ព្រះសីហនុ: ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រីបានយល់ព្រមឲ្យក្រសួងចំនួន ៤ រៀបចំកែលម្អ និងពង្រីកបន្ថែមសមត្ថភាពស្ថានីយប្រព្រឹត្តកម្មទឹកកខ្វក់ និងដោះស្រាយសំរាម ប្រព័ន្ធលូទឹកស្អុយ និងទីលានសម្ងួតភក់ក្នុងក្រុងព្រះសីហនុ បន្ទាប់ពីស្ថាប័នទាំងនោះបានចុះពិនិត្យ និងសិក្សារួចរាល់។
តាមសេចក្ដីជូនដំណឹងរបស់ទីស្ដីការគណៈរដ្ឋមន្ត្រីដែលចុះហត្ថលេខាដោយលោក ឈិត សុខុន រដ្ឋលេខាធិការនៃទីស្ដីការគណៈរដ្ឋមន្ត្រីចុះថ្ងៃទី ៨ វិច្ឆិកា បានបង្ហាញថា ចំពោះករណីរបាយការណ៍ស្ដីពីលទ្ធផលនៃការចុះពិនិត្យ និងសិក្សា ដើម្បីរៀបចំកែលម្អស្ថានីយប្រព្រឹត្តិកម្មទឹកកខ្វក់ដំឡើងស្ថានីយបូមទឹកកខ្វក់ ដោះស្រាយសំរាមតាមឆ្នេរ និងតាមការដ្ឋានសំណង់កែលម្អប្រព័ន្ធលូ បណ្ដាញផ្លូវ និងគ្រប់គ្រងការដ្ឋានសំណង់ក្នុងក្រុងព្រះសីហនុ ខេត្តព្រះសីហនុ រាជរដ្ឋាភិបាលយល់ព្រមជាគោលការណ៍។
ក្នុងនោះមានដូចជា រៀបចំកែលម្អ និងពង្រីកបន្ថែមសមត្ថភាពស្ថានីយប្រព្រឹត្តកម្មទឹកកខ្វក់ និងទីលានសម្ងួតភក់ក្រុងព្រះសីហនុនៅលើផ្ទៃដីទំហំ ១៦ ហិកតា ដើម្បីបង្កើនសមត្ថភាពប្រព្រឹត្តកម្មទឹកកខ្វក់ពី ៥ ៧០០ ម៉ែត្រគុបក្នុងមួយថ្ងៃឲ្យកើនដល់ ២៥ ០០០ ម៉ែត្រគុបក្នុងមួយថ្ងៃដោយបំពាក់ប្រព័ន្ធម៉ាស៊ីនមេកានិកស្វ័យប្រវត្តិបន្ថែម។ ក្រសួងសាធារណៈការ និងដឹកជញ្ជូនទទួលធ្វើផែនការ និងអនុវត្តក្នុងរយៈពេលពី ៣ ទៅ ៥ ខែ។
បន្ថែមលើនេះគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា (ត.អ.ឆ.ក) ក្រសួងសាធារណៈការ និងដឹកជញ្ជូន និងអាជ្ញាធរខេត្ត រៀបចំស្ថានីយបូមបង្វែរទឹកកខ្វក់កុំឲ្យហូរចូលក្នុងសមុទ្រចំនួន ៤ ទីតាំង ដែលមានឆ្នេរឯករាជ្យ អូរសម្អាត ឆ្នេរសុខា និងឆ្នេរអូរឈើទាល ដើម្បីបូមបង្វែរទឹកកខ្វក់ទាំងអស់ពីទីតាំងទាំងនេះបញ្ជូនទៅស្ថានីយប្រព្រឹត្តកម្មទឹកកខ្វក់ ដោយមិនឲ្យហូរចូលសមុទ្រវិញឡើយ។
សេចក្ដីជូនដំណឹងបន្តថា គ្រប់សណ្ឋាគារ ភោជនីយដ្ឋាន និងសំណង់ទាំងអស់ ត្រូវរៀបចំឲ្យមានអាងប្រព្រឹត្តកម្មទឹកកខ្វក់មុននឹងបង្ហូរចូលទៅលូសាធារណៈ។ រាល់ការដ្ឋានសំណង់អគារគ្រប់ប្រភេទត្រូវធ្វើរបងហ៊ុំព័ទ្ធការដ្ឋានយ៉ាងតិច ២ ម៉ែត្រ ដោយរៀបចំជើងរបងអំពីបេតុងកម្ពស់យ៉ាងតិច ៨០ សង់ទីម៉ែត្រ ដើម្បីកុំឲ្យដីសំណល់រឹង និងរាវ ហៀរចេញពីការដ្ឋានទៅលើផ្លូវ ចិញ្ចើមផ្លូវ ដីចំណីឆ្នេរ ឆ្នេរសមុទ្រ ព្រែក អូរ បឹង និងទីសាធារណៈ ក្នងគោលដៅធានាសុវត្ថិភាព សណ្ដាប់ធ្នាប់ អនាម័យ សោភ័ណភាព និងបរិស្ថាន។
លោក ឱ សារឿន អ្នកនាំពាក្យសាលាខេត្ដ និងជាប្រធានមន្ទីរព័ត៌មានខេត្តព្រះសីហនុបានថ្លែងថា លោកសាទរចំពោះការសម្រេចចិត្តរបស់រដ្ឋាភិបាលនេះ ព្រោះបច្ចុប្បន្ននៅខេត្តព្រះសីហនុកំពុងជួបបញ្ហាប្រព័ន្ធលូតូចចង្អៀត និងកន្លែងខ្លះមានការខូចខាត។ នៅពេលភ្លៀងធ្លាក់ម្ដងៗ ទឹកភ្លៀងហូរពីលើភ្នំ បូករួមទាំងពលរដ្ឋមួយចំនួនបោះចោលសំរាមនៅទីសាធារណៈ បណ្ដាលឲ្យកក់ស្ទះ និងបង្កភាពកខ្វក់នៅក្នុងទីក្រុង។
លោកបញ្ជាក់ថា៖ «កន្លងមកយើងមានស្ថានីយចម្រោះទឹកស្អាតមួយហើយ ប៉ុន្ដែវាមិនអាចផ្គត់ផ្គង់តម្រូវការនៅក្នុងទីក្រុងទាំងមូលបានទេ បើពីមុនយើងគិតវាអាចទប់ទល់បាន ហើយឥឡូវដោយសារកំណើនពលរដ្ឋទៅរស់នៅទីនោះច្រើន តែពេលនេះមិនអាចទប់ទល់បានទេ។ ដូច្នេះត្រូវតែពង្រីកបន្ថែមទៀត»។
លោក វ៉ាស៊ីម សុរិយា អ្នកនាំពាក្យក្រសួងសាធារណៈការ និងដឹកជញ្ជូនបានថ្លែងកាលពីម្សិលមិញថា នេះជាដំណឹងល្អសម្រាប់ក្រុមការងារពាក់ព័ន្ធ ព្រោះការសម្រេចនេះអាចជួយពង្រឹងប្រសិទ្ធភាពការងារបន្ថែម ប៉ុន្ដែការងារដែលត្រូវធ្វើនៅខេត្តព្រះសីហនុត្រូវបានភាគីស្ថាប័នបែងចែកតាមតួនាទីរៀងៗខ្លួនរួចរាល់ហើយ។
លោកបញ្ជាក់ថា៖ «ការពិតយើងមានយន្តការស្រាប់អស់ហើយ ប៉ុន្ដែគ្រាន់ថា សេចក្ដីជូនដំណឹងហ្នឹងនឹងជួយពង្រឹងប្រសិទ្ធភាពការងារ ព្រោះយើងត្រូវធ្វើការជាអន្តរក្រសួង។ ជាក់ស្ដែងគឺខាងក្រសួងបរិស្ថានគេមានយន្តការ និងយុទ្ធសាស្ត្ររបស់គេ ក្រសួងសាធារណការ និងដឹកជញ្ជូនក៏មានស្រាប់ និងខាងខេត្តក៏គេមានយន្តការគេដែរ អ៊ីចឹងនេះគ្រាន់តែពង្រឹងប្រសិទ្ធភាពការងារទេ»៕