ភ្នំពេញៈ ក្រសួងការងារ និងបណ្ដុះបណ្ដាលវិជ្ជាជីវៈបានប្រកាសពីការបើកផ្ដល់ប្រាក់ឧបត្ថម្ភជូនកម្មករ-និយោជិតដែលត្រូវបានបន្តព្យួរការងារចំនួន ៦ ៣០៣ នាក់ នៅក្នុងរោងចក្រសហគ្រាសចំនួន ៣៤ ក្នុងវិស័យកាត់ដេរដែលបន្តរងផលប៉ះពាល់ពីវិបត្តិជំងឺកូវីដ ១៩។
សេចក្តីជូនដំណឹងស្តីពីការបើកផ្ដល់ប្រាក់ឧបត្ថម្ភលើកទី ៥៧ ជូនកម្មករ-និយោជិតចុះថ្ងៃទី ៧ ខែ មេសា ឆ្នាំ ២០២១ របស់ក្រសួងការងារបានឱ្យដឹងថា ការបើកផ្តល់ឧបត្ថម្ភជូនកម្មករទាំងជាង ៦ ០០០ នាក់នេះ គឺស្របតាមស្មារតីនៃការអនុញ្ញាតព្យួរកិច្ចសន្យាការងារជុំទី៣ នៃកញ្ចប់វិធានការរបស់រាជរដ្ឋាភិបាល។
ក្រសួងបញ្ជាក់ថា ធនាគារឯកទេសវីងនឹងផ្ញើសារអំពីការបើកប្រាក់ឧបត្ថម្ភរបស់រដ្ឋាភិបាលទៅកាន់លេខទូរស័ព្ទ ដែលកម្មករបានផ្តល់ឱ្យក្រសួងតាមរយៈរដ្ឋបាលរោងចក្រ សហគ្រាសនាពេលកន្លងមក។
សេចក្តីជូនដំណឹងបញ្ជាក់ថា៖ «ក្នុងករណីបងប្អូនកម្មករនិយោជិតដែលបម្រើការងារនៅរោងចក្រ សហគ្រាសទាំង ៣៤ នេះមិនបានទទួលសារពីធនាគារឯកទេសវីង នោះសូមបងប្អូនទំនាក់ទំនងសួរព័ត៌មានបន្ថែម ឬធ្វើបច្ចុប្បន្នភាពលេខទូរស័ព្ទរបស់ខ្លួន ទៅរដ្ឋបាលរោងចក្រសហគ្រាសរបស់ខ្លួន»។
លោក ហេង សួរ អ្នកនាំពាក្យក្រសួងការងារមិនអាចទាក់ទងសុំការអត្ថាធិប្បាយបន្ថែមជុំវិញការផ្តល់ប្រាក់ឧបត្ថម្ភជូនដល់កម្មករ-និយោជិត ដែលត្រូវបានបន្តព្យួរការងារនេះបានទេកាលពីម្សិលមិញ។
គិតត្រឹមខែមីនា ឆ្នាំ ២០២១ រាជរដ្ឋាភិបាលបានឧបត្ថម្ភប្រាក់ជូនកម្មករនិយោជិត ដែលបាត់បង់ការងារក្នុងវិស័យកាត់ដេរ និងទេសចរណ៍សរុបប្រមាណជា ២៦ លានដុល្លារអាមេរិក ខណៈចាប់តាំងពីខែកុម្ភៈ ឆ្នាំ ២០២០ មក មានរោងចក្រ សហគ្រាស ក្នុងវិស័យកាត់ដេរ និងវិស័យទេសចរណ៍បានព្យួរការងារកម្មករជាង ៣៨៩ ២០០ នាក់ ក្នុងរោងចក្រសហគ្រាសចំនួន ៧៦។ នេះបើតាមលោក ហេង សួរ ដែលបានប្រាប់អ្នកសារព័ត៌មានកាលពីចុងខែមីនា។
សូមជម្រាបថា រដ្ឋាភិបាលបានសម្រេចឧបត្ថម្ភថវិកាប្រមាណ ៤០ ដុល្លារ ក្នុង ១ ខែ សម្រាប់កម្មករ និយោជិត ដែលត្រូវបានព្យួរការងារក្នុងម្នាក់ ហើយក្នុងនោះនិយោជកតម្រូវឱ្យឧបត្ថម្ភជូនកម្មករ-និយោជិតចំនួន ៣០ ដុល្លារ។ ការសម្រេចបែបនេះធ្វើឡើងដើម្បីជួយសម្រាលការលំបាក និងការចំណាយរបស់កម្មករនិយោជិត ដែលមិនមានការងារធ្វើក្នុងអំឡុងពេលទទួលរងនូវវិបត្តិកូវីដ១៩។
លោក អាត់ ធន់ ប្រធានសហភាពការងារកម្ពុជាបានលើកឡើងថា ប្រាក់ឧបត្ថម្ភរបស់រដ្ឋាភិបាលរួមទាំងប្រាក់ដែលរោងចក្រ សហគ្រាសផ្តល់ឱ្យកម្មករក្នុងអំឡុងពេលនេះគឺបានចូលរួមចំណែកជួយដល់ជីវភាពកម្មករបានមួយចំនួនធំ។ ប៉ុន្តែលោកថា ថវិកាទាំងនេះមិនអាចជួយកម្មករក្នុងការដោះស្រាយបញ្ហាផ្សេងទៀតដូចជាការជំពាក់បំណុល និងតម្រូវការសង្គមចាំបាច់បាននោះទេ។
បន្ថែមពីលើការឧបត្ថម្ភថវិកានេះលោក អាត់ ធន់ ចង់ឱ្យរដ្ឋាភិបាលចូលរួមគិតទៅដល់កម្មករនៅតាមបណ្តារោងចក្រដទៃទៀតដែលកំពុង និងបានប្រឈមនឹងការបិទទ្វារ គួរតែបញ្ចេញកញ្ចប់ថវិកាមួយដែលអាចផ្តល់ឱ្យពួកគាត់អាចទ្រទ្រង់ជីវភាពបាន។
លោកបញ្ជាក់ថា៖ «រដ្ឋាភិបាលគួរតែពិនិត្យមើលអ្នកដែលអត់មានការងារធ្វើ អ្នកដែលបាត់បង់ការងារដោយសារតែរោងចក្រមានបញ្ហាកូវីដ ឬបញ្ហាផ្សេងៗ រួមទាំងកម្មករដែលត្រូវបានគេបញ្ឈប់ដោយបញ្ហាផ្សេងៗដោយគ្មានលទ្ធភាព គួរតែមានប្រាក់បម្រុងនេះដូចទៅនឹងប្រទេសគេផ្សេង។ ពេលនេះ បើរដ្ឋាភិបាលមានថវិកា គួរតែបញ្ចេញដើម្បីជួយ»។
ក្រៅពីនេះលោក អាត់ ធន់ ក៏ស្នើដល់រដ្ឋាភិបាល គួរតែពិចារណាផ្តល់ប្រាក់ខែពេញជូនដល់កម្មករដែលត្រូវបានតម្រូវឱ្យធ្វើចត្តាឡីស័ក ខណៈដែលកម្មករជាច្រើនត្រូវបានកាត់ប្រាក់ខែ ឬទទួលបានតែប្រាក់ខែពាក់កណ្តាល បន្ទាប់ពីពួកគេ ធ្វើចត្តាឡីស័កតាមការណែនាំរបស់រដ្ឋាភិបាល៕