃប្រទេសដាណឺម៉ាក បន្ទាប់ពីការប្រកាសដេញថ្លៃជាអន្តរជាតិ ហើយជាផែនទីធ្វើឡើងតាមរយៈការថតរូបភាពពីលើអាកាសតាមបែបបច្ចេកវិទ្យាទំនើបថ្មី ដែលបានបង្ហាញយ៉ាងច្បាស់នៅទីតាំងបង្គោលព្រំដែន និងខ្សែបន្ទាត់ព្រំដែន ដែលមាននិយាមការច្បាស់លាស់។
ប្រតិកម្មរបស់គណៈកម្មាធិការព្រំដែនរបស់រដ្ឋាភិបាលនេះ ធ្វើឡើងបន្ទាប់ពីអតីតគណបក្សសង្គ្រោះជាតិបានចេញសេចក្ដីថ្លែងការណ៍ ១ កាលពីថ្ងៃទី ៣ ខែសីហា ដោយបានលើកឡើងថាលោក វ៉ា គឹមហុង ទេសរដ្ឋមន្ត្រី ទទួលបន្ទុកកិច្ចការព្រំដែនរបស់រដ្ឋាភិបាលដែលបានទទួលយកផែនទីខ្នាត ១ លើ ២៥ ពាន់ចំនួន ២៥០ ផ្ទាំងនៅខេត្តតៃនិញប្រទេសវៀតណាមកាលពីថ្ងៃទី ១ ខែសីហា គឺបានគូសដោយវៀតណាមផ្អែកតាមលទ្ធផលនៃការបោះបង្គោលព្រំដែនប្រទេសទាំង ២ សម្រេចបាន ៨៤%។
អតីតគណបក្សសង្គ្រោះជាតិបន្តថា ការបោះបង្គោលព្រំដែនបាន ៨៤% នោះគឺធ្វើទៅតាមសន្ធិសញ្ញាកំណត់ព្រំដែនរដ្ឋឆ្នាំ ១៩៨៥ និងសន្ធិសញ្ញាបំពេញបន្ថែមឆ្នាំ ២០០៥ ដែលជាសន្ធិសញ្ញាធ្វើឱ្យប្រទេសកម្ពុជាត្រូវបាត់បង់ទឹកដីទៅប្រទេសវៀតណាម។
ប៉ុន្តែគណៈកម្មាធិការចម្រុះកិច្ចការព្រំដែនរបស់រដ្ឋាភិបាលបានបញ្ជាក់ថា ការកំណត់ខណ្ឌសីមា និងការបោះបង្គោលព្រំដែនសម្រេច ៨៤% និងកំពុងបន្តធ្វើបញ្ចប់ជាស្ថាពរនៅពេលខាងមុខនេះគឺធានាបាននូវផ្ទៃក្រឡាដីរបស់កម្ពុជាចំនួន ១៨១ ០៣៥ គីឡូម៉ែត្រក្រឡាដោយមិនឱ្យជាតិ និងប្រជាជនត្រូវខាតបង់ឡើយ។
លោក សុខ ទូច ប្រធានរាជបណ្ឌិត្យសភាកម្ពុជាបានលើកឡើងថា កាលណាផែនទីត្រូវបានពង្រីកកាន់តែធំគឺវាកាន់តែធ្វើឱ្យមានការលម្អៀងកាន់តូចទៅនឹងផែនដី។
លោកបានបញ្ជាក់ថា៖ «ផែនទីខ្នាត ១ លើ ២៥ ពាន់គឺវាកាន់តែច្បាស់ ហើយការលម្អៀងមានតិច។ ខ្នាត ១ លើ ១០០ ពាន់មានន័យថា ១ សង់ទីម៉ែត្រនៅលើផែនទី វាស្មើនឹង ១ ពាន់ម៉ែត្រនៅលើផែនដី ហើយ ១ លើ ៥០ ពាន់ វាស្មើនឹង ៥០០ ម៉ែត្រនៅលើផែនដី វាស្មើនឹង ១ សង់ទីម៉ែត្រនៅលើផែនទី។ អ៊ីចឹងបើ ១ លើ ២៥ ពាន់គឺវាលម្អៀងកាន់តែតិច។ ផែនទីពង្រីកកាន់តែធំ វាធ្វើឱ្យការលម្អៀងកាន់តែតូច»៕
