.jpg)
រដ្ឋាភិបាលសម្រេចគិតថ្លៃសេវាពីជនបរទេស ពាក់ព័ន្ធការពិនិត្យព្យាបាលជំងឺកូវីដ ដែលសេវានីមួយៗមានតម្លៃចន្លោះពី ៥ ដុល្លារ ដល់ ១០០ ដុល្លារ ឬច្រើនជាងនេះ។ Cambodia Airports
ភ្នំពេញៈ រាជរដ្ឋាភិបាលកម្ពុជាបានសម្រេចគិតថ្លៃសេវាពីជនបរទេសពាក់ព័ន្ធនឹងការពិនិត្យធ្វើតេស្តរកមេរោគកូរ៉ូណា ការធ្វើចត្តាឡីស័ក និងការព្យាបាលនៅមន្ទីរពេទ្យរបស់រដ្ឋទូទាំងប្រទេសដែលសេវានីមួយៗមានតម្លៃចន្លោះពី ៥ ដុល្លារ ដល់ ១០០ ដុល្លារ ឬច្រើនជាងនេះ។
លិខិតចេញដោយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ផ្ញើទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាលចុះថ្ងៃទី ៨ ខែមិថុនា ឲ្យដឹងថាក្រសួងបានពិនិត្យ និងឯកភាពជាគោលការណ៍ឲ្យកំណត់ថ្លៃសេវាពីអ្នកដំណើរជាជនជាតិបរទេសចូលមកប្រទេសកម្ពុជា ក្នុងអំឡុងពេលអនុវត្តវិធានការសុខាភិបាលដើម្បីទប់ស្កាត់ និងឆ្លើយតបការឆ្លងរាលដាលនៃជំងឺកូវីដ ១៩។
តាមលិខិតរបស់ក្រសួងសេដ្ឋកិច្ចបានឲ្យដឹងថា សម្រាប់អ្នកដំណើរជនបរទេសចូលមកកម្ពុជាក្នុងអំឡុងពេលរង់ចាំយកសំណាកវិភាគរហូតដល់ការចេញជាលទ្ធផលគឺត្រូវចំណាយចន្លោះពី ១៦០ ដុល្លារ ឬច្រើនជាងនេះ សម្រាប់មនុស្សម្នាក់ទៅលើសេវាដឹកជញ្ចូនសំណាក សេវាធ្វើតេស្ត និងកន្លែងស្នាក់នៅអាហារហូបចុក។ ចំណែកករណីដែលអ្នកដំណើរជាជនបរទេស ដែលរួមដំណើរជាមួយអ្នក-ដំណើរដែលមានលទ្ធផលវិជ្ជមានជំងឺកូវីដ ១៩ ហើយតម្រូវឲ្យធ្វើចត្តាឡីស័ក ១៤ ថ្ងៃ នៅសណ្ឋាគារ ឬតាមមណ្ឌលណាមួយនោះគឺត្រូវចំណាយចន្លោះពី ១៨០ ដុល្លារ ឬច្រើនជាងនេះសម្រាប់មនុស្សម្នាក់ ក្នុងការទទួលបានសេវាម្តង។
សម្រាប់ការបង់ថ្លៃសេវាក្នុងការពិនិត្យ និងព្យាបាលអ្នកជំងឺកូវីដ ១៩ ជាជនបរទេស ក្រសួងសេដ្ឋកិច្ចបានបញ្ជាក់ថា តម្លៃសេវាមានចន្លោះពី ៥ ដុល្លារ ទៅដល់ ១០០ ដុល្លារ ឬច្រើនជាងនេះទៅតាមសេវាដែលអ្នកជំងឺបានទទួល ដូចជាការធ្វើតេស្ត ការសម្រាកព្យាបាល សេវាសង្គ្រោះបន្ទាន់ ករណីព្យាបាលជំងឺប្រចាំកាយ ហើយបើស្លាប់គឺតម្លៃ ១ ៥០០ ដុល្លារ ខណៈការចេញលិខិតបញ្ជាក់សុខភាពមានតម្លៃ ៣០ ដុល្លារ។
លោក អូន ព័ន្ធមុនីរ័ត្ន បានលើកឡើងនៅក្នុងលិខិតនោះថាការចំណាយរបស់អ្នកដំណើរជាជនបរទេសចូលមកប្រទេសកម្ពុជាត្រូវទូទាត់ជូនទៅអ្នកផ្តល់សេវាតាមគោលដៅតាមទំហំចំណាយជាក់ស្តែង និងស្របតាមគោលការណ៍តម្លៃដូចមានកំណត់ខាងលើ។
លោកបញ្ជាក់ថា៖ «ក្រសួងសុខាភិបាលគួរពិភាក្សាជាមួយក្រសួងស្ថាប័នពាក់ព័ន្ធ ដើម្បីអនុញ្ញាតឱ្យធនាគារមានបញ្ជរនៅស្ថានីយមកដល់ និងស្ថានីយចេញដំណើរដើម្បីឱ្យអ្នកដំណើរអាចតម្កល់ប្រាក់ដោយប្តូរយក Debit Card សម្រាប់ប្រើប្រាស់ទូទាត់ចំណាយ និងដកប្រាក់នៅសល់យកវិញ ស្របតាមស្មារតីនៃកិច្ចប្រជុំអន្តរក្រសួងកម្រិតបច្ចេកទេសកាលពីថ្ងៃទី ២៧ និងទី ២៨ ខែ ឧសភា ឆ្នាំ ២០២០»។
លោកបន្តថា ចំពោះការព្យាបាលអ្នកជំងឺកូវីដ ១៩ នៅមន្ទីរពេទ្យរដ្ឋ ក្រសួងសុខាភិបាលគួរតម្រូវឱ្យអ្នកដំណើរទិញសេវាធានារ៉ាប់រងក្នុងស្រុក ដើម្បីសម្រួលដល់ការទូទាត់។ ទន្ទឹមនឹងនេះគួរពិនិត្យអនុញ្ញាតឱ្យក្រុមហ៊ុនធានារ៉ាប់រងលក់បណ្ណសន្យារ៉ាប់រងជាមួយបញ្ជររបស់ធនាគារនៅតាមច្រកទ្វារអន្តរជាតិក្នុងស្ថានីយមកដល់របស់អ្នកដំណើរ ពេលអ្នកដំណើរមកដល់។
លោកបន្ថែមថាចំពោះការដាក់ឱ្យមានប្រព័ន្ធអនឡាញ ដើម្បីលើកកម្ពស់ប្រសិទ្ធភាពប្រតិបត្តិការក៏គួរតែត្រូវបានរៀបចំឱ្យបានឆាប់រហ័សតាមដែលអាចធ្វើបាន សម្រាប់ឱ្យអ្នកដំណើរអាចបង់ប្រាក់តម្កល់ និងដកប្រាក់នៅសល់វិញព្រមទាំងទិញផលិតផលធានារ៉ាប់រងជំងឺកូវីដ ១៩ ក្នុងគោលដៅសម្រួលដល់អ្នកធ្វើដំណើរចេញចូលប្រទេសកម្ពុជាហើយការផ្តល់សេវាពីអង្គភាពរដ្ឋត្រូវធានាពីគុណតម្លៃ និងគុណប្រយោជន៍របស់ខ្លួន។
លោក ម៉ម ប៊ុនហេង បានប្រាប់ភ្នំពេញប៉ុស្តិ៍កាលពីថ្ងៃពុធម្សិលមិញថាចំពោះសំណើរបស់ក្រសួងសេដ្ឋកិច្ចទាំងអស់គឺក្រសួងសុខាភិបាលបានយកមកពិចារណា ហើយក៏មានសំណើខ្លះត្រូវបានសម្រេចយល់ព្រមផងដែរ។
លោកបានបញ្ជាក់ថា៖ «យើងកំពុងតែរៀបចំ ហើយដាក់បញ្ជរធនាគារនៅតាមស្ថានីយមកដល់ និងស្ថានីយចេញដំណើរក្នុងព្រលានយន្តហោះដើម្បីបង្កភាពងាយស្រួល ហើយយើងកំពុងឲ្យប្រព័ន្ធធនាគារនេះចាត់ចែងកិច្ចការនេះ ហើយក្នុងនោះមានធនាគារអេស៊ីលីដា និងធនាគារកាណាឌីយ៉ាណានឹងដំណើរការក្នុងអំឡុងពេលឆាប់ៗនេះ»។
បើតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ១០ ខែមិថុនា ក្រសួងបានព្យាបាលជាសះស្បើយអ្នកជំងឺកូវីដ១៩ម្នាក់ទៀតធ្វើឲ្យអ្នកជំងឺដែលមិនទាន់ជាសះស្បើយនៅសល់តែម្នាក់ទៀតប៉ុណ្ណោះ និងមិនមានករណីវិជ្ជមានជំងឺកូវីដ១៩ថ្មីទៀតឡើយ ខណៈអ្នកឆ្លងសរុបនៅទូទាំងប្រទេសមានចំនួន ១២៦ នាក់៕
វីដេអូ៖
