ខេត្តរតនគិរីៈ តំបន់បឹងយ៉ាកអោមយ៉ាកការ៉ា ដែលមានទីតាំងស្ថិតនៅក្នុងភូមិសាស្ត្រ ឃុំសេដា ស្រុកលំផាត់មានផ្ទៃដីទំហំ ១៣២,០៥ ហិកតាត្រូវបានប្រមុខរាជរដ្ឋាភិបាលសម្រេចបង្កើតជាតំបន់ការពារទេសភាពដែលស្ថិតក្រោមការគ្រប់គ្រងរបស់ក្រសួងបរិស្ថាន។ នេះបើយោងអនុក្រឹត្យចុះថ្ងៃទី ២៦ ខែកុម្ភៈ ឆ្នាំ ២០២០។
អនុក្រឹត្យថ្មីស្ដីពីការបង្កើតតំបន់ការពារទេសភាពបឹងយ៉ាកអោម យ៉ាកការ៉ា នេះ ធ្វើឡើងក្នុងគោលបំណង ដើម្បីធានាការថែរក្សា និងការពារសោភណភាពធម្មជាតិ ប្រព័ន្ធអេកូឡូស៊ី សារព័ន្ធមជ្ឈដ្ឋានធម្មជាតិ សត្វព្រៃ រុក្ខជាតិ និងការអភិវឌ្ឍវប្បធម៌ ប្រពៃណី ដ៏មានសារៈសំខាន់របស់សហគមន៍មូលដ្ឋាន។
ជាពិសេស ដើម្បីការពារលំនឹងបរិស្ថានតាមរយៈការបង្កើនតួនាទីប្រព័ន្ធអេកូឡូស៊ីក្នុងតំបន់ការពារធម្មជាតិ រួមចំណែកកាត់បន្ថយការប្រែប្រួលអាកាសធាតុ និងហានិភ័យគ្រោះមហន្តរាយធម្មជាតិសម្រាប់ជាផលប្រយោជន៍ដល់សង្គមជាតិគ្រប់ជំនាន់។
អនុក្រឹត្យនេះបានប្រគល់សមត្ថកិច្ចនៃការគ្រប់គ្រង និងការទទួលខុសត្រូវទៅឲ្យក្រសួងបរិស្ថានជាអ្នករៀបចំយន្តការនៃការគ្រប់គ្រង តំបន់ការពារទេសភាពបឹងយ៉ាកអោមយ៉ាកការ៉ា ដោយមានកិច្ចសហការជាមួយក្រសួង ស្ថាប័នពាក់ព័ន្ធ ពិសេសរដ្ឋបាលខេត្តរតនគិរី និងកងកម្លាំងសមត្ថកិច្ចប្រដាប់អាវុធទាំង ៣ ប្រភេទ ដើម្បីធានាដល់កិច្ចគាំពារបរិស្ថាន ការអភិរក្សជីវចម្រុះ និងការប្រើប្រាស់ធនធានធម្មជាតិ ប្រកបដោយនិរន្តរភាពស្របតាមបទប្បញ្ញត្តិនៃច្បាប់ជាធរមាន។
តាមរយៈអនុក្រឹត្យនេះ សហគមន៍មូលដ្ឋានប្រជាពលរដ្ឋដែលរស់នៅក្បែរ និងជុំវិញតំបន់ការពារទេសភាពបឹងយ៉ាកអោម យ៉ាកការ៉ា នឹងទទួលបានជីវភាពរស់នៅកាន់តែល្អប្រសើរឡើងផងដែរ តាមរយៈការបង្កើតមុខរបរផ្សេងៗ ដែលពាក់ព័ន្ធទៅនឹងការផ្ដល់សេវាកម្មទេសចរណ៍វប្បធម៌ធម្មជាតិ។
ប្រជាសហគមន៍ជនជាតិភាគតិចទំពួនក្នុងឃុំសេដា ស្រុកលំផាត់ លោក ខាំ នីនកាលពីម្សិលមិញបានសម្ដែងក្តីរីករាយយ៉ាងខ្លាំង ដោយ «សង្ឃឹមថា តាមរយៈអនុក្រឹត្យនេះព្រៃឈើ និងសត្វព្រៃរួមទាំងជីវចម្រុះផ្សេងទៀតក្នុងស្រុក [លំផាត់] របស់យើងនឹងត្រូវបានការពារ និងអភិរក្សកាន់តែមានប្រសិទ្ធភាពថែមទៀត»។
លោក កែន សេរីរដ្ឋា ប្រធានអង្គការ WCS (Cambodia) កាលពីម្សិលមិញ បានសម្ដែងការសាទរចំពោះអនុក្រឹត្យនេះដោយថ្លែងថា តំបន់នេះមានសក្ដានុពលខ្លាំងលើវិស័យអេកូទេសចរណ៍ និង វប្បធម៌ ហើយវាក៏ជាផ្នែកមួយនៃរបៀងជីវចម្រុះនៃតំបន់ដែនជម្រកសត្វព្រៃលំផាត់ផងដែរ។
ទន្ទឹមនឹងនេះលោក សេរីរដ្ឋា ក៏បានបង្ហាញនូវក្ដីព្រួយកង្វល់ផងដែរ អំពីយន្តការ និងប្រសិទ្ធភាពការងាររបស់មន្ត្រីឧទ្យានុរក្សក្នុងការការពារ អភិរក្ស និងការគ្រប់គ្រងតំបន់ការពារទេសភាពថ្មីមួយនេះ ខណៈដែលបច្ចុប្បន្នចំនួននៃមន្ត្រីឧទ្យានុរក្សគឺនៅមានកម្រិតនៅឡើយ។
លោកបានថ្លែងថា៖ «យើងស្វាគមន៍ចំពោះការបង្កើតតំបន់ការពារទេសភាពបឹងយ៉ាកអោម យ៉ាកការ៉ា នេះព្រោះតំបន់នេះមានភូមិសាស្ត្រជាប់ទៅនឹងតំបន់ដែនជម្រកសត្វព្រៃលំផាត់ ដែលវានឹងក្លាយជាតំបន់រណប ឬរបៀងជីវចម្រុះនៃតំបន់ដែនជម្រកសត្វព្រៃលំផាត់ ប៉ុន្តែអ្វីដែលយើងកំពុងមានក្ដីព្រួយបារម្ភនៅពេលនេះគឺប្រសិទ្ធភាពការងាររបស់មន្ត្រីឧទ្យានុរក្សដែលនៅពេលនេះមានចំនួនតិចនៅឡើយហើយកញ្ចប់ថវិកាសម្រាប់ការចុះល្បាតត្រួតពិនិត្យបទល្មើសទៀតសោតនៅមានកម្រិត»។
លោក សាន់ សានី អនុប្រធានមន្ទីរបរិស្ថានខេត្តរតនគិរីបានប្រាប់ភ្នំពេញប៉ុស្តិ៍កាលពីម្សិលមិញថា នៅចំពោះមុខនេះខាងមន្ទីរបរិស្ថានរបស់លោកបានតម្រូវឲ្យខាងមន្ត្រីឧទ្យានុរក្សដែនជម្រកសត្វព្រៃលំផាត់ជាអ្នកទទួលខុសត្រូវ ក្នុងការគ្រប់គ្រង និងការពារ អភិរក្ស តំបន់ការពារទេសភាពបឹងយ៉ាកអោម យ៉ាកការ៉ានេះជាបណ្ដោះអាសន្ន៕