.jpg)
សកម្មភាពជីករករ៉ែត្បូង នៅស្រុកកូនមុំ ក្នុងខេត្តរតនគិរី នាពេលកន្លងមក។ រូបថត ហ្វេសប៊ុក
ភ្នំពេញៈ រដ្ឋាភិបាល បានបង្កើតគោលនយោបាយជាតិស្តីពីធនធានរ៉ែរយៈពេល ១០ ឆ្នាំគិតពីឆ្នាំ ២០១៨ ដល់ ២០២៨ ដើម្បីដោះស្រាយផលប៉ះពាល់នានានិងគ្រប់គ្រងធនធានរ៉ែក៏ដូចជាការប្រមូលចំណូលចូលរដ្ឋឱ្យមានប្រសិទ្ធភាព។ នេះបើតាមការផ្សព្វផ្សាយរបស់ក្រសួងរ៉ែនិងថាមពល។
គោលនយោបាយនេះមាន ២៣ ទំព័រត្រូវបានចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី ២៩ ខែ ឧសភា ដែលក្រសួងរ៉ែនិងថាមពលទើបផ្សព្វផ្សាយកាលពីថ្ងៃ ៣០ វិច្ឆិកា គឺសំដៅលើរ៉ែ ដែលមិនមែនជាប្រេងនិងឧស្ម័នក្នុងគោលបំណងគ្រប់គ្រងនិងអភិវឌ្ឍប្រកបដោយចរីភាពក្នុងការផ្គត់ផ្គង់វត្ថុធាតុដើមដល់ការអភិវឌ្ឍហេដ្ឋារចនាសម្ព័ន្ធនិងសំណង់ព្រមទាំងបង្កើតប្រភពចំណូលផងដែរ។
ដោយបានលើកឡើងក្នុងគោលនយោបាយនេះរដ្ឋមន្រ្តីក្រសួងរ៉ែនិងថាមពល លោក ស៊ុយ សែម បានថ្លែងថា ការរៀបចំនេះធ្វើឡើងដោយផ្អែកតាមតថភាពនៃវិស័យរ៉ែរបស់កម្ពុជាបច្ចុប្បន្ននិងបានពិនិត្យមើលលើមេរៀននិងបទពិសោធនៃការអភិវឌ្ឍធនធានរ៉ែតាមបណ្តាប្រទេសជឿនលឿននានា។
លោកថា៖«គោលនយោបាយជាតិស្ដីពីធនធានរ៉ែឆ្នាំ ២០១៨-២០២៨ នេះ…យកចិត្តទុកដាក់ចម្បងលើកត្តាធំៗចំនួនបីគឺ បរិស្ថាន សង្គម និង សេដ្ឋកិច្ច»។
ដោយឡែកលោកនាយករដ្ឋមន្ត្រីហ៊ុន សែន បានលើកឡើងដែរថា ធនធានរ៉ែមិនកកើតឡើងវិញទេ ដែលតម្រូវឱ្យមានការគ្រប់គ្រងដោយប្រុងប្រយ័ត្នខ្ពស់បំផុត ដោយការអភិវឌ្ឍត្រូវមានតុល្យភាពនឹងការអភិរក្ស ប៉ុន្តែលោកមានជំនឿលើផលប្រយោជន៍នៃគោលនយោបាយនេះ។
លោកបានថ្លែងថា៖ «ខ្ញុំមានសេចក្តីសង្ឃឹមយ៉ាងមុតមាំថាគោលនយោបាយជាតិស្តីពីធនធានរ៉ែនឹងជួយឱ្យសម្រេចបាននូវចក្ខុវិស័យមួយគឺអភិវឌ្ឍធនធានរ៉ែដើម្បីផលប្រយោជន៍សេដ្ឋកិច្ចនិងសង្គមប្រកបដោយអភិបាលកិច្ចល្អនិងការទទួលខុសត្រូវខ្ពស់ផ្នែកបរិស្ថាន»។
តាមគោលនយោបាយនេះក៏នឹងជំរុញដល់ការរៀបចំក្រមស្តីពីធនធានរ៉ែ ស្តីពីការគ្រប់គ្រងប្រតិបត្តិការធនធានរ៉ែ សុវត្ថិភាពអណ្តូងរ៉ែ និងពង្រឹងសមត្ថភាពមន្រ្តីក្នុងការត្រួតពិនិត្យក្រុមហ៊ុនរ៉ែនិងធ្វើអធិការកិច្ចការដ្ឋាន ក៏ដូចជាការជំរុញរៀបចំសារពើភណ្ឌជាតិធនធានរ៉ែ ដើម្បីកំណត់អំពីអត្តសញ្ញាណសក្តានុពលធនធាន។
ក្រៅពីនេះគោលនយោបាយនេះក៏បានកំណត់ឲ្យក្រុមហ៊ុនរៀបចំផែនការទទួលខុសត្រូវសង្គមរួមក្នុងពេលស្នើសុំអាជ្ញាប័ណ្ណនិងមានការបញ្ជ្រាបការយល់ដឹងជាសាធារណៈដោយមានការចូលរួមពីរដ្ឋបាលថ្នាក់ក្រោមជាតិនិងត្រូវគោរពនូវសិទិ្ធសេរីភាព ទំនៀមទម្លាប់ ប្រពៃណី វប្បធម៌ និងជំនឿសាសនា របស់ជនជាតិដើមភាគតិចជាដើម។
តាមទិន្នន័យនៃរបាយការណ៍នេះបានឱ្យដឹងថា ក្នុងឆ្នាំ ២០១៧ មានអាជ្ញាប័ណ្ណបើកអណ្តូងរ៉ែនិងការដ្ឋានវាយថ្មប្រមាណ ២៦០ ត្រូវបានផ្តល់ឱ្យអាជីវករធ្វើអាជីវកម្មធនធានរ៉ែសំណង់លើផ្ទៃដីប្រមាណ ៦ ០០០ ហិកតា។
ទាក់ទងនឹងរ៉ែលោហៈ ក្រសួងបានផ្តល់អាជ្ញាបណ្ណស្វែងរុករកធនធានរ៉ែចំនួន ៥៤ អាជ្ញាប័ណ្ណគិតត្រឹមចុងឆ្នាំ២០១៧ រួមមាន រ៉ែដែក មាស ទង់ដែង និង រ៉ែបុកស៊ីត។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែ ក្រសួងរ៉ែនិងថាមពលបានថ្លែងនៅថ្ងៃ ២ ធ្នូ នេះថា នេះជាគោលនយោបាយលើកទី ១ ដែលតាក់តែងឡើងដើម្បីតម្រង់ទិសលើការអភិវឌ្ឍវិស័យនេះប៉ុន្តែពុំមានពឹង
បរទេសទេ។
លោកថា៖ «វាជាគោលនយោបាយលើកទីមួយក្នុងវិស័យរ៉ែ។ វាគ្រាន់តែជាការតម្រង់ទិសទៅលើការអភិវឌ្ឍនវិស័យរ៉ែក្នុងរយៈពេល ១០ ឆ្នាំហ្នឹងមានទិសដៅអភិវឌ្ឍន៍របៀបម៉េច។…«យើងអត់មានពឹងបរទេសអីមកជួយសរសេរឱ្យយើងទេ។ គ្រាន់តែយើងបានពិគ្រោះយោបល់ជាមួយភាគីពាក់ព័ន្ធដែលមាន NGO ក្រុមហ៊ុនឯកជនហើយនិងក្រសួងពាក់ព័ន្ធអីហ្នឹង»៕
