The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋាភិបាល​ព្រម​សម្រួល​ខ្លឹមសារ​នៃ​ច្បាប់​អង្គការ

រដ្ឋាភិបាល​ព្រម​សម្រួល​ខ្លឹមសារ​នៃ​ច្បាប់​អង្គការ

ក្រុម​អង្គការ​សង្គម​ស៊ីវិល​ក្នុង​វេទិកា​នៅ​ទីលាន​ប្រជាធិបតេយ្យ​កាលពី​ម្សិលមិញ​។
ក្រុម​អង្គការ​សង្គម​ស៊ីវិល​ក្នុង​វេទិកា​នៅ​ទីលាន​ប្រជាធិបតេយ្យ​កាលពី​ម្សិលមិញ​។ ម៉ៃ វីរៈ

រដ្ឋាភិបាល​ព្រម​សម្រួល​ខ្លឹមសារ​នៃ​ច្បាប់​អង្គការ

ភ្នំពេញៈ មន្ត្រី​រដ្ឋាភិបាល​បាន​សម្រេច​សម្រួល​ខ្លឹមសារ​ខ្លះ​នៃ​សេចក្តី​ព្រាង​ច្បាប់​ស្តីពី​សមាគម និង​អង្គការ​មិនមែន​រដ្ឋាភិបាល​ខណៈ​​ដែល​​​រដ្ឋសភា​គ្រោង​នឹង​​​បើក​កិច្ចប្រជុំ​ធ្វើការ​ពិភាក្សា និង​អនុម័ត​នៅ​ថ្ងៃ​ចន្ទ​ដើម​សប្តាហ៍​ក្រោយ បើ​ទោះបី​ជា​អង្គការ​សង្គម​ស៊ីវិល​រាប់​រយ​នៅ​តែ​បន្ត​ធ្វើ​យុទ្ធនាការ​តវ៉ា​ប្រឆាំង​ជំទាស់​យ៉ាង​ណា​ក៏ដោយ​។

រដ្ឋលេខាធិការ​ក្រសួង​មហាផ្ទៃ លោក សក់ សេដ្ឋា បាន​ឲ្យ​ដឹង​ថា​ការសម្រេច​នេះ​ធ្វើ​ឡើង​កាលពី​ម្សិលមិញ​ក្រោយពី​កិច្ចប្រជុំ​របស់​ក្រុម​ការងារ​រដ្ឋាភិបាល​ដែល​មកពី​ក្រសួង​ពាក់ព័ន្ធ​រួម​មាន​ក្រសួង​មហាផ្ទៃ ក្រសួង​យុត្តិធម៌ ក្រសួង​សេដ្ឋកិច្ច ហិរញ្ញវត្ថុ ក្រសួង​ការបរទេស និង​ទីស្តីការ​គណៈរដ្ឋមន្ត្រី ហើយ​ការ​សម្រួល​ខ្លឹមសារ​ត្រូវ​បាន​ធ្វើ​ឡើង​ក្នុង​មាត្រា​មួយ​ចំនួន។

លោក​ថា ​ក្នុង​នោះ​មាត្រា ៥ ទាក់ទិន​នឹង​ចំនួន​ស្ថាបនិក​បង្កើត​សមាគម ឬ​អង្គការ​ត្រូវ​បាន​ក្រុម​ការងារ​សម្រេច​កាត់បន្ថយ​ពី ៥ រូប មក​នៅ​យ៉ាង​ហោច​ណាស់​ ៣ រូប​ដែល​មាន​អាយុ​ចាប់ពី ១៨ ឆ្នាំ​ឡើង ចំណែក​ការ​ចែង​រារាំង​អ្នក​ដែល​​ធ្លាប់​ជា​ថ្នាក់ដឹកនាំ​ក្នុង​ការ​បង្កើត​សមាគម​អង្គការ​ថ្មី គឺ​ត្រូវ​កាត់​ចេញ។

លោក​ថា៖ «ក្នុង​ស្ថានភាព​ជាក់ស្តែង​សម្រាប់​​អ្នក​ធ្លាប់​ជាប់​ទោស​គឺ​ស៊ីសង​ទៅលើ​តុលាការ​ដូចជា​បទល្មើស​ព្រហ្មទណ្ឌ​គឺ​រឿង​ផ្សេង​ទៀត»។

លោក​បន្ត​ថា​សម្រាប់​ករណី​នីតិវិធី និង​បែបបទ​នៃ​ការ​បង្កើត​សមាគម និង​អង្គការ​អនីតិជន គឺ​នឹង​ត្រូវ​កំណត់​ដាច់​ដោយ​ឡែក​តាម​ប្រកាស​ក្រសួង​មហាផ្ទៃ​រីឯ​ពាក្យពេចន៍​ដែល​សង្គម​ស៊ីវិល​បាន​ហៅ​ថា​មិន​ច្បាស់លាស់​ដូចជា​ពាក្យ វប្បធម៌ ប្រពៃណី ទំនៀមទម្លាប់​គឺ​នឹង​ត្រូវ​ថែម​ពាក្យ​ល្អ​នៅ​បន្ទាប់​ដើម្បី​​កំណត់​និយមន័យ​ឲ្យ​កាន់​តែ​ច្បាស់។

លោក​ថា​៖ «យើង​កែសម្រួល​ដាក់​ពាក្យ​ល្អ​នេះ​មាន​ពីរ​ទៅ​បី​មាត្រា​ឯណោះ​គឺ​យើង​ធ្វើ​តាម​រដ្ឋធម្មនុញ្ញ។ ខ្ញុំ​សុំ​បញ្ជាក់​ក្នុង​ករណី​ដែល​យើង​​លុប​ឈ្មោះ​យើង​ធ្វើ​លិខិត​ជូន​ទៅ​គាត់ (អង្គការ​សមាគម) ក្នុង​ពេល​ជាក់លាក់​ដើម្បី​ឲ្យ​ពួកគាត់​ប្តឹង​ទៅ​តុលាការ​សម្រេច។ នេះ​ជា​តុល្យភាព​សម្រាប់​ថ្លឹងថ្លែង​គ្នា។ អង្គការ សមាគម មិនមែន​ជា​បក្ស​នយោបាយ​ទេ​ដើម្បី​ចែក​គ្នា​ឲ្យ​ដាច់ ស្គាល់​ពី​ព្រំដែន កុំ​ឲ្យ​មាន​ភាព​ច្របូកច្របល់​អ៊ីចឹង​ហើយ​ត្រង់​ថា​អង្គការ ឬ​សមាគម​ត្រូវ​អព្យាក្រឹត​នោះ​មិន​មាន​ការ​​កែប្រែ​ទេ»​។

នាយក​ប្រតិបត្តិ​អង្គការ CCC លោក សឿង សារឿន បាន​ស្វាគមន៍​ចំពោះ​សញ្ញាណ​វិជ្ជមាន​នៃ​ការ​សម្រួល​មាត្រា​ខ្លះ​នេះ​តែ​លោក​គិត​ថា​នេះ​ជា​ការ​ប្រែប្រួល​ដ៏​តិច​បំផុត​ហើយ​បញ្ហា​នៅ​ចោទ​មាន​ច្រើន​ទៀត​ទាក់ទិន​នឹង​មាត្រា​ផ្សេង​ទៀត​ដែល​ហាក់​ចែង​មិន​បាន​ច្បាស់លាស់ និង​មាន​ចរិត​គ្រប់គ្រង​សមាគម និង​អង្គការ​ក្នុង​ការ​បញ្ចេញមតិ​។

លោក យ៉ែម បុញ្ញឫទ្ធិ អ្នក​នាំពាក្យ​គណបក្ស​សង្គ្រោះជាតិ​ថ្លែង​ថា​លោក​មិន​ទាន់​ទទួល​បាន​ព័ត៌មាន​ពី​ការ​កែសម្រួល​នេះ​នៅ​ឡើយ​ទេ​តែ​លោក​គិត​ថា​នៅ​មាន​ចំណុច​ជាច្រើន​ទៀត​ដែល​ត្រូវ​ពិនិត្យ និង​ពិចារណា​ឡើង​វិញ។

លោក​ថា៖ «គណបក្ស​យើង​មិន​យល់​ថា​ហេតុ​អី​ក៏​ត្រូវ​ប្រញាប់​អនុម័ត​នូវ​ច្បាប់​នេះ​​ម្ល៉េះ? គួរ​តែ​មាន​ការ​ពិភាក្សា​ឲ្យ​បាន​ច្រើន​ព្រោះ​យើង​ឃើញ​មាន​ចំណុច​ជាច្រើន​មិន​ទាន់​ច្បាស់​ហើយ​ត្រូវ​ការ​ជជែក​គ្នា​ច្រើន​ទៀត។ ជា​គោលការណ៍​គឺ​គណបក្ស​សង្គ្រោះ​ជាតិ​មិន​គាំទ្រ​សេចក្តី​ព្រាង​ច្បាប់​នេះ​ឡើយ​យើង​ឲ្យ​មាន​ការ​ពន្យារពេល ឬ​បញ្ឈប់​នូវ​ច្បាប់​នេះ។ យើង​នឹង​តស៊ូ​មតិ​ឲ្យ​មាន​ការ​ពិគ្រោះ​យោបល់​ច្រើន​ជាង​នេះ និង​ដើម្បី​ធ្វើឲ្យ​ច្បាប់​នេះ​ធានា​ការពារ​សង្គម​ស៊ីវិល​ដែល​ជា​ដៃគូ​អភិវឌ្ឍន៍»​។

អ្នក​នាំពាក្យ​និង​ជា​ប្រធាន​គណៈកម្មការ​កិច្ចការ​បរទេស​នៃ​រដ្ឋសភា លោក ឈាង វុន បាន​ឲ្យ​ដឹង​ថា៖ «កិច្ច​ប្រជុំ​អនុម័ត​សេចក្តី​ព្រាង​ច្បាប់​នេះ​អាច​នឹង​ធ្វើ​ឡើង​នៅ​ថ្ងៃ​ទី ១៣, ១៤ ឬ​ ១៥ ខែ​កក្កដា​ខាង​មុខ​នេះ»។

កាលពី​ម្សិលមិញ​តំណាង​អង្គការ សមាគម សកម្មជន​ដីធ្លី ព្រះសង្ឃ និង​ពលរដ្ឋ​ប្រមាណ ៣០០ នាក់ បាន​ប្រមូល​ផ្តុំ​គ្នា​រៀបចំ​វេទិកា​ពិភាក្សា​ជា​សាធារណៈ​នៅ​ទីលាន​ប្រជាធិបតេយ្យ​ដើម្បី​ទាមទារ​ឲ្យ​រដ្ឋសភា​ពន្យារពេល​អនុម័ត ឬ​ទម្លាក់​ចោល​សេចក្តី​ព្រាង​ច្បាប់​នេះ​ដោយ​ថ្កោលទោស​ច្បាប់​នេះ​ថា​ជា​ឧបករណ៍​របស់​រដ្ឋាភិបាល​ក្នុង​ការ​គ្រប់គ្រង​អង្គការ​ក្រៅ​រដ្ឋាភិបាល និង​បំបិទ​ខាង​សេរីភាព​បញ្ចេញ​មតិ​របស់​ប្រជាពលរដ្ឋ​។

ថ្លែង​ក្នុង​វេទិកា​នោះ លោក វន់ ពៅ ប្រធាន​សមាគម​ប្រជាធិបតេយ្យ​ឯករាជ្យ​នៃ​សេដ្ឋកិច្ច​ក្រៅ​ប្រព័ន្ធ​បាន​រិះគន់​ពី​ភាព​តូចចង្អៀត​នៃ​ដំណើរការ​តាក់តែង និង​ផ្សព្វផ្សាយ​ច្បាប់​របស់​រដ្ឋាភិបាល​រួម​នឹង​សិក្ខា​សាលា​ថ្នាក់​ជាតិ​ដែល​រៀបចំ​ដោយ​រដ្ឋសភា​ដែល​មាន​រយៈពេល​ត្រឹម​កន្លះ​ថ្ងៃ។

លោក វន់ ពៅ បាន​និយាយ​ថា​៖ «ខ្លឹមសារ​នៃ​ច្បាប់​នេះ​គឺជា​ដំណើរ​មួយ​ឆ្ពោះ​ទៅ​រក​ការ​រំលោភ​សិទ្ធិ​មនុស្ស​ដែល​ផ្ទុយ​ពី​រដ្ឋធម្មនុញ្ញ និង​បទដ្ឋាន​ច្បាប់​​អន្តរជាតិ។ រដ្ឋាភិបាល​ត្រូវ​តែ​ទម្លាក់​ចោល​ច្បាប់​នេះ​ដើម្បី​ឲ្យ​សង្គម​ស៊ីវិល​ងាយស្រួល​ធ្វើ​សកម្មភាព​ក្នុង​ការ​ជួយ​ដល់​ពលរដ្ឋ​ក្រីក្រ​នៅ​តាម​មូលដ្ឋាន»​៕

អត្ថបទគួរចាប់អារម្មណ៍