.jpg)
រដ្ឋាភិបាលផ្លាស់ប្តូរទីតាំងតុលាការក្រុង និងសាលាឧទ្ធរណ៍ ពីទីតាំងចាស់ទៅទីតាំងថ្មីស្ថិតនៅតំបន់អភិវឌ្ឍន៍ OCIC ក្នុងខណ្ឌជ្រោយចង្វារ។ ហុង មិនា
ភ្នំពេញៈ រាជរដ្ឋាភិបាលបានសម្រេចផ្លាស់ប្តូរទីតាំងសាលាដំបូង និងសាលាឧទ្ធរណ៍ភ្នំពេញពីទីតាំងចាស់ទៅទីតាំងថ្មីស្ថិតនៅតំបន់អភិវឌ្ឍន៍ OCIC ក្នុងខណ្ឌជ្រោយចង្វារដោយផ្តល់ឲ្យក្រុមហ៊ុន លី ឈួង សំណង់ និងអាហរ័ណ នីហរ័ណ ទទួលការសាងសង់អគារសាលាយុត្តិធម៌ថ្មីដែលមានកម្ពស់ ៧ ជាន់។
លិខិតដែលចុះហត្ថលេខាដោយលោក សុក ផេង រដ្ឋលេខាធិការ ជំនួសរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីចុះថ្ងៃទី ៣១ សីហា និងត្រូវបានផ្សព្វផ្សាយកាលពីថ្មីៗនេះឲ្យដឹងថា ចំពោះសំណើសុំគោលការណ៍អនុញ្ញាតសាងសង់អគារសាលាយុត្តិធម៌ថ្មីមានទំហំ ១៩ ៩៥៩ ម៉ែត្រក្រឡា សម្រាប់ប្រើប្រាស់ធ្វើអគារសាលាដំបូងរាជធានី និងសាលាឧទ្ធរណ៍ភ្នំពេញត្រូវបានអនុញ្ញាត។
លិខិតបន្តថា ការដោះដូរទីតាំងរបស់សាលាដំបូងរាជធានី ដែលមានផ្ទៃដីទំហំ ១ ៧៥៦ ម៉ែត្រក្រឡា ស្ថិតក្នុងសង្កាត់វាលវង់ ខណ្ឌ ៧ មករា ជាថ្នូរនឹងការសាងសង់អគារថ្មីដោយអនុវត្តស្របតាមគោលការណ៍ឯកជនភាវូបនីយកម្ម។ ដើម្បីធានាដំណើរការនៃការសាងសង់អគារថ្មីនេះ រដ្ឋាភិបាល អនុញ្ញាតឲ្យផ្ទេរកម្មសិទ្ធិទីតាំងដីសាលាដំបូងរាជធានីភ្នំពេញជូនក្រុមហ៊ុន លី ឈួង សំណង់ និងអាហរ័ណ នីហរ័ណ មុនការសាងសង់ដោយពន្ធប្រថាប់ត្រាជាបន្ទុករបស់រដ្ឋ។
បន្ថែមពីនេះទៀត រដ្ឋាភិបាលបញ្ជាក់ទៀតថា៖ «នៅពេលសាលាឧទ្ធរណ៍ភ្នំពេញ និងមហាអយ្យការអមសាលាឧទ្ធរណ៍ភ្នំពេញផ្ទេរទៅទីតាំងថ្មីរួចរាល់ អនុញ្ញាតឲ្យក្រសួងយុត្តិធម៌យកទីតាំងសាលាឧទ្ធរណ៍បច្ចុប្បន្នវិញ ដើម្បីប្រើប្រាស់។ តម្លៃនៃការដោះដូរត្រូវមានការយល់ព្រមពីគណៈកម្មាធិការឯកជនភាវូបនីយកម្មដោយភ្ជាប់ជាមួយថវិការដ្ឋចំនួន ៣ លានដុល្លារសម្រាប់ជូនក្រុមហ៊ុន (បំពាក់សម្ភារបរិក្ខារ និងគ្រឿងសង្ហារិម) ផងដែរ»។
លោក ជិន ម៉ាលីន អ្នកនាំពាក្យក្រសួងយុតិ្តធម៌បានថ្លែងនៅថ្ងៃទី ៦ កញ្ញាថា លោកមិនបានដឹងព័ត៌មានលម្អិតនៃការដោះដូរទីតាំងសាលាដំបូង និងសាលាឧទ្ធរណ៍ទៅទីតាំងថ្មីនេះនោះទេ។ ប៉ុន្តែលោក លើកឡើងថាបើសិនក្នុងពេលខាងមុខសាលាឧទ្ធរណ៍ត្រូវបានផ្លាស់ប្តូរ ហើយប្រគល់ទីតាំងចាស់ឲ្យក្រសួងយុត្តិធម៌ នោះនឹងផ្តល់សារៈសំខាន់ខ្លាំងស្របពេលទីតាំងក្រសួងយុត្តិធម៌ក្នុងពេលបច្ចុប្បន្នមានភាពតូចចង្អៀតដែលពិបាកក្នុងការបំពេញការងារ។ «បើសិនជាឧទ្ធរណ៍ផ្លាស់ប្តូរទៅទីតាំងថ្មី អគារសព្វថ្ងៃនឹងក្លាយទៅជាអគាររដ្ឋបាលរបស់ក្រសួងយុត្តិធម៌ ដែលអាចប្រើការផ្នែករដ្ឋបាលរបស់មន្ត្រីរបស់ក្រសួង។ ជាធម្មតាយើងបានអគារបន្ថែម ព្រោះមនុស្សវាច្រើនកន្លែងវាតូចចង្អៀត អ៊ីចឹងយើងបានកន្លែងឲ្យមន្ត្រីធ្វើការបន្ថែម»។
លោក អ៊ី រិន្ទ និងលោក សួស វិទ្យារ៉ាន់ឌី អ្នកនាំពាក្យសាលាដំបូងរាជធានីមិនអាចទាក់ទងសុំការអត្ថាធិប្បាយបានទេ។
លោកប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងថា ការដោះដូរទីស្នាក់ការរបស់រដ្ឋកន្លងទៅគឺមានចំណុច ៣ ដែលត្រូវពិនិត្យ គឺការមិនបានបង្ហាញតម្លាភាពនៃការដោះដូរឲ្យបានច្បាស់លាស់ដល់ប្រជាពលរដ្ឋ។ ម្យ៉ាងទៀត លោកថា ចំពោះបញ្ហាដោះដូរនេះទៀតសោតក៏បានធ្វើឲ្យបាត់បង់ស្លាកស្នាមប្រវត្ថិសាស្ត្រនៃទីតាំងទាំងនោះ ខណៈការដោះដូរភាគច្រើន បានធ្វើឲ្យមានការបែកខ្ញែកគ្នាកាន់តែឆ្ងាយរវាងការិយាល័យរដ្ឋបាលនីមួយៗ ដែលបង្កការលំបាលដល់ពលរដ្ឋក្នុងការស្វែងរកសេវាសាធារណៈ។
លោកបញ្ជាក់ថា៖ «តាមពិតនៅស្រុកគេអភិវឌ្ឍន៍ គេព្យាយាមដាក់ការិយាល័យរដ្ឋបាលទាំងអស់ឲ្យនៅជុំគ្នា ព្រោះគេមានប្លង់មេរបស់គេ ហើយនៅភ្នំពេញយើងក៏ឮថាមានដែរ។ កន្លងមកគឺមានតែផែនការ ប៉ុន្តែការអនុវត្តគឺមិនទាន់ចេញដូចការជាក់ស្តែងទេ។ បើគេអភិវឌ្ឍ smart city នៅស្រុកគេហ្នឹង គឺគេបែងចែកតំបន់គេតែម្តង មានតំបន់រដ្ឋបាល តំបន់ទូត តំបន់ពលរដ្ឋរស់នៅដែលងាយស្រួលក្នុងការគ្រប់គ្រង និងមានរបៀបរៀបរយ។ តែខុសពីស្រុកយើងរាល់ថ្ងៃគឺបែកខ្ញែកអស់ហើយការិយាយល័យរដ្ឋបាលដោះដូរអស់ រត់ទៅនៅជាយក្រុង ខ្លះនៅក្រៅក្រុងទៀត»។
លោក ច័ន្ទរឿន រំពឹងថារដ្ឋាភិបាលនឹងរៀបចំតំបន់រដ្ឋបាលរបស់រដ្ឋឲ្យមានលក្ខណៈល្អប្រសើរ និងនៅជិតៗគ្នាឡើងវិញ ដើម្បីបង្កលក្ខណៈងាយស្រួលដល់ប្រជាពលរដ្ឋក្នុងការស្វែងរកសេវាសាធារណៈ និងកាន់តែរហ័ស ព្រោះថាការដែលទីតាំងសេវារដ្ឋបាលរបស់រដ្ឋនៅបែកខ្ញែកគ្នាយ៉ាងដូច្នេះនឹងបង្កភាពយឺតយ៉ាងហើយប្រសិទ្ធភាពនៃការងារនឹងធ្លាក់ចុះ៕
