ភ្នំពេញៈ រាជរដ្ឋាភិបាលកម្ពុជាបានចេញអនុក្រឹត្យសម្រេចផ្ទេរធនធានពីថវិកាជាតិចំនួនប្រមាណ ១២៩ លានដុល្លារនៃថវិកាចំណូលចរន្តឆ្នាំ ២០១៨ ជូនមូលនិធិឃុំ-សង្កាត់ ប្រាក់ឧបត្ថម្ភសមាជិក ក្រុមប្រឹក្សា ឃុំ-សង្កាត់ និងមន្ត្រីភូមិ ដើម្បីចំណាយសម្រាប់ប្រតិបត្តិការរដ្ឋបាល និងចំណាយសម្រាប់ប្រាក់អភិវឌ្ឍន៍មូលដ្ឋានសម្រាប់ឆ្នាំ ២០១៩។
កាលពីខែវិច្ឆិកា ឆ្នាំ ២០១៧ រដ្ឋសភាដែលមានតែតំណាងរាស្ត្រមកពីគណបក្សប្រជាជនកម្ពុជាបានអនុម័តថវិកាជាតិដែលក្នុងនោះមានចំណូលចរន្តប្រមាណ ៤,៣ ពាន់លានដុល្លារ ហើយការអនុម័តនេះគឺកើតឡើងតែ ១ ថ្ងៃប៉ុណ្ណោះ បន្ទាប់ពីតុលាការកំពូលបានសម្រេចរំលាយគណបក្សសង្គ្រោះជាតិ ។
អតីតគណបក្សប្រឆាំងធ្លាប់បានប្រកាសជាសាធារណៈនូវសារនយោបាយថ្មីរបស់ខ្លួនកាលពីដើមឆ្នាំ ២០១៧ មុនការបោះឆ្នោតជ្រើសរើសក្រុមប្រឹក្សាឃុំ សង្កាត់ ដោយអះអាងថានឹងផ្តល់កញ្ចប់ថវិកា ៥០ ម៉ឺនដុល្លារក្នុង ១ ឆ្នាំទៅឃុំ សង្កាត់នីមួយៗដើម្បីធ្វើការអភិវឌ្ឍថ្នាក់មូលដ្ឋាននៅពេលខ្លួនឈ្នះឆ្នោតដឹកនាំរដ្ឋាភិបាល។
សារនយោបាយថ្មីមួយនេះទំនងទាក់ទាញការគាំទ្រក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ កាលពីឆ្នាំ ២០១៧ ដែលធ្វើឲ្យគណបក្សមួយនេះទទួលបានអាសនៈសរុបចំនួន ៥០០៧ ខណៈគណបក្សកាន់អំណាចទទួលបានអាសនៈសរុប ៦៥០៣។ គណបក្សប្រជាជនឈ្នះបាន ១១៥៦ ឃុំនិងអតីតគណបក្សសង្គ្រោះជាតិឈ្នះបាន ៤៨៩ ឃុំដែលគណបក្សទាំង ២ បានប្រកាសពីភាពជោគជ័យរៀងៗខ្លួន។
លោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា នេះគឺជា ហិរញ្ញប្បទានខាងប្រព័ន្ធវិមជ្ឈការទៅចែកគ្រប់ឃុំ សង្កាត់ ដើម្បីប្រើប្រាស់ក្នុងការកសាងអភិវឌ្ឍឃុំ។ លោកថា ថវិកាមានយូរហើយមិនចាំបាច់អតីតគណបក្សសង្គ្រោះជាតិថានោះទេ។
លោកបញ្ជាក់ថា៖ «គេមានផែនការតាំងពីយូរហើយ។ ពេលមានលទ្ធភាពថវិកាគេបែងចែកអាហ្នឹងមិនមែនធ្វើតាមបក្សប្រឆាំងថា ឯណា។ គេឲ្យបណ្តើរៗបន្តបន្ទាប់ យើងបែងចែកទៅតាមថវិកាជាតិជាក់ស្តែង។ យើងមិនបានគិតទាក់ទងនឹងការទាក់ទាញយកប្រជាប្រិយភាពនោះទេ។ ចង់ អ្នកណា ថាអី ថាទៅយើងមិនឈឺក្បាលវិលមុខទេ»។
យោងទៅតាមសៀវភៅរាជកិច្ចដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន រដ្ឋមន្ត្រីក្រសួងមហាផ្ទៃ និងរដ្ឋមន្ត្រី ក្រសួង សេដ្ឋកិច្ច និងហិរញ្ញវត្ថុកាលពីថ្ងៃទី ១១ មេសា ឆ្នាំ ២០១៨ ដែល ភ្នំពេញ ប៉ុស្តិ៍ទើបទទួលបានកាលពីម្សិលមិញក្នុងមាត្រា ៤ នៃអនុក្រឹត្យចែងថាត្រូវផ្ទេរថវិការដ្ឋទៅគណនីមូលនិធិឃុំ សង្កាត់សម្រាប់ថិរវេលា ៥ ឆ្នាំដោយកំណត់ជាភាគរយនៃចំណូលចរន្តថវិការដ្ឋ។
មាត្រាដដែលចែងថា ឆ្នាំថវិកា ២០១៩ ចំនួន ៣ ភាគរយនៃចំណូលចរន្តថវិការដ្ឋដែលបានអនុម័តឆ្នាំ ២០១៨។ ឆ្នាំថវិកា ២០២០ ចំនួន ៣,១ ភាគរយនៃចំណូលចរន្តថវិការដ្ឋដែលនឹងត្រូវអនុម័តឆ្នាំ ២០១៩។ បើយោងតាមច្បាប់ថវិកាជាតិដែលបានអនុម័តកាលពីខែវិច្ឆិកាឆ្នាំ ២០១៧ ឲ្យដឹងថា ចំណូលចរន្តមានប្រមាណ ៤,៣ ពាន់លានហើយ ៣% នៃចំណូលចរន្តមានប្រមាណ ១២៩,៦ លានដុល្លារ។
លោក សម គន្ធាមី នាយកប្រតិបត្តិអង្គការនិចហ្វិកឲ្យដឹងថារាជរដ្ឋាភិបាលបានបញ្ជូនមូលនិធិថវិកាជាតិដល់ឃុំសង្កាត់ដើម្បីទាក់ទាញការគាំទ្រ និងប្រជាប្រិយភាព និងជួយអភិវឌ្ឍឃុំ និងភូមិ។ «ប្រសិនរាជរដ្ឋាភិបាលអនុវត្តតាមគោលនយោបាយរបស់គណបក្សសង្គ្រោះជាតិ វាជាការល្អហើយដោយសារវាជួយអភិវឌ្ឍមូលដ្ឋាន។ គណបក្សកាន់អំណាច គាត់ប្រើយុទ្ធសាស្ត្រ គោលនយោបាយអតីតសង្គ្រោះជាតិនេះដើម្បីទាក់ទាញការគាំទ្រ និងដើម្បីជួយអភិវឌ្ឍឃុំ និងភូមិ»។
លោក ង៉ាន់ ចំរើន អនុរដ្ឋលេខាធិការក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) ពីម្សិលមិញមិនអាចទាក់ទងសុំអធិប្បាយបានទេ៕