.jpg)
រដ្ឋាភិបាលសម្រេចបើកសាលាឲ្យសិស្សថ្នាក់ទី ៩ និងទី ១២ ចូលរៀនខែក្រោយ ដើម្បីត្រៀមប្រឡងខែធ្នូ ដោយស្ថិតក្នុងទ្រង់ទ្រាយតូចចំនួន ១៥ នាក់ក្នុង ១ ថ្នាក់។ រូបថត ភ្នំពេញ ប៉ុស្ដិ៍
ភ្នំពេញៈ រាជរដ្ឋាភិបាលកម្ពុជាតាមរយៈក្រសួងអប់រំ យុវជន និងកីឡាសម្រេចអនុញ្ញាតឱ្យគ្រឹះស្ថានសិក្សាសាធារណៈ ចូលរៀនក្នុងដំណាក់កាលទី ២ សម្រាប់ថ្នាក់ទី ៩ និងទី ១២ នៅអំឡុងខែក្រោយនេះ ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិនៅខែធ្នូ ឆ្នាំនេះ។ នេះបើតាមសេចក្ដីប្រកាសព័ត៌មានរបស់ក្រសួងអប់រំ យុវជន និងកីឡាចេញផ្សាយពីម្សិលមិញ។
សេចក្តីប្រកាសព័ត៌មានរបស់ក្រសួងអប់រំ យុវជន និងកីឡា ស្ដីពី «ការប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំសិក្សា ២០១៩-២០២០» នេះបានឱ្យដឹងថា លោកនាយករដ្ឋមន្ដ្រី ហ៊ុន សែន បានអនុញ្ញាតឱ្យសិស្សថ្នាក់ទី ៩ និងទី ១២ នៃគ្រឹះស្ថានសិក្សាសាធារណៈចូលរៀននៅក្នុងដំណាក់កាលទី ២ នៃការបើកដំណើរការគ្រឹះស្ថានសិក្សានៅអំឡុងខែកញ្ញា ឆ្នាំ ២០២០។ ការបើកឲ្យសិស្សចូលរៀនវិញនេះគឺស្ថិតក្នុងទ្រង់ទ្រាយតូចចំនួន ១៥ នាក់ក្នុង ១ ថ្នាក់ដោយគោរពតាមវិធានអនាម័យនៃក្រសួងសុខាភិបាល និងអង្គការសុខភាពពិភពលោក ដើម្បីត្រៀមចូលរួមការប្រឡង។
ក្រសួងអប់រំបានបញ្ជាក់ថា៖ «ក្នុងន័យនេះក្រសួងនឹងរៀបចំការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០១៩-២០២០ នៅខែធ្នូ ឆ្នាំ ២០២០ ខាងមុខ។ ចំពោះការរៀបចំការសិក្សានៅតាមគ្រឹះស្ថាន សិក្សាសាធារណៈសម្រាប់សិស្សថ្នាក់ដទៃទៀតក្រសួងនឹងរៀបចំសេចក្តីណែនាំតាមក្រោយ»។
ក្រសួងអប់រំបញ្ជាក់តាមសេចក្ដីប្រកាសនេះទៀតថា សមាគមគ្រឹះស្ថានឧត្តមសិក្សាកម្ពុជាដែលជាតំណាងគ្រឹះស្ថានសិក្សា ឯកជន បានស្ម័គ្រចិត្តពន្យារពេលការប្រឡងសញ្ញាបត្រមធ្យមសិក្សាទុតិយភូមិ ដើម្បីចូលរួមការប្រឡងជាមួយថ្នាក់ជាតិនៅខែធ្នូ ឆ្នាំ ២០២០ ជាមួយនឹងសិស្សគ្រឹះស្ថានសិក្សាសាធារណៈផងដែរ។
សមាគមគ្រឹះស្ថានឧត្តមសិក្សាកម្ពុជាកាលពីថ្ងៃអាទិត្យទី ៩ ខែសីហា ក៏បានចេញលិខិត ១ ច្បាប់ផ្ញើទៅលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាទាក់ទងនឹងករណីប្រឡងសញ្ញាបត្រមធ្យមសិក្សាទុតិយភូមិរបស់សមាជិកសមាគមខ្លួនផងដែរ។ ក្នុងនោះសមាគមបានបញ្ជាក់ថា សមាជិកសមាគមបានឯកភាពគ្នាប្ដូរការប្រឡងដែលគ្រោងនឹងរៀបចំប្រឡងនៅថ្ងៃទី ២៧-២៨ ខែសីហានេះទៅប្រឡងជាមួយការប្រឡងថ្នាក់ជាតិនៅខែធ្នូ ឆ្នាំ ២០២០ វិញ។
លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្ដមសិក្សាកម្ពុជាប្រាប់ភ្នំពេញប៉ុស្ដិ៍កាលពីម្សិលមិញថា សមាជិកសមាគមដែលមានគ្រឹះស្ថានសិក្សាឯកជនត្រូវរៀបចំការប្រឡងបាក់ឌុបសរុបប្រមាណ ៤០ គ្រឹះស្ថាន។ រីឯសិស្សដែលមានប្រមាណ ៤ ០០០ នាក់ ត្រូវប្រឡងបាក់ឌុបនោះក៏បានឯកភាពគ្នាលើកពេលប្រឡងបាក់ឌុបដែលគ្រោងប្រឡងនៅចុងខែសីហានេះដែរ ដោយរង់ចាំប្រឡងជាមួយគ្រឺះស្ថានសិក្សាសាធារណៈរបស់រដ្ឋនៅខែធ្នូខាងមុខទាំងអស់គ្នាវិញ។
លោក វ៉ាន់ដា បានថ្លែងថា៖ «ក្រោយកិច្ចប្រជុំជាមួយឯកឧត្ដមរដ្ឋមន្ដ្រីក្រសួងអប់រំលោកបញ្ជាក់ថា ក្រសួងអប់រំនឹងរៀបចំការប្រឡងសញ្ញាបត្រមធ្យមសិក្សាទុតិយភូមិនៅខែធ្នូខាងមុខ។ ដូច្នេះបើយើងរៀបចំការប្រឡងដោយខ្លួនឯងនៅចុងខែសីហា គឺសល់ពេលតែ ២ ខែទៀតប៉ុណ្ណោះដល់ការប្រឡងថ្នាក់ជាតិ។ វានៅពេលកៀកគ្នាមែនទែន ទើបយើងឯកភាពគ្នាសម្រេចលើកពេលទៅប្រឡងជាមួយថ្នាក់ជាតិតែម្ដង»។
លោក រស់ សុវាចា អ្នកនាំពាក្យ ក្រសួងអប់រំ យុវជន និងកីឡាបានបញ្ជាក់បន្ថែមកាលពីម្សិលមិញថា ទោះបីជាវិស័យអប់រំកម្ពុជាបានប្រឈមនឹងវិបត្ដិកូវីដ១៩ ដូចបណ្ដាប្រទេសក្នុងពិភពលោកក្តី ប៉ុន្ដែការប្រឡងបាក់ឌុប និងប្រព្រឹត្ដទៅដូចឆ្នាំកន្លងមកដែរ។
លោកសង្កត់ធ្ងន់ថា គឺត្រូវគោរពគោលការណ៍ ៤ ច្បាប់ យុត្តិធម៌ តម្លាភាព និងលទ្ធផលទទួលយកបាន។ លោកបញ្ជាក់ថា៖ «ក្រសួងអប់រំសូមអំពាវនាវឱ្យសិស្សថ្នាក់ទី៩និងទី១២នៃសាលាសាធារណៈចាប់ផ្ដើមចូលសិក្សាឡើងវិញនៅខែកញ្ញាខាងមុខ»។
លោក សុវាចា បញ្ជាក់ទៀតថា ក្រោយទទួលបានគោលការណ៍ពីប្រមុខរាជរដ្ឋាភិបាលបន្ថែមនៅពេលខាងមុខ ក្រសួងអប់រំនឹងចេញគោលការណ៍ណែនាំលម្អិតបន្ថែមចំពោះការចូលរៀនឡើងវិញក្នុងដំណាក់កាលទី ២ នេះ៕
