.jpg)
មន្ត្រីឃុំ ចែកបណ្ណសមធម៌ជូនជនក្រីក្រពីថ្ងៃ ៨ មីនា។ រូបថត ក្រសួងសង្គមកិច្ច
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងសង្គមកិច្ចអតីតយុវជន និងយុវនីតិសម្បទាកំពុងបន្តកម្មវិធីឧបត្ថម្ភសាច់ប្រាក់ជូនជនក្រីក្រ និងងាយរងគ្រោះដោយវិបត្តិកូវីដ ១៩ នៅជុំទី៤ លើកទី២ និងបន្តលើកទី៣ រហូតដល់ចុងខែមេសា ឆ្នាំ ២០២១ បន្ទាប់ពីបានចំណាយថវិការដ្ឋអស់ជាង ២៣០ លានដុល្លារ ជួយពលរដ្ឋជាង ៦៨ ម៉ឺនគ្រួសារ។
សេចក្តីជូនដំណឹងរបស់ក្រសួងសង្គមកិច្ចអតីតយុវជន និងយុវនីតិសម្បទាចុះថ្ងៃទី ២៤ កុម្ភៈ ឆ្នាំ ២០២១ បានឱ្យដឹងថា ចាប់ពីថ្ងៃទី ២៥ ខែ មិថុនា ឆ្នាំ ២០២០ ដល់ថ្ងៃទី ២៤ ខែ កុម្ភៈ ២០២១ រាជរដ្ឋាភិបាលបានចំណាយថវិការដ្ឋចំនួន ២៣០,៥៨ លានដុល្លារ ជួយដល់ជនក្រីក្រ និងងាយរងគ្រោះដោយវិបត្តិជំងឺកូវីដ ១៩។
បើគិតមកទល់បច្ចុប្បន្ន រដ្ឋាភិបាលបានដំណើរការឧបត្ថម្ភសាច់ប្រាក់ក្នុងកម្មវិធីនេះឈានដល់ជុំទី៤ លើកទី២ ហើយ បន្ទាប់ពីជុំទី១ និងជុំទី២ ធ្វើឡើង ២ លើក និងជុំទី៣ ធ្វើឡើង ៣ លើក ហើយជុំទី៤ ត្រូវធ្វើ ៣ លើក។
សេចក្តីជូនដំណឹងបន្តថាដោយគិតមកទល់ត្រឹមថ្ងៃទី ២៤ កុម្ភៈ ឆ្នាំ ២០២១ ក្នុងជុំទី៤ លើកទី១ ក្រសួងសង្គមកិច្ចបានឧបត្ថម្ភសាច់ប្រាក់ជូនជនក្រីក្រដល់សមាជិកសរុប ២ ៧៣១ ១៦១ នាក់ នៃចំនួន ៦៨៨ ៥៣៩ គ្រួសារ។
ដោយឡែកសម្រាប់ការបើកប្រាក់ឧបត្ថម្ភជុំទី៤ លើកទី២ បានចាប់ផ្តើមពីថ្ងៃទី ២៥ ខែ កុម្ភៈ ឆ្នាំ ២០២១ រហូតដល់ថ្ងៃទី ២៤ មីនា ២០២១ ដែលមានរយៈពេល ៣០ ថ្ងៃ និងលើកទី៣ ចាប់ពីថ្ងៃទី ២៥ ខែមីនា ដល់ថ្ងៃទី ២៤ ខែ មេសា ឆ្នាំ ២០២១។
លោក ឈួ សុបញ្ញា ប្រធាននាយកដ្ឋានសុខុមាលភាពសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទាបានប្រាប់ ភ្នំពេញ ប៉ុស្តិ៍ ម្សិលមិញថាដោយសារវិបត្តិកូវីដនៅបន្តអូសបន្លាយនៅកម្ពុជា រាជរដ្ឋាភិបាលសម្រេចបន្តការបើកប្រាក់ឧបត្ថម្ភនេះចាប់ពីថ្ងៃ ២៥ ខែមីនា ដល់ថ្ងៃទី ២៤ ខែ មេសា ឆ្នាំ ២០២១ ទៀត។
លោកថា៖ «តាមផែនការកម្មវិធីបើកប្រាក់ឧបត្ថម្ភនឹងត្រូវបញ្ចប់នៅត្រឹមថ្ងៃទី ២៤ មីនា ប៉ុន្តែយើងនឹងបន្តទៀតចាប់ពីថ្ងៃទី ២៥ ខែមីនា រហូតដល់ថ្ងៃទី ២៤ ខែ មេសា ២០២១ នេះជាអ្វីដែលមន្ត្រីបានចេញឯកសារផ្លូវច្បាប់សម្រាប់ក្នុងអំឡុងពេលកូវីដ»។ ក៏ប៉ុន្តែបន្ទាប់ពីខែមេសាទៅថា តើរដ្ឋាភិបាលបន្ត ឬមិនបន្តកម្មវិធីនេះអាស្រ័យលើស្ថានភាពជាក់ស្តែង។
លោកបានបញ្ជាក់ថា៖ «យើងបានដឹងហើយ សេចក្តីសម្រេចថា បន្ត ឬមិនបន្តគឺបានផ្តល់សិទ្ធិជូនប្រធានក្រុមប្រឹក្សាជាតិគាំពារសង្គម (រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន) ជាអ្នកសម្រេចដោយស្របទៅលើស្ថានភាពជាក់ស្តែង និងការសម្របសម្រួលពិនិត្យពីសម្តេចតេជោនាយករដ្ឋមន្ត្រី)។
លោក ឈួ សុបញ្ញា បានឱ្យដឹងថា សម្រាប់ការឧបត្ថម្ភដល់ជនក្រីក្រត្រូវបានចែកចេញជា ៣ ប្រភេទ គឺជនក្រីក្រនៅទីប្រជុំជនក្នុងរាជធានីភ្នំពេញ ជនក្រីក្រទីប្រជុំជនក្រៅរាជធានីភ្នំពេញ និងជនក្រីក្រនៅជនបទ ខណៈគ្រួសារនីមួយៗនឹងទទួលបានសាច់ប្រាក់ទៅតាមទំហំគ្រួសារ និងជនងាយរងគ្រោះ។
លោកថា៖ «យើងឱ្យតាមប្រភេទនៃគ្រួសារទីប្រជុំជនក្នុងភ្នំពេញផ្សេង ទីប្រជុំជនក្រៅភ្នំពេញផ្សេង និងជនបទផ្សេង គាត់មានសមាជិកប៉ុន្មាន យើងឱ្យគាត់ប៉ុណ្ណឹង ១ កញ្ចប់ ក្រោយមកយើងពិនិត្យមើលទៀតថា តើនៅក្នុងកញ្ចប់ហ្នឹង គាត់មានសមាជិកជនរងគ្រោះ ៤ ប្រភេទទេ ទី១ កុមារក្រោម ៥ ឆ្នាំ មនុស្សចាស់ចាប់ពី ៦០ ឆ្នាំឡើងទៅ ជនពិការ និងគ្រួសារដែលមានផ្ទុកមេរោគអេដស៍ អ៊ីចឹងក្នុង ១ គ្រួសារទទួលបានប្រាក់មិនស្មើគ្នាទេ គឺអាស្រ័យលើការគណនាជាក់ស្តែង»។
យ៉ាងណាក្ដី លោកបានគូសបញ្ជាក់ថា ជាមធ្យមក្នុង ១ គ្រួសារនឹងទទួលបានប្រាក់ ២០ ម៉ឺនរៀល សម្រាប់ជនក្រីក្រនៅតាមជនបទ និង ៨០ ដុល្លារ សម្រាប់ជនក្រីក្រនៅទីប្រជុំជនភ្នំពេញ។
លោកថា៖ «ជាមធ្យមនៅជនបទទទួលបាន ២០ ម៉ឺនរៀល ក្នុង ១ ខែ សម្រាប់ ១ គ្រួសារ ចំណែកអ្នកនៅទីក្រុងជាមធ្យម ៨០ ទៅ ១០០ ដុល្លារ ការដែលផ្តល់នេះមិនមែនសុខៗយើងឱ្យសាច់ប្រាក់ខុសគ្នាទេ ផ្តល់នេះផ្អែកលើមូលដ្ឋាននៃការសិក្សាលើប្រាក់ចំណូលការសិក្សានេះមានការចូលរួមពី (ធនាគារពិភពលោក) និង (ធនាគារអភិវឌ្ឍន៍អាស៊ី)»។
ក្រសួងសង្គមកិច្ចឱ្យដឹងដែរថា ចំពោះគ្រួសារដែលបានផ្ទៀងផ្ទាត់នៅជុំទី១ ជុំទី២ ជុំទី៣ និងជុំទី៤ លើកទី១ រួចហើយ សូមទៅបើកប្រាក់នៅតាមបញ្ជរវីងណាមួយដោយមិនតម្រូវឱ្យមកសាលាឃុំ សង្កាត់ជាថ្មីទេ។ ប៉ុន្តែចំពោះគ្រួសារមានបណ្ណសមធម៌ មានសុពលភាព ហើយមិនទាន់បានផ្ទៀងផ្ទាត់ក្នុងជុំទី១ ដល់ជុំទី៤ លើកទី២ និងគ្រួសារក្រីក្រដែលទើបបានបណ្ណថ្មី សូមទៅផ្ទៀងផ្ទាត់នៅតាមឃុំ សង្កាត់ដើម្បីទទួលបានការឧបត្ថម្ភសាច់ប្រាក់ក្នុងជុំទី៤ លើកទី២៕
