ភ្នំពេញៈ រាជរដ្ឋាភិបាលបានប្រើប្រាស់ថវិកាជាតិចំនួន ១១ លានដុល្លារ សម្រាប់ទិញឱសថប្រឆាំងមេរោគអេដស៍ក្នុងរយៈពេល ៣ ឆ្នាំ (២០២១ ដល់ ២០២៣) ដើម្បីប្រើប្រាស់ក្នុងការព្យាបាលអ្នកផ្ទុកមេរោគអេដស៍ និងអ្នកជំងឺអេដស៍ និងបង្ការការបង្ករោគក្នុងចំណោមអ្នកដែលប្រឈមខ្ពស់នឹងការចម្លងមេរោគនេះ ខណៈអ្នកទទួលបាននូវការព្យាបាលដោយឱសថនេះមានចំនួន ៦១ ១៩៣ នាក់។
នេះបើតាមលោកទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងក្នុងសិក្ខាសាលាស្តីពីការអនុវត្តសេចក្តីជូនដំណឹងលេខ ២១៣ សជណ.សស ក្នុងការឆ្លើយតបនឹងមេរោគអេដស៍ និងជំងឺអេដស៍នៅសាលាខេត្ដកំពង់ស្ពឺកាលពីថ្ងៃទី ៣១ ខែសីហា។
លោកថ្លែងថា សេចក្តីជូនដំណឹងលេខ ២១៣ សជណ.សស គឺជាគោលនយោបាយរបស់រាជរដ្ឋាភិបាលដែលបានដាក់ចេញដើម្បីរុញឱ្យក្រសួង ស្ថាប័ន និងថ្នាក់ក្រោមជាតិ ធ្វើការងារប្រយុទ្ធនឹងជំងឺអេដស៍។ លោកថ្លែងថា៖ «បច្ចុប្បន្ននេះកញ្ចប់ថវិកាឆ្លើយតបនឹងជំងឺអេដស៍កាន់តែរួមតូចទៅៗ។ ប៉ុន្តែបានប្រើប្រាស់ថវិកាជាតិចំនួន ១១ លានដុល្លារសម្រាប់ការចំណាយទៅលើការទិញឱសថដើម្បីប្រឆាំងនឹងមេរោគអេដស៍ (ARV=Antiretroviral) ព្យាបាលដល់អ្នកផ្ទុកមេរោគអេដស៍ និងអ្នកជំងឺអេដស៍ និងសម្រាប់បង្ការការចម្លងចំពោះអ្នកដែលប្រឈមខ្ពស់ចំពោះជំងឺនេះក្នុងរយៈពេល ៣ ឆ្នាំ គឺពីឆ្នាំ ២០២១ ដល់ ២០២៣»។
លោកទេសរដ្ឋមន្ដ្រីបន្តថា ការងារប្រយុទ្ធប្រឆាំងនឹងជំងឺអេដស៍ គឺស្ថិតនៅក្នុងដំណាក់កាលផ្ទេរការងារទៅថ្នាក់ក្រោមជាតិ។ អំណាចគ្រប់គ្រងគឺស្ថិតនៅរដ្ឋបាលខេត្តតែម្ដង។ លោកបន្តថា អាជ្ញាធរជាតិប្រយុទ្ធនឹងជំងឺអេដស៍ក៏បានដាក់បញ្ចូលអ្នកជំងឺអេដស៍ឱ្យទទួលបានបណ្ណក្រីក្រដើម្បីទទួលបានប្រាក់ឧបត្ថម្ភពីរាជរដ្ឋាភិបាលផងដែរ។
លោក ហោ ប៊ុនឡេង អនុប្រធានអាជ្ញាធរជាតិប្រយុទ្ធនឹងជំងឺអេដស៍ថ្លែងប្រាប់ភ្នំពេញប៉ុស្ដិ៍កាលពីថ្ងៃម្សិលមិញថា សម្រាប់ថវិកាចំណាយទៅលើការឆ្លើយតបមេរោគអេដស៍ និងជំងឺអេដស៍គឺមានការធ្លាក់ចុះគួរឱ្យព្រួយបារម្ភចាប់តាំងពីឆ្នាំ ២០១៧ រហូតមក។ កត្ដាធ្លាក់ចុះនេះ ដោយយោងទៅលើជ័យជម្នះដែលកម្ពុជាទទួលបានកន្លងមក និងការបង្វែរនូវថវិកាជំនួយទៅប្រើប្រាស់លើវិស័យផ្សេងៗរបស់ប្រទេសម្ចាស់ជំនួយ។
លោកថ្លែងថា៖ «នៅក្នុងឆ្នាំ ២០១៧ កម្ពុជាមានថវិកាសរុបសម្រាប់ចំណាយលើការឆ្លើយតបមេរោគអេដស៍ និងជំងឺអេដស៍សរុបទាំងជាតិ និងជំនួយអន្តរជាតិមានប្រមាណ ៥០ លានដុល្លារ ក្នុង ១ ឆ្នាំៗ។ ប៉ុន្ដែនៅក្នុងឆ្នាំ ២០២០ នេះគឺមានថវិកាប្រមាណ ២០ លានដុល្លារតែប៉ុណ្ណោះ»។
លោកបញ្ជាក់ថា ស្ថានភាពមេរោគអេដស៍ និងជំងឺអេដស៍នៅក្នុងឆ្នាំ ២០១៩ កន្លងទៅនៅកម្ពុជាមានអ្នកផ្ទុកមេរោគអេដស៍ប្រមាណជា ៧៣ ០០០ នាក់ អ្នកឆ្លងមេរោគអេដស៍ថ្មីប្រមាណជា ៧៨០ នាក់ និងមានអ្នកស្លាប់ដោយសារជំងឺអេដស៍ប្រមាណជា ១ ៣០០ នាក់។ ដោយឡែកមានអ្នកទទួលបាននូវការព្យាបាលដោយឱសថប្រឆាំងមេរោគអេដស៍ចំនួន ៦១ ១៩៣ នាក់។
លោក ប៊ុនឡេង បន្ដថា ជាទូទៅកម្ពុជាអាចនិយាយបានថា មានលទ្ធភាពក្នុងការបង្ការ និងគ្រប់គ្រងស្ថានភាពនៃការរីករាលដាលមេរោគអេដស៍ និងជំងឺអេដស៍បានដោយជោគជ័យ។ លោកថា អត្រាផ្ទុកមេរោគអេដស៍ក្នុងចំណោមមនុស្សពេញវ័យដែលមានអាយុពី ១៥-៤៩ ឆ្នាំបានធ្លាក់ចុះពី ១,៦% នៅក្នុងឆ្នាំ ១៩៩៨ មកនៅត្រឹមតែ ០,៥ % នៅឆ្នាំ ២០២០៕