The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋាភិបាល​នឹង​ផ្តល់​អាហា​រូបករណ៍​ដល់​សិស្ស​​ក្រីក្រ​ពី​ថ្នាក់​ទី​១​ដល់​ថ្នាក់ទី​១២

រដ្ឋាភិបាល​នឹង​ផ្តល់​អាហា​រូបករណ៍​ដល់​សិស្ស​​ក្រីក្រ​ពី​ថ្នាក់​ទី​១​ដល់​ថ្នាក់ទី​១២

Content image - Phnom Penh Post
សិស្ស​កំពុង​តែ​រៀន​ក្នុង​ថ្នាក់​មួយ​នៅ​​តំបន់​ជនបទ ដែល​ត្រូវ​បាន​គេ​បង្ហោះ​តាម​​ហ្វេសប៊ុក​កាលពី​ម្សិលមិញ​។ រូបថត ដក​ពី​ហ្វេសប៊ុក

រដ្ឋាភិបាល​នឹង​ផ្តល់​អាហា​រូបករណ៍​ដល់​សិស្ស​​ក្រីក្រ​ពី​ថ្នាក់​ទី​១​ដល់​ថ្នាក់ទី​១២

ភ្នំពេញៈ រាជ​រដ្ឋាភិបាល​កម្ពុជា​ បាន​សម្រេច​ផ្តល់​​អាហា​រូបករណ៍​ដល់​សិស្ស​ក្រី​ក្រ​ នៅ​តាម​សាលា​ចំណេះ​ទូទៅ​រដ្ឋ​ចាប់​ពី​ថ្នាក់​ទី​ ១ ដល់​ទី​ ១២ ដើម្បី​ជួយ​សម្រួល​ដល់​ជីវភាព​សិក្សា​ និង​ជំរុញ​ការ​មិន​បោះ​បង់ចោល​ការ​សិក្សា​​របស់​សិស្ស។ កន្លង​មក​​ថវិកាផ្តល់​ដល់​តែ​​សិស្ស​មធ្យម​សិក្សា​បឋម​ភូមិ​ប៉ុណ្ណោះ។

អនុក្រឹត្យ​របស់​នាយករដ្ឋ​មន្ត្រី​ហ៊ុន សែន​ ចុះ​ថ្ងៃ​ទី​១៧ មីនា និង​ទើប​ផ្សព្វផ្សាយ​ដោយ​ក្រសួង​អប់រំ ក្នុង​សប្តាហ៍​នេះ បាន​សម្រេច​ផ្តល់​អាហា​រូបករណ៍​សម្រាប់​សិស្ស​ថ្នាក់ទី​ ៤ ដល់​ទី​ ១២ ចាប់​អនុវត្ត​ពី​ឆ្នាំ​សិក្សា​ ២០១៤ ២០១៥ នេះ​តទៅ ឯ​សម្រាប់​សិស្ស​ក្រីក្រ​ថ្នាក់​ទី​ ១ ​ដល់​ទី​ ៣ ត្រូវ​កំណត់​ដោយ​ប្រកាស​អន្តរ​ក្រសួង​អប់រំ និង​ក្រសួង​សេដ្ឋកិច្ច។

អនុក្រឹត្យ​របស់​លោក​ហ៊ុន សែន បាន​សម្រេច​ផ្តល់​អាហា​រូបករណ៍​ជា​ថវិកា ដល់​សិស្ស​ក្រីក្រ នៅ​តាម​គ្រឹះ​ស្ថាន​ចំណេះ​ទូទៅ មាន​កម្រិត​ បឋម​ភូមិ (ថ្នាក់ទី​ ១ ដល់​ទី​ ៦) ចំនួន​ ២៤ ម៉ឺន​រៀល កម្រិត​ ធម្យម​សិក្សា​បឋម​ភូមិ (ថ្នាក់ទី​ ៧ ដល់​ទី​ ៩) ចំនួន​ ២៤ ម៉ឺន​រៀល និង​កម្រិត​ធម្យម​សិក្សា​ទុតិយភូមិ​ (ថ្នាក់ទី​ ១០ ដល់​ទី​ ១២) ចំនួន ៣៦ ម៉ឺន​រៀល​ ក្នុង​មួយ​ឆ្នាំ​សិក្សា ដែល​ត្រូវ​បើក​ជា​បី​លើក។

លោក ហង់ ជួនណារ៉ុន រដ្ឋ​មន្ត្រី​ក្រសួង​អប់រំ​យុជន​និង​កីឡា មាន​ប្រសាសន៍​ប្រាប់ ភ្នំពេញ​ប៉ុស្តិ៍ ​ម្សិល​មិញ​ថា កន្លង​មក​ថវិការ​អាហារូបករណ៍​អនុវត្ត​តែ​លើ​សិស្ស​ថ្នាក់ទី​ ៧ ៨ និង​ ៩ ប៉ុណ្ណោះ ដែល​មាន​សិស្ស​ប្រមាណ​ ៦ ម៉ឺន​នាក់​ទទួល​បាន​ចេញ​ពី​ថវិការ​រដ្ឋ។

លោក​ថា៖ «កា​រផ្តល់​អាហារូប​ករណ៍​ជួយ​សិស្ស​បឋម​សិកក្សា​ ឲ្យ​រៀន​បាន​ជាប់​លាប់ លែង​បោះបង់​ចោល​កណ្តាល​ទី។ នោះ​នឹង​ជួយ​ពង្រឹង​មូលដ្ឋាន​នៅ​ពី​ក្រោម ដែល​ជា​គោល​នយោបាយ​រដ្ឋាភិបាល»។

លោក​បន្ត​ថា ទទួល​ស្គាល់​ថា ថវិកា​នេះ មាន​ចំនួន​តិច​តួច​អាច «ជួយ​សំរួល​ជីវភាព​សិស្ស​ក្រីក្រ។

លោក​បន្ត​ថា៖ «ការ​ផ្តល់​អាហារូបករណ៍ ក៏​នឹង​កាត់​បន្ថយ​ការ​បោះបង់ការ​សិក្សា ដើម្បី​ទៅរក​ការងារ​ធ្វើ​បាន​មួយ​ផ្នែក»។

លោក​បន្ត​ថា អាហារូបករណ៍​នេះ​នឹង​ផ្តោត​លើ​សិស្ស​ក្រីក្រ និង​ពូកែ​ ដែល​ក្រសួង​នឹង​ជ្រើសរើស​ប្រមាណ​ ៦ ម៉ឺន​នាក់​បន្ថែម​ទៀត។

លោក ស៊ឹម ស៊ីម នាយក​រង​វិទ្យាល័យ​ហ៊ុនសែន តាំងគោក ស្រុក​បារាយ ខេត្តកំពង់​ធំ មាន​ប្រសាសន៍​​​ថា លោក​មាន​សិស្ស​ក្រីក្រ ១៨ នាក់ ក្នុង​សាលា​ដែល​ទទួល​អាហា​រូបករណ៍​សម្រាប់​ថ្នាក់​ទី​ ៧ ដល់​ទី​ ៩ កន្លងមក គឺ​ម្នាក់​ទទួល​បាន​ ១៨ ម៉ឺន​រៀល​ក្នុង​មួយ​ឆ្នាំ។

លោកថ្លែងថា៖ «បើ​ថវិការ​ឡើង​អ៊ីចឹង​មែន ក៏​នៅ​តែ​មិន​គ្រប់គ្រាន់​សម្រាប់​សិស្ស​ក្រីក្រ​ពិត​ប្រាកដ​ដែរ ហើយ​ការ​បោះបង់​ការ​សិក្សា​នៅតែ​មាន​ជា​បន្ត​ទៀត ព្រោះ​គាត់​គិត​ថា គាត់​អាច​រក​ការងារ​ធ្វើ​ ជា​កម្មករ​រោងចក្រ ក៏​យ៉ាង​ហោច​ណាស់​បាន​ ១៥០ ដុល្លារ​ក្នុង​មួយ​ខែ​ដែរ»៕

អត្ថបទគួរចាប់អារម្មណ៍