.jpg)
ស្ត្រីមានផ្ទៃពោះមកពិនិត្យសុខភាពនៅមណ្ឌលសុខភាព។ ហុង មិនា
ភ្នំពេញៈ រាជរដ្ឋាភិបាលគ្រោងនឹងដាក់ឱ្យដំណើរការកម្មវិធីឧបត្ថម្ភប្រាក់ដល់ស្ត្រីក្រីក្រមានផ្ទៃពោះ និងកុមារអាយុក្រោម ២ ឆ្នាំនៅខែមិថុនា ខាងមុខនេះ ដើម្បីលើកកម្ពស់អាហារូបត្ថម្ភ និងជំរុញដល់ការលូតលាស់កាយសម្បទា និងបញ្ញាស្មារតីដល់គ្រួសារក្រីក្រ។ យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចនិងហិរញ្ញវត្ថុ កាលពីថ្ងៃទី ២៣ ខែ មេសា។ការសម្រេចនេះធ្វើឡើងនៅក្នុងកិច្ចប្រជុំក្រុមប្រឹក្សាជាតិគាំពារសង្គមលើកទី២ ដោយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម។
សេចក្ដីប្រកាសព័ត៌មានដដែលនេះបានឲ្យដឹងថាស្ត្រីដែលនឹងទទួលបានប្រាក់ឧបត្ថម្ភនេះគឺជាស្ត្រីមានផ្ទៃពោះនៃគ្រួសារក្រីក្រដែលមានប័ណ្ណសមធម៌ និងមានប័ណ្ណ Post-ID របស់ក្រសួងសុខាភិបាល ទោះបីជាស្ត្រីនោះជាកម្មករនិយោជិតក៏ដោយ។
សេចក្ដីប្រកាសនេះបានឲ្យដឹងថា ស្ត្រីមានផ្ទៃពោះក្រីក្រនឹងទទួលបានប្រាក់ ៤០ ០០០ រៀល ក្នុង ១ ដង នៅពេលមកពិនិត្យផ្ទៃពោះ ៤ ដង មុនពេលសម្រាលកូន។ ដំណាក់កាលទី២ គឺទទួលបាន ២០០ ០០០ រៀល ក្នុង ១ ដងគត់នៅពេលសម្រាលកូន និងដំណាក់កាលទី៣ ទទួលបាន ៤០ ០០០ រៀល ក្នុង ១ ដង នៅពេលមកពិនិត្យសុខភាពក្រោយពេលសម្រាលកូន ៤ ដង និង ៦ ដង ចុងក្រោយនៅពេលនាំកូនមកចាក់ថ្នាំបង្ការក្នុង ១ លើកៗរហូតដល់កូនអាយុ ២ ឆ្នាំ។
លោក មាស សុខដេរសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ប្រាប់ភ្នំពេញប៉ុស្ដិ៍ថា កម្មវិធីនេះរាជរដ្ឋាភិបាលគិតគូរនៅក្នុងគោលនយោបាយដែលបានសន្យាជាមួយប្រជាពលរដ្ឋ និងជារបៀបវារៈនយោបាយដែលសន្យាធ្វើសម្រាប់អាណត្តិក្រោយនេះ។
លោកថ្លែងថា៖ «កម្មវិធីនេះមិនធ្លាប់មានតាំងពីមុនមកទេ។ និយាយរួមគឺជាការបំពេញនូវកិច្ចសន្យាមួយ។ ធ្វើម៉េចដើម្បីឱ្យកូនដែលកើតមកហ្នឹងគាត់មានអាហារូបត្ថម្ភគ្រប់គ្រាន់»។
យោងតាមសេចក្ដីប្រកាសព័ត៌មានដដែលនេះបានឲ្យដឹងថាក្រសួងសេដ្ឋកិច្ចនិងហិរញ្ញវត្ថុបានផ្ដល់ប្រាក់ឧបត្ថម្ភសម្រាប់កម្មការិនីសម្រាលកូនក្នុងឆ្នាំ ២០១៨ ចំនួន ៦៥ ៨៨៤ នាក់ ដែលមានកូនចំនួន ៦៤ ៩៦៥ នាក់។
ក្នុងត្រីមាសទី១ ឆ្នាំ ២០១៩ កម្មការិនីចំនួន ១៩ ១០២ នាក់ ក៏បានសម្រាលកូនដោយទទួលបានប្រាក់ឧបត្ថម្ភនេះដែរ។ របបសន្តិសុខសង្គមផ្នែកថែទាំសុខភាពបានគ្របដណ្ដប់ប្រជាជនចំនួន ២ ០២៤ ៣៤០ នាក់ រួមទាំងកម្មករ និយោជិត អតីតមន្ត្រីរាជការនិងអតីតយុទ្ធជនពិការ។
លោកស្រី រស់ សុភាព នាយិកាអង្គការយេនឌ័រ និងអភិវឌ្ឍន៍ដើម្បីកម្ពុជា (GADC) បានប្រាប់ភ្នំពេញប៉ុស្តិ៍ថា ប្រាក់ឧបត្ថម្ភនេះបើមើលជាទូទៅឃើញថាល្អ ដោយសារការយកចិត្តទុកដាក់របស់រដ្ឋាភិបាលទៅដល់ស្ត្រីដែលសមស្របទៅនឹងគោលនយោបាយលើកកម្ពស់សិទ្ធិស្រ្តីលើការថែទាំសុខភាពស្ត្រី និងកុមារ។
លោកស្រី សុភាព បានអះអាងថា នៅតែបារម្ភថា បើកម្មវិធីនេះដំណើរការនោះតើស្រ្តីទាំងនោះនឹងប្រើប្រាស់ថវិកាបានត្រឹមត្រូវក្នុងរបបចំណីអាហារនោះទេ បើសិនជាគ្រួសារនោះ មានអំពើហិង្សា ផឹកស្រានិងជាប់បំណុល។
លោកស្រីថ្លែងថា៖ «គ្រាន់តែយោបល់ខ្ញុំទេ ខ្ញុំចង់ឱ្យរដ្ឋាភិបាលយកប្រាក់ឧបត្ថម្ភនេះទៅពង្រឹងសេវាសុខភាពនៅតាមមណ្ឌលសុខភាពវិញនឹងអាចទទួលបានផលល្អ ដោយសារមណ្ឌលសុខភាពនៅទូទាំងប្រទេស កម្ពុជា មិនទាន់បានផ្តល់ឱ្យទៅតាមអ្វីដែលប្រជាពលរដ្ឋចង់បានទេ ដូចជានៅខ្វះបុគ្គលិក និងថ្នាំ»៕
