ភ្នំពេញៈ រាជរដ្ឋាភិបាលបាន សម្រេចដាក់ចេញនូវវិធានការចាំបាច់មួយចំនួន តាមសំណើរបស់ក្រសួងរៀបចំដែនដី ដើម្បីទប់ស្កាត់ការដ្ឋានសំណង់ខុសច្បាប់ទូទាំងប្រទេសដោយការផ្តាច់ទឹក ផ្តាច់ភ្លើង រួមទាំងផ្អាកការផ្គត់ផ្គង់លើផ្នែកផ្សេងៗមួយចំនួន ខណៈក្រុមការងារចំនួន ២៣ ដែលទើបបង្កើតឡើងកំពុងចុះធ្វើការត្រួតពិនិត្យសំណង់នៅខេត្តព្រះសីហនុ។
លិខិតដែលចុះហត្ថលេខាដោយលោក ហ៊ីង ថូរ៉ាក់ស៊ី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជារដ្ឋលេខាធិការប្រចាំការ ចេញផ្សាយកាលពីថ្ងៃសុក្រ បានដាក់ចេញនូវវិធានការចំនួន ៥ ចំណុច ក្រោយទទួលបានចំណារពីលោកនាយករដ្ឋមន្ត្រីហ៊ុន សែន និងបានដាក់ជូនទៅរដ្ឋមន្ត្រីចំនួន ៥ រូប ដើម្បីទទួលភារកិច្ចនេះ។
លិខិតដដែល បានចាត់ឲ្យក្រសួងរ៉ែ និងថាមពល ផ្អាកការផ្គត់ផ្គង់ថាមពលអគ្គិសនី ទៅកាន់ការដ្ឋានសំណង់ណាដែលខុសច្បាប់ចំណែកក្រសួងឧស្សាហកម្ម និង សិប្បកម្ម គឺមិនត្រូវផ្គត់ផ្គង់ទឹកស្អាតដល់ការដ្ឋានសំណង់ ខណៈក្រសួងសាធារណការ មិនត្រូវតភ្ជាប់ប្រព័ន្ធលូជាដាច់ខាតចំពោះការដ្ឋានខុសច្បាប់ទាំងនោះលើកលែងតែសំណង់លំនៅឋានផ្ទាល់ខ្លួនរបស់ប្រជាពលរដ្ឋ។
ចំណែកវិធានការ ២ ទៀត រាជរដ្ឋាភិបាល បានណែនាំថា៖ «ក្រសួងស្ថាប័នរដ្ឋនិងអង្គភាពមានសមត្ថកិច្ចមិនត្រូវផ្តល់លិខិតអនុញ្ញាតឲ្យប្រកបអាជីវកម្ម។
ក្រសួងព័ត៌មាន និងអង្គភាពមានសមត្ថកិច្ចមិនត្រូវអនុញ្ញាតឱ្យផ្សព្វផ្សាយពាណិជ្ជកម្មចំពោះការដ្ឋានសំណង់សណ្ឋាគារ អគារស្នាក់នៅអគារពាណិជ្ជកម្ម អគាររោងចក្រ អគារសិប្បកម្មនិងសំណង់ផ្សេងៗទៀតដែលគ្មានលិខិតអនុញ្ញាតនិង/ឬសាងសង់ខុសលក្ខណៈបច្ចេកទេស»។
ការដាក់ចេញនូវវិធានការទាំងនេះ ធ្វើឡើងបន្ទាប់ពីមានសំណើពីរដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ លោកជា សុផារ៉ាកាលពីចុងខែមិថុនាកន្លងទៅស្របពេលក្រសួងមួយនេះត្រូវបានចាត់តាំងឲ្យចុះត្រួតពិនិត្យ ការដ្ឋានសំណង់ទូទាំងប្រទេស ជាពិសេសបង្កើតគណៈកម្មការ ដើម្បីចុះត្រួតពិនិត្យការដ្ឋានសំណង់ក្នុងខេត្តព្រះសីហនុ ក្រោយកើតមានឧបទ្ទវហេតុបាក់រលំអគារកម្ពស់ ៧ ជាន់ បានបណ្តាលឲ្យកម្មករសំណង់ ២៨ នាក់ស្លាប់ និងរងរបួសចំនួន ២៦ នាក់។
លោកសេង ឡូតអ្នកនាំពាក្យក្រសួងរៀបចំដែនដី បានប្រាប់ភ្នំពេញប៉ុស្តិ៍ពីម្សិលមិញថា ថ្មីៗនេះ ក្រសួងរៀបចំដែនដីនគរូបនីយកម្ម បានសម្រេចបង្កើតក្រុមការងារ ៦ ក្រុមបន្ថែមទៀត ពីលើក្រុមការងារ ដែលបានបង្កើតកន្លងទៅចំនួន ១៧ ក្រុម ដើម្បីចុះទៅត្រួតពិនិត្យសំណង់ការដ្ឋានទូទាំងខេត្តព្រះសីហនុ។
ជាមួយគ្នានេះ លោក បញ្ជាក់ថា ការសម្រេចវិធានការថ្មី ក្នុងការផ្តាច់ទឹកផ្តាច់ភ្លើងនិងវិធានការមួយចំនួន ក្នុងពេលនេះ គឺនឹងធ្វើឲ្យក្រសួងពាក់ព័ន្ធនានា សហការគ្នាបន្ថែមទៀត ដើម្បីធ្វើយ៉ាងណាឲ្យការគ្រប់គ្រងសំណង់ការដ្ឋានទូទាំងប្រទេស ជាពិសេសខេត្តព្រះសីហនុ ប្រព្រឹត្តទៅដោយរលូន។
លោកបញ្ជាក់ថា៖ «យើងចាត់ក្រុមការងារត្រួតពិនិត្យគ្រប់ការដ្ឋានសំណង់ក្នុងខេត្តព្រះសីហនុ ជាង ១ សប្តាហ៍ហើយ ដើម្បីណែនាំឲ្យពួកគាត់ រៀបចំអ្វីៗឲ្យស្របទៅតាមច្បាប់ ហើយនឹងបទដ្ឋានគតិយុត្ត។
ក្រុមការងារកំពុងបូកសរុបកិច្ចការងារហ្នឹង ហើយមកដល់ពេលហ្នឹងយើងចុះត្រួតពិនិត្យជាង ១០០ ការដ្ឋានហើយ។ ប៉ុន្តែខ្ញុំអត់ទាន់បានឃើញនូវរបាយការណ៍លម្អិតនៅឡើយ ដូច្នេះមិនអាចបកស្រាយអ្វីបានច្រើនទេ ដោយសារក្រុមការងារកំពុងបូកសរុប»។
ចំពោះមូលហេតុនៃការបាក់រលំអគារកម្ពស់ ៧ ជាន់ កាលពីពាក់កណ្តាលខែមិថុនាកន្លងទៅ លោក សេង ឡូតបានបដិសេធបកស្រាយថ្លែងថា ក្រុមការងារជំនាញ មិនទាន់បានបិទបញ្ចប់ការស៊ើបអង្កេតរបស់ខ្លួននោះទេ។
លោក ឃាង ភារម្យ អ្នកនាំពាក្យសាលាខេត្តព្រះសីហនុ បញ្ជាក់ថាចាប់តាំងពីក្រុមការងារចុះពិនិត្យសំណង់អគារការដ្ឋាន ក្រោយបាក់រលំអគារនៅខេត្តជាប់មាត់សមុទ្រមួយនេះ អាជ្ញាធរខេត្តព្រះសីហនុបានចុះផ្អាកការដ្ឋានសំណង់ជាច្រើនកន្លែងដែលមិនមានច្បាប់អនុញ្ញាត ក្នុងនោះ ក៏បានឃាត់ជនជាតិចិនចំនួន ២ នាក់ដើម្បីធ្វើការអប់រំផងដែរ។
លោកថា៖ «ផ្អាកសំណង់អគារខុសច្បាប់ មាន ៣ ការដ្ឋាន ក្នុងចំណោមសំណង់អគារខុសច្បាប់ជាច្រើនទៀតដែលយើងមិនអាចនិយាយថា ក្នុងចំណោម ៥ ដែលខុសច្បាប់ទេ ព្រោះជាក់ស្តែងថ្នាក់ដឹកនាំបានចុះត្រួតពិនិត្យក្នុងភូមិសាស្ត្រខេត្តហ្នឹង។ តែយ៉ាងណា មួយរយៈកន្លងមកយើងឃើញថា មិនមានការពុះកញ្ជ្រោលខ្លាំងនោះទេ ព្រោះតែសំណង់មួយចំនួន ត្រូវធ្វើការណែនាំនិងផ្អាក ដែលឈានទៅរក ការគ្រប់គ្រងបានផងដែរ»។
យ៉ាងណាក៏ដោយលោក សន ជ័យប្រធានអង្គការសម្ព័ន្ធគណនេយ្យភាពសង្គមកម្ពុជា យល់ថា វិធានការទាំងឡាយជុំវិញការគ្រប់គ្រងសំណង់ខុសច្បាប់ វាហាក់នៅខ្វះតម្លាភាព ហើយធ្វើឡើងក្នុងលក្ខណៈទន់ភ្លន់នៅឡើយ។
លោកមើលឃើញថា នេះគ្រាន់តែចំណុចចាប់ផ្តើមមួយប៉ុណ្ណោះ ដែលវាមិនទាន់បានបង្ហាញឲ្យបានទូលំទូលាយនោះទេ ស្របពេលជនជាប់ពាក់ព័ន្ធទាំងឡាយ ក្នុងអំពើខុសច្បាប់ទាំងនេះ មិនទាន់ត្រូវបានវែកមុខ ឬទទួលខុសត្រូវចំពោះមុខច្បាប់នៅឡើយ។
លោកបញ្ជាក់ថា៖ «ភាគច្រើនសំណង់អគារជារបស់ចិន ដូច្នេះការចេញរបាយការណ៍ស៊ីជម្រៅ គឺយើងមិនទាន់បានដឹងនោះទេ ស្របពេលដែលវិធានការផ្សេងៗ ដែលបានកើតឡើងគ្រាន់តែជាចំណុចចាប់ផ្តើម។ ក៏ប៉ុន្តែយើងចង់ឲ្យមានការបង្ហាញរបាយការណ៍ទាក់ទងទៅនឹងភាពមិនប្រក្រតីឬទង្វើខុសច្បាប់ហ្នឹង គួរតែត្រូវបានបង្ហាញថា បទល្មើសនៃពួកគេប្រព្រឹត្តសង់សំណង់ខ្ពស់ៗខុសច្បាប់ហើយ ត្រូវបានពិន័យបែបណា? និងមានការស៊ើបអង្កេតបន្ថែម ថាតើមានអ្វីនៅពីក្រោយបញ្ហានេះ ឬវាជាប់ពាក់ព័ន្ធនឹងអំពើពុករលួយ?»៕