ភ្នំពេញៈ ទីស្តីការគណៈរដ្ឋមន្ត្រីសម្រេចនិរាករណ៍អនុក្រឹត្យនៃការកាត់ផ្ទៃបឹងតាមោកចំនួន ២ កន្លែង ដែលមានផ្ទៃដីប្រមាណ ៣០ ហិកតា ដែលជាថ្នូរសម្រាប់ការដោះដូរទីតាំងរបស់ក្រសួង និងស្ថាប័នមួយចំនួនជំនួសវិញនោះ បន្ទាប់ពីមានការបញ្ជាពីលោកនាយករដ្ឋមន្ត្រី ហ៊ុន សែន។
លិខិត ១ ច្បាប់ចុះថ្ងៃទី ៤ មករា ឆ្នាំ ២០២១ ដោយមានហត្ថលេខារបស់លោក ហ៊ីង ថូរ៉ាក់ស៊ី រដ្ឋលេខាធិការប្រចាំការទីស្តីការគណៈរដ្ឋមន្ត្រីបញ្ជាក់ថា រដ្ឋាភិបាលបានសម្រេចនិរាករណ៍លិខិតលេខ ៧៩០ ស្តីពីសំណើសុំគោលការណ៍អនុញ្ញាតកាត់ផ្ទៃ បឹងតាមោក (បឹងកប់ស្រូវ) ទំហំ ១៥ ហិកតា ស្ថិតនៅខណ្ឌព្រែកព្នៅ សម្រាប់សាងសង់អគារទីស្តីការក្រសួងអភិវឌ្ឍន៍ជនបទ និងអនុក្រឹត្យលេខ ១៣៨ ស្តីពីការកែសម្រួលផ្ទៃបឹងតាមោក ស្ថិតក្នុងរាជធានីភ្នំពេញ។
ជាមួយគ្នានេះរដ្ឋាភិបាលបានសម្រេចនិរាករណ៍លិខិតលេខ ៧៩១ ស្តីពីសំណើសុំកាត់ផ្ទៃបឹងតាមោកទំហំ ១៥ ហិកតា ស្ថិតនៅខណ្ឌព្រែកព្នៅ រាជធានីភ្នំពេញ ដើម្បីសាងសង់អគារគណៈកម្មាធិការជាតិគ្រប់គ្រងគ្រោះមហន្តរាយ អគារគណៈកម្មការសិទ្ធិមនុស្សកម្ពុជា និងអគារអាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះ ជនពិការដោយសារមីន និងអនុក្រឹត្យលេខ ១៣៩ ស្តីពីការកែសម្រួលផ្ទៃបឹងតាមោកស្ថិតក្នុងរាជធានីភ្នំពេញ។
លិខិតដដែលបញ្ជាក់ថា រដ្ឋាភិបាលក៏បានសម្រេចនិរាករណ៍លិខិតលេខ ៨៩៧ និងលិខិតលេខ ៨៣៤ ស្តីពីសំណើសុំការអនុញ្ញាតដោះដូរ និងផ្ទេរកម្មសិទ្ធិទីតាំងអគារទីស្តីការទាំងអស់ខាងលើនេះដោយការបញ្ឈប់ការផ្តល់សិទ្ធិឱ្យក្រុមហ៊ុន ធីភី ម៉ូរាល់គ្រុប ឯ.ក ជាថ្នូរនឹងការទទួលបានដីមួយចំនួន និងការសាងសង់អគារថ្មី ឃ្លាំង រួមជាមួយហេដ្ឋារចនាសម្ព័ន្ធនានារបស់អង្គភាពទាំងនោះ។
លោក ហ៊ីង ថូរ៉ាក់ស៊ី បានឱ្យដឹង ក្នុងលិខិតដែរថា ជាមួយនឹងការនិរាករណ៍នេះរដ្ឋាភិបាលបានសម្រេចប្រគល់អគារទីស្តីការក្រសួងរៀបចំដែនដី នគរូបនីយកម្ម និងសំណង់បច្ចុប្បន្នជូនក្រសួងអភិវឌ្ឍន៍ជនបទ ហើយបានប្រគល់អគារទីស្តីការក្រសួងអភិវឌ្ឍន៍ ជនបទបច្ចុប្បន្ននេះទៅឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ។
លោកបន្ថែមថា៖ «រដ្ឋាភិបាលប្រគល់ទីតាំងទីស្តីការក្រសួងរ៉ែ និងថាមពលបច្ចុប្បន្នជូនគណៈកម្មាធិការជាតិគ្រប់គ្រងគ្រោះមហន្តរាយ អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្គ្រោះជនពិការដោយសារមីន និងគណៈកម្មាធិការសិទ្ធិមនុស្សកម្ពុជា»។
លោកស្រី ចក់ សុភាព នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា CCHR បានសរសេរនៅលើទំព័រហ្វេសប៊ុកពីម្សិលមិញថា ការនិរាករណ៍សេចក្តីសម្រេចដែលយកបឹងសម្បត្តិសាធារណៈនេះ គឺជាជំហានត្រឹមត្រូវ ដែលរដ្ឋាភិបាលមិនគួរឱ្យកើតឡើងតាំងពីដំបូងមកម្ល៉េះ។ ព្រោះរដ្ឋាភិបាល គឺជាអ្នកធានាថា ផ្ទៃបឹងនេះគួរជាសម្បត្តិសាធារណៈរបស់រដ្ឋ និងមិនអាចលុបបានទេ។ លោកស្រីបន្តថា ការលុបផ្ទៃបឹងធម្មជាតិ និងជាផ្ទៃបឹងសាធារណៈនេះគឺនឹងមានគ្រោះថ្នាក់ដែលរដ្ឋាភិបាលគួរពិនិត្យបន្ថែមទៀតលើការអនុបយោគ និងការផ្ទេរកម្មសិទ្ធិដទៃទៀតក្នុងតំបន់បឹងតាមោកផងដែរ។
លោកស្រី ចក់ សុភាព បញ្ជាក់ថា៖ «ទាំងស្ថាប័នរដ្ឋ និងឯកជនដែលទទួលបានផលប្រយោជន៍ពីតំបន់នេះ គួរមានការទទួលខុសត្រូវ និងធានាថា ធុរកិច្ចរបស់ខ្លួននឹងមិនប៉ះពាល់ដល់សង្គម និងបរិស្ថាន»។
លោកស្រីបន្ថែមថា៖ «រដ្ឋាភិបាលគួរបង្ហាញពីការវាយតម្លៃផលប៉ះពាល់ និងមូលហេតុនៃការកាត់ផ្ទៃដីបឹងជាបន្តបន្ទាប់ដល់សាធារណជនឱ្យបានយល់ និងជ្រាបពីការសម្រេចចិត្តទាំងឡាយកន្លងមក។ ជាពិសេសត្រូវបង្ហាញថា តំបន់ដែលជាសម្បត្តិសាធារណៈនោះបាត់បង់នូវតម្លៃផលប្រយោជន៍សាធារណៈទៀតហើយបើតាមលក្ខខណ្ឌនៃការបំប្លែងទៅជាសម្បត្តិឯកជនរបស់រដ្ឋវិញ»។
បឹងតាមោក គឺជាបឹងធំមួយនៅភ្នំពេញដែលមានផ្ទៃក្រឡាជាង ៣ ០០០ ហិកតា។ ក្នុងរយៈពេលចុងក្រោយនេះត្រូវបានរដ្ឋាភិបាលសម្រេចកាត់ផ្ទៃបឹងនេះជាច្រើនរយហិកតា ដើម្បីប្រគល់ជូនទៅសាលារាជធានីភ្នំពេញធ្វើជាសួនច្បារ ឧទ្យានធម្មជាតិសាធារណៈ អគ្គស្នងការដ្ឋាននគរបាលជាតិ និងអគារការិយាល័យរបស់ក្រសួងនានាជាច្រើន។
លោក ឯក ថា អ្នកនាំពាក្យនៃទីស្តីការគណៈរដ្ឋមន្ត្រីបានប្រាប់ភ្នំពេញប៉ុស្តិ៍យ៉ាងខ្លីពីម្សិលមិញថា៖ «រាល់កិច្ចការអ្វីៗទាំងអស់ ដែលរដ្ឋាភិបាលសម្រេចធ្វើអ្វីមួយ គឺដើម្បីផលប្រយោជន៍ប្រជាជន និងប្រទេសកម្ពុជា។ ព្រោះរាជរដ្ឋាភិបាលបានកើតចេញពីការបោះឆ្នោតដោយមានការគាំទ្រដ៏ច្រើនលើសលប់ពីប្រជាជនកម្ពុជា»៕
វីដេអូ៖