.jpg)
ស្ត្រីម្នាក់អូសរទេះអេតចាយ ខណៈកូនម្នាក់ដើរតាម និងកូនម្នាក់ទៀតជិះរទេះ។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលនឹងចាប់ផ្ដើមកម្មវិធីឧបត្ថម្ភសាច់ប្រាក់ដល់គ្រួសារក្រីក្រ ដែលមានជាង ៥៦ ម៉ឺនគ្រួសារ ឬស្មើប្រមាណ ២ លាន ៣ សែននាក់នៅថ្ងៃទី ២៤ ខែមិថុនា ខណៈដែលមន្ត្រីបញ្ជាក់ថា ការស្រង់អត្តសញ្ញាណគ្រួសារក្រីក្រនៅតែបន្តធ្វើ។
លោក ហ៊ុន សែន បានសរសេរបង្ហោះនៅលើហ្វេសប៊ុករបស់លោកកាលពីថ្ងៃម្សិលមិញថា ការរាតត្បាតនៃជំងឺកូវីដ ១៩ នៅទូទាំងពិភពលោកបានធ្វើឱ្យប៉ះពាល់ដល់សេដ្ឋកិច្ចកម្ពុជាយ៉ាងខ្លាំង ហើយបានធ្វើឱ្យពលរដ្ឋមួយចំនួនត្រូវបានផ្អាកពីការងារ ជាពិសេសពលរដ្ឋក្រីក្រនៅតាមជនបទដាច់ស្រយាលមួយចំនួនកំពុងជួបប្រទះការខ្វះខាតម្ហូបអាហារ។
លោកសរសេរថា៖ «រដ្ឋាភិបាលកម្ពុជាបានខិតខំរិះរកវិធីនានា ដែលអាចធ្វើបាន ដើម្បីជួយបងប្អូនប្រជាពលរដ្ឋក្រីក្រក្នុងស្ថានភាពចាំបាច់នេះ។ នៅថ្ងៃពុធទី ២៤ មិថុនា ខាងមុខនេះ យើងនឹងប្រកាសដាក់ឱ្យប្រើប្រាស់ជាផ្លូវការនូវកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ ១៩»។
យោងតាមអនុក្រឹត្យចុះហត្ថលេខាដោយលោក ហ៊ុន សែន នៅថ្ងៃទី ១២ មិថុនា ដែលទើបតែឃើញផ្សព្វផ្សាយកាលពីម្សិលមិញបញ្ជាក់ថា គ្រួសារក្រីក្រនៅទីប្រជុំជនក្នុងរាជធានីភ្នំពេញ និងទីប្រជុំជនក្រៅរាជធានីភ្នំពេញគឺក្នុងមួយគ្រួសារនៃគ្រួសារក្រីក្រកម្រិត ១ និងកម្រិត ២ ទទួលបានប្រាក់ឧបត្ថម្ភ ១២ ម៉ឺនរៀលក្នុង ១ ខែ។
ចំពោះសមាជិកម្នាក់ក្នុងគ្រួសារក្រីក្រនៅទីប្រជុំជនក្នុងរាជធានីភ្នំពេញគឺកម្រិត ១ ទទួលបានប្រាក់ឧបត្ថម្ភ ៥២ ពាន់រៀល ក្នុង ១ ខែ រីឯសមាជិកម្នាក់ក្នុងគ្រួសារក្រីក្រកម្រិត ២ ទទួលបានប្រាក់ឧបត្ថម្ភ ៣៦ ពាន់រៀល។ អនុក្រឹត្យបន្តថា ចំណែកសមាជិកម្នាក់ក្នុងគ្រួសារក្រីក្រនៅទីប្រជុំជនក្រៅរាជធានីភ្នំពេញ គឺទទួលបានប្រាក់ឧបត្ថម្ភ ៤ ម៉ឺនរៀល ក្នុង ១ ខែ ហើយសមាជិកក្នុងគ្រួសារក្រីក្រកម្រិត ១ និងទទួលបានប្រាក់ឧបត្ថម្ភចំនួន ២៨ ពាន់រៀលសម្រាប់សមាជិកម្នាក់ក្នុងគ្រួសារក្រីក្រកម្រិត ២។ ជនងាយរងគ្រោះដូចជាកុមារចាប់ពីអាយុ ៥ ឆ្នាំចុះ ជនពិការ មនុស្សចាស់អាយុចាប់ពី ៦០ ឆ្នាំឡើង និងគ្រួសារមានសមាជិកផ្ទុកជំងឺអេដស៍ទាំងនៅទីប្រជុំជន ក្នុង និងក្រៅរាជធានីភ្នំពេញគឺទទួលបានប្រាក់ឧបត្ថម្ភជាប្រចាំខែស្មើៗគ្នា គឺក្នុងម្នាក់ទទួលបានប្រាក់ ៤ ម៉ឺនរៀលសម្រាប់អ្នកក្រីក្រកម្រិត ១ និង ២៨ ពាន់រៀល សម្រាប់អ្នកក្រីក្រកម្រិត ២។
អនុក្រឹត្យបញ្ជាក់ទៀតថា គ្រួសារក្រីក្រ និងជនងាយរងគ្រោះនៅជនបទគឺក្នុង ១ គ្រួសារក្រីក្រកម្រិត ១ និងកម្រិត ២ ទទួលបានប្រាក់ឧបត្ថម្ភ ៨ ម៉ឺនរៀលក្នុង ១ ខែ ខណៈជនរងគ្រោះដូចជាកុមារមានអាយុចាប់ពី ៥ ឆ្នាំចុះ ជនពិការ មនុស្សចាស់អាយុចាប់ពី ៦០ ឆ្នាំឡើង និងគ្រួសារមានសមាជិកផ្ទុកជំងឺអេដស៍ គឺអ្នកស្ថិតក្នុងគ្រួសារក្រីក្រកម្រិត ១ ទទួលបានប្រាក់ឧបត្ថម្ភ ២៤ ពាន់រៀល និងអ្នកស្ថិតក្នុងគ្រួសារក្រីក្រកម្រិត ២ ទទួលបានប្រាក់ ១២ ពាន់រៀលក្នុង ១ ខែ។
ក្រសួងផែនការឲ្យដឹងថា ការធ្វើបច្ចុប្បន្នភាពកំណត់អត្តសញ្ញាណកម្មគ្រួសារក្រីក្រគិតត្រឹមថ្ងៃទី ១ ខែមិថុនា ដើម្បីទទួលបានប្រាក់ឧបត្ថម្ភពីរដ្ឋាភិបាល ក្នុងអំឡុងពេលការរីករាលដាលជំងឺកូវីដ១៩គឺបានរកឃើញជាង ៥៦ ម៉ឺនគ្រួសារ ឬស្មើប្រមាណ ២ លាន ៣ សែននាក់។
លោក ថេង បញ្ញាធន អគ្គនាយកផែនការនៃក្រសួងផែនការបានប្រាប់ភ្នំពេញប៉ុស្ដិ៍ពីម្សិលមិញថា តួលេខពលរដ្ឋដែលត្រូវកំណត់អត្តសញ្ញាណជាគ្រួសារក្រីក្រទាំងនេះ ត្រូវបានក្រសួងផែនការបញ្ជូនទៅឱ្យក្រសួងសេដ្ឋកិច្ចរួចហើយ ដើម្បីកំណត់អំពីទំហំទឹកប្រាក់ដែលផ្ដល់ជូនគ្រួសារទាំងនោះ។
លោកបន្តថា ការស្រង់ស្ថិតិចំនួនពលរដ្ឋក្រីក្រគឺនៅតែបន្តធ្វើចាប់តាំងពីថ្ងៃទី ១ មិថុនាz មក ហើយនៅចុងខែនេះនឹងធ្វើបច្ចុប្បន្នភាពអំពីចំនួនសាជាថ្មី ដើម្បីឱ្យបើកប្រាក់ឧបត្ថម្ភជំហានបន្តនៅក្នុងដើមខែកក្កដាខាងមុខ។ លោកបញ្ជាក់ថា ក្រសួងផែនការជាអ្នកកំណត់ចំនួនពលរដ្ឋក្រីក្រ រីឯក្រសួងសេដ្ឋកិច្ច និងហិរញ្ញវត្ថុជាអ្នកកំណត់ទំហំទឹកប្រាក់ ហើយក្រសួងសង្គមកិច្ច អតីតយុទ្ធជន និងយុវនីតិសម្បទាគឺជាអ្នកប្រគល់ប្រាក់ផ្ទាល់។
លោកបន្តថា៖ «ចំនួនគ្រួសារដែលកំណត់អត្តសញ្ញាណក្រីក្រគឺមានការកើនឡើងនៅក្រោយពីថ្ងៃទី ១ មិថុនា ប៉ុន្តែយើងអត់ទាន់ប្រើទេ ដោយសារទំហំថវិកា និងការឧបត្ថម្ភជាសាច់ប្រាក់ហ្នឹង គឺយើងធ្វើជាជំហាន»។
ចំណែកលោក មាស សុខសែនសាន អ្នកនាំពាក្យក្រសួងសេដ្ឋកិច្ចក៏មិនប្រាប់អំពីទំហំទឹកប្រាក់ដែលត្រូវឧបត្ថម្ភដល់គ្រួសារពលរដ្ឋក្រីក្រទាំងជាង ៥៦ ម៉ឺនគ្រួសារនោះដែរ។ លោកថា៖ «ចំនួនទំហំទឹកប្រាក់ហ្នឹង គឺសម្ដេចនឹងប្រកាសនៅថ្ងៃទី ២៤ ខែមិថុនា»។
ក្រសួងសេដ្ឋកិច្ចធ្លាប់បញ្ជាក់ថា រដ្ឋាភិបាលបានត្រៀមថវិកាបម្រុងសម្រាប់ចាយវាយនៅក្នុងអំឡុងពេលជំងឺកូវីដ ១៩ គឺមានចំនួនចាប់ពី ៨០០ លានដុល្លារ ទៅ ២ ពាន់លានដុល្លារ ដើម្បីជួយរក្សាលំនឹងអាជីវកម្មក្នុងវិស័យមួយចំនួន ជួយសម្រាលបន្ទុករបស់ក្រុមកម្មករ និងពលរដ្ឋដែលក្រីក្រងាយរងគ្រោះ ខណៈលោក មាស សុខសែនសាន ធ្លាប់បញ្ជាក់ប្រាប់អ្នកសារព័ត៌មានកាលពីពេលថ្មីៗនេះថា ទឹកប្រាក់បម្រុងទាំងនោះត្រូវបានរដ្ឋាភិបាលចាយអស់ជាង ១ ពាន់លានដុល្លារហើយ។
ក្រៅពីការប្រកាសចាប់ផ្ដើមកម្មវិធីឧបត្ថម្ភសាច់ប្រាក់ដល់គ្រួសារពលរដ្ឋក្រីក្រ លោក ហ៊ុន សែន ក៏បន្តអំពាវនាវឱ្យពលរដ្ឋត្រូវប្រុងប្រយ័ត្នអំពីជំងឺឆ្លងកូវីដ ១៩ គឺត្រូវប្រើប្រាស់ម៉ាស់ពាក់ការពារ ឧស្សាហ៍ដុសលាងសម្អាតដៃជាមួយសាប៊ូ អាល់កុល ឬជែលសម្លាប់មេរោគ។
លោកបន្តថា ចំពោះក្រុមហ៊ុន និងអ្នកគ្រប់គ្រងនៅតាមទីកន្លែងដែលមានការប្រមូលផ្តុំមនុស្សច្រើន ដូចជាផ្សារ ផ្សារទំនើប សណ្ឋាគារ ភោជនីយដ្ឋាន ហាងកាហ្វេ ជាពិសេសគ្លីនិក និងមន្ទីរពេទ្យព្យាបាលទាំងរដ្ឋ និងឯកជនត្រូវមានទឹកអាល់កុល និងម៉ាស់ដើម្បីឱ្យអតិថិជនប្រើប្រាស់ដើម្បីទប់ស្កាត់ការឆ្លងរាលដាលជំងឺកូវីដ ១៩ ពីម្នាក់ទៅម្នាក់។
កាលពីថ្ងៃម្សិលមិញ ក្រសួងសុខាភិបាលបានប្រកាសថា គ្មានអ្នកជំងឺកូវីដ១៩ថ្មីទៀតទេ ប៉ុន្តែមានអ្នកជំងឺម្នាក់ទៀតបានជាសះស្បើយ ដែលបានធ្វើឱ្យចំនួនអ្នកជាសះស្បើយកើនដល់ ១២៧ នាក់ ក្នុងចំណោមអ្នកឆ្លងសរុបទាំងអស់ ១២៩ នាក់ដែលត្រូវបានរាយការណ៍នៅកម្ពុជា។
ទោះយ៉ាងណាក្រសួងសុខាភិបាលបានអំពាវនាវឱ្យពលរដ្ឋបន្តប្រុងប្រយ័ត្នជាប់ជានិច្ច គឺត្រូវសម្របខ្លួនតាមការរស់នៅបែបគន្លងថ្មីដែលត្រូវប្រកាន់យកការអនុវត្តវិធានការការពារខ្លួនឱ្យបានខ្ជាប់ខ្ជួន ដូចជាលាងសម្អាតដៃឲ្យបានញឹកញាប់ ត្រូវពាក់ម៉ាស់ ឬក្រមានៅពេលចាំបាច់ ឬនៅពេលកណ្ដាស់ ឬក្អក ត្រូវអនុវត្តគម្លាតសុវត្ថិភាពសង្គម និងបុគ្គល ដើម្បីការពារកុំឱ្យមានរលកទី ២ នៃការឆ្លងនៅក្នុងប្រទេស៕
វីដេអូ៖
