.jpg)
អ្នកនាំពាក្យទីស្ដីការគណៈរដ្ឋមន្ត្រីលោក ផៃ ស៊ីផាន។ ហេង ជីវ័ន
ភ្នំពេញៈ បន្ទាប់ពីគណៈកម្មាធិការសិទ្ធិមនុស្សនៃសហភាពអន្តរសភា IPU បានចេញសេចក្ដីសម្រេចឲ្យកម្ពុជាស្ដារលទ្ធិប្រជាធិបតេយ្យឡើងវិញ រាជរដ្ឋាភិបាលកម្ពុជាបានព្រមានរក្សាសិទ្ធិពេញលេញក្នុងការ «ដកបេក្ខភាព» របស់ខ្លួនពីស្ថាប័ននេះ បើនៅមានការ «ជ្រៀតជ្រែកធ្ងន់ធ្ងរ» លើផលប្រយោជន៍កម្ពុជា ជាអ្វីដែលអតីតតំណាងរាស្ត្របក្សប្រឆាំង ១ រូបព្រមានថា កម្ពុជានឹងប្រឈមនឹង «ភាពឯកោ» នៅលើឆាកអន្តរជាតិ។
អ្នកនាំពាក្យទីស្ដីការគណៈរដ្ឋមន្ត្រីលោក ផៃ ស៊ីផាន បានអះអាងកាលពីម្សិលមិញបន្ថែមពីលើជំហររបស់រាជរដ្ឋាភិបាលដែលបានបង្ហាញកាលពីថ្ងៃ ២៦ តុលាថា កម្ពុជានឹង «គ្មានការផ្លាស់ប្ដូរជំហរ» ណាមួយឡើយដោយចាត់ទុកប្រទេសខ្លួនថាជា «រដ្ឋអធិបតេយ្យ» ដែលមិនអាចឲ្យបរទេសណាមកលុកលុយលើច្បាប់កម្ពុជាបានឡើយ។
កាលពីថ្ងៃទី ១៨ ខែតុលា IPU ដែលមានសមាជិកមកពី ១៧៣ ប្រទេសបានចេញសេចក្ដីសម្រេចមួយកម្រាស់ ៤ ទំព័រ និងមាន ១២ ចំណុចបានជំរុញជាថ្មីឲ្យអាជ្ញាធរកម្ពុជាស្ដារលទ្ធិប្រជាធិបតេយ្យឡើងវិញក្នុងនោះក៏មានការស្នើឱ្យដោះលែងប្រធានអតីតគណបក្សប្រឆាំងលោក កឹម សុខា ជាបន្ទាន់ និងទាមទារឲ្យគណបក្សសង្គ្រោះជាតិមានដំណើរការឡើងវិញផងដែរ ប៉ុន្តែត្រូវបានច្រានចោលដោយគណៈប្រតិភូសភាកម្ពុជាដែលកំពុងមានវត្តមាននៅទីនោះ។
នៅក្នុងមហាសន្និបាតសហភាពអន្តរសភា IPU លើកទី ១៣៩ ដែលបានធ្វើឡើងចាប់ពីថ្ងៃទី ១៤-១៨ ខែតុលានាទីក្រុងហ្សឺណែវប្រទេសស្វ៊ីសក្រោមប្រធានបទ «ភាពជាថ្នាក់ដឹកនាំសភាក្នុងការជំរុញសន្តិភាព និងការអភិវឌ្ឍក្នុងយុគសម័យនៃនវានុវត្តន៍ និងការផ្លាស់ប្តូរតាមបែបបច្ចេកវិទ្យា» ស្របគ្នានឹងគណៈប្រតិភូកម្ពុជាដែលដឹកនាំដោយលោកស្រី ឃួន សុដារី អនុប្រធានទី ២ នៃរដ្ឋសភាដែលកិច្ចប្រជុំនោះលោក សម រង្ស៊ី អតីតប្រធានគណបក្សសង្គ្រោះជាតិក៏ត្រូវបានគេអញ្ជើញឱ្យចូលរួមផងដែរ។
យោងតាមសេចក្ដីបំភ្លឺរបស់អ្នកនាំពាក្យរាជរដ្ឋាភិបាលដែលផ្សព្វផ្សាយកាលពីថ្ងៃសុក្របានព្រមានថា កម្ពុជានឹងដកបេក្ខភាពខ្លួនចេញពីអង្គការអន្តរជាតិមួយនេះ បើនៅតែមានការ «ឈ្លានពាន» ឬជ្រៀតជ្រែកធ្ងន់ធ្ងរណាមួយនេះបន្ថែមទៀត។
រាជរដ្ឋាភិបាលកម្ពុជាអះអាងថាខ្លួនមានបំណង និងទិសដៅដូចសហភាពអន្តរសភា (IPU) ក្នុង «ការលើកស្ទួយ និងពង្រីកវប្បធម៌សន្ទនា» ដែលនាំមុខ និងបានបង្កើតរួចហើយ «ប៉ុន្តែកិច្ចសន្ទនានយោបាយនេះ គ្មានវិសាលភាពស្ថិតនៅលើច្បាប់រដ្ឋនោះឡើយ»។
សេចក្ដីបំភ្លឺនេះបញ្ជាក់ថា៖ «កម្ពុជារក្សាសិទ្ធិពេញលេញ និងគ្រប់ពេលវេលាក្នុងកិច្ចដកបេក្ខភាពរបស់ខ្លួនចេញពីអង្គការអន្តរជាតិណាមួយនោះប្រសិនបើមានការឈ្លានពាន ឬការជ្រៀតជ្រែកធ្ងន់ធ្ងរណាមួយទៅលើដែនអធិបតេយ្យ និងផលប្រយោជន៍កម្ពុជាក៏ដូចប្រជាជាតិអធិបតេយ្យមួយចំនួនដែលបានប្រតិកម្មដកខ្លួនចេញពីអង្គការអន្តរជាតិមួយចំនួនដែលគេយល់ថា ប្រឆាំងឈ្លានពានលើដែនអធិបតេយ្យ និងផលប្រយោជន៍របស់គេ»។
បន្ថែមពីលើនេះលោក ផៃ ស៊ីផាន បានថ្លែងតាមរយៈការ Live ផ្ទាល់នៅលើទំព័រហ្វេសប៊ុករបស់លោកពីម្សិលមិញថាកម្ពុជានឹង «គ្មានការផ្លាស់ប្ដូរជំហរ» ណាមួយរបស់ខ្លួនឡើយ។
លោកថាកម្ពុជាគឺជា «រដ្ឋអធិបតេយ្យ» ដោយមិនឱ្យបរទេសណាមកលុកលុយលើច្បាប់របស់កម្ពុជាបានឡើយ។
លោកថ្លែងថា៖ «អាស្រ័យដោយការរំលាយគណបក្សសង្គ្រោះជាតិគឺមិនមានវិបត្តិនយោបាយទេ គឺទៅតាមអង្គហេតុ និងអង្គច្បាប់ សម្រេចដោយតុលាការ។ រាល់ការលើកឡើង ឬគំនាបណាមួយដែលឲ្យកម្ពុជា លុប ឬរំលោភ ឬរំលាយនូវសាលដីការបស់តុលាការកំពូល យើងមិនអាចធ្វើបាននោះទេ ពីព្រោះយើងយល់ឃើញថាកម្ពុជាកំពុងស្ថិតនៅក្នុងសភាពពង្រឹងនីតិរដ្ឋ»។
លោកសង្កត់ធ្ងន់ថា៖ «ខ្ញុំចង់ជម្រាបជូនថា គឺគ្មានការផ្លាស់ប្ដូរជំហររបស់រាជរដ្ឋាភិបាល ឬកម្ពុជាដើរចេញពីការអនុវត្ត ការប្រតិបត្តិរដ្ឋធម្មនុញ្ញរបស់ខ្លួន ឬការលក់ដូរ ឬការផ្តល់នូវអធិបតេយ្យ និងឯករាជ្យឲ្យបរទេសមកគ្រប់គ្រងកម្ពុជាទេ»។
យ៉ាងណាក្ដីលោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិយល់ថា ការព្រមានរបស់រដ្ឋាភិបាលកម្ពុជាគឺជារឿងគួរឲ្យអស់សំណើច ហើយលោកថា ប្រសិនបើកម្ពុជាហ៊ានដកបេក្ខភាពចេញពី IPU មែននោះនឹងធ្វើឲ្យខ្លួនឯងរងភាពឯកោ។
លោកបានថ្លែងថា៖ «ខ្ញុំបានឃើញលិខិតរបស់រាជរដ្ឋាភិបាលដែលបានចេញបំភ្លឺទៅ IPU ដែលជាការសម្រេចចិត្តចុងក្រោយដើម្បីព្រមានទៅ IPU។ វាជារឿងមួយដែលគួរឲ្យអស់សំណើច ព្រោះ IPU ជាអង្គការអន្តរជាតិមួយធំណាស់ដែលមានសមាជិកជាង ១៧០ ប្រទេស បែរជាយើងម្នាក់ឯងខុសគេ ហើយចេះតែចោទគេថា ជ្រៀតជ្រែកកិច្ចកាផ្ទៃក្នុង យករឿងអធិបតេយ្យភាព យករឿងឯករាជភាពដើម្បីជាលេសមិនឲ្យគេជំរុញយើងឲ្យអនុវត្តទៅតាមកិច្ចព្រមព្រៀងដែលយើងបានចុះជាមួយគេនោះ»។
លោកបានបន្តថា៖ «ខ្ញុំថា វាមិនមែនជារឿងល្អទេកាលណាយើងដកខ្លួនយើង គឺមានន័យថាយើងធ្វើឲ្យខ្លួនឯងឱ្យឯកោពីពិភពលោក ហើយនឹងបាត់បង់ប្រយោជន៍ច្រើនណាស់ដល់ប្រទេសជាតិ និងប្រជាពលរដ្ឋខ្មែរ»។
លោក Thomas Fitzsimons ប្រធានផ្នែកទំនាក់ទំនងនៃសហភាពអន្តរសភាមិនអាចទាក់ទងដើម្បីសុំការឆ្លើយតបបាននៅឡើយទេកាលពីម្សិលមិញ៕
