The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​ប្រកាស​ជ្រើសរើស​មន្ត្រី​រាជការ​ជិត​ ៣ ​ម៉ឺន​នាក់​បន្ថែម​ទៀត​ដើម្បី​បំពេញ​តម្រូវការ

រដ្ឋាភិបាល​ប្រកាស​ជ្រើសរើស​មន្ត្រី​រាជការ​ជិត​ ៣ ​ម៉ឺន​នាក់​បន្ថែម​ទៀត​ដើម្បី​បំពេញ​តម្រូវការ

 មន្ត្រី​រដ្ឋាភិបាល​នៅក្នុង​ពិធី​មួយ​កន្លង​មក​។
មន្ត្រី​រដ្ឋាភិបាល​នៅក្នុង​ពិធី​មួយ​កន្លង​មក​។ ហុង មិនា

រដ្ឋាភិបាល​ប្រកាស​ជ្រើសរើស​មន្ត្រី​រាជការ​ជិត​ ៣ ​ម៉ឺន​នាក់​បន្ថែម​ទៀត​ដើម្បី​បំពេញ​តម្រូវការ

ភ្នំពេញៈ រដ្ឋាភិបាល​ប្រកាស​ជ្រើសរើស​មន្ត្រី​ក្របខ័ណ្ឌ​មន្ត្រី​រាជការ​ស៊ីវិល មន្ត្រី​ជាប់​កិច្ចសន្យា និង​បុគ្គលិក​បណ្តែត​រហូត​ដល់​ជិត ៣ ម៉ឺន​នាក់​សម្រាប់​ឆ្នាំ ២០១៦ ដើម្បី​បំពេញ​ការងារ​នៅ​​តាម​ក្រសួង​ដែល​ខ្វះ​បុគ្គលិក​នៅ​ទូទាំង​ប្រទេស​ ខណៈ​ដែល​​អង្គការ​សង្គម​ស៊ីវិល​មើល​ឃើញ​ថា​ក្រសួង​មន្ទីរ​នានា​របស់​រដ្ឋាភិបាល​នៅ​តែ​មិន​ទាន់​​​ប្រើ​ឲ្យ​អស់​សក្តានុពល​ចំពោះ​មន្ត្រី​រាជការ​ដែល​មាន​ស្រាប់​នៅ​ឡើយ​។

នៅក្នុង​លិខិត​ចុះ​ហត្ថលេខា​ដោយ​រដ្ឋមន្ត្រី​មុខងារ​សាធារណៈ​លោក ពេជ្រ ប៊ុនធិន ចុះ​ផ្សាយ​កាលពី​ថ្ងៃ​ទី ១៨ ខែ​កុម្ភៈ ឆ្នាំ ២០១៦ ដែល​ភ្នំពេញ​ប៉ុស្តិ៍​ទើប​តែ​ទទួល​បាន​កាលពី​ម្សិលមិញ​បាន​ឱ្យ​ដឹង​ថា​រដ្ឋាភិបាល​បាន​អនុញ្ញាត​ផ្តល់​គោលការណ៍​ជ្រើសរើស​មន្ត្រី​ក្របខ័ណ្ឌ និង​បុគ្គលិក​បណ្តែត​​ផ្សេង​ទៀត​សរុប​ចំនួន ២៧៤៩៤ នាក់​សម្រាប់​ឆ្នាំ ២០១៦ នេះ។

លិខិត​បន្ត​ថា​ក្នុង​នោះ «ជ្រើសរើស​មន្ត្រី​​រាជការ​ស៊ីវិល​ក្នុង​ក្របខ័ណ្ឌ​ចំនួន ៧៦២១ កន្លែង​មន្ត្រី​ជាប់​កិច្ចសន្យា​ចំនួន ១០៩២១ នាក់​បុគ្គលិក​អណ្តែត​ចំនួន ៦៥៣០ នាក់​ (សម្រាប់​ការងារ​សម្អាត​សួន​ និង​បោសសម្អាត )និង​ឧទ្យានុរក្ស​ចំនួន ៩៦០ នាក់ (សម្រាប់​ក្រសួង​បរិស្ថាន) និង​គ្រូបង្រៀន​ពុទ្ធិកៈ​ជាប់​កិច្ចសន្យា​ចំនួន ១៤៦២ នាក់»។

នៅក្នុង​លិខិត​ឱ្យ​ដឹង​​ដែរ​​ថា​ក្រសួង​អប់រំ​ត្រូវការ​ជ្រើសរើស​មន្ត្រី​ក្របខណ្ឌ​ច្រើន​ជាង​គេ​រហូត​ទៅ​ដល់ ៣៤៨៨ នាក់​ក្នុង​នោះ​មាន​មន្ត្រី​ជាប់​កិច្ចសន្យា​ចំនួន ១៣៥ នាក់ និង​បុគ្គលិក​បណ្តែត​ចំនួន ២៩៦ នាក់។ បន្ទាប់មក​គឺ​ក្រសួង​សុខាភិបាល​ត្រូវការ​ជ្រើសរើស​មន្ត្រី​រាជការ​ក្របខ័ណ្ឌ​ចំនួន ៧៧៥ នាក់​ជាប់​កិច្ចសន្យា​ចំនួន ៤១៩១ នាក់។ ក្រសួង​មហាផ្ទៃ​ត្រូវ​ជ្រើសរើស​មន្ត្រី​រាជការ​ក្របខណ្ឌ​ចំនួន ៤៥១ នាក់​ជាប់​កិច្ចសន្យា​ចំនួន ៤៥៨ នាក់ និង​បណ្តែត​​ចំនួន ៩១០ នាក់។ ចំណែក​ក្រសួង​កសិកម្ម​ជ្រើសរើស​មន្ត្រី​ក្របខ័ណ្ឌ​ចំនួន ៣៣៣ នាក់​ជាប់​កិច្ចសន្យា​ចំនួន ១៨២ នាក់​ និង​បណ្តែត​ចំនួន ៨៤២ នាក់។ ទីស្តីការ​គណៈរដ្ឋមន្ត្រី​ត្រូវ​ការ​ជ្រើសរើស​មន្ត្រី​ក្របខ័ណ្ឌ​ចំនួន ៧៣ ​នាក់ កិច្ចសន្យា​ចំនួន ១៣០ នាក់។

ក្រសួង​មុខងារ​សាធារណៈ​ក៏​បាន​ណែនាំ និង​ជំរុញ​ឱ្យ​ជ្រើសរើស​បេក្ខជន​ដែល​មាន​សមត្ថភាព​គ្រប់គ្រាន់​ជាពិសេស​យក​ចិត្ត​ទុកដាក់​លើ​បេក្ខភាព​ជនពិការ​ឱ្យ​បាន ២ ភាគរយ​នៃ​ចំនួន​​​ក្របខ័ណ្ឌ​សរុប​របស់​សមី​ក្រសួង ស្ថាប័ន និង​បេក្ខភាព​នារី​ឱ្យ​បាន​ពី​ ២០ ទៅ ៥០ ភាគរយ​ដើម្បី​បំពេញ​​តំណែង​ដែល​​ទំនេរ និង​​សេចក្តី​ត្រូវការ​របស់​ក្រសួង​នានា​ដែល​ស្នើសុំ។

លោក ពេជ្រ ប៊ុនធិន បាន​ប្រាប់​ភ្នំពេញ​ប៉ុស្តិ៍​បន្ថែម​កាលពី​ម្សិលមិញ​ថា​ការ​ជ្រើសរើស​មន្ត្រី​រាជការ និង​បុគ្គលិក​បណ្តែត​បន្ថែម​សម្រាប់​ឆ្នាំ ២០១៦ នេះ​គឺ​ដើម្បី​បំពេញ​មុខ​តំណែង​ចាស់​របស់​មន្ត្រី​ដែល​ត្រូវ​ចូល​និវត្តន៍ និង​បំពេញ​តម្រូវការ​របស់​ក្រសួង។

លោក​ថា៖ ​«​ជ្រើសរើស​ដើម្បី​បំពេញ​កន្លែង​ខ្លះ​ដែល​ជា​ការដ្ឋាន​ថ្មី​ត្រូវ​បន្ថែម​ឱ្យ​គេ និង​បំពេញ​លើ​អ្នក​លុប​ឈ្មោះ និង​មន្ត្រី​ដែល​ចូលនិវត្ត​ន៍»។

លោក​បន្ត​ថា​ជា​រៀងរាល់​ឆ្នាំ​ក្នុង​ខែ​មិថុនា និង​ខែ​កក្កដា​គ្រប់​ក្រសួង​ទាំងអស់​ត្រូវ​ធ្វើ​ផែនការ​បញ្ជូន​ទៅ​មុខងារ​សាធារណៈ​ដើម្បី​កំណត់​ពី​ចំនួន​ដែល​នឹង​ត្រូវ​ជ្រើសរើស​​មន្ត្រី​ក្របខ័ណ្ឌ និង​បុគ្គលិក​បណ្តែត។ យ៉ាង​ណា​ក៏ដោយ​លោក​មិន​ទាន់​អាច​បញ្ជាក់​ថា​ការ​ជ្រើសរើស​មន្ត្រី​ឆ្នាំ​នេះ​ច្រើន​ជាង​ឆ្នាំ​មុន​​ ឬ​យ៉ាង​ណា​នោះ​ទេ។

បើ​តាម​លោក ប៊ុនធិន ចំពោះ​ការ​ប្រឡង​ជ្រើសរើស​មន្ត្រី​ក្របខ័ណ្ឌ​រដ្ឋ​វិញ​គឺ​ចាប់ផ្តើម​ពី​ការ​ជូន​ដំណឹង​នេះ​តទៅ​តែ​ផ្អែក​​លើ​ក្រសួង​សមី​ដែល​មាន​ពេល​ទំនេរ​​ក្នុង​ការ​រៀបចំ។ បច្ចុប្បន្ន​មាន​មន្ត្រី​រាជការ​ស៊ីវិល​នៅ​គ្រប់​ស្ថាប័ន​ក្រសួង​រដ្ឋ​ទាំងអស់​ក្នុង​រង្វង់ ២០ ម៉ឺន​នាក់​។

ទាក់ទង​នឹង​ការ​ជ្រើសរើស​មន្ត្រី​ក្របខ័ណ្ឌ​បន្ថែម​ទៀត​នេះ​អគ្គលេខាធិការ​នៃ​សមាគម​មន្ត្រី​រាជការ​ឯករាជ្យ​កម្ពុជា​លោក ហៀក ទ្រី ថ្លែង​ថា​ការ​ជ្រើសរើស​មន្ត្រី​បន្ថែម​សម្រាប់​កិច្ចការ​សាធារណៈ​ជា​រឿង​ធម្មតា​តែ​លោក​ដាក់​​ចម្ងល់​ថា​តើ​អ្វី​ដែល​រដ្ឋាភិបាល​​ជ្រើសរើស​នេះ​អាច​ដោះស្រាយ​​​បញ្ហា​ ឬ​ការ​ឆ្លើយតប​សេវា​សាធារណៈ​បាន​ល្អ​ជាង​មុន​ឬ​នៅ​ដដែល?

លោក​​បញ្ជាក់​ថា​ រដ្ឋាភិបាល​គួរ​ប្រើ​មន្ត្រី​ដែល​មាន​​ស្រាប់​ឱ្យ​អស់​លទ្ធភាព​មុន​នឹង​ចាប់ផ្តើម​ជ្រើសរើស​មន្ត្រី​ថ្មី​ដើម្បី​រក្សា​កញ្ចប់​ថវិកា​រដ្ឋ​កុំ​ឱ្យ​ខ្ជះខ្ជាយ។

លោក​ថា៖ ​«ធម្មតា​មន្ត្រី​រាជការ​ពី​មួយ​ថ្ងៃ​​ទៅ​មួយ​​ថ្ងៃ​វិវត្ត​ទៅ​រក​ភាព​ចាស់​ហើយ​​ត្រូវការ​មន្ត្រី​ក្មេង​ប៉ុន្តែ​សំខាន់​តើ​មន្ត្រី​រាជការ​ដែល​មាន​ហើយ​ប្រើ​អស់​លទ្ធភាព​ហើយ​​ឬ​នៅ? ទី ២ តើ​មន្ត្រី​រាជការ​ដែល​ជ្រើសរើស​បន្ថែម​​​ធ្វើ​ឡើង​ទៅ​តាម​លក្ខណៈ​បច្ចេកទេស​តាម​​អភិបាលកិច្ច​ល្អ ឬ​តាម​បក្ស​ពួក​និយម?»។

យ៉ាង​ណា​ក៏ដោយ​លោក​សង្កេត​ឃើញ​ថា​ស្ថាប័ន​រដ្ឋ​​មួយ​ចំនួន​បាន​ដាក់​កូនចៅ និង​បក្ខពួក​ខ្លួន​ចូល​ធ្វើការ​ខណៈ​មន្ត្រី​ជាប់​កិច្ចសន្យា​មួយ​​ចំនួន​ធ្វើការ​ជិត​ ២០ ​ឆ្នាំ​មិន​ទាន់​បាន​ក្លាយ​ជា​មន្ត្រី​ក្របខ័ណ្ឌ​រដ្ឋ​ផង​ដែល​​នេះ​​វា​ជា​រឿង​អយុត្តិធម៌​។

លោក​​បញ្ជាក់​ថា៖ «​សំខាន់​ស្ថាប័ន​រដ្ឋាភិបាល​មួយ​ចំនួន​គេ​ចោទ​ថា​ដាក់​កូន​ក្មួយ​របស់​ខ្លួន​ជា​មន្ត្រី​ជាប់​កិច្ចសន្យា​ដូច​គ្រួសារ​ខ្ញុំ​​ធ្វើ​ជា​មន្ត្រី​កិច្ចសន្យា​​ ២០ ឆ្នាំ​ហើយ​មិន​ទាន់​បាន​ចូល​ក្របខ័ណ្ឌ​រដ្ឋ​ផង​ហើយ​មន្ត្រី​កិច្ចសន្យា​ខ្លះ​ចូល​ទៅ​បាន​តួនាទី​ខ្ពស់​លឿន»​៕

អត្ថបទគួរចាប់អារម្មណ៍