.jpg)
ការប្រារព្ធទិវាវប្បធម៌ជាតិនៅសាលសន្និបាត និងពិព័រណ៍កោះពេជ្រកាលពីឆ្នាំមុន។ រូប SPM
ភ្នំពេញៈ រាជរដ្ឋាភិបាលប្រកាសរៀបចំទិវាវប្បធម៌ជាតិ ៣ មីនា លើកទី២៣ ឆ្នាំ ២០២១ ដោយរក្សាប្រធានបទដដែលដូចឆ្នាំ ២០២០ គឺ «យុវជនដើម្បីវប្បធម៌ជាតិ» ខណៈព្រឹត្តិការណ៍ធំៗមួយចំនួនទាក់ទងនឹងទិវានេះត្រូវបានលុបចោលដើម្បីការពារក្នុងបរិបទនៃការរីករាលដាលជំងឺកូវីដ ១៩។
សារាចរស្តីពីការរៀបចំទិវាវប្បធម៌ជាតិ ៣ មីនា លើកទី២៣ ឆ្នាំ ២០២១ របស់រដ្ឋាភិបាលដែលចុះហត្ថលេខាដោយនាយករដ្ឋមន្ត្រី លោក ហ៊ុន សែន បានឱ្យដឹងថា ទិវាវប្បធម៌ជាតិ គឺជាទិវាមួយដែលកម្ពុជាបានបង្កើត និងប្រារព្ធធ្វើឡើងជារៀងរាល់ឆ្នាំក្នុងបំណងរំឭកដល់គុណូបការៈចំពោះបុព្វបុរស ដែលបានបន្សល់ទុកនូវមរតកវប្បធម៌ដ៏សម្បូរបែបដែលមិនអាចកាត់ថ្លៃបានសម្រាប់កូនចៅជំនាន់ក្រោយ។
សារាចរដដែលបានបន្តថា ការប្រារព្ធទិវានេះក៏ដើម្បីបំផុសនូវស្មារតីស្រឡាញ់វប្បធម៌ ទំនៀមទម្លាប់ ប្រពៃណីជាតិពីសំណាក់ប្រជាពលរដ្ឋ ជាពិសេសយុវជនបន្តវេនដែលមានកាតព្វកិច្ចចូលរួមថែរក្សាការពារនូវសម្បត្តិវប្បធម៌ជាតិ និងវប្បធម៌ចម្រុះនៃសហគមន៍ជនជាតិដើមក្នុងប្រទេសឱ្យបានគង់វង្ស។
សារាចរបានបញ្ជាក់ថា «វប្បធម៌គឺជាព្រលឹងជាអត្តសញ្ញាណជាតិ និងជាស៊ីម៉ងត៍រស់សម្រាប់ភ្ជាប់ទំនាក់ទំនងពីបុគ្គលម្នាក់ទៅបុគ្គលម្នាក់ពីសហគមន៍ ១ ទៅសហគមន៍ ១ ពីប្រទេស ១ ទៅប្រទេស ១ ដែលជាមធ្យោបាយនាំមកនូវសាមគ្គី សន្តិភាព និងសុខដុមសម្រាប់ប្រជាជាតិទាំងមូល ស្របតាមទិសស្លោក «កម្ពុជា៖ ព្រះរាជាណាចក្រនៃវប្បធម៌» ទើបរដ្ឋាភិបាលសម្រេចឱ្យរៀបចំទិវាវប្បធម៌ជាតិ ៣ មីនា លើកទី ២៣ ឆ្នាំ ២០២១ ដោយរក្សានូវប្រធានបទដូចឆ្នាំ ២០២០»។
លោកនាយករដ្ឋមន្ត្រី ហ៊ុន សែន បានលើកឡើងក្នុងលិខិតថា ដើម្បីឱ្យការប្រារព្ធទិវាវប្បធម៌ជាតិ ៣ មីនានេះ ប្រព្រឹត្តទៅដោយជោគជ័យក្នុងបរិបទនៃការរីករាលដាលជំងឺកូវីដ១៩នេះ ក្រសួងវប្បធម៌ និងវិចិត្រសិល្បៈត្រូវសហការជាមួយបណ្តាក្រសួង ស្ថាប័ន អាជ្ញាធរដែនដី បណ្តាអង្គការជាតិ អន្តរជាតិ សមាគម និងវិស័យឯកជនដែលប្រព្រឹត្តលើវិស័យវប្បធម៌ ដើម្បីរួមគ្នាផ្សព្វផ្សាយឱ្យបានទូលំទូលាយ។
លោកបានបញ្ជាក់ថា៖ «គ្រប់លំនៅឋាន គ្រប់ក្រសួង ស្ថាប័ន អាជ្ញាធរដែនដី សាលារៀន សហគ្រាសរដ្ឋ និងឯកជនត្រូវលើកទង់ជាតិ ទង់ជ្វាលា បដាពាក្យស្លោក និងបិទផ្សាយអាវីស តាមដងផ្លូវសាធារណៈតាមអង្គភាព និងលំនៅឋានរបស់ខ្លួនឱ្យបានព្រមៗគ្នាចាប់ពីថ្ងៃទី ១ ដល់ថ្ងៃទី ៩ មីនា ឆ្នាំ ២០២១។ ការចូលរួមសកម្មភាពផ្សព្វផ្សាយដែលពាក់ព័ន្ធនឹងព្រឹត្តិការណ៍ទិវាវប្បធម៌ជាតិ ត្រូវស្លៀកពាក់តាមបែបប្រពៃណី»។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈបានប្រាប់ ភ្នំពេញ ប៉ុស្តិ៍ កាលពីថ្ងៃទី ៨ កុម្ភៈថា ការរៀបចំទិវាវប្បធម៌គឺនៅតែធ្វើក្នុងទ្រង់ទ្រាយតូចៗ និងតាមរយៈការផ្សព្វផ្សាយរំលេចនូវវប្បធម៌ជាតិខ្មែរ។ ប៉ុន្តែលោកថា ចំពោះព្រឹត្តិការណ៍ធំៗមួយចំនួនដែលធ្លាប់បានរៀបចំកាលពីពេលកន្លងមក គឺត្រូវបានផ្អាកការរៀបចំ ព្រោះតែបញ្ហាវិបត្តិកូវីដ ១៩។
លោកថា៖ «ជារៀងរាល់ឆ្នាំមហោស្រពយុវជន ដែលយើងឱ្យតាមវិទ្យាល័យ ឬមហាវិទ្យាល័យ ប្រកួតប្រជែងបង្ហាញស្នាដៃ ទទួលរង្វាន់នៃទិវាវប្បធម៌ ក៏ដូចជាមានការប្រឡងសំណួរចម្លើយអីជាដើម ដើម្បីអបអរសាទរ គឺកិច្ចការងារនេះយើងផ្អាកសិន»។
ក្រៅពីនេះ លោក ឡុង ប៉ុណ្ណាស៊ីរីវត្ថ បានថ្លែងថា តាមការសង្កេតគឺយុវជនកម្ពុជាបានយកចិត្តទុកដាក់ពីតម្លៃវប្បធម៌ច្រើនជាងពី ១០ ឆ្នាំមុន ដោយពួកគេបានចូលរួមជួយលើកតម្កើង និងផ្សព្វផ្សាយផងដែរ។ ដូច្នេះ លោករំពឹងថា តាមរយៈការរៀបចំទិវាវប្បធម៌ជាតិរៀងរាល់ឆ្នាំនឹងធ្វើឱ្យកូនខ្មែរជំនាន់ក្រោយកាន់តែយល់ដឹងច្រើនអំពី ទំនៀមទម្លាប់ ប្រពៃណីជាតិ អក្សរសាស្ត្រ៕
